THAWNTHU____ Short_Story Ziaktu: Cck Lalchhuanawmi

THAWNTHU___Short_Story 

Ziaktu: Cck Lalchhuanawmi

 Biak In chhungah chuan muangchangin an lut zel a, a nuta neihchhun kut a vawnna chu a nghet sauh sauh a; chutin a pangpar ken pawh a hmer ngawt ngawt. Hei hi an THAWNTHU intanna tura a lo suangtuah thin kha a ni a, Maicham hmaah chuan tlangval hmeltha tak leh chhelo tak hi nui sang chung hian a lo ding vang tawh mai bawk a. Vawiin zet chu nidang zawng aiin mo neitu chungah mit a fu leh thup zual ngei ang. 

Tetei ke pen lai chu chawl thutin, mo neituin nghakhlel taka mo lo thlen hun thlira maicham hmaa lo ding reng chu a thlek ngawih ngawih ringawt mai a. A uin han pawh kal a tum pawh chuan a che chang eih lo a; " Tete? ", zawi sapa a uin a kohna pawh chu bengkhawn awm ang pawhin a lang lo. Mo neitu ringawt chu a thlek tawn sek mai a ni. 

Ni e, hun reilote hnua a pasal ni mai tur chu a hmeltha takzet alawm; nula tam takte duhthusam kha a ni miau a, Tetei pawh hian chu chu a hai bik lo; amah taka pawh hian vannei a inti a sin. Mahse, a hmangaih tlat si lo, chu chuan a tihnat a hlau ngawih ngawih a, " Tete, min hmangaih let turin ka phut ngailo ang che; ka hmangaihna che leh ka hlimna te, ka lungngaihna te pawh nise ka damchhung  a min tawmpui turin ka bulah hian awm la ka duh a ni. I ngaihsakna chhete leh ka kut hi hmangaihtu ang nilo, thian emaw hnemtu emaw ang tal pawha min vawnsak thin turin leh ka THAWNTHU tifamkimtu ni turin  ka duh che; chuvang chuan khawngaihin min pawm hram rawh". 

A lo pawm ngei alawm, a hmangaihna pawh; mahse tunah hian a THAWNTHU tifamkim tur erawh chuan pen khat lek pawh pen a harsat ta. A mittui a luang thla ngiai ngiai a, a u kut vuan lo sela chuan a tlu tawp tawh ngei ang; a zawi vek ni ber mai. Tu emaw maicham hmaa ding tura a suangtuah thin kha tuna maicham hmaa ding hi a ni tlatlo alawm! 

Mo neitu hrilhhaihna a hmela lo lang tan chu a hmuh hmaih hauh lo, mipui phun ri lam chuan; a u pawh chuan ko sekin a han pawt thin a, mahse awmzia a awm chuanglo. Chutah Tetei chu a u lak atang chuan inla hrangin mo neitu hmaah chuan kut suih chung hian, " Min ngaidam rawh", a ti tham chhalh a, a inhnit feih feih nghal bawk; a tah chhuah loh nan a hmui hnuai a pet tan tan a. " Tete, khawngaihin", chu thu chu mo neitu David Lalremruata chuan sawi chhuak kher lo mah se, a hmelah chuan a lang chiang hle thung. 

Tetei chuan, " Min ngaidam rawh u", ti leh sapin mittui tling pam chung hian Biak In atang chuan a tlanchhuak ta vawn vawn a. A kawrfual hak var sar chu a pawt chhing a, pheikhawk sang bun loa a hniam a bun pawh chu a lawm hial zawk. " Mi àpa, ka haw lutuk che", a rilrua ti nuah nuah chung chuan a tlan zel a. 

Tetei khan a hmangaih takzet a ni tih kha a thiam ang tawk khan a tilang ve thin a, mahse a hrethiam hauh lo. Inthenawm an nih avangin an tette atangin an inkawm tawh a, Tetei aiin kum khat chauhin upa mah se an inkawmngaih em em thung; an chhungte ve ve pawh an inhre tha viau. Tetei pawh chu a ngaihsak tha viau a, school khatah an kal bawk a; haw lam leh kal lam pawh nise Tetei school bag a ah(ak) sak ziah thin. 

