PROFESSOR 'P' aka PROFESSOR POOPYPANT CHAPTER-3

PROFESSOR 'P' aka PROFESSOR POOPYPANT 

Chapter-3

Ziaktu: Cck Lalchhuanawmi

        Ka hmui a rawn chuktuah!!! 

Ka puar awp awpin ka hria, min ham nge mawni, boruak min pek a tum ni berin ka hria. Ka mit ka chhing tlat, an chhuak mai ang tih ka hlau. 

        Ka thawk pawh a dik tan, mahse lukhum duma chuan ka sam karah a kut rawn rawlh lut tanin dam deuh hian min fawp tawh zawk a. Ka mengchhuak hliai a, a vawikhatna nih vang nge mawni awmdan tur ka thiam der lo. 

        Ka chechang pawhin ka hre lo, ka mutte a chhuak zawkin ka hria; ka buai leh tan dawn! Tawp a tum der mai si lo, a va buaithlak tak. 

       Namsawn ka tum lahin a uar sauh emaw tih tur a ni, kei sa pan thing theng tan chuan hneh a har, a pa lian ve angreng reuh khanglang ang lehnghal a. 

       Ka beng bulah zawi sap hian, " Muthilh tum rawh", a ti a, ka nghawng a nul thuak thuak nghal! 

       A thluak a buai ta nge mawni le, ka chungah engmah a tihzawm loh ang tih engtin nge ka hriat theih ang. 

      Muhil turin min ti a, a thiltih lai tawp a tum chuang bawk si lo ka va ngei mai mai tak. 

        Het, chi loh lutuk a kut a nghal tan. "Ka mu dawn, ka... ka... muthilh ka tum ang", ka tichhuak thei hram, a kut ka vawnsak nghal vat bawk. 

        Min mut that tirin ka àwmah a lu a nghat vang vang a, muthilh a tum ve zawk mawni,  zanin teh thut chu engtak chu hria ni maw! 

***end of flashback***

      " Ka va hre mai tawh lo ve", tiin Remi bulah chuan dawt var ka hrilh ringawt, ka la hre reng sia. 

     Khami zan atang khan a lo lang leh tawh lo reng reng, zinga ka harh khan a lo awm tawh lo a, ka chungah engmah thleng phei chu a awm lo, mahse wardrobe ka hawn khan inhaler a lo awm reng sia! 

      A hmu lo der leh ka harsatna hmang tangkaia khatianga ka chunga a chet vang khan ka ngei hrim hrim, amah vanga ka thàwk pawh dik ni tho mah se ka ngei hrim hrim. 

          Lo kal leh poh rawh se, a hre khawp ang, lukhum a khum tlat thin vangin a hmel kan hmu thei lo kha ni a, a hming lah kan hre si lo a lukhum duma kan ti ve ringawt, vawiin tlai chu a lukhum ka hlih sak ngei ngei ang. 

      

    Saw le, a lo thleng nghal mai lawm, hmeltha sawi chu koh aiin a hnai🤭 

       A inthuam dan a la thlak lo, jeans dum, T-shirt dum a nghawng bial lam, kamis ban tlawn niin a ban erawh a thlep a, a dum leh var intial a hma phelin T-shirt chungah a ha a; a bag ah(ak) pawh dum tho, converse dum, lukhum dum, mahse tun tum chu mask a vuah tel tlat tinge le mask pawh dum tho, huiii.... 

        Cafe-a ka thawh atanga thla thum lina atang khan a khat tawkin a lo lang thin a, achangin kum chuangte a lo lang lo a, a lo lan chhunah lah a inthuam dan ngai zel! 

        Tunah lah khami zan atanga bo leh vang vang kha kum khat hnuah a lo lang leh ta, eng chu hria ni maw aw... 

     Tinge le ka ngaihtuah vak vak kher le, a mak thin lutuk em mai. Hna thawk ang. Ka chiauau peih lo, coffee pawh Remi pektir mai ang. 

      Vawiina kan professor ka hmuha ka awmdan kha mak ka la ti reng, tinge le khatianga ka awm le, mih hmuha a hmel buai ve deuh kha! Min hmutha ve ni hrim hrim, awii ka ngaihtuahna tak hi chu aw... 

      Remi tak hi chu aw... min nek tlu dawn lawm le, ka ngaihtuahna ata min tiharh alawm le. 

     " Eng nge ni ta? ", zawi sap hian ka ti a. "En teh, kan lukhum duma sawn a zawng chiang che lawm, ni lo a duh zawk che niang. Coffee ka va pek khan nang hi a lo kawk daih che, tawng a tum bawk si lo

      Coffee hi nangmah ngeiin va pe rawh, chuan a tawng ri kan la hre miah lo, tun tum chu a àw eng ang nge ni tih hriat theih nan biak tawng ngei ngei tum rawh aw", a lo ti, a va buaithlak tak aw. 

