MALSAWMSANGI-15 LAST

MALSAWMSANGI

MALSAWMSANGI-15

Ziaktu: Cck Lalchhuanawmi

         Tlai lam dar thum a ri tawh a, Sawmtei leh Vanneitluanga te chu Aizawl thleng tawhin Vanneitluanga te in lam chu an pan hna hna a. 

       Vanneitluanga chuan a Duatpuia chu pawmin Sawmtei a kai pah bawk a. Sawmtei khur der der pawh a hre thei hial. 

      A ruk tak chuan Vanneitluanga pawh a tiril a khur a, a thu sawi tur chu engtiang takin nge a chhungte'n an dawnsawn dawn tih a hre lo a ni.

      " Awi bawiha", Vanneitluanga nu chuan lo hmuin a ko nghal vat a. An indin chilh ta ran mai a. 

      A nu chuan Vanneitluanga chu a han thlek thin a, lo thau tha sen suah tawh anih avangin a hai dawn hial a. 

     A nu chuan Vanneitluanga chu a han khawih vel a, a fapa ngei a ni bawk si a, " Awi bawiha", a ti leh a, kuah thlawpin a tahkhum ta chiam mai a. 

     Sawmtei chu tim deuhin Vanneitluanga hnungah chuan a biru deuha, Chhantea te riah chuan Vanneitluanga nu pawh chu inlahrangin Sawmtei kut chu a va chelh a, " In va lo haw har ve, in awmna kan hre bawk si lo; kan lo mangang hman alawm", a ti a. 

      Sawmtei chuan inhnit hlawp hlawp chung hian, " Min ngaidam rawh", a ti a. 

     Vanneitluanga nu chuan, " Ngaihdam dil na tur a awm lo reng reng", tih pahin Sawmtei chu a va kuah a. 

     " Ti teh u, inchhung lamah i lut ang u", Vanneitluanga nu chuan a ti a, an lut ta a. Vanneitluanga pa leh a u Puii te chu a hrilh nghal zat a. 

     Rei vak lo ah Vanneitluanga pa leh a u Puii te nupa te chu an lo thleng a. Puii'n a nau Vanneitluanga a tum loh deuh dana a hmu chuan a thawng hle a, a lawm lutuk hrilhhai bawk si chu awm dan tur a hre lo ni ber. Sawmtei chuan Chhantea chu a pawm tawh a. 

    " Ka nau kha i ni tak tak tiraw, i lo va hmeltha ta ve", tap hawm hawm chung hian a ti ngawih ngawih mai a. Sawmtei lam chu va panin, " Sawmtei maw i nih, ka nau tha takin min enkawl sak a kan lawm lutuk a nia, fapa lah a nei hmeltha si", a ti a. 

      Sawmtei erawh chutia Puii'n a tihdan chu a inthiamlo em em thung a. 

     A pa pawh chu thawngin lawm tho mah se, a tilang tehchiam lo thung a, " In lo haw a, a tha e. Ti teh u, sawi ho tur a awmin ka hria, bawiha thuthmun te rem fel teh u", a ti a. Sawmtei leh Vanneitluanga chu thu dunin Chhantea erawh an u Puiin a pawm sak a. 

      " Hei, bawiha pawh i danglam nasa tawh tih a hriat a, tunah chuan nikum lama kan thuchiang lo kha tharthawh pawh min ti mai thei a, mahse; thuchiang zawk hriat erawh kan duh khawp mai ", Vanneitluanga pa chuan a han ti a. 

      Sawmtei chuan, " Ih... Englo... Kei", a ti chiah tihah Sawmtei kut chu Vanneitluanga chuan a chelh nghal vat a. 

     Vanneitluanga chu hawi chhuakin, "Ka... Ka... Ka pa"

    " Eng nge ni ta? "

   " Rose-i... Rose-i chungchang hriat i nei em? ", Vanneitluanga chuan a pa chu a zawt a. 

     Sawmtei chuan a hriat duh ber hre thei dawnin a inhria a, mahse hlauhthawnna chuan a khat nghal a. 

      Vanneitluanga pa chuan, " Rose-i chungchangah eng nge hriat tur awm a", a ti a. 

