PROFESSOR 'P' aka PROFESSOR POOPYPANT CHAPTER-4

PROFESSOR 'P' aka PROFESSOR POOPYPANT 

Chapter-4

Ziaktu: Cck Lalchhuanawmi

 

      " Ka pu, lukhum duma chuan kei hi min hruai ziah turin a ti che maw? ", tiin driver chu ka zawt tawp, mak ka ti em alawm. 

     " Aw, kha pa khan nang hi i hnathawhnaah hruai che a thlah leh thlap tur che in min ti alawm, khami zan kha ka vanneihpui ta a nih hi", a hlim tih a hriat, engtak chu tihsak ang maw. 

    " Eng nge i sawi awmzia chu? ", ka zawt let leh. 

     " Khami zan, in in atanga kan haw kawngah khan, ' Hmài hi zingkarah hnathawkin a chhuak thin a, tlaiah tun ang hunah khan a bang thin a, chu chu nangman hruaiin thlah thin ang che', min ti a"

      Hmài maw ka nih? "Chutiang chuan a sawi tak tak maw?"

    " Sawi e, fee pawh min pe thlap a, bakah kan chhungkua min tanpui nghal a, kan lawm tak tak a ni".

     Chuvang ni maw, a tuk atang khan taxi driver hian min hruaiin tihian min thlah leh thlap a, kan lukhum duma pawh chu... rin ang em em chu a lo ni lo nih dawn hi. An chhungkua a tanpui nghal a, zawh ka chak viau naa chhungkaw thu hla ni bawk si a, ka ngam chiah lo. 

      Tu chiah nge maw a nih le? Tinge kei hi min buaipui em em le? A landan a ngai reng, a tawng tam lo a, a tawng chhunah lah ' sorry ' emaw ' miss you ' hi a ti ziah. 

     English-a sawi lo in mizo tawng te hian sawi ve tur a nia. A lo lang zeuh zeuh ka tih tawh kha. 

        A lo lan chhunah chuan kan in thleng hi a lo chuang tel ve thin min thlah ve a ni ber ang chu, ka kut a chelh tlat thin a ka hnial em em bik chuang lo, hnial pawh ni ila tihluihna a hmang leh dawn tho. 

      Zanin pawh a lo lang lo, tihian zan hnih a ni  ta. Ka ngai thar riauin ka hre lehnghal! 

     Ngawi rengin awm thin mah se ka thla a muang tih ka hre thei. 

     Mah se, amahah hian kan professor kha ka hrechhuak ziah, a pumrua leh àw ah hian. A hmel chu la hmu hauh lo mah ila, kan professor nen hian an inchhung deuh reuh a nih te ka ring. 

       " Ka pu, a hming i hria em? "

  " Hre miah lo, i hre zawk lo a mi? ", ani pawh chu. 

    " A nih, a hmel i hmu em, eng ang nge?", ka zawhna pawh chu a, pawi tawh lo. 

    " Ka hmu hauh lo mai".

 Driver bulah sawi lo turin a ti chiang mai. 

    " Ka pu, i bulah engmah sawi lo tur in a ti che mi? "

    " Chutiang engmah a sawi lo, lukhum a khum sia".

    A dik ve reng, lukhum a khum. Hmài tih khan min sawi, a van nalh reuh. 

   " I hlim hmel hle mai a", 

Ka lo khi chhuak a ni maw... 

*******

     Awi a na lutuk, ka lu a na lutuk. 

Bangah ka lu ka tauh chawrh, professor lah chuan min lo la en kur zui. 

      Hriati te vang vek, tun thlengin tlar hmasa berah ka la thu, ka ning tawh e... 

     Tlar hma ber chu dawhkan bawha mut a rem chiah si lo, rem lo piah lamah mawi ka ti chiah si lo a. Ka mutchhuah hunah pawh ka mu thei lo, ka mutthlukna lamah bangah ka lu ka tauh lehnghal. 

      Chubakah kan professor laka ka rilru awmdan thin vang hian tlar hma ber chu ka zo lo, a mi uap hi na ka lo ti ve em em ringawt zel. 

        " Please, don't make any noise"

Ka tihluih pawh a ni mile, ngeiawm reuh mang e. 

       Bakah, lecture a pek laia ka intauh ri hi a àw tih lohah chuan thawm awm hmasa ber ni ang chu, chuti teh luaa ring pawh va ni suh. 

      Ka lu chu va na reuh tak! 

Lukhum duma lo lan lohna pawh rei leh tawh hle mai, kum chuang a bo leh dawn niang a! 

      Taxi driver erawh kha chuan a dan pangngai tein min hruaiin min la thlah reng tho, a chanchin han zawt ila a hriat loh thu bak a sawi ngai si lo. 

       Ka rilru va buai tak, tun ang hunah hi chuan lukhum duma ka ngaihtuahnaah a awm a, college ah lah kan professor kha ka ngaihtuahnaah a awm thung a. 

