MALSAWMSANGI-9

MALSAWMSANGI

MALSAWMSANGI-9

Ziaktu: Cck Lalchhuanawmi 

           " I pasal chuan a ngaihsak tha hle mai che, i vannei takzet a ni", a bula thu chuan  a ti lang lang a. Sawmtei erawh a kiai suk thung a. 

           " Thla engzah nge ni tawh a? ", Sawmtei chuan a zawt let a. " Thla thum chauh mawle, kan hriat na pawh la rei lo", tiin a lo chhang a. 

         " A pa hi a lo kal ve lo em ni"

       " Kal lo e, ka hrilh a  mahse; titla mai turin min tia, keiin ka duh si lo a, kan inthen phah ta reng nih hi", tiin a lo chhang a. 

       Sawmtei chuan mak ti tak hian, " In innei lo maw ", a ti chu a bula thu chuan a lu a lo bukkhum nghauh nghauh a. 

       " Awi Sawmte, vawiin chu ka lo pui hman lo che nih kha tihpalh lutuk aw", inthiamlo tih hriat tak hian Dindini chuan a lo ti phei nuah nuah a. 

        Dindini lo lan takah chuan Sawmtei bula thu chuan, " Ka'n haw ve tawh ang e, anih le aw Sawmtei maw kha", ding pah chuan a ti a. 

        Sawmtei chuan lo chhawn vatin, " Aw ni e Sawmtei ka nia, anih chuan tluang deuhin aw", a lo ti ve vat a. 

      " Tunge a , a hming pawh a hrilh ve miah lo che"

       " Ka hre bik lo, a ho lutuk ka hming tal a hria a lawm", nui sang chung hian Sawmtei chuan a ti a. 

       Dindini chuan, " Awi thla leh khian naute hmel kan hmu thei tawh dawn sia, ka phur tawh e"

        " Lehkha i zir tha thei em? ", tiin a zawt zawm nghal a. 

        " Aw zir tha ve zel e", Sawmtei chuan a ti a. 

        " Khawiah nge in pa tawng thei zuah zuah deuh kha, ka ngei teh mai nia"

       " Dawrah a kal lawk nih kha, lehkhabu lei ngai a awm a; in pahnihin in tawng thei ve ve", nui ver ver chungin Sawmtei chuan a lo ti vat a. 

         Dindini chuan hmui tipawr deuh chung hian, " Kei ai a tawng thei, mi hnial a hrat si", an nui dar dar a. 

         " Haw vat ula a tha mawle, thlasik a intan ve tawh si a; Damdawi in phei chu hei a vawt leh vur tawh "

      " Nia a rei ve reuh tawh khawp mai"

     " Ka awmpui rei hman lo che ka kal leh phawt mai ang aw"

      Sawmtei chuan, " Awle kal tawh rawh, tha deuhin aw", tiin an inthlah a. 

       Sawmtei chuan a pum chu chul heuh heuh pah hian a khi leh vur vur thin a, " Naute, hrisel tha takin lo chhuak rawh aw", a rilru chuan a ti mawlh mawlh pah a. 

        A han hawi chhuak deuh chu a hma zawn takah hian Lawmkima'n a lo thlek vung vung! Lawmkima a hmu thut chuan a tihrilhhai hle a, ngaihtuah chhuah ni a nei ngai tawh lo tih a inhre chhuak nghal bawk. 

       Lawmkima chuan, " Sawmte... Sawm... te i ni tiraw? ", zawhna mitmeng deuh hian a ti a. 

       Sawmtein a en reng ringawt, sawi ber tur lah a hre lo; inthiam loh nain a khat nghal, a rilru a tina hle tih a hria. 

       Lawmkima chu a cher deuh a, rilru hah hmel tak hi a pu a; a mit khur thuk deuh hlekin ngaihtuah a ngah hle tih a hriat bawk. 

       Lawmkima chuan a exam emaw ti tur hian, Sawmtei thu chu chik tak hian a en reuh reuh a. A pum kawh ve lah tawh chu a hmuh hmaih hauh lo. 

       A hnu deuhah chuan rilru na tih hriat tak hian, " Sawmte", a lo tichhuak a. 

       Sawmtei pawh chuan harsa ti tak chung hian, "Lawmkim", a àw chu a hriat phak chang chang. 

       Lawmkima'n a va pan hnai deuh tihah chuan, " Malsawmsangi", Vanneitluanga a lo ding vang tawh mai a. 

       Sawmtei chu thoa Vanneitluanga dinna lama kal phei a tum chu Lawmkima chuan a kutah  lo man chawtin, " Sawmte... Sawmte... ", a ti ngawih ngawih mai a. 

