Au Mami Chapter-2

Au Mami 

Chapter-2 

Ziaktu: Cck Lalchhuanawmi

Muanawma nen kan inbe ṭha chho viau a, kan inhaw tawn lo ve ve chu ni ber.  Mahse, hetianga hun khawhral mai mai thei ka ni lo, ka hna hi ṭha taka ka thawh a ngai tih chu ka nau Bawiha chuan a lo nemnghet leh chat a. " Au mami, accident ka tawk a" , tiin ka hnathawhna hmuna ka awm laiin min lo bia a, heti chung hian pasal nei thuai tur te hian min ti ṭhin chu nia! 

Bawiha hian rickshaw a khalh ve ṭhin a, seconhand mai a ni a, a chhe sa ve hrim hrim bawk nen, amahin kawng laiah tak te hian a thi leh tawp ṭhin a, " Min timualpho thei lutuk" , tiin Bawiha hi a phun a phun ve ṭhin, a thar leisakna tur kan nei bawk si lo, ngawi renga a phun ri ngaihthlak tawp ni mai. 

" Bawiha, kan office-ah hian lo kal mai ta che, hei bân a la hun chiah si lo a, kan haw rual dawn nia aw " , tia ka hrilh chuan, rickshaw chu workshop-a dah a, a haw mai tur thuin min lo chhang a, inah inhmu turin kan inti ta ringawt. 

Kan pu room-ah lehkha pawimawh tihfel ngai tur kengin ka lut a, Lalrintluanga a lo hau mial mial chu niin, " I ngaihtuahna hmang rawh " , tiin a lu-ah file-in a khawng chawrh a, " Ka pa " , phu uih chung hian a ti a, a lu a tuai vat vat mai. A rukin ka lo nuih sen sen a, lei min lo chhiahkhum! Va hahthlak ṭhin tak. Kan pu chuan , " Mama, ka sawi chu i hria maw? " , a ti nghut a, Rintluanga bu nghatin a chhuak zui ta daih a, engtak chu inhrilh ang maw! 

In ka thleng chu Bawiha, a kut veilam lo awrh chu ka hmu hmasa ber, " Bawiha, engtia zia nge? " , tiin ka va pan nghal vat a, " Ka accident ka tih kha, ka tlukpui a lawm mawle " , inthlahrun hmel tak hian a lo ti a, rilru no tih takah ka mittui a parawl kuang ṭan leh nghal, " Accident i tih khan hetiang a nih ka ring lo lawm, min hrilh ṭhat ve mai tur a nia " , ṭah âw ṭuau chung hian ka ti a, ka nu pawh lo inrawlh vatin, " Ngaihtuahawm lutuk a nih loh kha, rickshaw chu hluihlawn mai kan ti tlu ta a ni, vanduaina karah kan la vannei zawk alawm, lu em kan sûn lo a " , 

" Akhai, Mami nu mai mai chu, chutiang zawngin ngaihtuah loh tur, ti teh u, Mami pawh a lo haw tawh a, zanriah han buatsaih ṭan tawh u " , ka pa chuan a lo ti vat a, ka nu ho chuan kan biang hru thuak thuak chungin choka lam kan pan hlawm ta a.

Chaw ei fel hnu chuan inthlak turin ka pindan lamah ka pheisan ta hlawm a, inthlak mial mial chung chuan Bawiha chu ka ngaihtuah a, chhungkaw chawm lai nei a ni ve a, hetia a awm mai chuan a beidawnthlak dawn lutuk. Chutia ka ngaihtuahna ka kawm mawlh mawlh lai chuan Nunui a lo lut hlawl a, ka phu chiang em em zui, " Au Mami, thil hrilh duh che ka nei " , nui var chung hian a ti lehnghal a, engthil tak chu ni dawn maw. Ka khum chungah chuan kan ṭhu a, " Bialpa ka nei ve thei tawh em? " , a va ho ṭhin tak, mak tih hmel deuh hian ka han thlêk ang vung vung phawt a, " A ruk pawhin i nei ṭhin tho a, tun ataka min zawh kher eng nge a ṭulna " , ka ti bak deuh hlar a, a ruka a neih ngai loh thu a sawi ve nasa, mahse ka awih lo reng reng, a ruk hlirin lawm le bialpa kan neih! Tun hnua ka sawi vang chauh hian an hre ve mai mai chauh a, ani pawh a school kal laiin a nei tih chu inthup tum eng ang mah se, a chezia leh awm danah khan ka man chiang ve em mai. 

A tawpa tawpah, " Au mami chu a, thil hre thei lutuk mai " , ti nuah nuah chungin ka pindan a chhuahsan a, tikhan a va yes mai ang, a nih loh pawhin min hrilh hma pawhin a lo yes tawh pawh ni thei a. Têbera a lo lut ve leh a, math tuition kal ve a duh thu inthlahrung deuh hian min hrilh a, Henry-a school pheikhawk tur pawh a thar leisak a ngai leh tawh tak e, a harha harh ṭha ta nangiang chuan kum khatah vawi hnih hi chu kan leisak ngei ngei. 

