PROFESSOR 'P' aka PROFESSOR POOPYPANT CHAPTER-7

PROFESSOR 'P' aka PROFESSOR POOPYPANT 

Chapter-7 

Ziaktu: Cck Lalchhuanawmi

       Pum dawm meuha nui ta chu, thinrim vanga puak keh mai tur hian a awmin ka hria, ka khawngaih letling zawk, ka nuihza tawlh tawlh bawk si. 

     Classroom atang min chhuah tir leh ta nge nge e. Pawi tawp lo, ka seat ah khan thu vang vang ila ni mai. 

     Kan professor lo lan atang hian ka awmdan leh mizia inthlak vel hi ka hrethiam lo,ami uap hi na ka la ti reng a, ka lung phu erawh a rang lutuk  tawh lem lo. 

       Lukhum duma pawh, kan inkarah awm awm angin leh fel turin ka dah ve hmiah,  ka mi hriatchian vak lo lakah ka intulut chu a ni si a, zaninah chuan a hmel hmuh ka tum hrim hrim tawh ang.

    "Angaih, ka pa chungchang kha", Faka'n a tih chuan ka hre chak takzet, hriatchian tumin a chhui ve si a, a lo dik reng em? 

    " Keimah zawk hi ka lo dik lo a"

Ka va lawmpui tak, a thaw huai tawh ang chu. 

    "I lawm em? ", nui sang chungin ka zawt a, a hmelah pawh a hlim a ni tih a langchhuak. 

   " Lawm tehreng ele, hnara hlit phawi ang hluai a ni", a kut phar chhuak takmeuhin a sawi. 

      " Thil pakhawt ka zawt ang che aw?"

" Aw, min zawt la"

     " Kan professor Puia nen hian in inkarah eng nge awm a? ", a mi zawhna ber kher chu. 

          " Engmah a awm lo e a", ka tih chuan awih loh hmel deuh hian a kiai suk ringawt a. 

    " Eng emaw tak chu a awm a nih ka ring"

  " Engmah a awm lo ka tih chu", han awih ve mai se aw, ka chunga a thiltih te kha ka sawichhuak duh teuh lo mai. 

    " I hre lo nih kha, ka lo chik ve reng reng lawm. Tlar hnunga i thut atang khan i thutna lamah a hawiphei zeuh zeuh thin lawm"

     " I daw reuh mang e"

" A ni lawm, Hriati te lah kha an lawm thei nia, an star bawk sia"

     " Vawiin pawh khan a lecture pek kha classroom chhungah a vei tawn sek a, a zawng che a nih ka ring, a hmu ta reng bawk che a, nang lah chuan khatiang khan tham lo hmel tak khan i lo tilet bawk sia", nuih insum tih hriat tak hian Faka chuan a tih zawm a. 

      A van mak, chutiang a nih ka van ring lo, kan professor chuan engatan mah min ti lo. 

     Chemistry lab chhung hi ka tih hluah hluah, physics practical teacher a lo attend theih loh avangin chemistry lamah kan tuan leh a, chemistry hi ngati nge maw a luck thei riau. 

     "Sorry Sir", test tube pakhat ka'n thlauh keh chu va buaithlak tak, lukhum duma ka ngaihtuah vang vek. 

     Ni hnih a lo lang leh tawh lo, vawiin chu lo lang ve leh tawh hram se, biak theihna tur a number te ka nei bawk si lo. 

    " He lab hi ka ngaina tan dawn riauin ka hria", chu àw chu Tu nge a nih tih ka hrechiang lutuk, a sawi awmzia pawh mantu ber ka ni mai thei a ni. 

     " Awle, kan zo leh ta e a haw theih e, professor Puia hian min pui thei hlauh a vawiin chu a lawmawm lutuk e", chhuak nghal vang vang ang. 

     " Angaih, vawiin chu coffee min khiuriu teh ", min rawn kuah pah chuan Faka chuan a ti a. 

    " Tehreng mai, lo kal ngei ngei rawh ", ka ti let a, " Mahse khaw'nge i tarmit? ", eng maw! Awi leh, ka lo vuah miah lo, lab chhungah ka theihnghilh a mi le, ka theihnghilh chiang mai! 

    " Min lo kalpui", ka nuih tlawn a, min la nuih zui. 

    " Coffee chu ni dangah zawk le", a va chimawm tak, min la kalsan daih zui, a hre khawp ang mawle. 

      Chemistry lab chhungah keimah chauhin ka awm leh tawh, ka tarmit reng reng ka hmu bawk si lo. 

    " Hei mi i zawn? ", professor P! a kutah ka tarmit a awm, engtin nge? 

    " Ka chhar a", a tih zawm leh, ka dahna ka fimkhur loh luat vang vek. 

     Ka hriat loh karin bang ka lo ngheng leh reng tawh.

     " Ka sawi kha, ka ta chauh i ni, chuan he hmui pawh hi ka ta chauh", a tih zawh rualin min fawp leh nghal, a hmasa ang thoin dimna reng a tel lo, a hrehawm ngawih ngawih zawk, ka khabe a dawmna lah a na em em bawk. 

      " Faka nen engmah kan ti lo, kan titi mai mai alawm", ka insawifiah leh ta, lukhum duma chungchang phei chu hrilh ila chuan hei ai hian a nasat ka ring. 

      Ka nghawng lam a fawp kual leh dan dan a, chutah ka khabe a dawmna chu la thla lehin ka kawr chhungah a zen lut leh a, a kut pakhatin ka kawng a dawmna ata chu a tinghal leh tan bawk a. 

     " Professor min kal tir rawh", ka tichhuak tiau a, a hmasa angin a che leh ang tih ka hlau ngawih ngawih. 

       Hre lo ang hmakin ka kawr chhunga a kut chu a tinghal zual sauh thung a. A hmui lam pawh ka nghawng leh àwm velah te chuan a tinghal leh bawk a. 

       Chutah ka beng bulah zawi sap hian, " Ka thei lo, ka kal tir thei lo che", a thaw kàwk kàwk a, chutiangin keipawh. 

    " Khawngaihin", ka ti ve leh a, ka rilru a nut leh tak tak hma hian ka chhuah vat a ngai tun tum chu. 

        " A nih chuan, tun chu min chhang let rawh", eng nge maw a sawi le? 

    " Please", a rawn ti leh a, engtin nge ka tih ang?  Ka biang a kut pahniha dawm meuhin a hma zawng aia dam duai hian min fawp tha leh a,  a rei tawlh tawlh a, ka rilru a nu leh tan dawnin ka hria. 

      Engtik laiin nge ka lo chhan let ka hre lo! 

       "Rem, mangtha aw", ka ban chu ka vai lauh lauh a, chutah Tu emaw hi ka su chawrh. 

    Ka en chu lukhum duma kha lo niin, engkhaw sawi set set loin ka kuah nghal thlawp a, min kuah let ve nghal a, ka ngai tawh lutuk ringawt. 

    Keimahah inthiamlohna a awm nghal, professor chungchang hi ka hrilh ang em nge hrilh lo ang. 

     Ka inthiamna pakhat chu ka la thianghlim thung hi a ni, mahse chu chuan ka inthiamlohna a tihreh phah si lo, ka rilru a buai takzet. 

     Lukhum duma hi chan ka duh bawk si lo, kan professor laka ka awmdan a danglam phah chuang bawk si lo, han hnar tur in ka chak tawk bawk si lo a, chu chu chhuanlam a tling pawhin ka hre lo. 

      Pakhat zawk zawk lakah hian ka rilru pekna ka thlah a ngai.