Au Mami... Chapter-10

Au Mami... 

Chapter-10 

Ziaktu: Cck Lalchhuanawmi

Ka nu nen pangpar zingah chuan Lily par, mawi kan ti berin kan duh ber a, kan enkawl uluk thei hle bawk. Chubakah umami, Rintluanga û pangpar duh ber a ni bawk a, achang chuan ka nu hian Lily par chu chul heuh heuhin a ṭap leh ṭhin a, keipawh rilru no tih takah ka han ṭahpui leh hrih ṭhin a, ka nu sawi danin mi nunnêm leh zaidam tak a ni a, a hmelṭha hle bawk nghe nghe, a thlalak min entir a, tunah pawh la dam ngat sela chuan a hmelṭhatna en turin lam hla tak tak aṭanga an lo kal duh ngei ka ring, chutiang khawp chuan a thlalak en ringawt pawhin a hmelṭha thei a nia. 

April ni thum khi a thihcham a ni a, ka pa chuan ka chhungte, Pukpuia ka chhungte leh keini chhung tlaia chawhlui kil ho a rawt a, ka chhungte lam pawh kan la hrilh chuang lo. 

Umami chanchin sawi hi ka nu leh pa te hian nuam an ti thei em em a, an chhuang ngawih ngawih tih a hriat, mahse; Rintluanga hriatah erawh chuan sawi lan a ni mang ngai lo thung. 

" Ka nu, Saron kung hi gate chungah zam kul tir hi ila, a nalh ngawtin ka ring", gate en vang vang chung chuan ka ti a, ka nu pawhin en ve vang vangin, " A ni tak e mawle, mahse, mami; Saron pawh hi kung te tak te te hi an ni hlawm tawh a", a ti a, a ni ve viau mai. 

" Lalhmunsiam, bun lo ang ka tih chuan bun lo ve mai rawh, thu i awih lo lutuk mai", hepa ṭhin tak hi chu, khumah min ṭhuttirin ka ke a chelhbet leh tlat tawh, " A mak ṭhin em mai, Inkhawm dawn apianga inhnial ngai ziah mai, kei aia bun sang tak tak an tam lutuk, an pasal ten an khak kher ngailo, bakah kei te chu flat bun ang ka ni dawn lawm chutin a sang vak hleinem", ka ti leh charh charh a, Chawlhni a thlen tawh hi chuan kan heti tlat zel. A lu a thing nawk nawk a, naupangchhia ang mai. 

Nalh tak pawhin a inchei ve theih ngai loh reng reng, " Vawiin chu inkhawm ban rualin Lunglei khawpawnah kan kal nghal dawn", ti pahin pheikhawk min bun tir nghal mawlh mawlh a, " Lunglei khawpawn a ni ve ziah lo", tum deuh bar hian ka ti nghal hlur. Min pawt thoin min nawr kal dat dat, ka kal ṭha duh der lo. Ka pain min lo hmuh chuan, " Pheikhawk bun tur chungchangah bawk em ni in intih lungawi loh leh tak", nui deuh suk suk hian a ti a. 

" Ka pa, mama hi...", ṭah âw ṭuau chunga ka tih chuan, " Kei aiin a lang sang ṭhin a, ka duh lo alawm", tiin Rintluanga a lo inrawlh leh vat, thaw hrawk hian, " Ka lang sang ngai lo e a, kan inchen reng alawm, bun sang lo pawh ni ila kan inchen thuak tho", ka ti a, ka nu chuan nui bâwk bâwk chung hian inkhawm kal vat a rawn rawt nghal. 

Inkhawm ban chuan Pukpui lamah kan tlan nghal a, ka nu leh pa te erawh dam lo an kan thung dawn, kan veng Theiriat ah, ni e; kan veng. A chau an ti tlat tawh, a chhe ber thleng tura inrinlawk a ni tawh mai. 

F. Zomuanpuia, Satel Lem tih hla a sak play-in a zaipui rat rat a, nalh ka tih leh ka sakpui ve hluam ṭhin kha a ni bawk a, rei rial loin ka zaipui ve rat rat nghal. Rintluanga a zai tawp chiang teh e, off a tum chu ka dang tlat a, nuih sen sen chung hian ka zai vak vak a, ka au a ni mah zawk, " I va han zaithiam lo tak", a ti thla leh rawk ṭhin a, kei lah ka uar ang ta deuh deuh, a tum leh bur chu, " Zai ve rawh", ti pahin ka va nghawk leh zeuh ṭhin, " A mipa zawka hi tum bur reng mai", inkuangkuah nghalin ka ti leh zat. 

A zei lo ve hrim hrim nge a tum lo ve hrim hrim zawk nge ni, a der tal pawha min thlem a tum lo reng reng nia! Hmalam en ngurin steering a herhkawi zawt zawt ang lawi a. 

