Au Mami... Chapter-6

Au Mami... 

Chapter-6 

Ziaktu: Cck Lalchhuanawmi

A tuk Office ka kal chuan Rintluanga chu ka hmu hmasa leh ber a, a damṭha lo a ni tih leh a chau tih chu a hriat ngawih ngawih, ka hriat tawk lek chuan ka phun sep sep a, " I hriat tawk lek hian phun phun ṭhin suh" , ti pah chuan ka lu-ah file in min lo khawng chawrh, no lo tawkin ka melh nghal a, inhnial incho âtin kan awm nghal ni ber hian ka hria. 

Chutih lai tak chuan âw thian kharh kharh ri hi a lo awm a, chulam chu en vatin kan pu chuan min lo hui nghal.

" Mama, i dam ṭha meuh si lo a, vawiin chu chawlin in lamah va awm hahdam mai rawh" , a ti a, Rintluanga chu kun ngaihin a ngawi reng a, chutah kan pu chuan min lo siai zeuh pah hian, " Tunlai chu nupui a zawng a" , a ti a, ka lo ṭhen sak ringawt. " Mami, inah file pakhat, a kâwm hring ka theihnghilh daih a chu chu Mama rual hian lam turin kal mai ta che, Mama hian a hre tho a, a pe mai dawn che nia" , a ti leh a, ka lo bu nghauh nghauh. 

" Damdawi i ei em?" , tiin Rintluanga chu ka zawt ve luam a, a bu ringawt. " Kan veng hi chu Lunglei khawchhung dik tak a nia, tu emaw te veng ang a ni ve lo" , a ti leh charh charh a, ka va ngei tak, ka thin khei tur zawng ringawt a sawi a,  a tawpah zawng ka ngawi reng thei ta mai bik lo.

" Kan vengah chuan Helipad a awm bik aw, Sipai camp leh chân an kahna hmunte a awm" , ka ti vei tawn tawn a, ka tlawm duh bik lo re re. 

" Kan vengah chuan Theiriat tlang tih a awm a, Ṭawngṭaina In te a awm aw, Lunglei mi zawng zawng an lo kalna ber a ni tih i hria em? Chuan maw, kan veng chuan Mizoram huapa lar leh zaithiam F. Zomuanpuia kan nei bik bik aw" , intithei fahran hian a ti kharh kharh a, ka va ngei tak. 

" Kan vengah pawh maw, Darkhuang tlang a awm aw, Biak In a awm a maw, Lunglei mi zawng zawng Ṭawngṭaina hmun a ni ve tho aw, chuan maw Mizoram huapa lar ve tho Zorap-a hi kan veng pa aw, i lo hre ve mai mai dawn nia" , intithei fahran hian ka ti ve a, tlawm hi chu ka tum lo ve em. A ngawi ta daih, ka va melh leh zuk zuk ṭhin a, a hnu deuhah chuan, " Naupanchhiatthlak e" , a ti sup a, ka va hawi phei nghal vat, min lo en zeuh a, " Beidawng hma te kha min ti leh ringawt ang e" , kiai sak pah hian a ti a, ka lo chhing sawk. An in kan thlen hma chu in en leh zeuhin kan nui leh bâwk bâwk ṭhin a, kan inhnial dan teh tawp kha chu a naupanchhiatthlak ve em bawk a ni. Mahse, a nui hmel ṭhat dan kha chu... 

Gate chu kan hawng a, pangpar chi hrang hrang an lo pâr vul chuk mai, a va mawi hlawm tak! In chhunga kan lut tur chu Rintluanga chuan, " Au mami" , a ti a, ka lo ka ho mai, au mami an nei ve nge mawni? Thlê deuh hlakin, " Ka nu" , tiin a au leh vak a, a luruh hi chu a ring mawle. " Eng nge ni?" , tiin nu upa lam tawh hi kan hnung aṭang chuan a lo ti a, a landanah chuan hnathawk a ang, min hmu chu a au chul mai a, " Ehe, hei hi tunge ni? Mama, hei hi em ni kan mo tur chu?" ,  a ti ta mai, Rintluanga chu ka en vat a, " Ka nu, kan hnathawk zinga mi nih hi, ka pa theihnghilh file lo lam turin a lo kal" , Rintluanga chuan a ti a, keiin ka lo tuihnih ve vat bawk. 

