Au Mami... Chapter-4

Au Mami... 

Chapter-4

Ziaktu: Cck Lalchhuanawmi 

Thawhpui dangte hoin Rintluanga nen kan inkarah awm a awm leh awm loh min zawt rak rak hlawm a, a awm loh thua chhân bak chu tih theih vak ka nei chuang lo nain, awih loh fe fe chu an awm tho, a awm miau loh chuan 'awm e', tia chhân ngawt thu awm suh. A ke chhuiha ka tlûk hnu leh ka pawh tluk ve hnu aṭang chuan arukin kan inmelh sala ṭha ṭhin teh a sin, vawikhat inmelh pawha thih theih chu nise, kan thi ngun tawh ngawt ang. 

Min tir kual peih bawk si, " I secretary pawh ka ni lo" , thinrim ṭeuh chunga tih pawhin ka pui leh nge nge zel, Secretary ka nihna ber ka pu, kan pu ber lah hi tunlai chho hi lo kal loh a ching ta zeuh zeuh a, a fapa kutah hian Office hi dah a tum ta nge mawni!

" Naktukah tihzawm tawh mai ang, ka mut a chhuak tawh" , ham bai bai chung hian ka ti a, ka mut a chhuak tak tak. Min thlah haw a tum awm der si lo, sana ka en a dar riat a lo ri ṭep, ka meng bial kâwk a, " A nih, va haw mai rawh" , mi pawh en chuang lo chuan a ti a, ka rin dan chiah. Office-ah kan pahnih chauhin hna kan thawk tawh a, min thlah ve tur thu te chu a hming amawi tal pawha sawi ve awm hi nia. Mahni hriat tham leka phun bul bulin ka thawhsan ta daih a, " Hmuni", beisei nei ru tak chungin ka va en a, " I haw hmain coffee min lo siam lawk mai", dar chhin hak chung hian a ti a, ka bag hian ka va vawm chawrh dawn mile. 

Engle khawle, coffee chu ka siamsak leh phawt a, va pek pah chuan, " Min thlah duhna rilru te hi i pu ve reng reng em?" , ka ti a, " Lunglei khaw pawnah ka kal duh lo reng reng, ka hlau", hepa tak hi chu aw... "Nang ai chuan ka hlau feee zawk, hawna tur pawh ka neih loh hi" , kut phar chhuak meuhin ka ti a, en pawh min en lo chuan, " Khawiah nge i bialpa kha a awm tak a? Lo inhruai tir leh mai ta che" , a ti thum dut a, coffee no la kangin a in zo nghal zat, a sat tehreng nen, ṭhen salh salhin ka lo en a, sa a hre lo nge mawni le. Ni tak e, ka bialpa a tih chu Muanawma kha a ni ngei ang, kan inbiak lohna a va rei tawh tak, a damṭha zel ang chu maw! 

Zawi sap leh kun ngaih chung hian, " Ka bialpa pawh a ni lo e a" , ka ti a, ka thawhsan leh ta daih. 

Ka chhungte pawh hian min biak pawh tumna te hi an nei lo niang, tun thlengin ka la haw lo a, an call pakhatmah ka la dawng lo. Kan Office hi Chandmari-a awm a ni a, ahma kha chuan Venglaiah, Kimi bulah ka awm ve mai ṭhin a, ke pawh khan ka haw mai ṭhin a sin le, ni tak e; Kimi pawh kha an khuaa a haw hnu aṭang biak theih a ni tawh lo, engtin nge a awm zel tak ang le? Eddie-a nen chuan kan inbe zeuh zeuh a, Delhi-ah coaching a kal mek, an pahnih avanga ka buai ve ṭhin zia kha! 

Chuzawng ai chuan Bawiha rickshaw chhe daih chu a, phone ka on chiah chu, missed call a intlar dul mai, ka lawm hnuhnawh leh lutuk chu hnûk ulh ṭeuh chungin Bawiha zawk chu ka call ta a, " Au mami, ngati nge tun thlenga i lo la haw loh? In hna a laklawh deuh em ni? PaRama hi ka bia ang a, kan lo hruai dawn che em ni niang? A thuhrimah ngati nge call i lak theih loh? " , a lo ti nghal zung zung a, silent-a ka lo dah daih thute ka han hrilh a, chutih lai chuan Rintluanga'n ka phone chu min lo chuhin, " Keiman ka lo thlah ang" , ti supin call a cut nghal daih a, " Ti rawh le" , tiin nui sâng chungin ka kut a rawn chelh a, ka hamhaih em avangin a thu ang chuan ka awm ve tawp. 

