MALSAWMSANGI-10

MALSAWMSANGI

MALSAWMSANGI-10

Ziaktu: Cck Lalchhuanawmi

       " Naktip lawk exam ni tawh sia i huphurh em? ", Dindini chuan Sawmtei chu a zawt a. Sawmtei pawh a nau neih atang thla hnih lai a liam ve reng tawh a, exam hun tur pawh a hnai hle tawh bawk. 

        Vanneitluanga'n naute enkawl naah a awl hneh hle a, an fapa Lalchhanchhuaha chu a pa Vanneitluanga'n a hauh bik tlat emaw tih tur hian an pafain an inpawm chawt a ni ber. 

       An nu leh pa( nu Mamuani leh pa Rema te) te pawhin an pawm mang ngai lo. 

        Vanneitluanga hnathawka a chhuah hma zawng chu midangin an khawih theih lo a, a hnathawk bang in a thlen leh meuh hi chuan a fapa Lalchhanchhuaha chu tu kuta awm lai pawh ni se; a ban nghal vat zel. 

         A duat bawk a, " Duatpuia", tiin a ko kher thin. 

        A nu Sawmtei a chhun em em a," Malsawmsangi phirpui", Vanneitluanga chuan a tifiam thin a. 

        " Khaw'nge Dindin, Chhantea pa awm lo lai chuhin ka lo pawm ve teh ang", nu Mamuani chuan a ti a. Dindini chuan, " I pa hnathawh hun chhung chauh hian kan pawm ve thei thin che a, a hahthlak thin mang e", ti pah chuan nu Mamuani chu a va hlan a. 

         " Inchungah ka han hruai chho ang e, i pa pawhin a lawm chak ve em kha maw", nu Mamuani chuan a ti a. Dindini chuan, " Lawm pawh a la hriat vak lo kha aw,a pa lo haw hmain lo hawpui vat rawh aw", a ti a, an nui dar dar a. 

          " A riltam leh tak leh, ka lo chhukpui leh mai ang", tiin a chhoh pui ta a. 

         " An fel reuh e ka ti, i vannei khawp mai; mahse, i pasal ker kur kha chu ka mil lo ve thlawt", Dindini chuan a ti nuah nuah a. 

        Sawmtei chuan," In pahnihin in tawng thei ve ve sia, chuvang aniang in inmil theih loh", nui ver ver chung hian a lo ti a. 

        " I pasal hi chu i tan ve thlawt, kei ai pawhin a tawng thei; mi hnial a hrat ropui si, mipa ve si; kei chu mipa tawngthei deuh hi chu ka tei thei thak lo"

       " Mahse, tawng duh viau lo phei se chu kan inchhung hi a reh thei ngawt ang", Sawmtei chuan a lo ti ve bawk a. 

       " Aw i tan tho tho", an khi leh suk thin a. 

        " Engtia han inchhai ve nge maw in nih le, zirlai chawlhsan meuha han vawn ringawt atan chuan k'u Vana hi.... ka sawi tum chu i hre tho ang"

        " Nakinah ka la hrilh dawn che nia, tunah hrih chuan huaisenna ka la nei lo sawi turin"

       " Awle, awle, takah; nau i neih hnu hian lehkha zir i bahlah phah em? " 

       " Bahlah lo e, a hma aiin ka zir tha zawk; chuvang ania exam pawh hi ka cho ve em em, 

         Chhantea pawh hi a riltam lai chauh hian kan inpawm a ni ber,Tluanga pawh a hah thei ngawt ang; ka lehkha zir chhung zawng a meng ve thin a, mu tura ka tih lahin, ' i muthlu tur ka lo veng ang che' a ti thin a,", Sawmtei chuan a ti a. 

       Dindini chuan, " K'u Vana tak hi chu...  nupui leh fapa a inti nei bik hian ka hre tlat", Sawmtei chuan a lo nuih a.

        "Ka hriatthiam loh chu'Tluanga' tiin nangpawhin i ko ve reng tho sia, keiin ka koh a duh leh bawk si lo ka hrethiam lo reng reng; nang nen kan inrual reng tho sia"

        Nakinah a fapa hi ka la sawichhiat sak leh dawn lawm, a lawm lo leh ang chu aw", Dindini chuan nui ver ver chung hian a ti a. 

***********

       

        " Sawmte, saw lai restaurant-ah sawn inbe lawk i la", Lawmkima chuan a ti a. 

      Sawmtei chuan a zui ve mai a, a tum hnihna atan an inhmachhawn leh ta ran mai. 

        " Nau i nei tawh a ang hle mai", za lo zeta nui chung hian Lawmkima chuan a ti a. 

     Sawmtei chuan a pum chu dawm nghalin, " Nia,fapa ka nei ve a", zawi sap hian a ti a. 

      " Eng nge i tih a? "

      " Vawiin hi exam tan ni a Nia, ka exam ve a; nang zawk Lungleiah hian tih tur i nei em ni? "

      " Mahse, engtin? "

    " Tluanga hnathawhna school hming hawhin ka exam a, min dilsak a"

       Lawmkima chuan àw dam dup mai hian, " Ka lawmpui lutuk che, pasal tha tak leh fapa i nei a

        Lunglei ka lo kal chhan chu ka hmuh chak vang che a nia", kiai suk chung hian a ti a. 

        " Ka ngai thei lutuk che", a tih zawm leh zat a. 

       Sawmtei chuan, " Kei chu min theihnghilhin hmalam pan tawh zawk rawh", a ti a. 

       Lawmkima chuan, " Anih chuan i lungawiin i hlim em? ", tiin a zawt a. 

        Sawmtei chuan a zawhna dawn chu a lo ngaihtuah ngai lo tih a hrechhuak a, inngaihtuah ni awm tak hian hnuai lam a bih ngur a. 

      " Sawmte? "

   " Aw ka hlim a ka lungawi  bawk, chuvang chuan  lo inlan tawh suh", tiin a chhuahsan nghal daih a.