PROFESSOR 'P' aka PROFESSOR POOPYPANT CHAPTER-1

PROFESSOR 'P' aka PROFESSOR POOPYPANT 

Chapter-1

Ziaktu: Cck Lalchhuanawmi

         Ina haw ka van chak lo tak em! Hnathawhna hmunah hian riah nghal theih se ka ti thin ngawt mai, mahse a theih ngawt si lo a. Engpawh nise mahni in nge nge chu pan leh phawt mai ang. 

         Ka ring reng a, zan lam dar sarihah pawh nise kan in hi chu keiman ka hawng hmasa ziah. A ngaitein hawng leh phawt mai ang aw. 

        Ka chun leh zua hmuh tur an awm lo. A pawi em asin, hmangaihna tel loa nupaa insiam ringawt hi; an fanu neihchhun ngawih ngawih pawh hian ka tuar ta a nih hi! 

            Tunah pawh hian an ngaihzawngte ve ve bulah an awm nge, han zawt ila hna laklawh; an chhuanlam hi achang chuan a ninawm mah mah thin. 

          An fanu neihchhun ve vang chauha inthen lo mai an ni, fahrah ka ni tur an duh loh vang. Huhh, tunah pawh hian fahrah nun nen eng nge danglamna awm chuang. 

      He an chhuanlam pawh hi ka ning, inthen mai sela, keimah vanga hrehawm ti taka an awm reng ka duh lo. 

       Tunah chuan kum sawmhnih laia upa ka ni ve tawh, tuna ka thawhna cafe-ah hian kum sawmpasarih ka nih lai atangin ka thawk tawh a. 

         He ka thawhna hlawh atang hian lawm college te pawh ka kal ve theih, chubakah ka mamawh leina a phuhruk bawk a, ka tan chuan malsawmna a ni ringawt, a neitu te an lo fel lehzel nen. 

        Ka nu leh pa te hian ka dil loh chuan min pek an tum thin si lo, kei lahin ka be peih mang si lo. A tul tawpah lo chuan biak ka chak vak thin lo. 

         Awi...... Ka ngaihtuahna tak hi chu aw...a va buaithlak tak em! Ngati nge mawni in ka thlen apianga hei ringawt ka ngaihtuah thin le. Hetiang ngaihtuah theih tawh lohna tur inah te hian engtikah tak haw ve thei ang maw!!! 

       Ka ning, inbual daih ang. Chaw pawh ka ei peih lo e a, mahni chauh chuan ei tui a har thin em mai. 

      Ka chalsam pawh tan a ngai leh tawh nih hi, naktuk chu ka u te inah riak leh daih ila ni mai lawm. Ka fapa pawh ka ngai ve tawh lawm le. Lunglei lamah min pheisan hnai tawh bawk si. 

       Naktuk atang third sem. kan tan leh dawn chu nia, home science kan zir belh tawh dawn sia English chu ka ngai ngawt ang. 

       E, takah professor thar a awm dawn te kha an tia. Mipa nge hmeichhia ni ang aw...Thinchhe deuhte hi ni lo se. 

*******

     Khua var leh ta, zing thawh ngai tawh lo hian han muhil hlen thin ila; ka duhthusam hi thleng ngai thin si lo le, lawmthu sawina nei leh phawt mai ang. 

      Khaw'nge tarmit hi ka dah, hetah hi le. Vawiin chu inhaler pawh lei a ngai. Thawmhnaw hakthlak pahnih vel hi ak tel ila... Ka insiam zo e. 

      Inhnuai lamah chhuk tawh ang, hnathawha chhuah a ngai bawk si. Kan in hi a chhawngin awm ve reuh a, a chung lamah kei ka awm a; a hnuai lamah ka nu leh pa te. 

       Inchung lama ka awm hi ka lawm, an inhau thawm ka hre tha thei lo a. Kan in hi pawn lam atang chuan nawm hmel tak pawh a ni, mahse; a chhung erawh kei chuan nuam ka ti lo, inchhungkhur changkang lutuk vel aia mamawh dang ka nei zawk si a. 

     Lalhmangaihi. Hei hi ka hming, hmangaih ka ni leh lawi bawk si lo, hahaa... 

       Chutiang ngaihtuah hman ka ni lo, hnathawha kal ka ngai; zing dar sarih atang zan lam dar sarih thleng ka thawhna cafe saw hawn thin a ni a. 

         Tunah chuan college kal a ngaih leh tawh dawn avangin zing dar sarih atanga dar kua thleng ka thawk ang a, tlai lam dar thum leh dar ruk inkarah ka thawk leh tawh ang. 