Kan in kan thleng chu, ka chhungte ka lo ngaihzia ka hrechhuak. Ka kuah chuk chuk hlawm a, Duata leh Henry-a te, Têbera te, ka ngai tawh hlawm lutuk ringawt. 

Awmpuii chu chokaah ka kalpui hlawk hlawk a, zah pawh dawn loin Rintluanga'n night dress min leisak te leh a behbawm vel chu ka hrilh ta zung zung a, ka sawi zo ka zak lutuk chu ka biang ka dawm a, ka khu hmui rum rum nghalin ka hria, " Ai,ai,ai... buaina i neih hi chu ka ring reng a ni, i zei lo ve sia maw...", Nunui fridge bula lo ding ngawi ve reng lam chu nâ lutuk takin ka melh nghal a, a hrethiam a ni ang chu lu thing nak nak chung hian min kalsan a. Chutah Awmpuii chuan mo ṭha tak nih hi chu a theih mai a, mahse; nupui ṭha tak nih erawh a harsat ve ṭalh thu te, achang chuan nupui te zawk pawh hmâ la hmasatu nih changte a awm ve ṭhin tur thu te min hrilh piap piap a, chutiang chu ka zah zawng tak a ni bawk nen, ka ip chawih chawih thei. 

An nuih dar darna lam chu Awmpuii nen chuan kan va en a, an nuihpui chu hre ve lem lo mah ila, ka lo hlim ve veng veng tho, Rintluanga an ngaina tih hriat taka an han kuah thuak thuak emaw an chhaih leh zeuh ṭhin te chuan min tihlim takzet. Awmpuii chuan, " Awi, umama nui hmel chu van ṭha em em!", thlêk ngaih chung hian a ti ta reuh a, " I ti ve tho maw? ", melh zeuha ka tih chuan a lo bu nghat nghat, chutah, " Lalawmpui, pasal i neih ve kha aw", ka tih leh chuan hahthlak tih hmel deuh hian a thaw hrawk a, a lu a thing nak nak, " Thikthu pe chhe rual pawh i ni tawh lo", nui kur kur chunga a ti chu ka va ngei tak. 

Inkhawm ṭhulh ṭhak khawpin Rintluanga ho chuan an inkawm a, zanriah kil ve nghal turin min ti tak naa, ka nu leh pa te chauh an nih dawn avangin ka hnial ta a, Rintluanga erawh chuan kil ve nghal mai pawi a ti lo tih chu a tawi khawmuan danah a hriat, Duata lai lai pawhin a ngai nghal der, ka chhungte hi chu ka hmangaihin ka va chhuang hlawm tak! 

Haw kawngah Bawlhhlawh leh Satel Lem hla kan han sa phei tak tak mai nih kha, a va nuam tak, kan nui nasa bawk a hla dang a leng tawh lo, " Bawlhhlawh i ngai thei viau a nih chuan Lunglei khaw pawnah pawh kal mah la nuam i ti chuang lo ang", min kawk zeuh zeuh pah hian a ti a, " Ka ṭingṭang hi thinglerah ka khai ang a, Val putarin va tûm rawh se", tiin ka lo hnial ve leh zel, ka nui nasa lutuk chu ka pum a nâ vek, ka dang te hi a ro hulh mai, ahranpaa inhnial kan nei lo a, vawiin chu a nuam takzet a ni. 

A tuk aṭang chuan kan dan pangngai tea ka nu nen ina inawma, pangpar emaw inchhung sekrek khawih a ni leh mai, mahse; Rintluanga'n ka nu leh pa pindanah bual in, inthiarna awm nghal a siam tir a, mi pathum vel an ni. Chumi kan lo puih ve theihna zawnah kan ri hlut ve zel tho. 

Kan in hi lei chhuat ringa sak ni tho mah se, a sang deuh a, gate a awm ka tih aṭang in hriatthiam mai ka ring. A chhawng ang chi a ni lo a, chubakah a zau lutuk hran lo bawk, sitting room, ṭhutkhawmna pindan kan tih ang chi piahah ka nu leh pa te pindan awmin, keini nupa pindan erawh choka ep chiahah a ni thung. Chumi vangte pawh nia nge, Rintluanga hian bual in a hranpaa a siamtir ni. Umami pindan hi chu kan pindan bul lawk hi a ni a, hei erawh chhung leh khat, laina hnai emaw lo zin te mutna a ni mai tawh thung, ka nu min hrilh danin. 

Ka pain, " Mama, in pindanah bual in siamtir ve nghal mai rawh u, a hunlai hian", a tih chuan, " Ka pa, keini te chu a ngai lo, kan bul lawka awm ang tho lawm a nih", tiin Rintluanga chuan a lo chhang a. Ka pa ka thlawp zawk mah, zanlaia zun chhuah ilo velah pawh choka kaltlang kher a ngai ṭhin a, a peihawm lo ṭhin, mahse; thu ve miau hek lo i. 

