Au Mami... Chapter-12

Au Mami... 

Chapter-12 

Ziaktu: Cck Lalchhuanawmi

Engmah sawi loin lukham nen a chhuak daih a, mak ti takin ka en ringawt, ka ṭah pawh chhuak tawh lo. 

" Ka tihpalh aw", tia ka beng bula phun ser ser thawm chu ka hre re ruai a, men ka tum a ka thei der lo, ka sawi thiam danah chuan a incharphui tlat. " Ka tihpalh aw", tiin a rawn phun leh, taksa lum ther ther ka nghen danah leh kut lum ther ther ina min kuah danah chuan mama a ni tih ka hre ta a, ngaihsak zui duh loin ka muhil zawm leh hmak. 

" A va mak tak, Lalrintluanga ṭhin hi chu", ka nuin atih vak chuan ka va en vat a, mama, ka nu mal khama lo mut a tum chu niin, " Ka nu, min duat khat tawh em mai", pangchang tak hian mama chuan a ti a, a mu nghal zat bawk. Ka nuin, " Nu te duat theih pawh i ni tawh lo, duattu tur che nupui i nei tawh alawm", dam diaia a tih chuan ka awm hmunah kan lo ner nasa mai. Mama'n, " A sual em mai, min duat chu sawi loh, min hau nasa thei lutuk", a tih leh chuan ka melh rawm rawm nghal a, nui var vara min lo en kiauin mit min la siai khum zui. 

" Ka Bible chhiar lai min tibuai, tho teh",

" Ka lu chungah dah mai rawh, Hmuni, thingpui ka la in ve lo a nia", leh thlarawk ṭhin hian a, " A mak, khatin mahni nupui te an ko ngai lo, duat deuh tein ko ve ṭhin rawh. Chubakah i haw tlai dawn thu te hrilh ve ṭhin la, chaw pawh ei loin a nghak ṭhin che nia, duat hle tur i ni", ka nuin a tih leh chuan lei ka va chhiahkhum zeuh a, min melh râng nasa mai. 

" Khatia i tum bur reng chuan lungdam takin ka kal thei dawn lo a nia, han nui teh maw, a nih loh chuan keipawh ka tum reng ang a, ka nui hmel ṭha tak pawh i hmu thei tawh lo mai ang", min piai nawk nawk a, nuih chu khawi lamah, a hui pap pap a, " Pathian hian engvangin nge mi luhlul deuhah a siam che le", beidawn hmel tak hian a ti a, chutianga han intih, mahse ka chhang buai peih lo, ngawi rengin a necktie ka suihsak mial mial, ka ngaihthlak duh ber a la sawi lo tlat. 

Lungdam lo deuhin kan inthlahliam ta nge nge a, a kal liam hnu chuan ka inthiamlo hnuhnawh leh, buaithlak ṭhin, a hunlaia thiltih duh ṭhin loh hi chu. 

Ka nu leh pa te khawhar in lamah an la kal zeuh zeuh a, achangin ka zui ve ṭhin bawk. Vawiin pawh an va lang leh zawk dawn a, kei erawh in lamah inthiamlo ru tak chungin inchhung sekrek ka khawih thung.

Mama ringawt ka ngaihtuah a, tukin zinga a kal dawn te khan ṭha taka lo thlah ve tur hi ka ni sin le. Tlai lamah lo haw tur a awm tawh lo ang a tih ka ngaihtuahnaa a lo luh phei chuan ka hlauthawng lutuk hi, ka lûng a thlawk chhuak lo chauh. Tho lawkin mama ka call nghal a, " Hello, eng nge ni ta?", ka ṭawngchhuak leh thei lo, ka tawt leh up up a, atawpah chuan ka inhnit hlawp hlawp ta nge nge, " Hmuni, i ṭap em ni? Ngati nge?", hlauhthawn hmel fahrana a lo tih leh chuan min tilungchhe zual. 

" Engmah a ni lo, bai siam tur a awm lo a, lo lei haw mai rawh", ṭap pur chung hian ka ti a phone ka dah nghal daih, keimah leh keimah pawh ka inawih lo, ka innuihzat hial. Mama'n min lo call let nghalin bak hlar hian ka eng nge vak a, " Khati vak vaka au a ngai em ni? I thinchhe lutuk, ka lo haw hma dawn nia", dam zet hian a rawn ti ta a, ka thaw huai mai, zahthlak letling zawk hian. 