Rintluanga nu, ka pi tur chuan, " Hmeichhia i lo hruai ngai si lo, i pa lahin nupui zawng turin a ti bawk si che nen chuvang alawm, ka tih lai ka va tihzawm leh ang e" , ti pah chuan a chhuak leh ta a. Rintluanga chuan file chu min pein keipawh chu office lam panin ka kal leh ta a. 

Thlasik boruak kan hip ṭan ta a, zing thawh a peihawm loh ṭhin, Christmas pawh a hnai leh hle tawh, kâwnchei pawh a nalh hlawm tawh khawp bawk. Bawiha pawh a luck ṭan a, nuam hi a tithei ve em em mai ni. Kei erawh chu kan hma lawka Christmas lo thleng tur hi kan chhungkaw kima kan hman tawp berna ni tur ang mai hian ka hre tlat a, ka awm hi a nuam thei reng reng lo, keimahah hian dik lo te hi a awm nge ni. 

Office chawlh pawh kan nei ṭep tawh, urlawk zan leh kum hlui thlah dan turte chu kan titi tam ber a ni ta a, Christmas leh kum tharah chuan ka inkhawm ngei ngei ang tih ai chuan. Christmas present atan hlawh double kan dawng a, kan va lawm hlawm tak! 

" Kan chawl dawn ta" , tiin kan thawhpuipa chu a au lauh lauh a, keinin kut kan lo bensak, pakhatin, " School chawl tur, hlim te pawh i an kha le" , nui huah huah chungin a lo ti a, keini pawh chu kan nui tawp hleithei bik hlawm lo. School anga lunch break a nih ve avangin kil khatah kan inhawrkhawm a, chutia kan nui khêk dual lai chuan thawhpuinu pakhat hian zawi sap hian, " Lawk, lawk, ngawi lawk teh u, kan hnung lam han en ve teh u" , a tih chuan rang mangkhengin kan hnung lam kan en rual ṭhap. 

Rintluanga chuan nui sen sen pah hian hmeichhe pakhat sam hi a lo hui ṭha hliau hliau a, chu hmeichhia pawh chuan Rintluanga kawr nghawngte chu a siam ṭha ve a, amah pawh chu a nui sen sen ve a, a hmelṭha hrep lehnghal, kum sawmthum pawh la kai lo hmel a pu. " Kan pu fapa nupui tur chu saw saw mile, a van hmelṭha, mahse; a naupan hmel deuh e ka ti" , pakhat chuan a ti sup a, pakhat leh chuan, " A pawi em ni? A ṭha daih zawk alawm, ka va ît e" , kiai sak pah hian a ti ve thung a, Rintluanga te pahnih chungchang chu thlir pah hian an sawi zel a, ṭhenkhat chuan a nupui tur a nih an rin loh thu te an sawi a, ṭhenkhatin a nih ngei tur thu te an sawi. 

Mahse, kei erawh chu ka chhungril a ṭek chhuai chhuai, hawisawn ka tum lahin ka thei der lo, saw nu saw a nupui tur a nih dawn chuan Rintluanga nui hmel ṭha zet saw a hmu reng dawn bik sia, hmeichhia chuan Rintluanga bianga a fawp ta zeuh chu, " Ni lo" , tiin ka au chhuak ṭhawt a, min lo en nghal ṭhup, ka va zak leh si tak! " Engmah a ni lo" , nui tawi tâk hian ka ti leh a, Rintluanga te lam ka va en leh chuan mak tih hmel deuh hian min lo en ve reng chu niin, hahthlak ṭhin mang e. 

