Au Mami... Chapter-5

Au Mami... 

Chapter-5

Ziaktu: Cck Lalchhuanawmi

Inkhawm kan bang kan haw lam chu ka pa nen kan titi mai mai a, ka nu a nawmsam meuh loh avangin zanin chu inkhawm a ṭhulh a. Kan in leh Biak In hi a inhlat ve angreng hle a, chuti chung chuan ka nu leh pa hi chuan inkhawmte hi an ṭhulh mang ngai lo. 

Ka pa bulah chuan Têbera zirna senso tur atan liau liaua ka pawisa khawl hmangin Bawiha rickshaw khalh tur, secondhand ṭha ve pangngai emaw, pawisa tlem azawng belh a, a thar hlak emaw lei sak ka rawt a, ka pa pawh chuan a lo remti ve khawp mai. Têbera zirna senso tur ka ti tak naa, Nunui leh ka vahte ho zirna senso tur pawh a ni tho a nia. 

In kan thleng chu an lo reh duak hlawm a, ka pa nen chuan kan inen hrek hrek a, kan bangbo tih chu a hriat hliah hliah. Thawm chhe te tal hriat tum ni awm takin kan beng kan chhi kar a, kan hawi kual hruk hruk mai bawk. A hnuah ṭi deuh dâk chung hian, " In awm em? " , ka han ti a, tumahin min la chhang chuang lo, " In awm em?" , ka han ti leh a, Awmi chu thawm dim fahran hian an pindan aṭang a lo chhuak a, " In lo haw tawh a ni maw? " , a ti sep sep a, ka pa chuan, " Aw, kan lo haw tawh e. In reh teh ṭhiap lutuk a, min tihlau dawn alawm" ,  a ti a, keiin ka thin zawn chu dawm vang vang chungin Awmi chu ka lo en, " I uang em mai a" , ti pah chuan min lo nghawk zeuh a. 

" Zanin chu kan intifel zo hma deuh a, kan mu ta hlawm vek mai" , Awmi chuan a ti leh a, ka pa pawh chuan a pawi loh thu leh a mut ve mai nghal tur thu a sawi a. Keipawh ka pindan lamin ka kal a, Têbera leh Henry-a te nen kan pathumin pindan pakhat kan inṭawm a, Nunui erawh pindan hran a nei tawh thung. Chhuatah hian kan pathumin kan mu mai ṭhin bawk, an pahnih bulah chuan keipawh chu inthawlh ve nghalin ka kuah chial a. 

A tuk zingah chuan Nunui, Têbera leh Henry-a te chu ka ko a, an zirna senso tura ka khawl tawh chu an pa leh û, Bawiha tan rickshaw lei sak ka pa nena kan rawt chu ka hrilh a, " Au mam, a pawi lo reng reng, keini chuan ṭha kan ti lutuk" , Nunui leh Têbera chuan an lo ti a, Henry-a pawhin, " A pa rickshaw khalhah ka chuang leh chak tawh" , a lo ti ve bawk, a inhnit feih feih a, ka va lainat tak. Ka pawm kang a, a biangah chuan fawp zeuhin ka naute pahnih chu ka kuah a, ka chhuan thu chu ka hrilh mawlh mawlh bawk. 

" I va han ṭah belh tak" , Têbera chuan a ti hlak a, ka rilru no ṭhin lutuk hi chu a buaithlak a ni. " Au mam, ka bialpa chungchang chu ka nu leh pa i hrilh tawh em? Leng turin lo sawm ve ula" , zawi sap hian a ti a, ka la hrilh lo tih ka hrechhuak. Inthiamlo tak chung hian, " Ka la hrilh lo reng reng, ka lo hrilh vat ang" , ka ti ta ngawt a. Nunui chuan, " David-a nia, College veng a mi, kei chu a nu leh pa te pawhin leng turin min sawm tawh a, ka leng thlap tawh bawk a nia" , a ti leh a, remchang hmasa berah ka nu leh pa hrilhin David-a pawh chu leng tura kan sawm bawk tur thu ka hrilh ta a, ka nu leh pa hrilh hmasa loin min hrilh hmasa a, min ring ve tihna nia, ka nau hi chu a fing mawle. 

Pindan aṭang chuan chhuakin ka pa leh Duata an lo inchhaih nui khêk duai duai a, Duata pawh school kai rual a ni ve ṭep tawh e. Ka pa chu awmze nei tak hian ka va en a, nizan lamah ka nu pawh a lo hrilh ve tawh ngei ang. Ka pa chuan min ko khawm hlawm ta a, " Bawiha, hei i u mami hian rickshaw a lei sak dawn che nih chu, keini'n tlem kan thawh ve ang a",  ka pain a tih chuan, " Ka pa, kan leisak zawk dawn lawm, keiin engtin nge ka leisak theih ang ni" , ka lo ti thuai a. 

" Ka pa, chutiang a ngai kher hleinem, inhlawhna tur pawh ka hmu zeuh zeuh a, bakah lo lamah ṭan kan la pah thei tho alawm" , Bawiha chuan a ti a, a inthlahrung hmel chu hmuh hrehawm ka ti takzet. Ka nu lo inrawlh vein, " Lo te chu i pa hian  awm mai mai aiah a ti ve mai chauh lawm. Tun hma ang khan mami hian bazar lamah a ṭhutpui hman tawh lo, hna a nei tawh a. Chubakah, kan fate hi in fel em a, in nu leh pate hian mi nu leh pate angin thil ṭha tak tak pek tur che u leh, ropui tak tak kan tihsak thei lo che u chung pawhin in phun nawi ngai hleinem maw. Tun ṭumah pawh hian mami thawhchhuah liau liau vang a ni leh hi" , tiin a inhnit hlawp hlawp nghal a, a va hrehawm ṭhin tak! 