Tetei pawh chuan mipa dang a ngaihtuah bik lo a, thian lah a kawm ngai em em si lo; a nu leh pa leh a nuta te hi a thiante an ni mai a, an thenawmte nen. Chutia mipa dang be lo leh pawh em em lo ta chuan a rilru put hmang pawh a dang tial tial a, mahse a inpawm thei thin lo; an chhungte lahin, " Kan fate hi inneitir mai ang u, kan inpawhthat lehzual nan, anni pahnih lah inngaizawng ta emaw ti ang hrimin an inzui ngun ve bawk si a, an ute ve ve hi han inneihtir dawnin mipa ve ve han inneih ngawt thu awm bawk si lo", fiamthu titak deuh hian an ti thin bawk nen, A inngaihbel angah a inngai leh thin a. 

Mahse, chutianga ngaih a tum nasat pauh leh a rilru put hmang chu a nghet tawlh tawlh mai a; a sawichhuak ngam bawk si lo, a chang chuan a duhin a hmangaih takzet a ni tih chu a tilang hial thin a; mahse a lo hrethiam ngai lo. A bialnu nena an intihthiamlo changte hian Tetei chu a palai tir thin a, chutianga palai tura a hrilh apiang chuan Tetei chu a rilru a na thei em em a; na hle thin mah sela a palai leh nge nge thin a, a rilru put hmang hrilh ngam miau hek lo le! 

An chhungte chuan inneihtir tak tak sela tih chu a duh ber a ni a, a chang chuan an inneih hun tur leh fa an neih dun hun tur te thleng chuan a suangtuahna a vah vel tir chiam thin a; chu bak tih theih a nei chuang si lo. 

Thlanmual kawng lamah chuan a tlan zel a, lungthil a lo tam ve reuh nen a han tlu leh rih thin a; na pawh sawi thei lo chuan a tho thuai leh zel tho. Thlanlung dum tliang tak Maia ' KAN THEN TAK ALEX LALHMACHHUANA KUM-25 ' tih inziahna chu a va kuah vawng vawng nghal a, insum karna nei lo leh Tu mit mei mah ven tur awm tawh lo bawk nen chuan a tap chhuak hawm hawm ta a. 

" Alex, ka hmangaih che; ka hmangaih lutuk che", kum tam tak chhunga a lo pai tawh kha a ni miau a. " Nangmah nen chauh khan ka hma hun hi ka suangtuah thin a sin; engtin nge i u Thawnthu chu ka tihfamkim theih ang ni? ", thlanlung chu a kuah ngawih ngawih a, " Alex, lo tho leh mai rawh, ka ngai lutuk che", a ti zawi sap a, a ruka a lo pai tawh Alex-a dam laia a hrilh ngam loh te a sawi chhuak ta mawlh mawlh a; Tunah chuan a tlai lutuk tawh huaisen chhuahin lo hrilh tawp mai sela tha tur hi a nia. 

A hnung lam atangin hmeichhe pakhat hian, " Tete", tiin a lo ko a, Tetei chu muangchangin a in her a, Alex-a bialnu a hmuh chuan mak a ti kher mai. " Rinrin, eng nge i lo tih dawn? ", tah àw tuau chung hian a ti a. Rinrini chuan, " Tete, Alex-a nen khan kan inngaizawng ngai miah lo a sin", a tih chuan Tetei a lo ka ho a, " Eng, eng nge awmzia? In intithiamlo fo thin a nih kha, keipawhin ka inremtir thin che u kha", a ti bah nuai a. 

" Ka hria lawm, Alex-a khan thian ang chauhin a en ngailo che sin; kei chu a hmanrua mai chauh lawm ka ni, i laka a rilru put hmangte kha hrilh tur chein ka ti ve fo thin a sin", Rinrini chuan a mittui hru thuak thuakin a ti a. Tetei chu tap khur hlawk hlawkin, " Ngatinge min hrilh mai loh", a dinnaah chuan a thu thla hnawk nghal a, Rinrini chuan va kuaha chul heuh heuh pah hian, " I hmangaih a ni tih pawh hi a hria a sin", a tih chuan Tetei chuan, " Maw, a hria maw? ",  a lo ti chul a. 

Rinrini chu bu nghat nghatin, " Aw, a hria lawm; mahse a haider tlat thin thung", a ti a. Alex-a pawh khan Tetei hi a hmangaih ve lutuk a alawm, mahse buaina pakhat a nei; chu chu a u David Lalremruata kha a ni. Tetei laka a rilru puthmang te hrilh a tum ve zet naa, a u thuruk a hre ta mauh mai si; a hriat theih tir ata a u chu a ngawichawi em em thin a. 

