MALSAWMSANGI-13

MALSAWMSANGI

MALSAWMSANGI-13

Ziaktu: Cck Lalchhuanawmi

          

        " I sawifiah ngei chu a ngai ang, nachina thil thleng kha eng nge a awmzia; kha pa kha tunge ni reng reng a, Tluanga'n dawrah kal tura  min ti chu a zia hle mai", tiin Dindini chuan Sawmtei chu kaiin a kalpui hlawk hlawk pah a. 

       " Fawh che a tum a nia, hmun reh lai a ni hlauh zawk a; lo fawp tak tak che sela i lo hnial bik ka ring hauh lo ", Dindini'n a tih leh chuan Sawmtei chuan, " Dindin", a ti zawi sap a. 

      " Dawrah kal phawt ila, haw kawngah kan sawi tha ang".

***

    " Le, min hrilh tawh rawh, muangchang hian kal mai ang", Dindini chuan a ti a. 

     Sawmtei chuan, " Ka bialpa Lawmkima anih kha", a ti a. 

       Dindini chuan mak ti zet hian, " Eng maw! Bialpa a! Lawkin, bialpa hlui nge bialpa mek zawk? ", a tih chuan Sawmtei chuan, " Aw, ih, a... bialpa hlui ka tih na", a ti bah nawk mai a. 

       Chutah Dindini chuan, " Nang hi... Engkim min hrilh teh, Tluanga, nang leh Lawmkima i ti mi kha? Engpawh chu ni se han sawi vek teh ka rilru buai dawnin ka hria

         Tunah hian huaisen chu chhuah la min han hrilh tawh teh, inah chuan thleng har mah ila Tluanga te chu an lo buai phah ka ring lo", a ti a. 

       Sawmtei chuan pawngsual a nih avanga Lawmkima hnenah ngaihzawng dang nei anga a insawi te, a hnuah nau a pai tih an hriatchhuah hnua Vanneitluanga'n a hruaichhuah dan te chu a hriat ang angin a hrilh ta vek a. 

        Dindini chuan va kuahin a hnungah a chulsak hoh hoh a. 

      " Ka thian, ka tawrhpui chein ka va lainat tak che em", Dindini chuan a ti a. 

      " Zawh awm a ni em phei chu ka hre lo nain, mahse;  Tluanga hi a ni tak tak a mi"

      " Aih, amah a ni lo; keipawhin mak ka ti khatia mawhphurtu anga a lo insawi ve ringawt kha", Sawmtei chuan a ti a. 

      " Anih chuan tunge ni? "

   " Aih, ka sawi duh hrih lo chu kher chu... "

          Dindini chuan, " Anih chuan Lawmkima chu ngati nge i hrilh loh a?", a ti a. 

     Sawmtei chuan, " Ka hre lo, ka hrilh ngam lo a ni. Thianghlimna leh hlutna nei tawh lo ka ni si a, ka bel ngam tawh lo a ni. Lo hrilh pawh ni ila min pawm duh ka ring chiah lo bawk a",a ti a. 

      " Awle, ka hrethiam e. Lawmkima chu lo dah tha ta ila, Tluanga ve thung hi! ", tiin Dindini chuan a zawt a. 

     Sawmtei chuan nui deuh chung hian, " Tluanga a, chutiang chuan i koh a duh lo kha", a tih chuan Dindini chuan, " Vawiin chu a phal ve teh mial a, min duat reuh lutuk; a chhan pawh ka hre lo e a. 

        Chhantea pawh vawiin chu nu Mamuani leh pa Rema te ho nen kan inpawm chhawk zak zak mai. 'Laldinmawi' pawh min ti lo Dindin tiin min ko ve nih chu! ", mak tih hmel deuh hian a ti a. 

        " Mahse, a hmai vel kha... Ngati nge ni reng reng a? ", Dindini chuan a tih zawm a. 

     Sawmtei chuan, " Keipawhin ka hre lo, nizan chu hmai duk cher chur khan a lo haw a, thu mak deuh deuh te a sawi a", a ti a, Vanneitluanga awmdan te chu a hrilh a. 

       Dindini chuan, " Tu emaw te hian sawisain kalsan tur chein an lo ti te ni lo maw? ", a ti a. 

     " A awihawm loh, chutiangin tunge ti duh ang", Sawmtei chuan a lo ti thuai a. 

     Dindini chuan, " Lawmkima chu ka ring deuh", a lo ti ve a. 

     " Tluanga hian a rilru a pe tawh che u ni hrim hrim. Ka sawi awmzia chu a hmangaih tawh che niang", nui deuh titih lu hiat deuh nuah nuah hian Dindini chuan a ti a. 

        Sawmtei chu inngaihtuah ni awm tak hian a ngawi vang vang thung a. 