        " Rose-i pa kha a thiltih i hriatpui em?", a ti leh a. Vanneitluanga pa chuan, " Engthil chiah nge hriatpui tur awm a", dam zetin a ti a. 

     Vanneitluanga chuan, " I hriatpui ve nge ve lo, nge ni a in inthurual? ", seh chilh deuh takin a ti a. 

     " Vanneitluang, eng nge maw i sawi nuah nuah le"

    " Bawiha, tha deuh in sawi rawh che, Rose-i leh a pate chu engthil nge hriat tur awm? "

     Sawmtei erawh chuan Vanneitluanga chu a en ngawt ngawt a, Vanneitluanga kut chu a hmer leh ngawt ngawt thin bawk a. 

      " Rose-i kha a pain a sual a ni", seh chilh takin a han ti a. 

     Sawmtei chuan a kut a chelh avangin Vanneitluanga chu a thinrim a insum a ni tih pawh a hai lo, a hmer sak leh ngawt ngawt thin a. Thawm a reh thiap mai bawk a. 

     Vanneitluanga nu chuan, " Rose-i tak chu aw.... Ka va lainat tak em... Chumi vang anih chiah chu mahni nunna pawh a chhat tak mai... ", a ti vawng vawng mai a. 

       Sawmtei chu a thawng hle a, a chanchin hriat a duh tak chu a ngaih loh dan deuha a han hriat chuan , a lo thik ve ngawt te kha à a inti rilru em em a. 

      Vanneitluanga pa chu lo tawng chhuak lehin, " Ngati nge chutiang te chu in sawi loh", pawi tih hmel tak hian a ti vawng vawng mai bawk a. 

     Chutah Puii chu Vanneitluanga bulah chuan va kalin, " Chuvang a mi ka pa hlata awm tura min tih fo", a va ti a. Vanneitluanga chuan a lu a lo bukkhum a. 

     " Chupa mai mai chu aw... ", Vanneitluanga pa chuan thinrim hmel tak hian a ti a, a rum nghut nghut a. 

     " Ka pa, engmah i hre lo tak tak a maw?", Vanneitluanga chuan a pa chu a zawt leh a. 

    A pa chuan, " Hria ila chuan tunah pawh hian Rose-i a la awm ve ngei ang. Bawiha puitling zawkte hi min hrilh tur in ni a sin. Naupang mai in la ni a, mahnia thil chinfel tum ringawt hian thil tha a thlen ber lo thin a sin", a ti a. 

     " Ka pa min ngaidam rawh, thiantha tak in nih avang khan i inhnamhnawih ve ka rin vang zawk em a ni", Vanneitluanga chuan a ti a, a mittui a hnam sawk! 

     A pa erawh chuan, " A tha e. Mahse, a thleng tur chu a thleng zo tawh e", dam diaiiin a ti a. 

     Chutah Vanneitluanga chuan Sawmtei chu ' i hun a thleng e' tih ni awm tak hian a va melh a. Sawmtei chuan lu a lo thing nar  nar a. 

    Vanneitluanga chuan Sawmtei a chelhna chu tinghet zual sawtin, " Rose-i chunga thleng ang chiah kha Malsawmsangi chungah pawh hian a thleng a ni", a ti a. 

***********

      Lawmkima chuan Sawmtei chu Maicham bula suit dum tliang zarh nena inthuama Sawmtei nghaka lo ding mek Vanneitluanga  bulah chuan a hruai phei dat dat a.  

        Vanneitluanga chuan kawr var fual nalh tak maia inthuama nui sang chunga a lam pana kal chhet chhet a 'MALSAWMSANGI' chu a thlir doh doh a. A hnungah chuan Dindini chuan a Duatpuia chu pawmin a lo zui ve bawk a. 

     Vanneitluanga'n pangngai taka inneih a duh thu a sawi chu a pain, " Suahsual rawng a bawlna hmun ngeiah hian ropui taka lawm han hlawh ve teh se", a tih avangin Armed Veng South BCM Biak Inah 'Tiam tlat e' an ti ta a ni. 

      Sawmtei nu leh pa te erawh Vanneitluanga'n a hruai chhuah ni hnih thum vel atangin chanchin engmah hriat tur awm lo in an bo daih thung a. 

