MALSAWMSANGI-7

MALSAWMSANGI

MALSAWMSANGI-7

Ziaktu: Cck Lalchhuanawmi 

           A hnathawk bang haw intifai hliau tawh mah se, a taksa khur nasa lutuk tihziaawm nan choka lama bathroom lamah chuan; a inleih nghek nghek mai a. 

           Sacrament inna no khat lek pawhin a taksa khur nasa lutuk chu tui mai mai ai chuan a tiziaawm ngei ang! 

           " Tluang, lo let leh vat rawh aw", tih ri a hriat rual chuan a hma zawna bang chu a hnek nghal chawrh. " Rose", tiin a phun sep a; " Kalsan lo tur che kha ka ni asin, min ngaidam rawh". A tap khur zawih zawih mai a. 

             Tui chuan a inleih leh nghal bawrh bawrh mai bawk a, a changin bang a hnek thul. 

*******

        Ziaawm deuha a inhriat hnu chuan chhuah a tum a, inthlakna tur pawh keng lut loin; a thawmhnaw hak ang ang nen a tlan lut tawp kha a ni si a, a huh zawr hnap tawh mai bawk nen. 

        Bathroom kawngkhar hawn tuma a ban chiah tihah chuan, a hnung lam atang a hriat than em em àw hian, " Tluang, min kalsan suh, keimah chauh chuan ka hlau", tah àw tak maia a tih chu a hria a. 

         Rang takin a hnung lam a hawi nghal a, hmeichhe pakhat; a nghawnga hrui invet, sam uai thla hnuang mai; dàng bil bel tak lo uai thla a hmuh rual chuan a thu thla dawt nghal a. 

         " Rose... Rose... ", ti chuan a lu chu a tuai nawk nawk a." Mangchhia mai ni turin ka duh che, mahse; a tak a ni bawk si a", a ti ngawih ngawih a. 

            Hei vang hian lawm harhfím kàka a awm duh thin loh! 

           Hlau àw leh tah àw inpawlh chunga, " Tluang, min chhan rawh", tih lo chhuah lehna lamah chuan bucket chu a vawm chawrh mai a.

           " Rose... Malsawmsangi... Malsawmsangi... Rose... ", tiin a au pawlh vak vak mai a. Bathroom chhungah chuan a rilru mai ni lo, amah leh amah chu a insual a ni ber. 

*******

         Sawmtei chu a thawm hriat ruai ruai chuan a tiharh a, thawm lo chhuah lam nia a hriat chu a pan zel a. Bathroom bula a han din chuan a thawm hriat ruai ruai pawh a ring ve deuh ta a. 

         " Tluang", tiin a han ko a, a thawm hriat a reh nghal. 

         " Tluang, nangmah i ni em? ", tiin a han ko leh a. 

         Thawm hriat tur awm loin a reh nghal vawng vawng mai a. Sawmtei chuan a han ko leh a, chutah bathroom atang chuan chau tih hriat tak leh, a kut chang ding lam leh vei lam atanga thisen hnàm tiam tiam chung leh huh zawr hnap mai chung hian Vanneitluanga chu a lo chhuak a. 

          " Malsawmsangi ", thawk la halh halh chung hian a ti a,a chau ngawih ngawih tih a hriat. Sawmtei chuan tah insum zeta a hmui hnuai pet tan tan chung hian a en tlawk tlawk mai ringawt a. 

           Vanneitluanga chuan thutthleng(dining chair) chu dawhkan hnuai atang chuan pawt chhuakin Sawmtei chu a thuttir a. 

            Amah chu thingthiin, Sawmtei kut pahnih vawnsakin a mal chungah chuan a lu a nghat vang vang mai a. 

*******

         A hnu deuhah chuan lo hawi chhuakin, " Engkim theihnghilhin bul tan tha ang hmiang", a lo ti chhuak a. Sawmtein chhan ngaihna hre lo chuan mak ti takin a en reng ringawt mai a. 

        " Ka mawhphurhna i ni a... ", " In ni a", tih pah chuan Sawmtei pum chungah chuan a kut pahnih chu a nghat a. 

         "Pa Rema khan a sawi dik hetiang mai maia awm tur ka ni lo. Tun atang chuan in pahniha innghahna leh rin ber nih ka duh". Sawmtei mal chungah chuan a lu a nghat leh vang vang phawt a. 

          Sawmtei chuan inthiamlo tih hriat tak mai hian, " Mahse... Nangmah i ni si lo a... ", inhnít hlawp hlawp chung hian a lo ti a. 

          " Ka hria a lawm, mahse maw; i pum chhunga nunna awm a lo chhuah hunah chuan, 'Ka pa chu Vanneitluanga a ni', tiin a la sawi ang. 

            Hmangaihna leh ngaihsakna tha tak thlazar hnuaiah ka than len tir ang, chuan a nu pawh chutiang chiah chuan ka luah lum reng ang. Vawiina i thiltih tum ang kha chu ngaihtuah tawh lo bawk la ka duh a ni. 

            Hlim takin ka awm tir reng ang che u tih chu ka tiam thei lo che u, mahse; lungngaihna te, harsatna leh manganna te; chung zawng zawng lo thlen hunah pawh chuan ka chelh tlat ang che u ang a, ka kalsan ngailo ang che u tih ka tiam a ni", Sawmtei biang chul hliau hliau chung chuan a ti a. 

            Sawmtei chuan, " I kut a vawt a nia", a lo ti a. Vanneitluanga chuan kiai suk pahin, " Malsawmsangi, min ring ang em?", a ti sup a. 

         Sawmtei'n a lu a lo bu nghauh nghauh a, Vanneitluanga chu ding chhuak lawkin Sawmtei chalah chuan a tum khatna atan a fawp vang vang. 

          Sawmtei chu a lo tap chhuak hawk hawk a, Vanneitluanga chu a kuah thlawp a; Vanneitluanga pawhin a kuah let ve vat. 

           Tap chungin Sawmtei chuan, " Nangmah vangin ka huh vek a nia", a ti a. " Pawilo, kan inbual tha leh mai dawn lawm; nangphei chu i la inbual loin ka hria" , a ti chu Sawmtei chuan, " Tun atang chuan keimahin ka inbual ve tawh ang", a lo ti vat. 

        "  Teuh lo lutuk, ka naute te pahnih hi keimahina bual thin ka duh lawm; bakah heti lai hmun kan thlen atangin keimah char charin ka tifai thin che  bawk a", mit siai zeuh chung hian a ti a. 

       Sawmtein duh lo tih hriat tak hian, " Tun atang chuan ka ti reng alawm", tih pahin pindan lam a pan san hnà hnà a. 

        Vanneitluanga chuan, " I riltam em", tiin zui pah chuan a au lang lang a. Sawmtein, " Tam lo, nu Mamuani nen kan ei tawh", a lo ti ve vat a. 

         Sawmtein pindan kawngkhar a khar ri chawrh a, a kalh hmak bawk. Vanneitluanga chuan, " Bul tanna duhawm tak a ni", ti supin a khi suk a. 

**PIAN TLAI AI CHUAN PIAN LOH A PAWI** 

 ( A la tawp lo nia aw Lawmkima pawh a lang tan ve dawn chauh 🤭)