Rintluanga chu ka va en leh zeuh ṭhin a, a la nui sâng reng mai, engtak chu hria ni maw. Huii, Pukpui hi chu Lunglei khawpawn a lo ni tak meuh meuh a nih hi!

" Lalhmunsiam, saw en rawh, i ṭhian thlawi meuh pawhin pasal a neih leh tawh saw, eng i tibik em em nge ni?" , tiin ka nu chu zing kar karah a âng leh buan buan a, "Nangpawh, eng i tibik em em nge ni, pasal nei turin min tiziah mai" , carrot seh bung hmawk chung chuan ka ti a, engtik laiin nge ka nu chu ka bul a lo thlen hman ka hre lo, ka lu-ah a chawhtawlh ken chuan min khawng chawrh a. " Ka nu" , ka lu tuai vat vat chungin ka ti a, " Ka sawi tawh kha, kum sawmli ral ka kai hma chu pasal ka nei dawn lo reng reng, ka nu duhtak, i ânhla titamtu nih ka la duh alawm" , nui ver ver chung hian ka ti a, ka kuah nghal vat bawk. " Ka nu, khawng leh rawh" , Awmi chuan a lo ti, ka nu chuan min khawng leh chawrh, "Lalawmpui" , ka ti tuar a,  " I thuawih loh man a nih kha" , an pahnih chuan an lo la ti zui, a engah chuan nge maw thu ka awih loh le, " Nangni pahnih tak hi chu aww" , ti vawng vawngin choka ka chhuahsan daih a.  

Ka vahte ho nen inchhaih paha kuhva leh panhnah han khawih zawh leh takah chuan choka lamah ka va phei ve leh a, eirawngbawlin Awmi chu a lo phar buai nasa mai a, peih lo tawkin ka pui nghal zat. Ka nu chuan panhnah nge mawni a lo sil a, an pahnih bula awm hi chuan pasal nei tura min tih rualin nuthlawi ang mai hi ka ni ziah bawk, pasal min han neihtir ngei zel a, chuan eng eng emaw vangin kan inṭhen ta a, kan inṭhen chhan pawh keimah vang a ni ngei zel bawk. 

Bawiha'n rickshaw khalh tur a neih tak lohah chuan ka nu leh pa chu a fehpui ṭhin a, a changin inhlawhna tur a hmuh chuan a inhlawh lawp lawp mai ṭhin bawk, Awmi hi chu tihian inah a lo awm a, kuhva hi dawrah a pe ve ṭhin a, a hlawk ve thei lutuk. 

Vawiin chu kan pu a lo kal ve teh khiah, ka lawm lutuk ringawt, Rintluanga'n min tir kual zet zet thei tawh lo ang chu. Mahse, Ka hmu dawldâng tlat, Rintluanga ko turin min ti a, coffee pein ka va lut ve bawk, " Nupui neih zai te hi rel tum ve tawh rawh" , ehee, ani pawh chu! " Ka pa, hnathawhna hmunah lehzel chuan sawi lo teh" , min lo en zuk zuk pah chuan Rintluanga chuan a ti a, a zak ve a ni chiang, chhuah ka tum chu, " Mami, khalai file hnawk nuai kha lo tifel lawk mai ta che" , tiin ka pu chuan min lo au ding a. 

" Mama, kan fapa neihchhun i ni a, i nu leh pa te hian i fa hrin ngei pawm kan chak ve tawh a ni, kan duh tawh zawk.  I nu leh pa te hian kan dampui reng dawn lo che, he Office pawh hi i enkawl tur a ni a, chumiah chuan nang lo enkawltu tur che kawppui i neih ngei ngei a ngai bawk a nia, kum sawmli lai i ni tawh, nula chhai thlu turin i hmelin a zir lo ti dawn ila a zir ve tho, chuvang chuan thlakhat chhung vel chu nupui zawn nan hun hmang rawh, hna ringawt ngaihtuah loin" , ka pu chuan a ti charh charh a, aruk tak chuan ka lo khawngaih lutuk, Rintluanga pawh chuan neih ve mai tur hi a nia aw. Ka va en chu a lo ṭhen sak sak a, a tukkhum a hiat nuah nuah bawk, a hmel aṭang chuan a hreh ngawih ngawih tih a hriat. 