" Chutin a ni ngawt ngai lo, nakinah nau in pai hunah te a la ṭangkai phian maithei sin", ka nuin a lo tih chuan dawhkan hnuaia Rintluanga ke chu ka tlawh nghal chawrh, a hnialkalh leh ang tih chu ka hlau lutuk ringawt. Mi pawh en loa chaw a bar mial mial chu ka va tlawh leh chawrh, " Nia, naktukah ka hrilh ang e", a ti ta nge nge, ka lawm lutuk chu chaw ka khawrh nghek a, a ṭul teh ṭeuh lo tih ni awma min lo en chu ka lo nuih sen sen a, a khi sup ve nghal. 

Kan damlo chau tawh pawh chu mak tak maiin a ṭha chho ve zel mai a, kawng lehlamah chuan a lawmawm phian. 

Kan pindanah pawh bual in, inthiarna awm nghal nen ka nu leh pa te hman tur an siam zawh rual chuan an siam ve nghal a, tihi chuan a hahdamthlak tawh ang te han ti ila. 

Vengchhungah pawh ka tlangnel chho a, kan ṭhenawm lawka an mo nen hian kan inkawm ve zeuh zeuh, mahse; a pasal chhungte hi a sawichhe vak vak zelin, a pasal ngei pawh hi a chhuah chhe thei em em zel mai a, tih vak ngaihna ka hre ṭhin lo. Famkim lo vek kan ni a, fel lohna te pawh kan nei vek, chumi inhriatsaka insawichhiat ang chi hi chu ka duh lo, kei chuan a ṭha lam hi ka sawipui hram hram zel a, chumi vangte pawh a nia nge, dawr kala inhmuh nikhua hian kan inbe lum lam zel tawh, keimah hi ka dik lo nge phei chu ka hre lo, a bula ka awm reng chuan a chin dan ṭhalo ka kai ve ang tih ka hlau a, kan inbiak zeuh zeuh theih chuan ka lawm em em. 

Naktip lawk hi umami thihcham a nih tawh avangin a thlan kan tifaiin kan chei ṭan a, ka nu leh pa te lungchhia hnem ngaihna ka hre ṭhin lo lutuk hi chu ka inhaw ngawih ngawih. Ka pa chuan ka pa min hringtu te lo va hrilh tawhin, chawhlui min kilpui dawn a, Rintluanga pawh ka hmu nguai sawtin ka hria. 

" Mam, han nui ve sak teh", necktie suih sak pah chuan ka ti a, office a kal dawn hian necktie ka suih sak ziah zel, " Necktie awrh hi ka hua", heti tlat zel hi kan ni bawk, " Coat nen induang ve zuarha necktie awrh loh te chu a", nectie pawt zip chawih pah hian ka ti leh a. " I awm aṭang chauhin necktie pawh ka awrh phah", ner nung hian a ti leh, " Chupawh nise, nui ve phawt rawh", ka tih chuan, " Necktie chungchang sawi laia thildanga lo pakai", 

" Ka pakai lo, i nui hmel ṭha ka tih vang zawk a nia", lei chhuat teta ka ti chu a lâi kual vel, a ne ne kual ta mai mai a, atawpah chuan a nui hmel ṭha zet chu ka hmu ta nge nge e, " Midang bulah han nui vaih teh, abikin hmeichhe ho bulah, i nui tih ka hriat vaih chuan i chak lo ngawt ang", tiin ka kut te ka hum ruh kual a, Awmpuii'n thikthu pe chhe rual ka nih loh thu min hrilh kha ka hre chhuak zawk, a ho em mai a. 

Ṭhenawm pi te leh kan laina hnai deuhte an lo leng khawm ṭan a, umami thihcham pualin a ni ber ang chu, ka nu pawh huanah a tâp chawt thei ta bik lo a, keipawh inchhung sekrek ilo vel pawh eirawngbawl pah hian ka tifel hi a ni deuh ber tawh. 

Rintluanga'n ATM Card min pe a, bazarna atan leh ka kawl ve hrim hrimah. 

" Kan dam lo ṭha chho leh chu a zual an ti leh tlat mai", ka pain a tih chuan, " Chuti a nih chuan mama pa, vawiin chu han lang ve ila a ṭha lo ang maw?", tiin ka nu chuan a lo zawt let vat a, " Naktuk hi au mami thihcham a ni tawh si a, tun zan emaw a tukah a kal mai ang tih a va hlauhthawnawm ve", Rintluanga chuan a lo ti ve a, an thusawi ngaithlain ka ngawi reng thung. 

Ka pa chuan Rintluanga chu Office kal phawt turin a ti a, a ṭul a nih leh chanchin inhrilh hre mai turin a ti ta ngawt.