PROFESSOR 'P' aka PROFESSOR POOPYPANT CHAPTER-5

PROFESSOR 'P' aka PROFESSOR POOPYPANT

Chapter-5

Ziaktu: Cck Lalchhuanawmi

       Tu hriat lawk va ni suh hmalam hun hi. 

    Faka'n a pa leh hmeichhe pakhat restaurant pakhata a hmuh dun thu min hrilh a, chiang tak chuan an inkawp tih hre lo mah se, an awmdan atang inhaw zawk zawk chu an nih loh arin thu a sawi a. 

      Min ring ngam a, a hrilh hriat hmasa ber ka ni. A rilru a buai ve khawp mai, ka khawngaih reuh lutuk, ka tawn ang hi tawng ve lo turin ka duhpui khawp mai. 

       Faka erawh chu kei ang lo takin nu leh pa hmangaihna thlazar hnuaiah zalen takin a seilian a, kei ve chu... Ka ngaihtuah zawng ringawt pawh hian ka thinlung hi vih ang maiin a na ngawih ngawih thin. 

        Kum sawmpasarih ka nih atang veng hla takah hnathawkin zing leh tlaiah ka chhuah thin a ngai a. Khang kum sawmparuk chhung zawnga ka school kalna senso tur pawh ka dilchhuah ngawng ngawng an ngai thin a. 

        Ka kum rualpuiteah khan hnathawk an awm pawhin ka hre lo, ka hriselna derdep chung pawh khan ka tilui hram hram zel a. 

     Mahse, khang khan tun thleng hian chhelna min pe zawk a, chakna min petu an ni lawi bawk si. 

       Ka nu leh pa te inkarah hian eng nge awm ang le? Kei hi ngati nge min hrinchhuah kher? Zawhna hlirin ka khat, a chhang theitu ber te lah an hetih tlat bawk si. Chiang taka ka nu leh pa hmel ka hmuh lohna hi engtia rei nge ni tawh ang... ka hre lo. 

       " Hmài, i tha em? ", a ding dawt a, a lo hawiphei nghal thuai bawk. 

     " Aw... Ka tha e", ka nui lui sak a, a har khawp mai. 

   Dik tak chuan ka tha lo, englai mahin ka tha ngai lo, dam lo reng ka ni a, dam ni reng ka nei lo bawk. 

     " Hmài, i tha tak tak maw? ", dam diai hian min zawt leh a, a awm ve reng e, zanin chu ka lungchhe thar leh em a ni. 

     Ka mittui ka hru thuak thuak a, nui lui leh sakin, " Ka pu, ka tha lawm, tlan leh tawh zawk rawh, zan a rei lutuk palh ang e", ka ti a, ka àw chu a làwi tein ka hria. 

      A chhunga chengte chu eng mi pawh lo ni ila, kan In nge nge chu ka pan leh thin si a nih hi maw! Ka inhumna tura ka neihchhun a ni miau si. 

*******

       Tunlai chu vanduaina nge harsatna zawk nge a kal tluang khawp mai, mahni tawkah rilru a hah thar duh riau. 

     Kan professor lah hian rum deuh deuh hian min melh ziah a, a pawi ka sawi awm ka hre ngai si lo. 

     Min hrem atang eng thawm mah a awm leh tawh lo, nuih pawh ka nui ngam tawh teuh lo, nuih chu sawi loh khík vur vur ringawt pawh ka hlau. 

     A lecture pek lai pawh hian awmbo daih ka duh, Physics pawh ka haw ngawih ngawih tawh, tunah chuan amah pawh ka haw tel tawh. 

      Tiang em ema han khirh tak mai chu. 

A hrehawm zawk, ama chungchang ka ngaihtuah ringawt pawh hian ka hah. 

     Chu achhapah Faka lo ni bawk, tunah chuan a mizia, a engkim a inthlak vek tih theih a ni. 

       A ngawi ngúl tawh a, a hmelah lah a hah tih a hriat ngawih ngawih, amah ber hetia a awm achin, kan class thawm chu bengchheng tha tho thin mah se, a famkim thei tak tak lo. 

       

      Khu khu, lukhum duma ni chiang lutuk, amah a ni chiang lutuk. 

 " Sir sir, pawimawh lutuk ka chhuah lawk ngai", hmanhmawh tak hian ka ti hlawk hlawk a. 

    " Ngawi teh, i hre thiam lo palh ang, chemistry hi last period ah practical tih nghal a ngai dawn a", a ti muang ban churh a, kei ka hmanhmawh tawh bawk si, a kal liam hman ang tih ka hlau. 

   " A sir, emergency ", tih leh tlanchhuah ka rual nghal, lo la liam lo hram se . 

     Kawngpui velah te chuan ka zawng kual a, ka hawi kual ka hawi kual mai, mahse ka hmu miah lo. 

