PROFESSOR 'P' aka PROFESSOR POOPYPANT CHAPTER- 10

PROFESSOR 'P' aka PROFESSOR POOPYPANT 

Chapter- 10

Ziaktu: Cck Lalchhuanawmi

          Tukverha ka dak mai mai chu lukhum duma  ang deuh ka hmu leh! 

      Ka ngaihtuahna mai mai nge ni ang a, amah tak tak zawk le, kei hian ka theihnghilh thei miah lo zawk ni ang? 

     Buai naah te ka innamluh palh takah, professor hi hrilh ve vek ila tha ang. Engtin pawhin lo ngai mah se, pawi lo turah ngai ang. 

        Chemistry lab ah chuan kal veleh phawt mai ang, practical tih hun pawh ni lo mah se, chahbi office ah an dah vek avangin a duh hun hunah a hawng ve thei tho. 

     " Ka theihnghilh thei lo a", ka tih zawh rualin bang a hnek nghal chawrh, ka hlau lutuk chu ka beng hup nghalin ka thu thla nghal a. 

     Pawi lo, tuna hrilh vek hi, nakinah amahin min zawh ai ni mai. 

      A thinrim tawh em lo ang chu maw! 

" Angaih, kawngkaa lo lut mek saw han en ve teh mah", Remin a  tih chuan ka en ve nghal vat a lukhum duma a lo ni! 

       Eng nge a lo tih dawn le? 

Ka en tha ngam mang tlatlo, ka hmaa tihtur awm chu ka tih zawm mawlh mawlh a, ka rilru erawh a nuam chuang miah lo bawk, mi kam tun mai. 

     Remi chu coffee no nen a lo let phei leh a, " Nangmah a kawk leh tawh che", a la ti zui, bo daih ka va chak tak. 

    Muangchang chuan ka pan phei a, ka tiril a khur hialin ka hria, eng nge ka sawi tak ang, a dam that leh dam that loh thu em ni ka zawh ang. 

     Coffee chu dawhkan chungah kut khur hlawk hlawk chungin ka dah a, ka thlanfim te a bawl tiam tiamin ka hria, ka kha tichihin a awm tlat, eng thu mah ka sawichhuak thei lo, va hrehawm tak, ka hmaa kut suihin ka dingkhawng reng ringawt. 

        Chutah mi rawn enin a lukhum a phelh a, keiin mak ti takin ka lo en thung, a mask a phelh leh chiah chuan mi thawng ngang mai! 

     " Hmai ka tihpalh, khawngaihin kawng lo hawng teh",  a kik dat dat a, ka ngaihtuahna a buai vek. 

     Tinge ka lo àt em em le, lukhum duma kha kan professor hi lo ni rengin! 

     An pumrua, an àw leh thil dangah inang ka lo ti thin kha ni a, engtin nge mi pakhat an ni tih rin ngaihna te ka lo neih loh le! 

    " Hmai, please... ", a ti leh a, tunah hian lawm tur nge ka nih thinrim tur? 

    Chan ka duh lo em em kha mi pakhatah a lo awm vek si a. Atir atangin tha takin intilang ve mai sela tha zawk tur. 

     Thawm a reh leh vang vang a, ka ngaihtuahna a vai leh ruai mai. 

      Pawnah chuan ka tlanchhuak leh vat a, ka zawng leh ruai tawh, hmuh tur a awm leh tawh lo. 

     Keia pawh chuan lo tihtauh khum loh tur ania, kawngpui thleng te chuan ka zawng zel a, chapal pawh ka bun hman lo ka kete an na zo vek tawh. 

     Nula pumpa chapal bun lo leh tap pur chunga khawlaia kal ta na na na chu min en duh ngang hlawm mai. 

     Ahma ang thoin a kal leh tak tak ta mile, ka haw lutuk. 

    Kan in lam pan chuan ka kal leh hna hna a, inchhung ka luha ka thil hmuh avang chuan ka khawng awt! 

     Professor chu chokaah lo awmin plate ah te chuan eng eng emawni hi a dah a, dining table ah chuan juice hi a lo awm bawk a. 

    Min hmuh chuan, " Kha, i lo haw tawh maw? Kawngka hawng huauin in i chhuahsan a", amah ka zawn vang a ni reng sia. 

    " Ei rawng bawl ka tum a, mahse buhfai ka hmu mai lo, chawhmeh siam tur lah a awm mai bawk si lo, fridge pawh a ruak huai mai, chaw i ei ngai lo ami?", engtin nge ka chhan tak ang? 

      Dining chair chu pawtchhuakin min thuttir a, ka ke te chu a thlek sek a," I tarmit te hi dah fimkhur thin rawh, in kawtah ka chhar", ka thlauh a ni ngei ang. 

    " Rice, chow leh momo, heng ho chiah hi an lo nei tawh a, juice ka lei tel bawk a, zanin chu heng hian inhnawhpuar mai rawh", tih pah chuan ka hmaah a lo dah hnai zel a. 

      Fian chu ka kutah dahin min chelh tir a,"Ei vat vat la, i ei zawhah intihfai te i ngai dawn a nih kha", a tihzawm leh a, kei erawh ka lungchhiat a zual sauh sauh thung. 

     Tap chunga thil ei chu a sawt mawh teh e, lem chu sawi loh thial takngial pawh ka thial hleitheilo. 

    "Good girl", ti supin ka thutna lamah a lo phei a, ei zawh phei chu ka ei zo lo, inchung lamah mi pawm chho nghal a. 

     " Keiman ka tihfai che i duh awm si lo a, chuvang chuan i lo intihfai chhungin i ei hnawkna ka zu tifai thung ang e".

     

      Ka ke a hmet neuh neuh a, a dam thlup mai lehnghal a, na a awm tawh pawhin ka hre lo, ka thla lah a muang ngawih ngawih bawk. 

    "Professor", min lo en nghal vat a, ka chanchin ka hrilh ta vek a, ka nu leh pa awmdan te nen lam. 

    Ka sawi chhung chuan dawhthei takin a lo ngaithla a, min kuah hlun bawk a, achangin ka mittui min hruksak bawk a. 

    " Le, tap tawh lo la, tunah chuan nui tawh rawh le ", ka mittui hru nuah nuah chung chuan a ti a. 

    " I nuih ve hma chu ka nui tawh dawn lo"

  " I nuih hian ka tan pawn i nui tih hre tel ziah la, chuvang chuan nui ziah ang che", a thusawi chu mak ti takin ka en reng a. 

     " I thei ang em? "

" Ka tum ang e", nui saihin ka ti a. 

      Khuma min tlukpui ruah ruah chungin kan hmui a inchuktuah reng a, kan tlukfel hnuin a kut a tinghal leh tan riai riai a, a tak ram thlentir lo tur erawh chuan ka inveng ve ran mai. 

     Kan hmalam hun chu keia sawi theih a ni hauh lo, kan professor nena kan inlaichinna hian engtik hun thleng nge a daih ang, damchhung tal a daih ve ang em?