Au Mami... Chapter-3

Au Mami... 

Chapter-3 

Ziaktu: Cck Lalchhuanawmi 

" Ka pu, vawiin chawhnu chu khawngaihtakin chawlh min pe thei ang em?  Ka ṭhiannu pasal neihnaah kal a ngai a" , kun ngaih chung hian ka ti a, a ruk tak chuan phal lo se ka ti rap, ka ṭhiannu pasal neih nî ni dawn mah sela, zawhna ka dawng hnem leh dawn lutuk, ka life ṭenghneng ve tak chungchangah hian. " Awle, keipawh vawiin chawhnu chu tihtur ka nei a, Mama kutah office hi chu a awm mai a ngai dawn a ni" , a ti a, ka lawm leh lutuk zawk chu ka zuang awr awr lo chauh, Lalrintluanga kuta han awm tur chule! Nui ver ver chungin ka pu room chu ka chhuahsan a, chawhnu chawl tur ka nih avangin chawhma lamah tihfel ngai tur chanve chu tihfel hman ngei ngei ka duh a, chuvang chuan ka dawhkan chu ka lo bih ngawr deuh a ni mahna, ka puin min kohna pawh chu ka lo hre lo a. 

Ka dawhkan chu a lo kik kar kar a, " Aw, aw ka pu, eng nge ni ta?" , bah nuai hian ka ti a, din ka tumna lamah file te chu ka han hnawk thla leh hrih, rang tak hian ka dah fel leh nghal zung zung a, " Coffee min lo siam lawk mai" , a tarmit vuah ṭha chung chuan a ti a, ka inthiam lo bawk si chu, a tlan hian ka tlan ni ber. Hmanhmawh takin Coffee ka siam a, ka lêt  leh lam chu  Lalrintluanga ke ka chhuih a ka tlu bawk thlawp mai, coffee no pawh khawiah nge a awm tak ka hre lo. " Sazupui mei i man ṭhelh e law?" , nuih insum tak hian a ti a, leh ka hmaah tak si chuan a lo ṭhu tung a, ka thinrimna leh zahna inpawlh avang chuan ka sa chhuak vekin ka hria. 

Ka ṭah mai loh nan ka inhumruh nasa mai a, ka hmui ka pet tan tan bawk. Rum tawkin ka melh chho a, a lo nui sâng! Keh nawk nawk ka va chak tak, muangchangin ka tho a, ka khup veilam a nâ ut ut mai, Lalrintluanga pawh a ding hluai a, " Ka lo pui ang che" , ti pahin a kut a lo phar chhuak a, chelh vatin thawh pawh tum ta lo chuan ka tha tawpin ka pawt vak mai a, keimah ang chiahin a tlu bawk thlawp mai, " Kan in draw" , ka ti sap a. 

Ka ṭhiannu pasal neih nî a ni bawk a, ka han intithu mai mai khawp a, a pasal neih hmasakah pawh chuti tho, mahni ṭhiante inneih nî loah intihthuna tur a awm chuang hleinem. Kum upa lam ho thu nawi tâwn a hun ṭan leh dawn e. 

" Nangpui reuh hi engtikah nge pasal te hi i neih ve dawn?" , 

" Au mami, a lehpek chu i pasal neihnaah kan lo kal tawh ang aw" ,

" E khai, engtikah nge Palai hmel te hi kan hmuh ve dawn? " , 

" I tar zo mai dawn" , 

" Nau puakpuan tur lei te pawh a va  chakawm tawh ve" , 

" A lehpek chu i hun ve aw" , ka va ning ṭhin tak!  Ka la â lo te hi a mak a ni, a thuhrimah pasal nei tawh rawh intih ngawtte hi a ni lo, pasal tur kan la hmu lo chu thuhran, hmeichhia mah ni ila ka chhungte hi ka kutah innghahna chen an la nei ve. Chuvang chuan ka lo nuih liam hlawm mai mai a, ka chhang buai peih tawh lo, a kam tam thlak mai mai.  

Office lama thil thleng ka ngaihtuah apiangin ka thin a thawk thut zel bawk, kei chu chawhnu lam ka la chawl tal a, ka zahna so sang tur pawh a la zia deuh, Rintluanga ve kha chu, a zah ve pawh ka ring lo e a, a ke kha khawng tliak thei ila ka va ti tak. 

