Au Mami... Chapter-11

Au Mami... 

Chapter-11 

Ziaktu: Cck Lalchhuanawmi

" Mam, mama tho teh", tiin ka ko mawlh mawlh a, lo hre thei hlauh sela, eng emaw hian ka thau ah min man tlat a, hlauh tur awm si lo chuan ka hlau ru tlat bawk, Mama chu ka ko leh a, " Engthil nge ni ta?", thophang âw tak hian a rawn ti ta hlawl, ka ngawih deuh vang vang hnuah, " Ka hlau", ka sawichhuak thei ṭawk, ka mut ngai ngaiin ka mu tawp a, ka che ngam thlawt lo. 

" I mit meng rawh", 

" Aih, ka hlau alawm", ka mittui ka dang zo leh lo, hru tur takngial pawhin ka che ngam bawk si lo, a kut lum thar thara min kuah khawmin, " Meng tawh rawh le, a hlauhawm loh i bulah ka awm alawm", a ti a, chuti chung pawhin ka la hlau. Meng tura min rawn tih leh chuan men luih ka tum ta a, hlau chung chunga ka'n mengchhuak pawp chu a lo êng uar mai, ka thaw huai huai a, ka kut pawh ka tiche ve ngam ta e. 

Min kaithoin tui min in tir a, tlemin ka hlauhna pawh a zia ve deuh, " Hlauh tur a awm lo, mangchhia i mang a nih kha", ka lu chul heuh heuh hian a ti a, ka pangchan chhuak ta, a âwmah ka bei hle hle bawk nen chuan ka ṭap ta ngawt a. " Ṭap tawh suh le, i bulah ka awm hi", min kuah nghet sauh sauh, " Zinglam dar hnih chauh a la ni si a, ti teh; mu leh mai ang, êng hi chu tithim tawh lo mai ila", dam diai hian a ti leh sap sap a, a mutchhuak hmel kara min ngaihtuahna hmel chuan ka lung tichhe zual leh sawt. 

Ham bai bai chung hian pindan ka chhuahsan a, mama erawh a tho tawh nia ka hriat avangin choka ka pan ding nghal, mahse; ka nu zawk lo awmin Kan damlo chau thar leh chuan mual min lo liamsan reng chu niin! 

Zinglam dar thumah niin, ka pa leh mama pawh an kalna a rei loh thu min hrilh a, chutia ka tho tlai ta ber chu inthiam lohnain ka khat nghal a, nuam lo duh tak a ni, ka nu chu ka pui vat a, " Mama'n i mang a ṭhat loh thu a sawi a, kan tiharh duh lo che nih kha", min ti lehnghal, ka hlauh ber leh mang ṭha lo ka man awm pawh ka hre bawk si lo, mangchhia ti ve tawp tawh mai ang. 

Mama leh ka pa chaw ei turin an lo haw a, umami thihcham puala chawhlui kil ho kan la ti hram, a phu ve lawm. Hlauh ka nei tlat kha Mama'n mitthi kan neih dawn vangah a puh a, chu chuan min tilawm ve em em, a nui hmel ṭha tak kara min ngaihtuahna hmel lo lang leh khan mawle!

Chutih lai chuan ka chhungte an lo thleng chawpchilh ve nghal mai a, kan nu leh pa te ho mitthi in lamah kalin Bawiha'n Mama, thlan laihnaah a zui ve dawn ni awm a ni. 

Awmpuii leh ka mopui te pahnih, mopui tihah veng danga awm te nen chuan eirawngbawlin kan ri chel chul a, an pasal te nena an intawn dan te, an inneih zan vel te leh, aaa, eng eng emawni an sawi ṭeuh a, kei erawh sawi tur nei ve ta lo chu ngawi rengin ka lo ngaithla hmiah hmiah mai. 

Lalawmpuii ṭawng thei lutuk hi chuan min tibuai leh ta, ka chanchin a sawichhuak ta alee, Mama'n night dress min leisak enin ka ha ngai bawk lo nen, min dil ta sap sap, ka lo phal lo ve tum hrang, ha ngai lo mah ila duhsak taka min lei, midang pek ka phal lo nasa lutuk a. Councelling ka dawng ta mawlh mawlh mai, hui; nupa chungchang tih luk lak, ka ai naupangten awmdan tur leh thurawnte min pein  min hrilh ta mai chu nia, a upa ber hian thurawn te pe zawk tur ka nih laiin. Thinrim thei pawh ka ni lo, ka zak peih lo ti dawn ila tlemin ka zak ve deuh tho bawk sia, ka ngei hlawm lutuk hi ka khawng fawk fawk chak hlawm lutuk. 