 Kan pu chuan chocolate pakhat ṭheuh hi ban hma chuan min pe leh a, inthlahna tak tak atan, Christmas present dang a nih thu a sawi a, tun aṭang chuan Office pawh kan chawl ve ta. 

Office kawtah Rintluanga chuan intithei tak hian nupui tur a hmuh tawh thu leh, tunah pawh hian an in lama zanriah a ei tur thu a sawi siam siam a, ngawi rengin ka en ringawt, dar chhin hak chung hian, " A nih leh aw" , a ti a, a kal liam ta! Office kawtah chuan ka ṭhu ngawi reng a, eng nge ka ngaihtuah tih pawh ka hre lo, ka ngaihtuahna a vir muai muai ni ber. " Au mam, i ṭha em? Vawt i ti lo em ni? Ti rawh, haw tawh ang" , tiin Bawiha chuan min lo ko a, ka mang hriat ruai hian ka hre ber. " A vawt em?" , ti pah chuan Bawiha chuan ka nghawng a lo khawih a, ka harhchhuak chiah, " Vur chiah chiah" , nuih saih hian ka ti a. 

Ka sawi tawh angin tun Christmas chho vel chu min mawlhtu hi a awm tlat a, chhungkaw kima kan hman ho tawpna ber tur tih chu ka rilruah a awm reng, ka nu leh pa te hian min boralsan dawn nge, ka unaute zingah hian tu ber hi nge ni ang? Lalnunui te hi inruk an tum dawn nge? Chutiang hlir chuan ka rilru a luah a, a tawpah chuan ka pa bulah chuan ka sawichhuak ta nge nge, ka thawl huaiin ka hria, ka pa chuan hahdam taka awm turin leh Christmas nuam taka hmang thei lo tura sual hnathawh mai a nih thu min hrilh a, chu chu keipawhin ka ring ve hmiah. 

Urlawk zan chuan Muanawma reilote a lo lang ve zawk a, kei nen chuan kan inbe tam hman lo, Ka vahte hian min tibuai em a ni, chubakah eitur siamin Awmi nen kan phar buai nasa ve em a, a hnuah David-a pawh a lo lang veleh ta a, ka nu leh pa te erawh zaikhawmna lamah an kal thung. 

Choka lam aṭangin an titi Awmi nen kan lo ngaithla pah a, kan  awm hmunah in enin kan lo khi ve sek. Muanawma chuan a ṭhianten an lo call thu leh an bula a kal mai tur thu a rawn sawi a, fimkhur tura inhrilh chungin kan inmangṭha ta a. David-a pawh a awm rei lo, " Christmas chibai" , tia kan inbuk tawn hnuah a haw ve nghal. 

Christmas chhungkaw kimin, hlim takin kan hmang a, kum thar pawh Pathian zarah chhungkaw kimin kan thleng leh ta, a va lawmawm tak em! 

Zan khat ka mang chu, " Mam, haw tawh ang le" , tih chu ka hmu leh a, a hmel erawh ka la hmu chiang thei lo reng, chu chuan ka rilru a mawlh leh tlat a, tun ṭum chu ka nu bulah Christmas bawr vela ka rilru mawlhtu lam nen chuan ka sawi ve leh thung. Ka nu chuan ngaih khatah ngai mai mai turin min ti a, kei hian ngaih khatah ka ngai thei bawk si lo hi buaithlak ta ni. 

Tih dan phung pangngai, kum a thar tawh miau chuan Office pawh kan ṭan leh ta, " I senior sawt e" , ve ṭhin tak hian a, " Nang chu senior pawh i ni pha tawh lo, putar " , ṭhen sak chunga tiin ka inthiarfihlim  san hmak a, inhnial battle-te hi huaihawt ta ang sela, kei hi ka champion ngei ngei ang. 

