MALSAWMSANGI-8

MALSAWMSANGI

MALSAWMSANGI-8

Ziaktu: Cck Lalchhuanawmi

    

        

         " Malsawmsangi, ngati nge i tah a; i tha tiraw, na  i nei ami? ", hlauthawng tak hian Sawmtein mittui tling piau chunga a pum lo dawm vang vang a hmu chu Vanneitluanga chuan a va ti a. 

         " Naute hi a lo che a", Sawmtei chuan a hmui hnuai pet tan tan chungin a lo chhang a. 

         Thawk la halhin Vanneitluanga chuan, " A tha e, ka lo hlauthawng hman lawm; lo chhuah a chak ve tawh pawh niang", nui sang chung hian a ti a. 

         " Ti rawh le, tap tawh lo la; chaw ei a hun tawh hnathawha chhuah hma ka ngai deuh a vawiin chu". Sawmtei tahna a hmai bal vel te chu hrufai thuak thuakin choka lam chu a panpui a. 

          " Exam chu i duh tak tak maw ", tiin Vanneitluanga chuan a zawt nawn leh a. 

         " Aw ka duh alawm, bakah inah ka awm reng tho a; inchhungah  chet i phal bawk si lo, ka nu nen chauh kan awm bawk thin nen", Sawmtei chuan a ti nang nang a. 

          Vanneitluanga chuan, " Mut i duh em mai a", nui deuh titih chuan a lo tilet thuai a. 

       Sawmtein a en kar tih a hriat chuan, " Ka ngaihtuah vang che lawm, exam tur chuan lehkha zir a ngai a, chutah chuan rilru pek a ngai a; bakah nau neih i hnaih  telh telh bawk nen".

       " Tihian ti ang, nau han nei fel phawt la  a tharin, kum bul atangin i tan tha zawk mai dawn nia", a ti zawm leh a. 

      Tap deuh pur chung hian Sawmtei chuan, " Ka upa lutuk dawn asin, chutiang ka duh lo reng reng", a lo tilet a. 

      "Ngati nge tah hi i awlsam em em mai le", hahthlak tih hmel tak hian Vanneitluanga chuan a ti a. 

     " Ka hre lo", Sawmtei chuan a ti vin hlar a, " Ka puar ", tiin a chaw thleng chu a namsawn a. 

       " Exam ka phal loh vangin titau bur bur kher thin suh", a ti chu Sawmtei chuan, " Ka titau bawk lo", tiin a lo chhang a. 

        " Phal ve tawh mai la ka dil nasa tawh lutuk che, min ngaihtuah tih chu ka hre tho lawm; tunah hian thla rukna a hmang mek a, december thla ka neih hun tur a nia;

          Ngaihtuah la, exam hun a thlen meuh te chuan naute pawh a changkang tawh dawn bawk a; harsatna em em a awm ka ring lo. 

        Nurse tal zir ve ka duh a, Dindini pawhin ka zir chu min duhpui lutuk, mahse pawl sawmpahnih hi zir chhuah ve phawt a ngai si a", inthlahrung tih hriat tak hian Sawmtei chuan a ti ne ne a. 

       " Tunge Dindini chu? "

       " Kha kan in check-up apianga min lo pui ve thin Tu nurse kha mawle"

        " Tawng thei deuh kha", Vanneitluanga chuan a lo ti var a. 

       " Tluang", beisei tak chungin Sawmtei chuan a han ko a, Vanneitluanga erawh inngaihtuah tih hriat tak hian a ngawi vung vung a. 

       " Awle, a tha e ka phal e; i exam dawn nia, mahse; i pass ngei ngei tur a ni ang", a tih chuan Sawmtei a lawm ngang mai. 

       " Pass dawn lutuk tlat, Topper ka ni dawn lawm", nui ver ver chungin a ti a. 

       " Mahse, zirlaibu lei a ngai dawn a; lei tur te hi a la awm ang em aw" 

       " Lei a ngailo ang, Dindinin a zirlaibu hlui a la dahtha a; chu chu min pe dawn a lawm tlaiah hian a lo kal ang", a lo ti var a. 

       " Sawmte, Vana in awm maw? ", nu Mamuani chuan kawngka hawng pah chuan a ti a. 

       Vanneitluanga chuan lo chhawn vatin, " E ka nu, lo kal rawh kan awm alawm".

        " Vawiin chu hei in pa nen chhuah lawk kan ngai a, Sawmtei hi ka ngaihtuah deuh a; a khua lo har ang em aw ka lo ti deuh a", nu Mamuani chuan a ti a; in awm nileng thin an ni si a. 

      An inluahna neitu te, an inluahna chung lawka awm te; nu Mamuani leh pa Rema te kha tunah chuan an nu leh pa te an ni tawh a, Vanneitluanga hian nu leh pa zawn kan tih ang khan a zawn te an ni ( zawn tih hi ka sawifiah thiam chiahlo, in hrethiam tho ang🤭) 

       Sawmtei chuan, " Ka nu, min ngaihtuah loin ka pa nen tluang deuhin kal rawh u, ka khua har lo ang; Dindini lo len a tum a", nui sang chung hian a lo chhawn let a. 

      Nu Mamuani chuan, " Anih, kan han kal ang e kan lo haw hma ang; lo fimkhur la aw, ei chhunzawm leh tawh rawh u", a ti a. 

      " Chaw kha ei rawh", Vanneitluanga chuan a ti sup a. Nui var chung hian Sawmtei chuan, " Awle ka pu", a ti a. 

      Hlim tih hriat taka chaw a ei lai chu Vanneitluanga chuan a thlir leh veng veng thin. Sawmtei pawh tunah chuan ama tawkah a thau ve bam tawh mai. 

       Sawmtei chu lo hawichhuak thutin, " E takah Tluang, thil pakhat ka hrechhuak thut", 

      " Aw han sawi la"

       " Kan Tawngtai ngailo reng reng", Sawmtein a ti chu Vanneitluanga a chek hlak.