    Cafe - college... Eng emaw tak inzawmna an nei niang a, an pumrua leh àw phawiah lah lukhum duma leh professor te an inang em em a. 

     An chezia leh mizia te thleng hian, lukhum duma hmel hmuh hi ka chak ngawt mai. 

          Professor thar kan neih niah tak lukhum duma a lo lang ve leh chiah bawk. Awi ka ning a! 

******"

    " Guys, kan professor thar kha , routine ah khan 'P' tia an dah chhan ka hre tawh", Hriati chuan a lo ti lauh lauh mai, a rawl a ring tha narawh e. 

     "Eng tihna? ", an lo ti sup sup mai, hriat an chak hlawm teh e, dik tak chuan keipawhin ka hre chak. 

    " Puia tihna", Hriati lah chu a khi sung mai. 

   "Puia" tihna maw, eng Puia nge ni ang le? 

       " Lalhlimpuia"

Maw!? Lalhlimpuia. 

     " Mahse u maw, section 'A' ni tain ka hria an sawi danin, lecture a pek laiin nui an lo awm a, a thinrim lutuk an ti" , Hriati thiannu Tetei chuan a lo tihzawm. 

     " A va ho tak"

  " Chutiang em em te chu a"

" Keini section 'B' hi kan fel ber, first day-ah pawh a sawi kha bengchhen a duh loh thu, ngaihtuah ula tun thlengin bengchheng pawh kan la awm lo, Angaihi intauh ri tih loh", Faka chuan a lo ti. Ka va ngei tak min sawi tel kher ngai lo. 

      Mahse, pawi lo kan nui ho dial dial a. 

Kan professor chu Lalhlimpuia maw lo nih a, professor 'P'. 

    " Lecture kan pek lai che u hian fiamthu kan sawi ngai lo, Lalnunsanga te anga hun urhsunah pawh fiamthu sawi mai thei ang kan ni lo", a ti thum dut dut mai. 

     A thinrim la reh lo niang a, Lalnunsanga han sawi daih chu! Kan professor chu... a va nuihzatthlak loh ve. 

     Faka'n ring mangkheng hian , " Yes Sir", a lo ti, ka phu thelh lawm le. 

      Professor lah chuan, " Excellent, lecture ka pek lai chuan haha. pawh in ti tur a ni lo", a ti a. 

     Hahafazelafalam... Ka rilru chuan a lo tihzawm. Lawkin, tunah khan eng nge ka sawi, hahafazelafalam! 

    Professor Poopypant! Aw Lalpa... 

Naupang thluaka awm nuih theihna hahafazelafalam nuai reh a tum kha, captain underpant... 

    Ka ngaihtuah mai mai chu! 'P' awmzia an zawng ve ngei a poopypant tihna kha lo nia, ka nuih va za reuh tak. 

    Ani pawh hi professor 'P' kha nia Puia tihna nia... bengchheng a duh lo ve tho bawk a, a inhmeh dawn lutuk tih pahin  ka hmaa dawhkan chu ka chum nghal thuai a ka khi sung mai bawk nen mi melh rum teh e kan professor chuan. 

      Ka nuihza tawlh tawlh bawk si, ka kà ka hup ringawt. A thinrim meng phar kual vel saw hlauhna ai chuan nuih lamah a kal tlat, va buaithlak tak. 

     " Khaw'nge i ngaihtuahna i dah? "

Nangmahah tih ka van chak. Nui tawh suh... 

    A la mengrum nasa, min ei zawh vek duh hmel a pu, ka nuihza zual sawt. 

    " Chhuak rawh", a ti vin hlar mai. 

Tlem chuan ka hlau ve ta, ka nuihza tawh lo khawp mai. 

    " Sorry Sir "

" Chhuak rawh, classroom pawnah sawn va ding rawh"

     Ngaihdam ka dil ve reng sia, min la thinrim khum ka ti, pawi lo chhuak daih ila ni mai lawm. 

      Pawn boruak chu a zia zawk daih nih hi, a mi uapna boruak ai thlawt chuan. 

    Mahse, tinge le ka lungchhe dawn tlatin ka hria, khatia thinrimna tur engmah a awm lo sin le, ngaihdam pawh ka dil sia. 

     Tiang hian hrem ka la tawk ngai lo, min hrem hmasa ber Tu a ni. Lawm tur nge thinrim tur pawh ka hre lo e a, mittui a ko tlat. 

         Ka hmaah Tu emaw ding en tura ka hawichhuak chu professor kha lo ni. Min chík teh e, ni dawn tak, ka mittui a luang, ka hru thuai thuai nghal a. 

     Professor chet dan chuan lukhum duma min hriatchhuah tir, ka ngai tawh viau bawk, engtikah tak lo lang leh ang maw! 

     Ka biang dawmin inthiamlo tih hriat tak hian, " Sorry", a ti sup a, a kal nghal nal nal. 

*** MI THENKHAT CHU KAN HRIATRENG NI TURIN KAN NUNA AN LO LAN CHANG A AWM CHAWK ***