PROFESSOR 'P' aka PROFESSOR POOPYPANT CHAPTER-6

PROFESSOR 'P' aka PROFESSOR POOPYPANT 

Chapter-6 

Ziaktu: Cck Lalchhuanawmi

           Kan professor nui ngai lo tak hi chu aw... Lalhlimpuia te chu a la ni ta deuh deuh a. Tun atang chuan a hming thar chu Professor Poopypant ni tawh rawh se, nui ri ngai thei lo lutuk . Saw a thluakah sawn hahafazelafalam chhete tal pawh awm lo niang! 

     Ka nui lui talh dawn mi le. Ka rindan kha a dik dawnin ka hre tlat, kan professor khan eng damdawi emawni chu a ei chiang alawm! Mahse, lo ei ta ang sela, a thinrim tun emaw tih turin a awm lawi bawk si! 

      Ka theih chhung chu a hlata awm ka duh, hmannia chemistry lab ( lab— laboratory, bung hmasa lamah practical room tiin ka ziak ringawt dik tho mah se) chhunga thil thleng kha ka ngaihtuah zawng ringawt pawhin ka la t(r)im  uai uai thei. 

          Tlar hnung berah ka thu ta bawk a, min hmu chiang thei lo tho bawk a, a lecture pek lai pawhin ka mu ziah tawh ang, ka haw ngawih ngawih. 

" Angaih, Tu emaw hmeltha deuh hriat i duh ve em? ", nui thaw chung hian Remi chuan a ti a. 

     Keiin, " I bialpa ka hrilh dawn", nuih letin ka tihsak a. 

    " A ho em mai, hmeltha ka tih te chu ka hrilh thin lawm, mahse amahah bak rilru ka pe ngai chuang lo a"

    " Ka awih duh ang em aw... "

  " A nih chu a, tak takah tukina ka mi hmuh kha a hmeltha reuh tak tak em lawm ", Remi chuan a ti leh a. 

    " Nangpawhin i hrechiang lutuk", a tih zawm leh, Tu ka hriatchian chu ni dawn ni maw. 

     " A nih chuan han sawi teh", ka ti let a, a lai nge mawni le, " Khatia awmkual lo khan sawi ta che", ka ti hlak a, ka mi hriatchian teah Tu ber nge Remi'n hmeltha a lo tih chu ka hre chak. 

     " Aw  ka sawi dawn thinawrh", kan han nui leh rih phawt a. 

     " Tukina college i kal hnu rei vak loah lukhum duma lo kal a", a lo kal maw! a hlim hmel em em lehnghal Remi chu, engtin tak lo inti ang maw. 

      Hun rei tak hnuah a lo lang leh a, chupawh amah ngai ngawih ngawihtu ni lo zawkin a hmu hmasa lehnghal a. Remi chu ka thik dawnin ka hria. 

    " Chuan maw chuan maw, coffee ka va pek khan maw ", a la au ta ang lehnghal a, phur hluaina tur a awm mi le. 

    A thusawi leh chuan min thawng dawt mai, " A lukhum leh mask a phelh a, awi..... a lo hmeltha reuh lutuk a, keipawh ka à zo dawnin ka hria", ka thin a tawt up upin ka hria, lawmte lo lawmpui hi a lo harsa nih dawn hi! 

      " Chuan maw..... Lawmthu te min hrilh a, a àw pawh pa reuh lutuk, a inthup thei mah mah a ni, i chan ropui khawp mai", a la ti ta deuh deuh, mi elsen deuh nge maw ni le. 

           Ka va ngei tak, Remi a hnaih theih nan min lo hmang zawk te hi niang a? 

      Ka inkuangkuah tlat dawn, ka kut a chelh pawh ka phallo, zanin chu ka thinrim, Remi a hnaih theih nana min lo hmang vaih a nih tak tak phei chuan aw... 

       Tlaia a lo kal pawhin lukhum a khum tlat, a hmel pawh ka hmu ve thei lo, Remi pawhin phur deuhin coffee pawh a pe, zing lamah engtiang takin lo inchhai ang maw? 

        " Angry??? ", tih pah chuan ka kut a lo vuan a, lo  vai per lawpin, " Min khawih suh", ka ti hlak a, ka tah a chhuak rum rum bawk, ka inhrethiam tawh bik lo. 

     " Why??? ", a ti thum dut. 

Keiin, " English ka hrethiam lo", ka ti leh sak. Chuta tang erawh a ngawi leh hmak, ahma pawhin a tawng tam ngai lo hrim hrim bawk a. 

      Ka pindan kawngkhar nghengin a ding run a, a inkuangkuah tlat ve bawk. " Chhuak rawh, inthlak ka duh a nia", ka la thinrim reng. 

     A che eih lo, min thlek vung vung ringawt, ka va ngei tak. Dressing table-a inhaler bur ka dah chu la lawkin, " Haw rawh", tih pahin ka vawm chawrh a, nat phahna tur khawp hmanrua chu ni lo maw le. 

      Khumah chuan ka thu thla chawrh a, ka mittui a hnàm tiam tiam a, ka thinrim chhan tak pawh ka hre lo, Remi thusawi vang kha nge ni a, tuna a awmdan vang zawk hian? 

      Chutah mi rawn pan hnai a, ka hmaah rawn thingthiin ka hmai a chul heuh heuh a. Mittui tling piau chungin, " Remi i hnaih theih nan chuan kei hi min hmang miah suh, bakah ani te chuan bialpa a nei alawm", ka thusawi mai mai chu. 

        Mi rawn fawp thut a, a dam duai mai lehnghal, kan professor - in mi fawh dan ka ngaihtuah chhuak lo thei lo, ani fawh erawh kha chu a hrehawm zawk! 

        " Min hmang lo tiraw", ka zawhna pawh chu, mahse a lu a bu a min hmang lo, ka ngaihtuahna mai mai. 

     Min fawp leh a keiin ka thiam ang angin ka chhang let ve a, tihian kan inkar a felin ka hria. 

      " Nuihzatthlak ka sawiin i hria em? ", kan professor tak hi chu aw... 

    Nizan kan awmdan ngaihtuaha ka nui ver ver lai min rawn hau ringawt, tlar hnung berah ka thu a min hau turin a lo phei ngat ngat, engtin nge ka nui pawh chu mi rawn hmuh theih ni? 

       " Engvanga nui nge i nih? "

"Professor", Sir pawh ka ti peih tawh lo. Takah a hming thar kha. 

   " Professor P, nuih hi damdawi tha ber a ni sin", engthu nge maw ka sawi tak ni. 

    Vin tak  hian, " Damdawi tha ber chu damdawi a ni", a hmel atang a thinrim ngawih ngawih tih a hriat. 

       Mahse, ka nui tawp thei lo, a thusawi kha... Professor P sawi chiah chiah a rawn sawi ve, pum deuh meuhin ka nui a, a mak ve bawk em alawm.