" Lalnunu, dawrah lawm i kal dawn, inchei vak a ngai lo " , ka nu râwl hi chu a ring ṭha teh e. 

" Ka inchei bawk lo e a " , ti pah chuan kan pindan aṭang Nunui chu a lo chhuak a, ka vah te ho nen, " Nia, a inchei lo " , nui khur ru dar dar chungin kan lo ti ve a, " A nîtei leh darthlalang hi chu an inzawm tlat " , Henry-an zawi sap hian a ti leh a. 

Choka lamah ka va phei a, " Au mami, Muanawma nen eng nge in chungchang ni zel " , zawi sap hian Awmi chuan a lo ti nghal vat a, a pangngai thuin ka lo chhang ve mai, han sawi vak dan tur ka hre lo, " A ṭhat chu, kan vengah hian nula a lo rim ṭhin alawm " , a tih leh chuan ka tui in lai ka phuh chhuak ṭhawt a, " Engtin nge i hriat? " , tiin ka zawt let nghal a, " Ka hmu ṭhin alawm, bakah a nu ṭawng thei leu luau vang khan tuikhur titi a tling tawh alawm" , vui hmui pu deuh si hian a phun sep sep a, en liam mai mai turin ka hrilh a, a en liam thei leh ngut ang emaw, Awmi hi chu kan mo mah nise, kan chhungkuaa pianga kan thisen zawm hi a ang ṭhin, kan vannei hi ka tia. 

" Lalhmunsiam, coffee min lo siam ve teh " , awi! Ka phu nasa lutuk, hepa tak hi chu. 

" I duh chuan insiam ve mai rawh " ,

" Ngaihzawngte tan chauha inphal loh tur " , Lalrintluanga mai mai chu, ka va han khawng chak tak!  Coffee siam sawk sawkin a hmaah chuan ka va dah chawrh a, " Hmela, ngaihzawngte tana kan inphal lohin tu tan nge kan inphal chuan ang a? " , ka thinrim lutuk. 

Chhun thil ei hun velah chuan bazarah kal ka tum a, chutih lai chuan Muanawma a lo lang hlawl, bazarah kal lawk ka tum thu ka sawi chuan , " Ka lo kalpui ang che" , a ti a, chutih lai bawk chuan , " Lalhmunsiam, hna a tam tehreng nen khawia kal nge i tum? " , vin deuh hian Rintluanga chuan a lo ti a, ka phu leh nasa lutuk. A pa, kan pu pawh ka dil vek thu ka sawi a, engah mah ngai lo chuan kal a phal tlat lo, ka hmusual nge phei chu ka hre lo, Muanawma a melh no lo khawp bawk. Inrinni a ni a, school pheikhawk ka lei loh chuan Henry-an Thawhṭanah bun tur a nei dawn loh thu te chu ka hrilh a, ka banah lo vuan chawtin, " Kal lo ang ka tih chu " , a ti thla leh hrawk a, eng nge maw a hriat chu ni? 

Ka hmaah chuan file a lo dah vum thur a, kâ hoin ka en tlawk tlawk ringawt, Rintluanga chu kiai sak pah hian a kalsawn a, a hnu rei vak loah chow plate leh thingpui hi min lo pe leh a, kâ hoin ka lo en leh ringawt, " I kâ chhungah thô an lut ang e " , ti pah chuan ka kâ a lo tichip a, a kut ka lo vai kiang thuai, ka la thinrim reng. Ka chhungte biain Nunui emaw tu emaw ber bazar kal mai turin ka va hrilh ta tawp. 

Lalrintluanga awmdan hi hriatthiam a har telh telh mai nih hi, " Vawiin hi eng nge i hriat? Bazar kal lawk pawh i phal lo a, tunah lah min bân tlai tir i tum leh a, eng nge awmzia? " , ka hmui hnuai ka pet tan tan a, ka ṭap thei dawn takngialin ka hria, engmah pawh sawi loin a file bih lai chu a bih zawm leh daih a, ka va ngei tak. 

Thawhpui dangte an haw fel vek tawh hnuah pawh Rintluanga nen file kan la bih ngar ngar a, eng file file-te nge ni pawh ka hre teh hrep lo e a. Ka thinin a tuar ngang ta lo, " I phal emaw phal lo emaw ka pawisa tawh lo, dar sarih a ri tawh dawn a ka haw dawn " , ka dawhkan hnawk nuai rem fel chung chuan ka ti a, ka bag lain ka chhuak ta daih a, " Mam " , Muanawma leh bawk a ni, " Ka lo thlah ang che" , a ti leh a, a va vanneihthlak ṭhin tak.  Ka hnung lam aṭang, " Ka lo thlah ang che " , a lo ti ve leh bawk, a ngaih loh thu leh Muanawma'n min thlah tur thu ka hrilh a. 

A kekawr ipteah a kut pahnih zen lut ve vea ngawi renga dingin min en a, ka tukkhum za mer merah hian ka hre thei,  min thlir liam dawn te pawh a ni mahna!