" Mami, Mama nen khan lo kal lawk teh u", ka pu chuan a lo ti a, Rintluanga chu ka va ko a, " Awle, senior" , 

" Putar" , nuih pawh ka nuih peih lo, ka tûm deuh hmuk. 

Ka pu chuan, " Nangni pahnih hi innei mai rawh u" , a tih chuan ka ho hian ka en a, Rintluanga chuan a tui in lai chu a hak bawrh bawrh, a hnungah ka han chum awk awk leh hrih a. " Ka pu, i fiamthu tiraw?" , ka tih chuan a thutak thu leh kan pahniha nupaa insiam chu a duhthusam a nih thu a sawi ta mai a. " Ka pu, pasal nei thei ka ni lo, abikin Rintluanga phei hi chu" , ka tih chuan Rintluanga chu a lo khuh kharh kharh a, en pawh ka en chuang lo, ka pu ringawt chu ka en a, ka chalah chuan ka duh loh zia a chhiar thei hial ang. Rintluanga lah a ngawi reng a, eng emaw tak sawi ve se ka ti rilru hle, a hnuah, " Ka pa, keipawhin ka duh lo" , tiin a lo ṭawng chhuak ve ta a, kawng ro su tak ang maw! 

Ka pu chu a ngawi vang vang a, kan lûng chu a inphut chhawk ni ber hian ka hria, kei phei chu arukin ka khûr der der tawh. Chutah ka pu chu lo dingchhuak hluaiin, " Tunah hian i pa ka hmuh nghal a ngai, in inah kan kal ang, min lo zui rawh u" , a ti ta mai, 

" Ka pu",

"Ka pa" , sawi tur reng ka hre tawh lo, Rintluanga car-ah chuan kan pathumin kan inhnawh a, boruak a rit kher mai. 

Kan in kan thleng a, ka pa a lo awm hlauh, a vanneihthlak nge vanduaithlak pawh ka hre tawh lo. Ka pa leh ka pu chu rei fe an inkawm a, Rintluanga nen choka-ah kan lo awm thung, ka chhungte dang ho hi khaw nge maw an awm ni? Ka pa chauh a lo awm. " Nangpa hi, nupui tur i hmuh thu leh an inah pawh chaw i ei tur thu i sawi ni lawm ni? " , sehchilh tak hian ka ti a, ka thinrim thut, pasal nei thei dinhmuna ka din lohzia te, ka chhungte chhuahsan thei ka nih lohzia te leh ka nau te leh vahte zirna thlenga ka kuta awm an nih thu te nen lam ka sawi niap niap mai a, a nêr nûng ringawt, " I va han ṭawng thei tak e aw, eng ang pawhin duh lo sateh mah ila, ka pa thu hi ka hnial ngam i ring em ni? Use your brain" , awi, va hahthlak ṭhin tak, a bul aṭangin ka sawi ṭha leh a, " E, e, a nih chu, Mizo hmeichhia ṭawng theilo an awm lo an ti tih tichiangtu i ni" , ve khanglang a, " Nangpawh, Mizo mipa dulkiar, mahni thu duh, eng ni mang si loa ṭha ta luaa inngai, ṭawngthei, mi hnial hrat, dak zuah zuah i ni ve tho aw" , ka kâwk siah siah a, min ben thluk tawp duh hmel a pu, ka hlau chuang lo em mai. 

" I va han ṭawngthei tak e aw" , beidawn hmel tak hian a ti sup a, " Nangpawh" , ka ti leh hram. 

Zanriah ei lai chuan ka pa chuan palai hmel, Theiriat veng aṭanga kan hmuh tur thu chu a sawi ta a, ka chhungte chu an haw haw rual dual a, kei erawh ka tûm bûr a, ka ngawi reng, ka pa chuan ka hnathawhna pu ber fapa a nih thu te chu a sawi a, chaw pawh ei hleithei a ni lo, kan kham ta vek ringawt. A hnu deuhah kan inah chuan pasal nei tawh tura min ti ho kha thei leh thei loin an lo kalkhawm a, Lalnunui'n engtik laiin nge a lo hrilh hman hlawm ni, Aww, chhungkaw ṭangrual tak hi chu... 

