MALSAWMSANGI-2
MALSAWMSANGI-2
Ziaktu: Cck Lalchhuanawmi
Sawmtei'n " pawngsual" tia a lo tawng chhuah leh takah chuan, Khuavang kal lai kawng an kian ta emaw tih turin ; a reh thuap ta mai a. A hnu deuhah erawh Sawmtei nu chuan a fanu chu kuah thlawpin a tah khum nasa ta mai a.
Engmah a hrilh loh vang chuan a hau mawlh mawlh pah a. Mahse, thil pakhat hriat ngai a la awm tlat. Sawmtei chunga thil thalo tak titu chu!
An zawt nawn leh a, Sawmtei nu pawhin a fanu chu zaidam takin a be thei ta a. Thuchiang engmah hre lo a, kut hial a lo thlak te chu inthiam lohnain a khat nghal a.
Sawmtei pawhin chutia tantu nei tawha a inhriat takah chuan,a chunga thil thalo tak titu sawichhuah tuma kà a'n ang chiah tihah chuan,Tu emaw , rúi chhe lutuk tia sawi tur ni chiah silo; harhfím kàk tia sawi tur pawh ni chuang silo, mit sen deuh, ding ngíl hleitheilo; mipa àw ngei mai hian,
" MALSAWMSANGI"
Chu thu lo chhuahna lam chu an hawi thap!
Chupa chu Sawmtei te nufa inkuah chiala thu sawp nuai hmaah tak chuan, àwn deuh duaih hian a va ding chawt a. " Malsawmsangi", tiin a ko leh. Sawmtei mak ti lutuk chuan ka ho hian a en reng ringawt.
A chhan chu,a hmél leh pianphung engkim chu atan chuan theihnghilh har tak tur a ni. A ngaihzàwngpa Lawmkima nena an awmdun lai chiang taka phàwktu anih miau avangin! Kha kha Armed Veng south-a an insawn atanga a vawikhat hmuhna mah ni se;a thalo lamin a ni tlat a, tunah a vawihnihna atana an inhmuh lehna lah chu buaina a chawk chhuak zual dawn emaw tih tur a ni.
Khúavang kawng an kian leh ta!
Pawn lama thenawm nu te thawm erawh arukin a tang nasa.
" Malsawmsangi, engvangin nge dàwt i sawi?, " Tia a zawhna chu mak tilo reng an awm lo. Sawmtei erawh a che chàng lo a, a hrilhhaiin mak a ti takzet.
" Engvangin nge i fà paina pa ka nih tih i sawi mai loh", a ti zawm leh zàt.
Sawmtei chu phàwk lutuk hian a meng bial kàwk a, hrilhhaina leh mak tihna; chiaina chuan a zui nghal. " Engmaw Vanneitluang i sawi kha, i thusàwi kha i chiang meuh maw? Nang rui thlé mai mai.....
Anih chuan Nang hi ni maw ka fanu lo sualtu chu, " Tiin Sawmtei nu thinrim lutuk insum zo lo leh chuan, ding zawtin a kutin a kawk sawk sawk mai a. Vanneitluanga erawh a nui deuh sûk thung.
Ni e, amah Vanneitluanga ngei mai a ni. Armed Veng South-a an " WANTED" kumtin thin. School kal tha mang lo, pawl sawm takngial pawh zir zo lo a, suahsual ràwngbawl; kum sawmpariat anih atanga lock- up ah zàn hun hman ching zeuh zeuh. Kum sawmhnihpalia upa, Sawmtei aia sàng tam pui lo; dàwldang,cher( cher chhe lutuk ni chuang leh si lo) tih hriat ngawih ngawih, thà ngah zet ni leh làwi si.
Zú a in nasat vanga a mit khúr thúk tak, lu buk deuh chhâp; zú a in loh pawha tawng duh lutuk tih tawh nàk laia, zú a in tawh phei chuan ngaihna awmlo ang chi.
Ngo deuh víng vêng ni thin kha, zú vangin a thú ta lutuk mah mah; dum lutuk tia sawi tur erawh ni chuang si lo.
Sawmtei nu chuan, " I va nui ngam zawk ve a, " A ti kharh kharh a. Vanneitluanga erawh a kut pahniha a kàwng ding lam leh vei lama nghatin, àwn deuh duaia ding chung leh mit meng dé sàwr sàwr, muang ban deuh hian, " Ka pi, i... fanu hi. kei hian ka sual lo".
" Nang harhfím lai nei lo hian engtin nge sual leh sual lo te i hriat ang a", tiin Sawmtei nu chuan Vanneitluanga chu a lo aukhúm nghék nghàl.
" Ka pi, mi pahnih inkara thil thleng chu mi pahnihte duhthu ngeiin a thleng thin", tia a'n sawi chuan Sawmtei chu a lo íp chawih nghal a. Vanneitluanga'n, " Malsawmsangi adik em?", tia a'n zawh leh chuan a ding lamah a thlé hawi sawk nghal.
" Vanneitluang", an hnung lam atangin a ni. Vanneitluanga nu leh pa an lo ding vàng tawh mai.
Tunah chuan chhungkaw hnih inkar thu hla a ni ta. Sawmtei te chhung leh Vanneitluanga chhungte chauh an ni ta a,zanlai pawh sawi theih a ni tawh lo; an inhmachhawn ta ràn mai. Sawmtei nge dik zawk ang a, Vanneitluanga zawk le???
CHHUNZAWM ZEL CHI A NI ANG EM?????
Comments
Post a Comment