Zanin chu saisira mu tho siin inhmatawnin kan mu, A kut veilam khama muin a kut dinglamin min kuah pah a, achangin ka hmui a khawih neuh neuh ṭhin, ka hmui khawih hi nuam a ti thei viau. Thawklehkhatah a kut ka sehsak thut a, lakchhuah tumin a bei fat fat, ka men chuan a lo ner nasa mai a, ka thlah phal tawh teuh lo, " Thlah rawh", ner nung hian a ti leh a, ka nuihza tawlh tawlh mai bawk si, ka thlah duh tawh bawk si lo, mahse, " Lalhmunsiam, ngaihtuahna ṭhalo min put tir a nia, thlah vat rawh", a tih chuan ka thlah rang nasa teh e. 

Ṭhen sak chung hian, " I chil hlir a kai va tenawm tak", puana hruk pahin a ti a, a hruk zawh chuan ka hmui bawk a rawn khawih leh, " Ngati nge ka hmui ringawt i khawih ṭhin?", 

" Hmui nilo thil dang khawih reng ringawt ila i duh zawk em ni?", hepa tak hi chu. 

" Ka duh ka tia mi?", ti hlakin ka inhersan daih a, a nui kur kur mai. Nghet tak hian  Min rawn kuah leh nghal tho, " A nih chuan, fanu min hrinsak rawh aw", 

" Fanu maw?", mak ti taka ka en vat chu a lo nui sâng mai a, mahse; a thutak tih chu hai rual a ni lo. Sawi mai tur ka hriat loh avangin ka ngawi reng a, 'Aw' tiin nge ka chhan ang a 'Aih' tiin, ka rilru a insual buai nuai nuai mai, " I duh lo mi? Ka tilui chuang lo che nia", aw aw, hahthlak ṭhin, min tilui leh tilui loin awmzia tehvak a nei awm der si lo, fa hrin thu hla te chu Pathian thu thu a ni awm si a. " Kan mut hmain kan ṭawngṭai ziah ang a, tunah pawh kan mut hmain ka ṭawngṭai thlap", a tih leh chuan ka nui chhuak ta hawk hawk a, " Eng nge i nuih? I ring lo em ni?", rin leh rin loh lam pawh ni lo, mut hma te chuan ka ṭawngṭai ve reng, ka pasal hi a lawmawm mah mah zawk, " Lo en rawh, rinna hi pawimawh nia", ti pah chuan a kawr a phelh a. 

Zep lo-ah chuan ina awm reng chu ka â thei mai dawnin ka hria, tih ngai tih nawn tlut tlut ni bawk nen, mama hnungzui ka tum et et nain, ka nu leh pa te an pahnih chauha ina an awm tur ka lainat bawk si; inchhung chet lah tih mai mai a lo ni lo ropui nen, lungawi kan zir mai a ngai a ni. 

" Mami, i nu len lawk hlan hian biak lawk che ka va duh ve", ka pain a lo tih chuan ka pan vat a, engtak chu ni ang maw? 

Ka nu leh pa te pindanah chuan lutin ka pa chu a lo ṭhu ngui bam mai a, chu chuan min tihlauthawng nasa, ka nu awm loh hlana min biak duhna hian chhan eng emaw tak chu a nei ngei awm si a, thil ṭha lo lam hlir ka ngaihtuahnaah a rawn lut nghal. Ka pain ka nu awm loh laia min hrilh duh chu min hringtu ka pa pawhin a hriat thu leh, ka nu erawhin engmah a hriat loh thu te, hmanhmawh angreng taka ka pa be tura kal a rawt nghal leh mama nena kan inneihna tur sawirem a ni nghal te chu a chhan tak sawi chuang lo chuan min hrilh leh dap dap a, chutih lai chuan ka phone a rawn ri ral ral mai, choka-ah ka dah daih chung pawhin ka hre thei nia, mama ni leh pek ang ring taka set leh tu chu. 