" Ka pa, pasal ka neih daih chuan tuin nge enkawl ta che u nga? ",

" Mami, i ngaihtuahna i vahkual tir thei nasa lutuk, hahdam takin awm rawh, hei leh chen kan tan i thawk tawh a, nangmah i inngaihtuah ve a ngai alawm. I upat huna enkawl tur chein pasal i neih a ngai alawm, keini chu Bawiha pawh a la awm a, Nunui leh Têbera pawh an la awm hi maw. Chubakah Henry-a leh Duata te pawh an awm a, an ni lo tû te pawh kan la neih belh zel dawn a, lo lungngai reng reng suh, an zirna senso tur pawh i rilru tihah duh suh" , tiin ka pa chuan muangchangin a sawi a, han sawi belh leh tur vak hi a awm lo, a thusawi tawi teah khan ka hnial kalhna tur chhanna a awm thlap vek bawk. 

Hun leh ni a kal zel a, Kohhranah pawh inneih sawmna thu puan a ni tawh a, Pasal ka nei ve dawn ta reng mai! 

Man hlan nî chuan Muanawma pawh a lo kal ve a, eng emaw ti tak hian lainat ruk riauna ka nei tlat pek. Kan venga kum upa lam ho hi chu an kim vek ti ila ka sawi sual ka ring lo, a lawm ber ber leh hlim ber ber hi an ni lehnghal a, anmahni ka hmuh chang phei hi chuan ka lungchhe tlat zel bawk. 

Chawhlui kan buatsaih bawk a, lo ei pawh an ṭhahnem. A tuk chu kan in ka chhuahsan ni a nih bawk avangin inleng an awm ṭak ṭak a, kan ri chel chul mai ni. 

Muanawma chuan, " Ka ngai ngawt ang che, naktuk aṭang chuan mi ta i ni tawh dawn si a, chuvang chuan reilote tal ka ta ni la" , a ti a, ka meng phawk hru chu min nuih nasa ta mai a, " Fiamthu" , a ti leh a, ka lo nuih sen sen, min kuahin, " Mam, ka thinlung zawng zawngin ka lawmpui che nia aw, fa duhawm tak tak nei bawk la, i pasal leh fate tan nupui leh nu ṭha tak nih tum tlat bawk ang che. Harsatna i tawh hunin kei i ṭhian hi min lo hre reng la, ṭanpui tur chein ka lo awm reng ang. Chuan maw, i nuna mipa hmasa ber ka ni hi ka inchhuang takzet a ni" , tham chhel chhawl hian a ti a, ka hnuk ulh ṭun chu a hrehawm takzet a ni. 

Ka nu pawh chuan, " I pasal tur hi i hmangaih lo a nih pawhin hmangaih i tum tlat dawn nia, amaha ṭhalo lai leh sit deuh lai i nei a nih pawhin hmuh kânin siamṭhat tum la. Tin, i zah pah bawk dawn nia, hnial pung pung te a mawi lo a, i pasal nu leh pa te pawh nangmah hringtu i nu leh pa ang chiahin i en tlat dawn nia" , a ti a, a mittui a hru a hru mai a, " Ka khuahar dawn hle mai, hauh tur an awm tawh dawn si lo" , ṭah nuih deuh tak hian ka nu chuan a ti leh a, " Lalnunui a awm alawm" , ka tih chuan Nunui'n min lo hnial nghal vat. 

Ni e, a nui hmel ṭha zet kha hmuh reng ka duh ni lawm ni kha? Hnial tur hrim hrim tal pawhin Rintluanga chu ka nei ngei ang.