Zirna lamah a tang nasa a, a phak tawkah a inhlawh ve reng bawk; a zirna senso tur a intum chawp chang a tam zawk a, mahse a chhungkaw neihchhun tan pawn engmah a ui ngai lo. Tin, Alex-a pawh a nau a nihna angin a ngaihtuahin a hmangaih em em a, chutin a chhungte pawh. 

A uin an nu leh pate a koh dawn hian inthlahrung tak leh inthiamlo tih hriat takin, " Ka nu, ka pa", tiin a ko thin tih chu a lo hre ngai reng reng lo. Alex-a chuan a u dinhmunah inchan han tum ngial thin mah sela, a uin a paltlang ang paltlang ve lo na na na chuan han tih vak ngaihna a hre thin bik lo; Tetei a hmangaih ve a ni tih a hriat phei chuan, " Ka u tan", tiin na hle dawn zawk mah sela kiansan zawk a tum ta a ni. 

Tetei chu a inhnit feih feih a, " Ngati nge, min hrilh mai loh, u David-a pawh chuan min lo hmangaih pawh nise keiin ka hmangaih ve chuang hleinem", a ti siam siam a, Rinrini chuan a hnungah a chulsak heuh heuh bawk a. 

" Tete, u David-a hi fa sàwn a ni tih i hre lo em ni?", tiin Rinrini chuan a zawt a, Tetei chuan mak ti tak hian Rinrini chu a en chho ha a, " Engtin? A ni thei lo ang", a ti bah nuai a, " A ni lawm, Alex-a khan min hrilh danin i u leh u David-a te inbiakna a hriat ruk atangin a nia. Alex-a khan a hmangaihna che aiin a u a hmangaihna hi a nasa zawk a ni mahna le, a hmangaih thu che pawh a hrilh duh loh che", Tetei chu a hma aiin a lungchhe lehzual a.

David-a chu fa sàwn a ni tih reng a lo hre ngailo; a u erawh chuan a lo hria a inkawm reng reng an ni bawk a hre awm tak pawh a ni, a nih chuan a nu leh pate pawhin a hre ve ngei ang. A han ngaihtuah ve ngial a, sàwn a ni tih hriat theih turin a awm ngai bawk si lo; a chhungte lahin an tilang ngai hek lo. Tetei chuan Alex-a thlan chu a kuah leh ngawih ngawih ringawt a, tunah chuan sawi tur a haihchham viau tawh. 

Rinrini chuan dam diai hian, " Tete, Biak Inah va kir leh rawh, u David-a'n a lo nghah che ka ring", a ti a, Tetei chuan a mit chhing vang vang chung hian, " Ka hre lo, min lo nghak dawn em ni? Alex-a hi engtin nge ni ang? ", a tap leh hawm hawm a, Rinrini bawk chuan, " Tete, u David-a hi kan hriat angin a hmeichhe mi loh kha bakah a zakzum si, i u nen chuan danglam tak an ni; engtin nge nangpawh hi inneihpuiah a sawm ngam zawk che ni, mak ka ti hial zawk a sin; i la hria em , ' Lênglai thi chu Pawla'n a sai thin an ti a, nangpawh hi a sai tur zinga mi i ni', tiin kan fiam thin kha ", dam dup hian a ti a. 

Tetei a inhnit feih feih a, Biak Inah chuan a kir leh dawn em ni? Rinrini chuan Tetei chu a hnung atang chuan a va kuah a, " U David-a hi ngaihtuah ve la, va kir leh mai rawh; hei hi Alex-a duh dan pawh a nih ngei ka ring, a duh dan a ni ngei ngei ang", a ti siam siam a. Tetei erawh engmah sawi lo chuan a tap chhuak leh hawm hawm a, tuna an dinhmun theuhah hi chuan eng nge dik ang a, eng nge dik lo ang tih pawh thliar thiam a har ngei ang. Rinrini chuan Tetei hmaite chu a rawmawl chuan a hrufai a, a tahna avangin a hmaite chu a val kulh a; makeup hmang a ni bawk nen. 

" Tete, ngaihtuah chiang la tunah hian u David-a bulah kal leh ngei ngei rawh; a lo la nghah reng che ka ring", Rinrini chuan Tetei dara sawi dat dat chung chuan a ti a, " Alex-a khan a u hi a hmangaih em avangin nangpawh a kalsan che a ni a, la dam ni sela chu a inneihtir tho che u ka ring, chuvangin kir leh ngei ngei rawh aw", Rinrini chuan dam diai hian a ti leh a. Tetei pawh chuan tap hawm hawm chung hian a lo bu ve nghauh nghauh a, tichuan Tetei chu Biak In lam pan chuan a tlan let leh ta a ni; thlanmual a pelh dawnin a han hawilet a Rinrini chuan nui sang chung hian a ban a lo vai lauh lauh a. 

