Au Mami Chapter-1

Au Mami

Chapter-1 

Ziaktu: Cck Lalchhuanawmi

 

" Mam, haw tawh ang le", chhâng lo chuan mittui parawl kuang chung hian ka lo en a, ka suitcase hi a bulah chuan a awm bawk, " Ka rualin i lo haw ang tiraw? ", tiin min zawt leh a, a hmel lah chu ka hmufiah thei bawk si lo, mahse ka hriatchian em em  chu, ka hmaa ding, a ruala haw tura min sâwmtu hi hun rei tak chhung ka hloh tawh ka mi hmangaih em ema kha a ni tih chu. 

Ka lam pan chuan lo kal a tum a, a hmel pawh ka hmufiah thei ṭep, chutah, " Lalhmunsiam, rang takin tho vat rawh", tiin min sawi nawk nawk a, ka mangram aṭang chuan ka harhchhuak chiang teh e, " Ka nu, ka pasal neihna tur min tihchhiatsak vek alawm le", ṭhu tho luah chung hian ka ti a, ka tep chuap chuap pah bawk, " Tho vat la a nih chu a, i lu te ber bur kha, sava bu ni awm tak a ni. I mangramah te ni loin a tak ramah te hian i pasal neihna tur te chu tichhe thei zawk ila ṭha tur", ti nuah nuah chungin ka pindan chu a chhuahsan a. 

A tu tak chu ni ang maw, ka mang zawm leh mahna tiin mut leh tuma ka tlu riai riai chu ka nu chuan, " Lalhmunsiam, mut leh han tum vaih teh, tuivâwt hian ka lo leih che ni mai", ka pindan pawn aṭang chuan a lo au lauh lauh a, choka aṭangin a lo au leh a ni chék ang chu, a hahthlak ṭhin mang e. 

Ka sam hui ṭha hliau hliau pahin ka pindan aṭang chuan ka chhuak a, panhnah roll tur leh kuhva thel tur lo inchhawp hnawk nuai mai chu hai rual loin ka tihtur a ni tih ka hre thei nghal, heng ho lah hi a, ka buaipui kher hi an phût ve ṭhin khanglang a, ka nér sawk chu ka nuin min lo hmu leh a ni ang chu, " Khatia nér vak lo khan ti nghal rawh, Nunui dawr kal pawh a lo thleng ṭep tawh ang", a lo ti a, ka ti dawn reng sia, ka nu em em ṭhin hi chu a, tihian zîngkar aṭang hian a âng nghal hlawi hlawi a, ninawm chang awm ṭhin mah se; a âng thawm hriat tur a awm loh hi chuan ka ngaih a ṭha lo ṭhin zawk. 

Panhnah chu ka roll hmasa zawk a, roll pah chuan ka mumang ka ngaihtuah mai mai a, a chhan chu hre hauh lo mah ila, ka lâi deuh tlat zu nia! 

Chaw ei naah chuan ka mumang chu ka sawi a, kan mô Awmawmi lah pek chuan , " I ex te aṭang hian renew pui leh duh tu che an awm tihna a ni thei mai ang em?", a lo tichhuak hlawl a, a sawi dan aṭang chuan ex ka ngah hmel ṭiah ṭiah, pathum bak ex ka nei tawp si lo a, ka insum zo lo chuan ka nuichhuak ta nge nge a, " Lalawmpuii ṭhin tak hi chu, mahse a ni ve thei tho bawk", a nupui hi chu a thlawp thei ṭhin tak e, " Chutiang chu a ni ve thei tho ", Awmawmi chuan a ti leh a, unau pali kan ni a, upa ber ka ni. 

Ka chhang chiah Bawiha hi chuan nupui a nei tawh a, hei Awmawmi hi a nupui chu a ni, a chhang leh chiah Nunui, college a kal ṭan ve tawh a, tin; kan tê ber Têbera erawh pawl riat chiah a la zir thung. Pathian zarah ka nu leh pate hian min la dam pui a ni. 

