MALSAWMSANGI-3

MALSAWMSANGI

MALSAWMSANGI-3

Ziaktu: Cck Lalchhuanawmi

         " Ka ei dawn lo ka tih chu", tih pahin dawhkana ei tur awm ho chu Sawmtei chuan a hnawl thla vek mai a. Chutah, pindanah tlan lutin na tak in pindan kawngkhar a khar ri thuai mai a; Vanneitluanga a phu zûk! 

             A hmai lukhamah phúmin a tap vak vak mai a. Zanin chu a lungchhiat a zual leh tlat, harhfim kàk lai nei lo a zú rim a nam reng thin vangin a thinrimna a thar leh; chu lohah zanlaiah " Rose" tia auchhuah a ching lehnghal! 

              Vanneitluangan chaw a ei luih tir thin vang erawhin tlem tlemin a ei ve mai thin bawk a, mahse; Sawmtei hna erawh tah nilena, achanga," Ka hua che ", tia Vanneitluanga aukhum nghék a ni leh mai. Engtiang chiaha Ramzotlanga awm nge an nih pawh chiang taka hriat mumal  a nei lo.,kar khat dawn lai chu an awm ve tawh a; Lunglei daih lehnghal! 

             Vanneitluanga, harhfim kàk lai pawh nei lo ina Lunglei a hruai thleng thei chu mak a ti zawk hial! Engtin nge in luah man pek tur a neih? In luah tur te hi engtin nge a hmuh theih zawk? Khami zan khan engtin nge an awm tih te, Vanneitluanga te nu leh pa an lo lan atang engthil nge thleng chhunzawm zel engmah hriat mumal a nei lo, a boin a bo ni ber, a â chhuih ni ber ang chu! 

                Chutih lai chuan Vanneitluanga chuan, Sawmtein hmun a tihhnawk ho chu a lo tifai mawlh mawlh a, " Ei duh loh paw'n khatia paih darh vek ngailo, ei duh kan awm reng laia; thinrim vang maia khatianga chet kher, " tiin a phun bul bul pah a. 

* * * * * * * 

            Khami zan khan, Vanneitluangan mawhphurhna a lak vek tur thuin a hrilh hlawm a. Sawmtei nu erawhin a ring ngamlo, a fanu hi a duh lo chung a sual lui a nih ngei a ring nghet tlat. Sawmtei a'n zawh leh lahin engmah sawi lo in a ngawi leh kàr tawh si.

            Vanneitluanga pa lahin ka in chhungah ka lo lawm thei lo ang che u a ti mauh mai bawk si. " Tumahin makpa atan an duh lo che, a hrim hrimin eng rilru pua hmeichhe naupang, zirlai lehnghal chunga han che duh nge maw I nih le? ", tiin a vín nghék. 

             " I tupa tur ka siam sak che", Vanneitluanga'n a lo ti sam et. A pain kut thlak tuma a' n tin chu  Vanneitluanga nuin a lo dang hman. Sawmtei pa thu ngawi kar renga hnuai lam bih ngur chu Vanneitluanga'n a va melh leh zauh thin. 

                 Sawmtei a dik zawk nge Vanneitluanga a dik zawk tih lah hriat hleitheih a ni lo, Sawmtei a ngawi tlat bawk si. Sawmtei nu leh Vanneitluanga intàwng bak thil danglam tehchiam a awm lo; a kar lakah Vanneitluanga nu leh pa an lo inrawlh ve thin tih mai loh chu. 

               Vanneitluanga hian a nu leh pa hi a haw tlat, a u Puii erawh a hmangaihin a véng tlat thung, a thlavàng a hauh thei em em bawk, abikin a pa lak atang hian; a u Puii'n a hrethiam thin lo.Vanneitluanga'n a nu leh pate ' Ka nu, ka pa' tia a koh lohna pawh a rei ta. 

               Hetia a nun a lo hmang ta hi a lusúnna vangah ngaiin, an thiam ang tawkin zàwldawh taka fuih thinin an dàwm thin. Mahse, Vanneitluanga'n a haw tlat erawh a nu leh pate'n a chhan an hre bik lo. 

          Sawmtei naupaina pa ka ni atih tlat avang leh hruai haw a tum em avangin Vanneitluanga pain a phal tlatlo thung. Sawmtei chan tur a ngaihtuah em vang a ni. Rui thlé mai mai thin a ni si a, a ngaihsak tha dawnlo tih a hre kiau bawk si a. 

            Sawmtei nu pawhin tihngaihna tak a hre lo, Vanneitluanga a tawng thei si a. Sawmtei, Vanneitluanga kuta hlan a ngaingam bik lo. Mahse, Vanneitluanga'n a tilui tlat bawk si, Sawmtein engmah a sawi bawk si lo. 

             Vanneitluanga erawh chuan Sawmtei pawt dingin chhuahpui a tum ta mai a. Sawmtei nuin amahin a enkawl tur thu hrilhin a lo tiding vat thung a, Vanneitluanga nu leh pa pawhin Sawmtei nu thu ngai turin an lo hrilh ve vat. 

              Vanneitluanga erawh chuan, " Tu bulah mah ka dah dawn lo, keiman ka enkawl ang; ka nupui leh ka fapa te hi Tu enkawlpui na mah ka mamawh lo. Tu tanpuina mah ka dil ngai hek lo ang", a ti ta mai a. 

      " Nupui a? ".

      " Fapa a? ". Mak an ti tlang ngang mai! Sawmtei chuan Vanneitluanga'n a chelhna chu a kut lehlamin a va vuan a, a hmér ngawt ngawt mai a. A mittui a luang ngiai ngiai bawk a, a thin lah a tawp up up a; mahse, tap chhuak turin àw a chhuah thei lo. Lawm tur nge lungngaih tur tih lah a hre lo, a mang hriat ruai ruai ngawt mai a ni. 

          " Nangni hian min pawmpui duh lo a, ka inah lah ka hruai haw thei lo a; chutih anih chuan hmun dangah ka hruai mai ang ", a ti a, Sawmtei chu a chhuahpui nghal nal nal. 

( ka thawnthu ziah hi a ho tawlh tawlhin ka hre tlat,min lo chhiar sak thin a ka lawm lutuk ringawt☺ Nilaini zanah dar 7- ah a zawmna ka lo dah leh chauh ang ; naktuk zanah chuan ka lo dah hrihlo ang,  hun hman nuam vek ule 🤗)