Hmangaihna hi eng nge ni chiah le? Engtiangin nge hmangaihna chu kan ngaih a, kan sawifiah ve thin? Tawngkaa, " Ka hmangaih che", tihah hian mi kan lungawi thin? Pu Mafaa khan, " I tho nuam em? Thil i ei tha maw? Indim hle ang che. I damdawi ei a hun a nia. Tu nen nge in chhuah dawn, rei suh aw? I inthuam lum maw? Rawmawl kha i pai theihnghilh leh ang e. " Ka hmangaih che " ti si lo hian ka hmangaihna thu hi ka va'n hlan ngun  tak che em! ", a ti mathlawn lovin. 

David-a pawh khan Tetei kha, " Ka hmangaih che", ti dawt lo khan a hmangaih a ni tih kha a lo tilang ve fo ang a, Tetei pawh khan a lo hai thin a ni mai ang em? Tetei chu a lo tlan tawhnaah chuan a tlan let zel a, David-a chuan lo la nghak ngei rawh se. 

Biak In kawnga mipui lo ri mur mur te chu a tlan pel a, Biak in chhungah chuan thaw hluam hluam chungin a tlan lut a; mipui thu pawh an awm mumal tawh lo. A hawi kual du du a, Maicham hmaa David-a lo thu kun ngawih ngawih a hmuh chuan a tap leh ringawt a, " Dave", tah àw tuau chung hian a ti a, a zawi em a David-a'n a hre theilo a ni ngei ang a hawichhuak miah lo! 

Tetei chu David-a hmaah chuan a va ding a, David-a'n a hmuh chuan Tetei chu a kuah ngawih ngawih a, " Tete, ka tihpalh min ngaidam rawh", thawk a la halh halh a, a kalbo hlau ni awm hrimin a kuah nghet em em a. Tetei pawh chuan, " Dave, min ngaidam rawh", a ti ve leh a, a tap hawm hawm mai a; Tetei hi zawng duat rawn kha a ni ve miau a, a pangchang ni ah ngai mai ang. Tetei chuan David-a Thawnthu tifamkimtu ni tur chuan ke a pen ta a ni. Ni e, Alex-a pawh a hlim ve tawh ngei ang. 

" Dave, a tlai tawh em hi ngati nge i la mut loh a? ", tiin Tetei chuan ham bai bai chung hian David-a chu a zawt a. David-a hi chuan a nupui Tetei leh a fapa Alex-a te muhil lai thlir hi nuam a ti thei em a, tunah pawh zan dar sawm lai ri tawh mah se, a lo thlir leh veng veng chu nih ber hi! 

" Ka mut a la chhuak lo a, mu leh rawh", Tetei biang chul heuh heuh chung hian a ti a, Tetei chuan a lo nuih sak a. An inneih atang kum thum lai a Liam ve tawh a, an fapa Alex Lalhmachhuana pawh kum thum lai a ni ve der tawh. " Keipawh ka mut a la chhuak lo", David-a'n a biang a chul heuh heuhna kut chu vuanin Tetei chuan a ti sap a. David-a chuan nui saih chung hian a fapa chu a fawp zeuh a, " A nih chuan, kei chu ka mut a chhuak ka mutsan mai ang che", tih leh mit chhin a rual nghal a Tetei a lo ner nawng. 

" I fapa chauh i duat bik", Tetei chuan ti hlakin a lehhawi daih a. David-a chu a nui kur kur a, " Naute lian titau an awm ni maw? ", Tetei dara va sawi pah chuan a ti a, Tetei chu David-a lama inher tuah tuah chung hian, " I fapa chauh i duat bik a nih kha", vui àw tak hian a ti lang lang a. David-a chuan Tetei biang chul heuh heuh chung hian, " In pahnihin ka hmangaih che uin  ka duat bik ve ve che u", dam dupa a tih chuan Tetei a lo nui saih a. 