" Mami hi kan hrilhhre duh tawh ang em?", thingpui pek ka tum chu min hringtu ka pa zawkin chutiang thu ka pa a zawt ka hriat chuan mak ka ti kher mai, " Ka hrilh theih ka ring lo, ka hlauthawng a ni", tiin ka pa chuan a lo chhang a, min hringtu ka pa chuan, " Ni lo ve, kan fanu hian a pawm thiam em em ang", keimahah zawhna tam tak a rawn lut nghal, engtak chu ni ang maw aw, ka rilru a luah leh tlut tlut dawn nih hi. 

Min hawsan ta hlawm chu a ruak huaiin ka hria, Mama'n ka chhungte a thlah a, khawhar inah lo tlang nghal mai turin ka ti, keipawh zanin chu ka lan ve ngei a ngai tawh. Ka nu te nen kal rualin ka pa chu ka en leh zeuh ṭhin a, ka ngaihbel tawh nge phei chu ka hre lo nain, thup nei tlat hmel pu hian ka hre tawh mai. 

A tuk chawhma chhung chu Mama tih loh chu khawhar inah kan tâp chawt a, zai a nuam phian, " Phungrual an ṭin ang a, Vânduai kan rûn ṭahnaah hian; Ka awmhar lungngaih chhûm a lo zîng ang Lalpa, Ka ngai dâwn êm a che", he hla hi kan lo zir tawh ṭhin, mahse; vawiin chu min hneh lutuk tlat, nimin lama kan boruak ka ngaihtuah phei chuan, " Lungduh an liam ta a, An sûlhnu lei awmharah hian", ka rilru no chhuak lehin ka mittui a luang zawih zawih a, ngaihtuah loh tur thleng thlengte chuan ka ngaihtuah zui mawlh mawlh, ka nu leh pa te hian zankhat mit  chhin min tawhsan ta se emaw, ka unau te tu emaw ber hian emaw; ka pasal ngei pawh hian, ka hria lawm, ka pasal nen hian hmangaihna hmingin kan innei lo tih chu, mahse; min kalsan thut ta ang sela ka awm thiam ka ring tawh lo. 

Chutiang ka tawh loh nan ka Ṭawngṭai hnuhnawh leh, châng li-na kan sak lai phei chuan ka nu ka ngaihtuah a, umami harsa ti taka a thlah liam tur te chu mitthlain, engtik emaw chuan Pathianin fa min la pe ve ngei ang a, min laksak leh ta si se, aww; ka ngaihtuahna tak hi chu! 

Zan dar kua a ni a, ka nu leh pa te khawhar in kal pawh lo haw tawhin an mu fel der tawh, mama erawh Office ban chu sawi loh, tun thleng thlengin a lo la haw lo, call a chhang thei bawk si lo. A hna a laklawhah chuan ka ngai thei der lo, ka mangang hlauthawng ru tel tlat bawk. 

Pawnah te chuan chhuakin ka vei ka vei a, achangin pangparte chu biain, mama thla chu ka hau leh mawlh mawlh ṭhin. Chutih lai chuan kan in hi motor light ni ngei tur hian a lo chhun êng uar mai a, mama ngei a ni e. Inchhungah tlan lutin pindanah ka lut nghal a, khumah ka ṭhu tum luau mai le. 

" Tu nen nge in awm?", thlawt in a, ka ringhlel phal chiah si lo, ringhlel deuh thoin ka awm, " Eng nge i sawi awmzia?", mak tih hmel deuh hian a ti a, ka bula lo ṭhu pah chuan, " Ṭha deuhin min lo hmuak ve la, tianga thinrima lo inhmuah te chu a", 

" Chu chu ka zawhna chhanna a ni lo", hawisawn chung hian ka ti a, amah zawk hi thinrimah a ṭang dawn nge ni? " Ngati nge call i chhan theih loh? Tu nen nge in awm ka tih chu?", lukhama vaw chawrh chungin ka ti leh a, a ngawi reng ringawt. Chu chuan ka rinhlelhna a tizual lehnghal.