         Tihian ei rawng bawl loin chhuahsan thin pawh ni ila, engmah an sawi ngai chuanglo. Kan awmdan hi kan lungawi tlang em, cafe-ah inhnawhpuar a ni leh mai kei chu. 

*******

       Dar kua leh chanve, ka seat-ah awm hahdam leh veng veng phawt ang. 

       " Angaih, lo ding lawk", Faka tak hi chu aw, engtak chu min hrilh leh dawn ni maw. Ngaihzawng lam a sawi leh dawn ni chiang, ka va ning tak. 

     " Angaih, star Tu deuh che ka hria", kha maw, ka rin dan reng. Hepa tak hi chu aw. 

    " Enteh maw, tuna mi hi chu maw hmeltha bawk si, fel bawk si, thiante care thiam bawk si, si hlir sang tam tak a ni mai", a thiante hi chu a tan ve teh e. 

    Tiang hian a sawi ziah tute pawh, mahse ka engah teh vak an thawk lo; ngaihzawng neih tih vel ka peih lo, bakah ka hriselna a pan. 

     Ka chhan lawk loh vang nge ni, " Tun ami hi chu nihpui ve tawh rawh, midang ho i hnawl zel a, ka inthlahrung thei lutuk a nia rem loh thu sawi ziah ngai mai. Piantirh atanga single tluan thak i tum a mi", chupa mai mai chu. 

     " Nui suh", a lo ti hlak. Ka nuihza tho tho, tuna a thusawi leh a hmel kha inhmeh reuh em alawm. 

     " Ngaihzawng ka nei lawm", tiang hian ka chhang ziah zel, a hrethiam tho; aih ka tih na tih a hre hneh tawh lutuk tlat. 

    " Huii, a tha e, kha i ngaihzawng i damdawi bur nen khan duhsakna ka hlan a che u", nui huah huah chungin a ti a, a kal ta. A sawifiah leh vek tho ang, a thianpa bulah chuan. 

      A dik, ka ngaihzawng chu he ka damdawi bur inhaler hi a ni. 

      College ka kalna hi Faka pa college din a ni a ka pa pawh hian a puibawm ve thin, ka pa leh a pa hi Inkawm thin an ni a.       

       Chuvang nge ni Faka pa pawh hi ka hmu tha thei tlat thinlo, ka pa awmdan ka hriatchian lutuk vang te pawh niang. 

      Mahnia awm hi nuam ka ti ber a, ka thiantha ber chu ka ngaihtuahna hi a ni a; ka lo kawm leh veng veng thin. 

     Mi kan rel zuah zuah a, kan fak bawk a; kan tap bawk a, kan inhnem leh bawk a; kan nui leh vur vur thin. Kan bengchheng ve thei lutuk. 

     Thian dang hi kan ngai lo ve em, college ah pawh thian tia sawi tur ka nei teh chiam lo. Class khata thu ho na na na chu inhriat loh theih loh a. 

        Mahse, a hranpa taka kawm ka nei chuang lo, mahni te chauh  hian ka ni mai, classroom ah pawh tlar hnung kil ber tukverh awmna hi ka duh ber a, ka thutna ber pawh a ni. 

     Ngaihzawng lam ka ngaihsak loh bawk avang hian classmates te tih loh chu mipa han hriat ka nei lo a, classmates teah pawh hriat mumal ka nei lo, Faka a ni leh mai a. 

    Mahse, Faka hian min star Tu hi min hrilh ve thei ziah, nge ni a amah hian a tilui ve hrim hrim, ka hre tawh bik lo. 

     " Good morning Sir"

  Saw saw mi le professor thar chu, a hnung bera ka thut vang nge ni ka hmu tha thei lo; ho lutuk chutiang a! 

     " Morning, in professor thar ka ni a"

   Awi le! A àw van pa. Het, chutiang ngaihtuah lo tur. A hmel hmuh chian ka van chak! A ti leh ta. 

    " Vawiin chu first day a nih angin hun ka la rei lo ang a, mahse lecture ka pek lai che u chuan classroom ah hian ka aw chiah ka hre tur a ni".

    An phun sep sep mai, an duh lo ngang hlawm a niang, mahse Faka leh a thiante an awm a, kan classroom hi a reh tak tak thei lo, lecture pek lai pawh nise. 

      " Chuvangin in lo mu a nih pawhin pawi ka ti lo, in bengchhen lohna tur a nih phawt chuan ka duh zawk ang. Pin drop silence ka duh ber. "

      A khai a! Pin drop silence tih vel, Faka leh a thiante an awm ka tih kha, professor thar pawh hian ngaiah a la nei vat mai ang.