Zanah Muanawma nen kan inbia a, kan vengah nula rima a lo kal ṭhin thu chu ka sawichhuak ta keuh, a pha ve nasa mai, kei ka lo ṭang ve tlat thung a, a tawpah, " Nia, Fam Lalzoa meuh pawh zân lalnu thlazarna hnuaiah in vengah ke lawng ngatin a lo kal kha, keipawh ke thoin ka lo kal a, mahse; ka lung dumtu ber erawh ka chhâi thlu thei ve bawk si lo" , muang ban raih hian a ti a, ka lo nuih hak ringawt, ahma ang thoin a inla zei leh dawn e, " A va pawi ve, ka lo hau dawn em ni?" , ka tih chuan, " Mam, ka thinlungah hian i thi ngai lo a sin, min pawm leh nan chuan engpawh ka ti ang, min pawm leh hram la",

" I phakar, thu dang daih sawi lo la" , khûr ru der der chung hian ka ti a, ka thin a phu dut dut bawk, " Ka bum vang che kha niang ngaihzawng neih kawngah hian ka tluang ngai miah lo a sin, chuan... ka tana i lo hlut zia te kha ka hre thar ṭhin bawk" , zawi sap hian a ti leh a, " I inngaihbel vang mai mai a nih chu" , ka lo tihsak a, chutiangin a lo awm ka ring ngai miah lo, "Ni lo, ka tluang ngai miah lo, min en la tun thlengin ka la, ka la, A, a ho lutuk" , a ti bah nuai a, ka khawngaih hnuhnawh leh deuh, ka thiam ang tawk chuan ka han hnem leh hrih a. A hnu deuhah chuan, "In in kawtah ka awm, ka lo leng dawn a nia" , a ti a, kan inbiakna chu a ti tawp ta daih. Ngaihna hre vak lo leh awih chiah lo deuh chung chuan ka chhungte ri nak nak bulah chuan ka va kal a, Muanawma chu ka hmu ta luau mai! 

Ka ṭhiannu pasal neihna vel titi chuan an ri hluai a, loh theih lohin min hmer tel hlawm ziah bawk.  Ka ṭhiani leh a fanu tan chuan Dinga kha chu Vantirhkoh a ni ringawt, thlamuang takin an hun hmang tawh rawh se. 

Muanawma chuan panhnah te chu a han roll ve a, a thiam lo ropui si, ka vahte lawmah a tla a, an nui uar uar a, " Han ṭang deuh teh khai, makpa interview-ah i tling lo palh hlauh ang e" , ka pa chuan a lo ti a, chuta chin chu min chhaih zawm nghal, Muanawma pawh a han uang leh vel a, high school kan kal lai a kan inngaihzawn dan te chu kan sawichhuak ta zel mai, ka chhungte chuan beng an lo chhi kar hlawm a, a chhan chu aruk hlirin bialpa nei miau hek i ! 

Muanawma chu car a hunna thleng ka thlah a, kan titi pah bawk, ngaihzawng neih lam chu ka rilruah a lan tawh loh thu te ka hrilh a, pasal neih phei chu chi loh lutuk, ka chhungte hian pasal nei turin min nawr ṭhin mah sela, an innghahna ber ka ni tih hi ka hre ve kar a, chuvang chuan chhuahsan thei hi ka ni lo hrim hrim. 

" Min hnawl tihna a ni maw?" , thaw hrawk chung hian a ti a, ka bu nghut ringawt. Van lam hawiin a ngawi vang vang a, tihtur ber ka hriat si lo avang chuan ka ngawi ve vang vang ringawt. A hnu deuhah chuan a âw a thian kharh kharh a, " Anih, ka haw tawh mai ang, muttui phawt aw" , nui saih pah hian a ti a, car-ah chuan lut nghalin ka mangṭhana pawh ngaichang tawh chuang lo chuan a tlan liam nghal daih a, ka en zui vawng vawng. Tinge mawni ka thin hi a nâ ut ut mai! 

Muangchangin ka inher a, Awi, ka phu nasa lutuk! " Min tiphu alawm" , ka ti hlak a, ka chhungte ho tak hi chu a, " Ti teh u, i lut ang u, tunlaiah chuan mahni tana chakai khawrh vek hi a ni tawh" , muangchang hian ka pa chuan a ti a, ner deuh salh leh an lu thing nawk nawk chung chuan in chhungah an lut ta vek a, kan thusawi kha an lo hre ve vek nih dawn kha.