Keipawh chu ka han inngaihtuah a, ka pu rilru ang hi ka nu leh pa te pawhin an put ve tho ka ring, mahse; kei chu pasal nei thei dinhmunah ka ding lo a ni. 

Rintluanga chu a ngawi reng a, min lo en zeuh ṭhin tih lohah chuan a che chang eih lo, kei lah hian ka va melh leh zeuh ṭhin nen. " I senior tawh lutuk, tar lam i hnaih zel a nia" , ka puin a tih leh chuan ka insum zo lo chu ka nuichhuak ta hawk a, ka hmui ka hup vat, ka nui khur dar dar a, ka va inthlahrung tak, mahse ka nui tawp thei miah lo, ka pum a na vek. Ka mit sirin an pahnihin min lo en reng tih pawh ka hmu thei, ka mittui te chu a tla phung a, nuih te hi tihtawp thei sela ṭha tur hi nia awww. 

A hnu deuhah chuan, " Saw mami pawh a nuihzat tawh saw" , nui huah huah chunga ka puin a lo tih takah chuan ka thla a muang huai mai. Ka pu room kawngkhar ka khar chiah tihah Rintluanga chuan ka kut a lo man chawt a, " Engvangin nge min nuih a?" , min melh rum chung hian a ti a, chil ka lo lem khawlh, ka kut lah chu a hmer nâ em em mai lehnghal, mahse; ka hlau duh chuang miah lo, " Ka duh leh ka nui ang, i nuihzatthlak em alawm" , nui deuh sak hian ka ti a, laser kap chhuak thei tur ang hialin min melh. 

Engmah sawi leh tawh chuang lo chuan min en vung vung a, a mitmeng pawh a dul riai riai, " Min thlah teh" , tia ka kut ka tiche chu vawilehkhatah min pu kang nawlh a, a dar dinglamah ka uai hnap mai. " Vanlalrintluangzaktheilomisualpa, min chhuk tir vat rawh" , sehchilh tak leh zawi sap hian ka ti a, ka ṭawng ring ngam lo, ka puin a lo hria nih chuan ka mualpho dawn lutuk, chubakah thawhpui dangte lakah pawh. Kan inkarah engmah a awm lo tih ka sawi hnua hetianga min lo hmu a nih ngat phei chuan, a chi dawn lo lutuk. 

Ka ke ka leng vak vak a, a hnungah ka chum vak vak bawk, ka va ngei tak, " Shhh, shhh, mi in min lo hmuh i duh em ni?" , zawi sap hian a ti ve a, zawi sap bawk hian, " Min chhuk tir rawh" , ka ti ve leh a, a lu ka kêk bawrh bawrh bawk, awmzia phei chu awm lo teh e, " Nangte hi, bialpa chu i nei lo a ni hrim hrim, tun aṭang chuan puan i veng emaw pawnfen chauh feng tawh ṭhin ang che, chuti a nih loh chuan" , tih leh ka mawng a rawn ṭham vak. Chupa mai mai chu!!!

" Vanlalrintluangzaktheilomisualpa, tenawm, rilru hmul lutuk" , ti pah chuan ka chum vak vak a, achangin ka kêk a, ka ke ka leng vak vak bawk. " Ka hua che, ka haw lutuk che" , ṭap pur chung hian ka ti a. " Chutiang ka hming a ni lo" , ka va ngei tak. Chutah leiah min nghat chawrhin min fawp zui ta mai!!! Ka tal leh vak vak a, hetiang hi chu lo tem ve hlak tawh ṭhin ka nihnaah a kalhmang chu ka hre hneh ve em, chuvang chuan ka hmui ka chip tlat a, leh a rang thei ang bera talchhuah tumin ka bei bawk, a awmdan hi a mak tual tual mai. 

Reilo te-ah inla hrangin, " I va han luhlul tak" , ring leng lawng hian a ti a, rum tawka melhin ka hmui ka hru vak vak phawt a, chutah nui lui sakin, " I beidawng hma em mai" , ka ti a, keipawh chu a. " Engmaw?" , tih leh min lo pan hnaih leh a tum chu ka pu room-ah ka tlan lut ta daih...