PROFESSOR 'P' aka PROFESSOR POOPYPANT CHAPTER -8

PROFESSOR 'P' aka PROFESSOR POOPYPANT 

Chapter -8 

Ziaktu: Cck Lalchhuanawmi

       Pakhat zawk zawkah ka rilru pekna ka thlah a ngai!

      "Hmai? ", kawngkhar a kik dat dat a, ka hawn dawn lo reng reng, ka rilru a let leh ang tih ka hlau. 

      Bakah tun angah chauhte han tawng, ka khawngaih rualin ka thin a rim bawk si. A hmel takngial pawh la hmu lo leh, hrechiang mang lo hian ka lo luangliam ve ringawt a, a hming pawh ka la hre lo. 

        " Hmai", tia min kohna ka hriat hmasak ber leh a tawpna tur a ni tawh si a, a hmate khan min koh thin tur a lawm le, à lutuk mai! 

     Kawngkhar nghengin ka thu tlat a, a thawm ka ngaichang reng, ka ngaihtuahnaah chuan hun reilote kan hun hman ve lai te kha an lo lang a. 

      Ka thawk buai lai min pui a, min pawm a inchung lam min panpui lai te, inhaler a zawng buai lai leh hmu lo ang hmaka awma thawk min pe lut lai te chu ka mitthla chuan a chhui rauh rauh a, a va nuihzatthlak tak. 

     Simeikhu ang maia hun rei tak a rial hnu chauhin a lo lang thin a, ka hmuh hmasak ber atang tun thleng hian a inthuam dan a la ngai reng, mahse ka hriat theih dan ber a ni lawi bawk si. 

      Ka tan taxi pawh a hire tawp a nia, fee pawh ka pek buai a ngai lo. Engtiang takin nge ka tihnat ang le? 

     Zanin kha pangngai taka kan awmdunna hmasa ber tur a ni mai thei a ni, a tawpna tur ber pawh. Thu dengkhawng tak ka hrilh leh bawk si, kan professor vang vek. 

        Amah kha keimahah chuan a hmasa ber a ni, ka fawh hmasak ber leh min ngaihsaktu ka hriat hmasak ber. 

     Hetiang taka ka tana inhuamtu hi na tak in ka siam chu a ni si a. Ka lung phu hi kan professor vang khan phu rang thinin, amah khan min hip thin tehmeuh mah se, ka chunga lainatna lantirtu hian lantir let chu a phu chiang a ni. 

      A dik, amah kha ka mamawh tak zawka chu a ni, ka chelh leh a ngai. 

     Kawngka chu hawngin ka tlanchhuak nghal a, mahse hmuh tur a awm tawh miah lo, a kal tawh a ni ngei ang. 

     Ka thinlung chuan a au vawng vawng a, chhangtu tur ber lah chu a awm tawh si lo, engtikah tak hmu leh ang maw? 

     À lutuk mai, Hmai... Hmai ti ringawt lo khan min chelh a duh thu te sawi ve sela, nge kei hi min lém mai mai zawk.                         Chan hlen tur chuan ka phal lo, kir leh turin ti ta ila a lo duh leh ang em? À intihna, thinrimna leh lungngaihna inpawlh chuan ka thin an titawt up up! 

      " Ka tha", ka ti zawi sap a, dik tak chuan ka chau ngawih ngawih. Professor P chuan ka chal chu a dek nawn leh a, ka damlo pawh ni si lo ka chal a dek ve ringawt chuan ka nuih a tiza, mahse nui tur takngial pawhin chakna ka nei lo a ni e. 

       Lukhum duma chuan ka tan taxi a la dah reng, driver chuan a hun dik takah mi rawn hruai thlap thlap zel tho, ti tawh lo tur in driver pawh ka hrilh nasa, " Puin min hau ang", a ti tlat zel. 

      Ka rilru ka pekna tur ka thlang fel tawh a, chu chu zirna lamah hian a ni. Ka u te nen kan inbe fel vek tawh a, exam a zawh veleh Lunglei lamah ka awm daih ang a, chutah chuan college pawh ka zir zawm ang. 

         Mahse, min tibuaitu pakhat chu kan professor hi a ni. Nitin hian min ngaihsak zia a tilang thin hi a ni. 

    Tunah pawh ka dam that leh dam that loh fiah nan ka chal a dek a nia! Lukhum duma nen kan inkar te hi a lo hre ru ve zawk te hi niang. 

      Hetiang tehnuai ka ngaihtuahna lamah ka chau zo vek, kan classmates te lah hian min chhaih nan tak an hmang thin leh tawh nghal. 

     Kan professor awmdan pawh hian a zir ve em bawk a ni, kan college pumah a la darh lo mai mai zawk a. 

     " Kan professor Puia nen in inkarah eng nge awm? ", Hriati te lah hi aw... 

     " A class ah pawh bengchheng siam ngam ber a ni bawk a", an la nui huah huah zui. 

      " Tunah pawh hian damdawi lei turin a kal ngei ngei ang"

    " I damlo ami, khawmaw ", tih leh ka chal deh chu Hriati chuan a rual nghal a. 

     Awmdan tur leh chhan dan tur ber pawh ka hre lo, chutia mi rawn zim huai huai tak avang leh ka zam em avang chuan ka thawk a rawn buai ta thut a. 

     Kan professor chu damdawi eng eng emawni khaiin kan classroom ah chuan a rawn lut thut mai a. 

    "Hmai", tih leh ka lama rawn tlan chu a rual nghal, lukhum duma min koh danin min ko ve ringawt! 

     Medical room lamah min pawm phei a, khumah chuan min thuttirin inhaler chu min hip tir nghal vang vang a, midang ho chhuahtir vekin kan pahnih chauhin kan inhmachhawn leh ran mai. 

     " I tha em? ", ka lu ka buk khum a. 

 " Engtin nge an tih che? An va ngam zawk ve", a inseh ruh teuh a, a thinrim a ni tih a bek vela thisen zam pawng talh chuan a tichiang hle. 

     " Nangmah vang vek", ka tichhuak tiau a, mak tih hmel takin min en ho ringawt. 

    Ka tarmit la thlain ka mitah chiang kel kawlin min en vung vung a, keiin ka mittui kar atang ka en let ve a. 

    " Nangmah vang vek, engvanga ka chunga tianga awm nge i nih?"

    " Ka sawi tawh kha ka ta chauh i ni ka tih kha, chuan bul tan pui che ka duh bawk, ka venghim zel bawk ang che"

    "Engvangin? "

  " Mipain hmeichhe bula bul tan pui a duh tih a hrilh chuan, a chhan a hriat reng a ni lawm ni", a ti tak tak ami le, a nui miah lo lehnghal. 

    " Pro... Professor? "

  " Min ring rawh", a hmelah chuan ring  turin min duh tih a hriat theih. 

      Engtin nge ka tih ang, ka rilru pekna tur ka siam fel tawh hnuah. Ring ta ila engtin nge ni zel ang? 

     " Hmai? "

  " Ka hua che... ". 

" A pawi lo,keiin ka hmangaih thung che", ti supin mi kuah nghal vawng vawng a, Lalhmangaihi hian hmangaih ka nih thu hrilhhriat ka ni tak tak! Ka tah a chhuak em em mai lehnghal. 

*** HMANGAIH KAN NI VEK, HMANGAIHNA AVANGA CHHANCHHUAH KAN NI SI A ***