" Dave? "

"Umm"

" Ka hmangaih che", David-a chuan Tetei mitah chuan a en kar a, dawt a sawi lohzia leh a tihtakzia a hmu chiang kher mai; Tetei pawhin ahma angin dawihzep a tum tawh biklo David-a chu a hmangaih a ni tih huaisen chhuah tak meuh meuhin a hrilh a ni. David-a mittui a hnàm sawk a, inper thoin khum chungah chuan a thu a, Tetei chuan a hnungah va kuahin, " Dave, i tha em? ", a ti zawi sap a. David-a chu a hmai hup hian a tap khur zawih zawih mai a, patling pui han tah tak mai chu! 

Tetei chuan a kuah nghet zual sauh a, David-a chuan Tetei kut la kangin a fawp vawng vawng a, " Tete, tumahin min hmangaih thu min la hrilh ngai lo a sin", Tetei kut la kangin a fawp leh vawng vawng a. " Dave, ka hre lo alawm; hria ila chuan ahmain ka hrilh daih tawh tur che a nia, min ngaidam rawh aw", tap pur chung hian Tetei chuan a ti a, a hnungah chuan a bei hle hle bawk a. David-a chuan, " Ngaihdam dilna tur a awm lo, fa sàwn ka ni tih hi i hre tawh em?", tiin a zawt a. Tetei chuan tah àw tuau chung hian a hriat thuin a lo chhang a. 

David-a pa hian David-a hi a fapa a nih a ring thei lo a, mahse David-a hringtunu kha a chetsualpui ngei bawk si; test hrang hrang results chuan David-a chu a fapa ngei a ni tih an nemnghet vek a. Mahse, chuti chung chuan a la ring theilo, David-a hringtunuin mipa dang a lo chetsualpui ve tho tih a hriat vang a ni ber a, mahse a fapa ngei a ni! David-a chu khawvel éng hmuh tir a nih hnuin amah pawm theilo Tu a hringtupa hnenah hnutchhiah tawp a ni a, kum thuma upa a nihin a pa chuan a ngaihzawng, a hmangaih em em; a ruih avang leh David-a a hrin tak avanga nupuia a neih theih loh ngei mai nen khan an innei ta a, a hnu lawkah a nau Alex Lalhmachhuana pawhin khawvel éng a lo hmu veleh ta a ni. 

" Dave, engtin nge i hriat a chu chu? ", Tetei chuan zawi sap hian a zawt a, " Ka pa te leh i pa te an titi lai ka nang fuh a", tiin David-a chuan a lo chhang a. Alex-a hmangaih tih hriat taka an chawi lai David-a hian a hmu ve fo ang a engtiang taka na thin nge a nih ang le? A zawhna ni thin ngei tur a hriat hnu pawha hetia surgeon ropui tak a ni thei hi a fakawm takzet a ni, a duh phawt chuan kawng thalo lam a zawh thei ngei mai; lo zawh pawh nise chhuanlam tur tha tak pawh a nei. 

Tetei chu a inhnit feih feih a, " Tete, nangmah vang chauh kha a ni thin a sin; vawi tam tak ka nunna chhah pawh ka tum a, mahse nangmah vang hian beiseina ka nei leh phah fo thin,min hringtunu hmel hi engtiang chiah nge a nih tih pawh ka hrelo", David-a  chuan Tetei kut khalh niap niap chung hian a ti a, " Alex-a nunna kha ka chhan thei bawk si lo, surgeon nep tak ka ni, tunah lah ka nau hmangaih ka neihsak leh a", nui lui sakin a ti leh dap dap a. 

Chutah Tetei chu David-a hmaah thingthiin, " Dave, Alex-a khan vuaiduai vang liau liauin accident a tawk a i thiam loh a ni lo; Pathian remruat pawh a ni mai thei a sin, chuan hmangaih nilo anga i inngaih chhung zawng pawh khan Pathianin a hmangaih reng che; keipawhin ka hmangaih lutuk che i fapa pawhin a hmangaih che", nui sen sen chunga a tih chuan David-a a nui chhuak hawk a. 

Tunah chuan David-a pawh lo dam vawng vawng tawh sela, Tetei pawhin hmangaih zual zel sela; Alex-a pawh a patea ang chiahin hmangaihna ngah tak mi ni turin lo thang chho zel sela, David-a pawhin a chhungkua hmangaihna nen enkawl zel turin leh an kal zelna turah duhsakna sang ber hlan ang aw! 

" Tete, ka hmangaih che"

" Dave, keipawhin ka hmangaih che"

" Alex, ka hmangaih che", an sawi rual ve ve avangin in enin an innuih ringawt a, an fapa tui taka muhil siai siai bulah chuan an mu ve leh ta a ni. 

                ***  A TAWP TA  ***