        Vanneitluanga zawk chuan va pan hnai nghal vatin Lawmkiman a chelhna chu a va pawt thla a. " Ka rei deuh hlek a ka thiam loh ni e, ti rawh haw tawh ang le", tiin a kal pui nal nal a. 

         Sawmtei chu a hawilet tawh lo a, engtin nge Lawmkima a awm zel ang tih a ngaihtuah rauh rauh a. 

        Chutih lai chuan Vanneitluanga tang tung pawh chu a hre thei, a dara a kuahna atang chuan. A dar chu a hmer leh deuh ngawt ngawt thin a. 

 ***

     " Zanin atang chuan pindan chhungah hian ka mu ve tawh ang, pindan pawn lama mut chu ka hne ve deuh tawh;

        zanlaia i riltam vel emaw thil dangah pawh ni se, buaipui i ngai tho thin a min lo auhna lamah i chau chhe zo vek palh ang", nui sang chung hian khum bulah chuan a mutna tur chu a siam mawlh mawlh pah a. 

      Sawmtei pawh chuan a lo hnial lem lo a. 

      Vanneitluanga chuan Lawmkima'n Sawmtei kut a chelh lai a hmuha a rilru awmdan chu a hrethiamlo hle a, Sawmtei chuan a kalsan mai ang tih hlauhna chuan a tuam nghal bawk. 

    Sawmtei chuan, " Tawngtai theihnghilh lo tur aw", a lo ti var a. 

     " Awle awle" , a lo ti ve bawk a. 

   " Aw Lalpa ka rilru i hria, Malsawmsangi... ", a rilru chuan a ti nuah nuah a. 

***********

      " Tluang... Ka pum na lutuk", Sawmtei chuan Vanneitluanga chu a au vak vak a. Vanneitluanga chu lo tho chhuak thuaiin a tihtur hre lo lutuk chu a vei tawn chhen ringawt mai a. 

    Sawmtei chuan lukhama vawm chawrh pah chuan, " Ka nu te han ko rawh", a ti vin hlar a. 

    " Mahse, zanlai ni tawh sia tuilum in la a zia mai ka ring"

     Sawmtei chuan thinrim tun chung hian, " Nau ka vei a nih hi", a àw a fiak tha kel kawl hle. 

       Vanneitluanga a la ding khawng reng chu, " Vanneitluang", tiin a aukhum vak. 

       Vanneitluanga chuan, " A, a, awle awle", tiin a tlanchhuak nghal a. 

       A lo luh leh chuan Sawmtei chu pawm nawlhin a chhuah pui nghal a. 

      " Ka nu, ka pa tihian ka pawm chung hian kal pui mai ang u"

     " Awle pawilo ang, car chahbi ka tibo daih alawm le aw, a va pawi tak", pa Rema chuan a lo ti a. 

      Nu Mamuani pawhin puan vel keng chung hian, " Sawmte, tuar fan fan rawh aw kan thleng tep tawh a nia aw; Damdawi in kan hlat lo hi chu a vanneihthlak teh e", a lo ti ve bawk a. 

       Vanneitluanga chu ding chawtin, " Malsawmsangi, a na viau a mi, zún i chehin ka hria; naupangchhia reuh lutuk"

    " Vanneitluang", Sawmtei chuan na a ti lutuk chu a hmui hnuai a pet tan tan a. 

       "Vanneitluanga hi chu aw... khatia ding lo khan kalpui vat vat rawh che a tuibawm a keh tawh a nih chu, kal rawh che", nu Mamuani chuan a lo ti vat a. 

     " E e e awle awle"

    " Takah, ka nu; Laldinmawii( Dindini) lo be teh a", a tih zawm a. 

    Pa Rema chuan , " Khawi keiman", a be nghal a. 

***

   Dindini chu nau neihna room atang chuan nui  ver ver chung hian naute lo pawm chung hian a lo chhuak a, " Mipa a ni e, pa i ni ve ta e", Vanneitluanga kutah chuan a hlan a. 

      An lawm tlang ngang mai. Vanneitluanga chuan, " Malsawmsangi a  tha maw", a lo ti a. 

     Nu Mamuani leh pa Rema an lo Tawngtai ve mawlh mawlh pah a. 

      Chutah nurse pakhat hi lo chhuakin, " Naute nu hi a chau deuh thut a, thisen pek a ngai ang; thisen dah khawl sa kan neih loh lai tak a ni si a engtin nge ni ang? ", a ti a. 

       Vanneitluanga chuan a nu kutah naute chu dahin, " Keiman", a ti a.