 *** 

      Thla eng no nghelh chu thlir vang vangin Sawmtei chuan malsawmna tam tak a dawn te chu a thiam ang tawkin a chhui a chhui ve a. 

    A nu te chanchin hre tawh lo mah se, nu leh pa pahnih lai a nei a, Vanneitluanga nu leh pa te leh nu Mamuani leh pa Rema te. 

     Chumai bakah thian tha tak Dindini, Lawmkima pawh a thian tha tak a lo ni ta a, unau fel tak Puii te. 

     A fapa Chhantea pawh en hrang loin an hmangaihin an duat em em vek a. 

      Vanneitluanga, amah hmangaih em em Tu chu a ngaihtuah rauh rauh a. A enkawl dan te, a thutiam ang ngeia a awmdan te. 

       Hun harsa tak mumang mai atana itawm hliah hliah chu paltlangin tun dinhmun hlimni an tawng baw ta a ni si a.          Vanneitluanga tan pawha hun harsa tak, kal ngaihna hriat loh khawpa ping kha a ni ve si a. 

     Sawmtei chuan a awm dawm vang vangin tap chhuak lo tur in a hmui a pet tan tan a, " Ka pa... I fanu hi i awmpui.... Reng thin a ni tiraw? ", a ti chhuak tiau a. 

       Bathlar( balcony) ah amah chauha awm mah ni se, a thawm chu an hriat a hlau em em a. 

     " Ka... Ngai thei lutuk che. Min kalsan hma lutuk a, mahse; hei... I Vantirhkoh lo tirh te avang hian ka lawm e aw... "

      A hmui chu a hup a, thu thla riai riaiin a tap khur zawih zawih a. 

      Chutih lai tak chuan Vanneitluanga chuan a lo hmu a, va panin a va kuah nghal vat a. 

    " Malsawmsangi, i tha em; ngati nge ni a? ", a hnung a chul sak hoh hoh pah a. 

     Sawmtei chuan Vanneitluanga awmah chuan a hmai a phum a, him hliah hliahin a inhria a; a hahdam sawng sawng mai bawk a. 

      " Ka hlim lutuk a chuvang mawle", Sawmtei chuan a ti a. Vanneitluanga chuan a kuah nghet zual sawt a, a mittui te chu a hruk sak pah bawk a. 

        " Ka pa ka ngai lutuk a", Sawmtein a tih chuan Vanneitluanga chuan a enchhuk ho mai a. 

     Sawmtei chuan, " Ka pa dik tak chuan kum sawmpahnih ka nih lai khan min boralsan a", a tih zawm a. 

     Vanneitluanga chuan a 'MALSAWMSANGI' tuarna te a han ngaihtuah  a. A hmangaih thar em em a, Sawmtei vanduaina a han ngaihtuah a, Rose-i anga a pa, a hringtu ngei ni loina a sual pawh chu a rilru chu a hlim zawk hial a. 

      Hringtu te ngei chu a rapthlak mah mah! 

     " Malsawmsangi"

   " Aw"

  " Ka hruaichhuah lai che kha i la hria em?"

" Hre nel nual"

     " Anih chuan khawlaiah zan ka riahpui che tih i hria em? "

      Sawmtei a phu zuk a, Vanneitluanga'n a kuahna ata chu inla hrang hretin a en chho ho mai a. Vanneitluanga erawh a khi suk thung a. 

      Sawmtei chu a lo nui chhuak hawk hawk a, " A chhangchhiatthlak e", a ti a. 

      "  Engtin nge kan awm, han sawi teh"

    " Nakinah kan sawi dawn nia"

   " Awle"

   " MALSAWMSANGI? "

    "Aw"

     " Ka hmangaih che"

   " Tluang?"

     "Aw"

   " Ka hmangaih che"

     " MALSAWMSANGI! 

*** HRINGNUNAH HIAN HARSATNA KAN PALTLANG DAN HI KAN HLIMPUI BER LEH SAWI NUAM KAN TIH BER THIN A NI FO***

                           A TAWP TA 

( Duhsak taka min chhiarsak Tu te in chungah ka thinlung zawng zawngin lawmthu ka sawi e☺ mangtha muttui vek ule🤗 )