Kan chhung chuan kan ṭap hi a ni ber, Duata erawh engmah la hrethiam tak tak lo le, " Ngati nge?" , ṭap pur chung hian a ti leh ṭhin a, kan inhmangaihzia thute chu kan han infah leh hlawm te te bawk. 

Tikha chuan ka rilru kaptu ber Bawiha chu a fel ta. 

" Au mami, tunlai chu office hi a reh riau, kan pu mama nena in inhnial thawm hriat tur a awm loh hi chuan, a khawharthlak zawk" , a va buaithlak ṭhin tak. Ka thawhpui te hi kei aia upa te an ni hlawm a, ka aia nau pawh an awm tho, mahse; Au mami tiin min ko vek, Rintluanga tih loh chuan, kan pu ber hi chuan a secretary ka nihna angin Mami min ti mai zel. 

Ni e, tunlai chu Rintluanga hi office lamah a lo lang khat thei khawp, a chang chuan nikhat tal tawp te hi lo office loh changte a nei ṭhin. Nupui te hi zawn a tum ta nge mawni? 

Keipawh hian ka zep bik lo, office hi a ruak huai hian ka hre ve ṭhin a, ka ngai ru tlat zel, a lo lan loh ṭum hi chuan. Mahse, a lo lan tawh hi chuan min tibuai ziah, kei lahin tlawm mai ta'nge tih tum bik si lo hian ka lo hnial let ve ziah tho bawk. 

" Hmuni" , kha maw, a râwl lah hi ring si. Ka pu room-ah ka luhsan daih. Ka chhuah hun min chang nge mawni, " Hmuni" , tiin min lo ko leh vak a, ka phu nasa lutuk chu ka file kenin ka vawm chawrh a, a lo indang hman. " Kekawr ha tawh lo turin ka hrilh che kha" , ti pah chuan ka vawmna file bawk chuan min lo vawm let. Ka inring lo lutuk bawk si nen ka lu a ri fawk a, a nâ lutuk ringawt. Ka lu chu ka tuai ka tuai a, amah lah chu a la nui huah huah ang zui a. 

Ka pu chuan min lo hmu reng a niang chu, " Hna thawk rawh u" , a lo ti a, mei khup zul zulin Rintluanga pawh a kalsawn ve hram, keipawh ka hmaa tihtur chu ka bih ṭan leh nghal vat bawk, pu te hauh ngaia han awm mai ngai ṭhin hi chu aw. 

David-a chu ka nu leh pate chuan zanriah kil puiah an sawm ta a, Nunui lawm lutuk lâi kual vel chu a hmuhnawm lutuk tlat. David-a chuan an chhungkaw chanchin te, a tet lai chanchin leh an unau chanchin te a sawi a, a changin kan lo nui dar dar hlawm a. A felin a ngainatawm takzet bawk. 

Bawiha pawh rickshaw a khalh leh tawh a, a rual hian ka haw ṭhin a, laklawh chang a neih hi chuan ka nghak mai zel bawk. 

Zan khat chu a laklawh leh viau a, office kawtah ka lo nghak leh ran, dar riat a ri tawh a, in lamah kan haw har tur thu ka va hrilh ta a. A lo thlen chuan dar kua lai a ri tawh, " Theiriat lamah min hmang lawk alawm le" , a ti nghal a, a ṭhat thuin ka lo chhang a, kan titi zawm nghal a. 

Bazar venga bus stand bulah chuan Rintluanga car hi ka hmu a, ka han hawi leh deuh chuan amah ang tak hi dawr kawta lo ṭhu âwn duai hi ka hmu a, " Bawiha, ding lawk teh, ding lawk teh" , ka ti chul a, ka va pan phei a, amah ngei a ni! Tun ang zan reiah leh hna ban hnuah chuan inah a awm tawh ka rin tehlul nen. 

A mit a chhing a, a phun bul bul mai bawk, chik zawka ka en chu a mittui hi a lo luang ngiai ngiai chu niin. " Rintluang, harh teh , hetah eng nge i tih?", ti pah chuan ka sâwi a, a la harh chuang lo, a phun ri chu chiang leh zuala hriat tuma ka beng ka dah hnai chu, " Au mami, au mami" , ka thin a phu rang lutuk. Amah lah chu a sa vûr a, a damlo ni ngei ang, ko pah chuan ka sâwi leh a, " Au mami, a vawt lutuk" , tiin meng chuang lo chuan a lo ṭawng chhuak leh a. Tih ngaihna ka hre bawk si lo chu a harh ngei ngei theih nan ka sâwi vak vak a, " Lalrintluang, harh teh" , ka ti pah bawk. 

A hnuah phak deuh hû hian a lo mengchhuak hliai a, vawt a ti chu nge ni a inkuangkuah hlun nghal. Tep chuap chuap pah chuan min en vung vung a, a hawi a hawi hnuah engmah sawi loin leh biak pawh min be loin a car-ah ṭhu lutin a tlanliam ta daih a, mak ti takin Bawiha nen kan en vung vung ringawt.