Office ka thleng a, hnial hrata ka hmu hmasa ber zui, kan pu ber fapa mah nise, amah hian a zir lo miau a, ka theih chhung chu ka hnial ve zel dawn hi a ni hrim hrim. 

" Ka pa Secretary ve mai i nih kha, intivei ve vak tur i ni lo", 

" Eng nge ka intihveina, nangpawh kan pu ber fapa i nih avang maiin intivei tur i ni chuang lo", ka melh kar a, min chhan tuma a kha a âng chiah tihah, " Nangni pahnih chu, in lo inhnial leh tawh a ni maw? Lo kal teh u ", kan pu ber ni rengin, a room-ah kan inzui lut a, " Nangni hi in hahthlak lutuk, inhnial reng teh suh u, hnathawk dangte mit hmuhah pawh a mawi zo zai lo, Lalrintluang, mipa i nih kha, hmeichhia hnial kalh zawnga awm reng mai. Lalhmunsiam, nangpawh mipa chhan zuah zuah loh tur, inzah tawn rawh u, engtin nge ka tih dawn che u aw" ,  pu ber chuan a ti vawng vawng a, ka va zak tak, kan pu chu ka khawngaih tho naa, a fapa leu luau hi lawm. 

Ka ṭhutnaah chuan ngawi rengin ka mumang ka ngaihtuah leh a, ka lo nui ver ver ni awm tak a ni, kan thawhpuinu pakhat chuan, " Nizan lamah be ṭhatu kan nei a ni maw?", nui ver ver tho hian a lo ti a, ka lâi leh ringawt , ka lu ka thing nawk nawk a, thawhpui dangte chuan min chhaih nghal sup sup, " Tumah an awm lo", ka tih pawh chuan engahmah ngai duh loin min chhaih luih luih tho a, atawpah chuan fiamthuin ka sawipui ve vel ta mai mai a, chutia inchhaiha kan nuih dar dar hlawm lai chuan, " Au mami, hmu duh che an awm", tiin min lo au a, ka va hawi phei chu ka high school ex ngei mai kha a lo ding vâng mai. 

" Min hre tawh na nge?", 

" Hria e, engvangin nge ka hriat loh ngawt ang che" , nui sen sen chung hian ka ti a, nupui a nei tawh an ti emaw ka tia, " Nupui ka la nei lo reng reng", ka phu zawk, ka rilru a hria nge mawni, " Min kawp tih ka hrechhuak a, chuvang chuan Palai pawh ka tir ta lo a nih kha", a tihzawm leh a, sawi tur pawh ka hre lo, pawi ka tih thu chu ka sawi ve luam a, mahse; min kawpna man a hmuah ka lo ngai hmiah. " Ih, ngaidam dil che ka duh a, kha, aa, ih, ka kawp che avang khan hremna ka hmu niin ka hria, pawi ka ti lutuk ringawt ", inthlahrun hmel tak hian a ti a, " A ho em mai", ka lo tihsak tawp. 

Office chhunga ka luh leh chuan min lo chhaih nghal sup sup a, awmdan tur hriat a har ṭhin teh e. Ngaihdam min dil tura lo kal a ni bawk si a, ngaihdam chu a phu e. Tlai lam dar nga a ri tawh a, ban a hun tawh e, kan pu chu ka thlah liam a, keipawh haw turin ka inkhung fel mawp mawp a, " Au mami chu, vawiin pa kha ṭha kan ti tlang e, ran lu kim ngei nise kan ti bawk",  min ti laih laih a, a va buaithlak tak, ka lo nuih liam ve mai hlawm a, " Ka haw dawn, in ninawm lutuk a", tiin ka bag ah(ak)  pah chuan ka ti a, hnial hrata lah chuan, " Pukpui chu Lunglei khaw pâwn a nia, chuvang chuan haw vat vat rawh, naktukah te hian in in i thleng palh ang e",  min lo ti a, ka va ngei tak, thawhpuite an lo nui dar dar a, a ṭhen an haw ve mek bawk, chhang tawh lem lo chuan ka nuih sak ringawt a. 