     Chutah Dindini chu lo tawng chhuak lehin, " Sawmte, ka ngaihdan chuan Lawmkima lakah i rilru a la awm leh awm loh chu ka hre lo a mah se, Tluanga hi chuan a phu ve ngawih ngawihin ka hria

       Ka han ngaihtuah a, i chunga thil thleng mawhphurtuah a insawi a; mahse amah chu a ni hauh lo a. A hma atang tawhin Lawmkima nen in inngaihzawn lai atangin a lo duh tawh che pawh ni thei a, chu em zawng ka hre lo nain

       Harsatna i tawh laiin a pui che a, tunah lah Chhantea pawh a hrin ni awm takin a duatin a hmangaih em em a. I rilru zawng zawng pe nghal rawh chu ka ti lo, mahse; tlem tlem chuan han tum ve la chu ka ti

      Tluanga hi misual tak chu anih ka ring lo", a ti a. 

      Sawmtei chuan, " I tidikin ka hria, a bulah chuan ka him hliah hliah hian ka inhre thin. Lawmkima pawh ka hre chang tawh lo, a tir chuan amah hi ka ngai thei lutuk.

        Mahse, Tluanga bulah ka awm rei tawlh tawlh a ka ngaih lohna chin leh ka hriatchhuah loh ni pawh a rei ve tawh khawp mai. Kan nufain min enkawl tha em em a

     Mahse i hria em, hetia min enkawl tlat chhan hi ka hre lo", a ti a. 

     Dindini chuan, " Nakinah i la zawt dawn a nia. Hmangaih let i zir ve ngei a ngai ang. 

        Tirawh haw tawh ila, kan rei thawkhat tawhin ka hria, nakinah kan la sawi tha leh dawn nia", a ti a. 

      " Takah, exam i ti tha em"

    " Aw ti tha lutuk, keimah vangin vawiin i chawlh phah ta sia ka lawm rualin ka inthiamlo lutuk a nia"

     " A ho lutuk, kum khatah piancham vawikhat chauh a thleng alawm le".

*******

      " Tluang, zanin atang chuan khumah kan pathumin mu ho tawh ang u ",  Sawmtein atih chuan Vanneitluanga a meng buai nasa. 

    Sawmtei chuan a rilruin, " Dindini khan a tidik, kan nufa avangin a buai nasa thei em em a; hmangaih let ka zir ve ngei tur a ni", a ti nuah nuah a. 

      Vanneitluanga chuan awih ngam chiah si lo hian, " I ti tak tak maw? ", a ti a. Sawmtei chuan lu a lo buk khum a. 

     Vanneitluanga chuan Sawmtei  va kuah phutin, " Ka lawm e, Malsawmsangi", a ti a. 

     Chutah Vanneitluanga chu inla hrang nghal vatin kut phar chhuak hliai hian, " Malsawmsangi ka kuah thei che tiraw", lu thle deuh nghut hian a ti a. 

      Sawmtei chuan nui sang chunga va kuahin, " Kuah thei tehreng mai", a ti a. 

      Vanneitluanga hrilhhai lutuk chuan a kut pawh dahthlakna chang hre loin a phar reng ringawt mai a. 

        " Vanneitluang, i va han zei lo tak khatia awm reng lo khan kuah let ve ta che" , Dindini chuan a lo ti vin hlar a. Sawmtei leh Vanneitluanga ten an en nghal vat. 

     Vanneitluanga chuan Sawmtei chu kuahin, " Hei i hmu maw ka kuah hi, chuan kalsawn rawh naupang awm laia tih loh chi kan ti dawn, riah i tum ve ngawt bawk sia",a ti hlak a. An han nui leh rih phawt a.

    " Khawiah nge ka Duatpuia"

   " Inchungah khian, a pi leh puin an la awmpui".

     Chutah Dindini hmel inthlakin, " Tluang, pawnah Lawmkiman a hmu duh che", a ti a. 

     Vanneitluanga chu Sawmtei a kuahna a kut chu a la thla riai riai a. 

     Sawmtei chuan mak ti tak hian Vanneitluanga chu a en chho a. A rilruah zawhna tam tak a inzawt bawk a. 

      Vanneitluanga chuan, " Ka va kal ang e, lo chhuak su aw", kiai suk chunga tiin Lawmkima hmu tur chuan a chhuak ta a. 

*******

      " Dindin, ka va kal ve teh ang ka awm hle hle thei lo, eng tak ti ang maw", Sawmtei chuan a ti a. 

     Dindini chuan, " Keipawh ka ngaih a tha thei lo, chhun lama ka hrilh che kha i la hria em, kei chu ka ngaih a tha hauh lo", a lo ti ve bawk a. 

     Sawmtei chuan, " Sawisak tir i tih kha maw? ", a tih chuan Dindini chuan a lu a lo bu a. 

     Sawmtei chu hlauthawng tak chung hian, " Ka kal dawn ", tih leh chhuah a rual nghal a. Dindini chuan a hnungah a zui ve nghal bawk a. 

      An va thlen chuan Vanneitluanga,thi hnuang chunga Lawmkima hmaa  lo thingthi mek chu an va hmu a. 