         Kan lukhum duma pawh chu keimah kherina ka va pek eng nge tulna le aw, ka peih lo sin le. E takah, a lukhum hlihsak kha, mahse mask a vuah sia... ni dawn tak e, coffee in dawnah te chuan mask a phelh ve ang chu mawle. 

     Dawhkanah chuan coffee no chu ka dah chawrh a, a phu eih lo nia, a lo hawichhuak e min thlek ang vung vung lehnghal a ka tarmit kar atang hian ka han melh let ve hrep ang e. 

      Customer anihna angin polite deuha biak a ngai bawk si ka va han peih mai mai lo tak. 

    " Sir, mamawh dang i la nei em? ", nui sang chungin ka tih ve kha. A lu a bu nghut a, a duh tur chu ka zawt leh nghal vat a, a tawng ve dawn ta niang. 

      Min kawkin, " You", a ti bul hmuk! Chupa mai mai chu... 

    Lalhmangaih insum insum, hahdam rawh hahdam rawh... 

     " Coffe pawh in tawp suh", coffee no chu lain ka kalsan nghal vang vang. A va han zam lo mai mai tak, ka haw so bawrh bawrh. A chhuak zui nghalin ka hria pawi tawp lo, chhuak nghal vang vang rawh se, lo kal tawh lo sela tha ang. 

     Ka ban hun ka tlingtla ve  leh ta e, mahni in nge nge chu hreh tak chung pawhin pan leh mai ang. Taxi chhungah ka thu lut fel chiah tihah lukhum duma a rawn thu lut ve leh nghal! 

     Eng chu hria ni thin maw aw... 

Driver bulah chuan, " Ka pu, hepa hi thlah hmasa zawk mai rawh", tia chhuah ka tum chu ka kut a lo man, a vuan nghet em em Mai lehnghal. 

    " A na", ka ti hlak a, " Chawlhhmun", a la ti ta deuh deuh. 

    " Tu nge maw i nih le? En teh, ka harsatna remchangah i la a, khatiang ang kha chu a thleng tawh dawn lo nia aw", ka ti vin hlar a. 

    Lukhum a khum tlat tih tawh nak laiin mask a la vuah zui bawk nen, a hmel awmdan pawh ka hre thei lo e a. 

      Driver lah chuan, " In intithiam lo deuh ami? ", a lo la ti zui. " Ka pu, kan inkarah engmah a awm lo, misual a nih hi, police call vat ila a tha ang", ka ti chu a duh lo ngang a niang, rum nghutin ka kut a hmer na zual sauh. 

       Driver pek lah chuan lukhum duma hnenah chuan, " Thiana, tiang hunah hi chuan  a thiam zawk hi mipa pawh ni ila, kan tlawm hun tak zawk a nia, chuvang chuan ngaihdam dil te hi hreh lo tur a nia aw", a fuih zawk nge mawni le. 

        Lukhum duma lah chuan, " Sorry, sorry", a lo tih zawm, kan professor àw pa deuh kha ka hrechhuak zawk! Ngati nge le? 

     Ka ngaihtuahna ka lo kawm zawk chhungin taxi chu a tlan ta mai. 

      " Awi ka pu, ding rawh, ka chhuk duh", ka ti hluai a, kan lo tlan thui hman angreng viau ni tur a ni, kawng sirah chuan a ding a, a la reh thuap zui! 

       Lukhum duma chuan hahthlak ti hmel deuh hian a rum nghut a, min bawhbet nghal ta mai! 

     Ka tal vak vak a, namsawn ka tum ve tang tang bawk, driver lah chuan min puih a tum lo nge mawni? 

     Ka hneh ngang bawk si lo thinrim lutuk chu ka thaw kàwk kàwk a ka buai tan leh dawnin ka hria. 

     A mask a phelh a," Shhhhh, shhhhh", ka nghawng a fawp dan dan a, ka va ngei tak. Ka mittui a luang ngiai ngiai a, tap chhuak lo turin ka hmui ka pet ringawt. 

       Maw! Engmaw!! Engmaw!!! Tunah khan eng nge a sawi? 

       " I miss you", tiin a sawi, chu chu eng nge awmzia? Lalhmangaih a awmzia i hriat reng kha... 

     A dik, a awmzia ka hria, tu emaw a ngaih thu a sawi, chu pawh ka bulah ngei a sawi, driver nen kan pathum chauh kan ni, driver chu a ngaih thu a hrilh awm lo em Mai, keimah ngei ka ni! 

      Kei hi min ngai a maw, ngaitu ka nei ve maw!!!  

    Ka lungchhe lutuk ka tahchhuah tak vang nge mawni innemkhalhin min en chhuk run a, ka tarmit a la sawn a, keiin ka mittui kar atang ka en chho thung.

      Lukhum a la khum reng bawk nen, bakah a thim deuh ruih mai bawk si a, a hmel ka la hmu thei ta chuang lo. 

    Ka hriat ngai miah loh hnen atang ngaih ka nih thu ka dawng, kei Lalhmangaihi hi hmangaih ka nih thu ka dawng leh ang em? 

    Ka ngaihtuahna tak hi chu aw.......