" Lalawmpui, Lalawmpui", inchhung ka luh rual chuan ka au nghal tuar tuar a, " Aw, eng nge, eng nge?",  tiin choka lam aṭang chuan a lo au ve bawk a, choka lamah chuan kal nghalin, " Ngaithla rawh, tukin zinga ka mumang ka sawi laia i thusawi kha i la hria em?", thaw hlawp hlawp chung hian ka ti a, " Aw, hria e, eng nga ti nge?", min zawt vat nghal bawk a, " Eng nge ni a?",  tiin Nunui leh Têbera leh ka vahte pahnih, Henry-a leh Duata te chu an lo lang ve nghal thuai a. 

" Vawiin khan Lalmuanawma nen kan inhmu",  ka tih chuan an ka ho hlawm a, " High school ex, kawptu che kha maw?", Nunui chuan a lo ti var a, ka lo bu nghauh nghauh. Chutah Awmawmi chu a au ta chiam mai a, "  Tak tak maw?  Chuan engtin zel?",  ti pah chuan dining chair-ah min ṭhuttirin ka bulah an lo ṭhu ve nghal hlawm a. 

" Ka hnathawhnaah a lo kal a, a bialnuin a kawp avangin a Palai tirh tur pawh a ṭhulh daih a, chumi vang chuan ngaihdam min lo dil a" 

" A kawp man che a hmu a nih chu, i ngaidam em ni?", 

" Aw, ngaidam, chuan saw Serkawna Christian Higher Secondary  School-ah sawn a thawk dawn a, vawiin tlai pawn min lo thlah", 

" Engvangin nge i hlim em em a?", 

" Ka hre lo", nui ver ver chung hian ka ti a, Awmawmi chuan, " Renew a duh leh ngei ngei ang",  a lo ti leh, " A nî, bialpa i nei dawn mi?", Henry-a chuan a lo ti ve bawk a,  Nunui lo inrawlhin, " Nei dawn, au mami, vawiinah ngaihdam dil tur chein a lo kal a, a lo thlah leh bawk che a, Uawmawmi sawi angin renew a duh leh pawh ni mai thei sin", a ti a, " Ka hre lo, chutiang a ni lo ang", ka lu ka hiat nuah nuah a. Nia, chutiang a ni lo ang. 

A tuk zing ka tho chu min chhaih laih laih nghal a, ka thawhpuite pawh tih tawh nak laiin, ka nu lah chuan ka pasal tur angin a sawi leh ringawt tawh, mi zingah hrilh lo turin ka han khap leh vel a. Office kal tura ka insiam zo, ka pindan aṭanga ka chhuak chu Muanawma lo ṭhu khi vur vur hi ka hmu a, mak ti takin ka en reng ringawt. Ka chhungte chuan an lo be ṭha khawp a, ka pa nen an lo titi bawk. 

" Ka lawm lutuk aw, office thleng min thlah a, min lo hruai kher a ngai hleinem", 

" A ho lutuk, lut tawh rawh, chuan i phone number ka nei miah lo", a phone lek kang chung hian a ti a, ka phone number chu ka pe a, hlawhtling inti taka a tlan liam chu ka thlir zui vawng vawng, ka sawi thiam theih si loh hian ka hlim ru veng veng nia mawle! 

" Ngaihzawng inti nei em mai a, lo inthlahtir kher kha eng nge a ṭangkaina?",  huiha, ka hnung lam chu hawiin, " Ngaihzawng nei ve lo awhthik",  ti hlakin ka kalsan zui a, Lalrintluanga teh hrep hi chu aw, a ngeiawm zawng ngawt te hian min be ziah mai, helai hmuna ka thawh tir aṭang ṭha taka inbiak hi kan la nei lo reng reng, min huat rukna riaute hi a nei hial emawni te ka ti tawh.