     Sawmtei te chuan an va pan nghal vat a. 

     Vanneitluanga chuan lo hmuin, " Lo chhuak lo tur chein ka tih kha", a ti muang ban fan raih mai a. A lu atang chuan thisen muang changin a luang thla ngiai ngiai a, a hmai pawh a chiah hneh deuhin a duk chur leh a. 

      Sawmtei chuan Lawmkima tiang nena lo ding chu a hmaiah a va beng chawrh mai a.

      " I eng pawi nge a sawi a, tianga i tih a", Sawmtei chuan a ti bah nawk a. Vanneitluanga a hmuh khan hlauhthawnnain a khat a, a chhungrilah a khur nghal bawk nen, a àw pawh a chhuak tha hleithei lo. 

      Lawmkima chuan, " Ka pawi nasa takin a sawi, ka hnen atangin nang min laksak a; kalsan tur chein ka ti a, a theih loh tur thuin min chhang a", tih pah chuan Vanneitluanga chu a chhir nghal zawt mai a. 

     Dindini chuan, " Tluanga", tiin Sawmtei erawhin Lawmkima a nam sawn dawrh thung. 

     " I va zak lo ve, ka pasal khatia ti tur khan tunge i nih a", Sawmtei chuan a ti khur hlawk hlawk mai a. 

     Vanneitluanga chuan Sawmtei kutah lo chelh vatin, " Malsawmsangi", a ti a. 

    Lawmkima erawh chuan, " Pasal maw? Sawmte, i chungah thil tha lo tak a tih kha i hre tawh lo a mi, chuti chung chuan ka pasal i la ti amaw", a ti vin hlar a. 

     Sawmtei chuan, " Ka chungah eng thil tha lo mah a ti lo, thil tha hlir a ti zawk", tiin a lo chhang thuai a. 

      " A sual chein a fa i la hring zui a nia, chu chu thil tha maw? Ngati nge min hrilh loh, kei hian ka lo pawm duh lo che i ring ami? 

      Engvangin nge ka pawm duh lo ang che, ka hmangaih che lawm. Dawt min hrilh kher lo la tha tur", Lawmkima chuan a ti zawi sap a.  

     Sawmtei chuan, " Engtin nge i hriat a? ", a ti a. 

     Lawmkima chuan, " I chungchang ka lo hre thawi a, i nu ka zawt a", tih pah chuan Sawmtei biangah chuan a va dawm a. 

    " Khata tang khan ka zawng nasa lutuk che, Sawmte; tunah pawh a la tlai lo a nia. Ka bulah lo kal rawh", a ti a. 

      Vanneitluanga chuan Sawmtei a chelhna chu a lo thlah riai riai a. 

     Sawmtei chuan, " Ka thei lo", a ti a. 

           Lawmkima chuan, " Engvangin maw, i chunga thil tha lo tak titu bulah i him reng i ring a mi", a tih chuan Sawmtei chuan, " Tun thleng hian ka him a sin, chuan ka hlim em em bawk. 

         A chhan chu Tluanga hi min... min sualtu kha a ni lo alawm", a mittui hru thuak thuak chung chuan a ti a. 

      Lawmkima chuan, " A nih chuan tunge? ", a ti a. 

   Chutah Vanneitluanga chu thei leh thei lo chuan a lo ding chhuak a," Malsawmsangi ", a ti a. Mahse, a chauh em avangin a tlu leh a. Dindini chuan a buaipui vat a. 

     Sawmtei chu tap chhuak hawk hawkin a thu chawrh mai a. Vanneitluanga chuan, " Malsawmsangi", a ti leh a. A chauh em avangin a àw pawh a chhuak tha hlei thei lo a, a hriat phak chang chang thung. 

        Sawmtei chuan, " Ka... Ka... Pa... Ka pa kha lawm min sualtu chu", a àwm dawmin a tap hawm hawm mai a. 

     Vanneitluanga chuan a hnunglam atang chuan a va kuah vat a. 

     Sawmtei chu Vanneitluanga hmaah chuan inherin, " Nang hian i hria a ni tiraw, engkim i hria a ni tiraw? ", a tap khur zawih zawih mai a. 

      Vanneitluanga chuan a kuah nghet zual sauh a, Sawmtei darah chuan a lu a nghat a; a thaw kàwk kàwk a, " Malsawmsangi".

      Inkuah chial an nih avangin Sawmtei pawhin thisen a kai lo thei lo. 

      " Malsawmsangi"

    " Aw"

  " Sawmte, Tluanga hi Damdawi in kan panpui vat a that ka ring", Dindini chuan a lo ti a. 

   Sawmtei chuan, " Awle, awle; Tluang, i harh tiraw? ", a tih chuan Vanneitluanga chuan, " Mal... Sawm... Sangi... Ka... Hmangaih... Che... ", a kiai suk a. 

*** THUDIK HI A KHA RENG A SIN***