    

Ka hmusual mai mai aniang, keia pawh chuan eng nge ka hriat a hmuh ka chak em em a, khatia ka zawn vak kher ni atthlak lutuk mai.

       Tukverh atanga hmu mai kha ka nia, amah ang deuh pawh an ni mai thei a, mahse lukhum duma inthuam thin dan chiah chiah a ni bawk si. 

    "Angaih", ka hawi phei chu Faka a lo ni, a nui thaw ang lehnghal a. 

     Lunch break a ni a, kei erawh chu kan college chhunga hmun reh ve  deuh, thingkung hnuaia thutna an siamah ka awm daih thin a, hei hi ka seat ve liau liau. 

      Ka bulah chuan a lo thu ve a, mahse engmah phei chu a sawi lo a ngawi reng thung, ka khawngaih ngawih ngawih. 

    " Ka nu hi ka chhuahpui daih dawn ami le ka ti deuh a"

    " I nu i hrilh tawh ami? " 

" Hrilh lo", a thaw hawk a, " Ka pa pawh hi engmah thlenglo ang mai hian a awmdan ngaiin a awm reng bawk si. Ka nu nen an hlim dan ngaiin an hlim reng tho a, ka hrilh ngam thin lo a ni"

      " I hmusual zawk te ani lo maw, chutiang chuan ngai tawp la, hahdam deuhin awm tum rawh", ka tihsak a, a awih dawn em phei chu ka hre lo. 

   " I vannei ngawt mai, i nu leh pate hi an tha ngawt mai", a ti a. 

    Za vak loin ka nuihsak a. Ka hrilh ve vek zawk dawn mawni le, nge ni a amah hian a hre ve zawk ang aw? 

      Chutah ka biang tawn tawnah dawmin,"Angaih, veng khatah awmin kan nu leh pa te an inhre tha a, keini pahnih erawh kan inbe lum lam lo e tiraw", ti chungin a thle tawn a thle tawn a. 

     Keipawh chuan ka biang a dawmna a kut chu ka vuan a, a thlek lohna lam apiangah thle ve sekin, " Faka, veng khatah awm mah ila, kan in a inhlat a, bakah i thiante avang chauhin min lo be thin a", ka nui lui sak a. 

    " Kha kha chu... ", kan nui hawk hawk a, kan inbiak dan vel chu naupangchhiatthlak reuh lutuk. 

     Mahse nuam ka ti, pangngai taka kan inbiakna a ni si a. 

    " Angaih... "

  " Ei ahh"

" Innei daih ang hmiang"

Chupa chu, ka nui tawp chiang teh e, ka namsawn dawr a. 

     Nui hawk hawk chungin, " Fiamthu nih kha, i hmel kha", a ti a, a nui vak vak a. 

    A hnungah chuan ka chum dat dat a, a tlanchhia chu umin, " Misualpa", tiin kan inum kawi zar zar a, kan nui vak vak pah bawk a, tiang ang hun hi ni reng thei sela. 

      "  Tikhan Practical chu zawh a ni a, ban hun aia hmaah kan zo fel thei a, a lawmawm e. Chuan vawiina lecture pek laia tlanchhuak daih kha awm hnufualin hmanrua ho hi dah fel rawh se, midang chu a haw theih e".

      A zahthlak reuh e, ka tlanchhuah chhan lah ka hmu leh lawi bawk si lo. 

    Faka'n min lo nuih tet tet mai, ka va ngei tak, pawi lo, hnathawhna hmun chu a hun pangngaiah ka thleng tho ang.

         Ka zo fel ka bag ka ban chiah tihah kawngka inkhar ri thuai ka hria a, ka phu nghek lehnghal, rang taka ka hawiphei chu professor thar kha a lo ding vang mai. 

      Mi melh leh nghek tawh, ngati thin nge le, damdawi rui a nei thin mawni le? Ka hlau tan ta khawp mai. 

     " Sir, practical kan zo tawh a", hlau titih deuh hian ka ti a, practical room hi chhuahsan vat ka duh. 

     A thuhrimah chemistry ah te eng nge lo tih a tum le, ani te chu physics a ni sia. 

     " Ka hria", ti hlakin ka lam panin a lo kal a, kei ka lo tawlh hnung hret hret thung. 

     " Sir, practical tihna hmanrua vel hi dah fel tur in min ti a"

     "Ka hria"

Ka chil ka lem khalh a, " Ka zo tawh a", ka ti leh a, muangchangin ka lam panin a lo la kal tho. 

    Bang ka lo ngheng reng tawh! Eng nge tih a tum ang le, ka ngaihtuahna a vak thui ngang mai. Chutah tlanchhuah thut ka rilruah a lo lang nghal, ka ke te hi an khurin ka hria.