Ka pa chuan chhang phawt tura min tih avangin pindan ka chhuahsan a, Bawiha lo ni rengin, " Au mam, umama khan Têbera admission fee min tum sak vek a, Henry-a pawh tiamin. Têbera chu Serkawnah, umuanawma thawhna school-ah khan a nia, Henry-a erawh kan vengah la kal rih se kan ti deuh",

" Mama, ka pasal hi maw?", tiin Bawiha thusawi lai chu ka lo pawtchat a, nui kur kur chung hian, " Aw, i pasal. A hrilh lo che em ni, vawiinah kan tifel chiah", a ti a. Ka hamhaih vek, ka lawm tho bawk, " Hey, dawt i sawi lo tiraw?", bah nuai hian ka ti leh a, ka mittui a tling pam lehnghal, " Dawt ka sawi lo tak tak alawm. Takah chuan maw, in inneih hmaa umama Bazar venga a mu kan hmuh kha i la hria em? Kha tah khan urinmawii thihcham tuk zanah khan a lo mu ka hmu leh a", ni tak e, khami hmun kha umami boralna hmun a ni. 

Mama'n scooty-in a phur a, truck nen an insut avangin umami a boral nghal kha a ni a. " Umama hi duat hle rawh aw, ka lainat reuh lutuk, urinmawii thih chhan kha amah a inpuh tlat a, khalai hmunah khan a awm zeuh zeuh ṭhin a nia. Tunah pawh a secretary Hlima te in luah tur min zawn tir a, an unauin Office-ah a chen tir hrih a, mahse; in luah tur pawh a vang lutuk a ka la hmu thei hrih lo", Bawiha'n a rawn tih leh chuan ka mang nghal vekin ka hria. 

" Mami, mami, i ṭha maw? Ngati nge i ṭah? Thu lawmawm lo lam em ni?", tiin ka pa chuan min sawi harh hi ni ber, ka nu pawh a lo haw ve nghal, " E khai! Engti zia nge?", mangan hmel taka rawn ti lutin min rawn kuah nghal a, " Ih, ih, mama'n ka nau te school kalna tur a lo tum vek a, Bawiha'n min rawn hrilh a", insut hlawp hlawp chung hian ka ti a, ṭah apianga hnap tel ve ziah hi ka haw lutuk, zip zep mai a!

" A ho mai mai ṭhin a, chutiangte chu a tihtur dik tak alawm, bang tawh rawh", ka nuin ka hnung beng thak thak chunga a tih chuan ka pa pawhin, " Ni e, a tihtur a ti mai chauh nih chu, bang tawh rawh", a rawn ti ve a, ka han bu lawp lawp ve tak naa, ka ṭap bang thei der lo. 

Mama hnathawh lo bang haw chu mit sen rum hian ka lo hmuak a, mak a ti nge ni min en duh em em mai lehnghal. Ka ṭah leh ṭah loh min zawh chuan ka ṭah thuin ka lo chhang a, a chhan min zawh erawh chuan ka hrilh duh der lo. 

Chaw ei laiin ka nu leh paten an sawi chhuak leh tho. 

Mama tak hi chu aw, thleng sil min chhawk ngei a, " Mam, fanu kan neih hunah a nu hi min duat ve tho ang em?", a hnunga va kuah pah chuan ka ti a, " A nu maw? Duat dawn lo nasa", nui tet tet hian a ti a, " Kha sil ṭha rawh, sahbawn la kai kha", ka ti bak hlar a, sual reuh lutuk mai, ka nu leh pa te tv en lai ka va enpui ve daih. 

Ka nu leh pa te mut hnuah pawh tv ka la en ngar ngar, ṭul lo lutuk hian. A tawpah mama'n, " Hetiang hi mi i tihtauh ve dan?", ka biang a rawn dawm a, " A nu ber kan duat lohin min vin phar dawr dawr ang tih hlauhawm nak laia", a tih leh chuan ka lo nuih tawi tak a, " Chuan maw; ka thiltih ho tê vangin ṭap tawh reng reng suh ang che, pumkhat kan ni tawh tih kha hre reng la", 

" Ka lawm e, mam, ka lawm lutuk", 

" A nih chuan titau tawh suh aw, i tihtau dan lah hi ṭhing bawk si", min fawp zeuh chung hian a ti a, mu turin pindan lam kan pan hna hna a, khum chungah chuan ṭhuttirin mit ka chhin tir a, zanin chu ha chhin ve reng reng ang. 

Bathroom aṭanga ka chhuah chuan meng turin ka ti a, min hmu chiah chu a meng bial kâwk kâwk mai! Ka sam ka chul leng siau siau vel a, a hmui hupin a ke a per vak vak, a phusa nasa lutuk chu a hlimawm zawk, keiin ka tilui zel bawk nen puan nen tein a inkhuh, a nui hmel ṭha tak kara a lungawi hmel chu thlir nin a har ngang mai. 

" Mam, thil pakhat ka zawt ang che aw, ngati nge fanu i duh?", 

" A chhan chu, au mami tih luih nan khan fanu ka neih ngei tur thu leh a hmingah Lalrinmawii tiin ka phuah ang a, ka vuak hrep hrep ṭhin tur thu ka sawi a, chumi vang chu nia", a khi deuh sak a. " A nih tunah?",

" Tunah chuan fanu neih ka duh chhan chu, Lalrinmawii tiin a hming ka phuah tho ang a,  chin lem nei lek loa hmangaiha duat ka duh vangin, ka theihtawk chhuah tak meuh meuhin venhim ka tum tlat bawk ang. Khami ni khan au mami duh loh chung Kawmzawlah ka lenpui a, kan haw lamah lah", 

" Ka hria e, ka hria e", ka necktie suih lai pawh ngaihtuah chang loin ka kuah a, a hnungah ka chul heuh heuh, " Mahse, tunah chuan au mami dang i lo lut tawh a, ni lawm ni?", nui sen sen chunga tiin ka bengah ka sam a zep ṭha mial mial a, " Au mami kha chu ka nu leh pa hlimna ber pawh a ni, ka pa nena kan lu met tu a ni a, chhunah lah nise thil tui chi tinrengin min hrai puar a, i awm aṭangin kan in chhung leh ka nu leh pa te pawh an khawhar ka ring tawh lo", 

" A nih nang? ", 

" Kei maw, Office kal a hun, ka'n kal tawh ang e, min lo thlah rawh", tih leh min kai a rual a, chhanna pawh inpe chuang loin kan inthlah liam ta phawt. 

Mama thusawi chuan min tifing sawt, ina awm reng ṭhatna ka hre thar ni ber. 

Chumi ṭang chuan ka phak ang tawkin ka nu leh pa, ka pasal, ka chhungkaw tan chuan rawng ka bawl thar a, farnu leh fanu chu ni thei ngai dawn lo mah ila, mo leh nupui nihna neia he chhungkuaa ka awm thei ringawt pawh hi vanneihna vang liau liau a ni a, Pathian hnena lawmthu sawi ban theih loh a ni hial a ni. 

Ka pa lu ka meh sak lai chuan ka nuin darthlalang a lo keng a, " Awi, mama pa, khawiah mah chhuak reng reng suh ang che, ka chang lo palh mai ang che", tiin ka nuin a lo fiam a, " Mama nu mai mai ṭhin hi a, nang neih loh hlaua phe buai ṭhin kha ka ni reng dawn lawm le", tiin âw thum chham ṭha ṭhiak ṭhiak hian ka pain a lo chhang a, kei ngawi reng thei lo ta na na na chuan, " Rual awh in tina em mai", lungawilo hmel tak hian ka lo ti a, " Ni dawn tak e", ka nuin a tih chuan kan nui zo leh vek. 

Momo ka siam lai chuan ka phone a lo ri a, Bawiha bawk a ni, " Au mam, umuanawma awm dan hi ka duh lo tawp mai, umama hi duh ai chuan a kawmnel mah mah ni, i chungchang hlir a hrilh ṭhin lehnghal, abikin in inngaihzawn lai vel. Umama hian a hmu khawlo zo vek palh ang che tih hi ka hlauh ber a ni, chuvang chuan umuanawma hi hrilh ve deuh rawh aw", 

" Engtin nge i hriat?", 

" Ka hmu reng reng ṭhin lawm, nachin deuh lawk pawh khan Office-ah kalin Hlima te in luah tur ka hmuh tawh thu umama hrilh tumin ka kal a, umuanawma kha a lo awm leh a, i chanchin bawk ni a sawi leh ni".