Au Mami... Chapter-7

Au Mami... 

Chapter-7

Ziaktu: Cck Lalchhuanawmi

Ka ṭhian atan Nunui ka sawm a, a pawina awm vak chuangin ka hre lo, ka ṭhian kawm fal ho te chuan nuthai min chan san vek tawh si a, kan in chu zing kar aṭangin a ri chel chul a, second tin maiah thawm hriat tur a awm. 

Mo kawr ha rual ka ni tawh lo ka tih tlat avangin puanchei ka bih a min hnial bik chuang hlawm lo, kawr var ha in, veil min khumtir hram bawk, a ṭha vek mai zel e. 

" Mo hruai tur a lo thleng e" , tiin an au lauh lauh a, ka khûr nasa ngang mai. " Tunah chuan thlamuang takin ka chawl thei tawh ang" , aww, manganthlak ṭhin, " Nau puakpuan tur kan ngah a nia aw", hetiang em em hian min lawmpui ang tih reng rin ngaihna ka lo hre lo. Ka nuin a mittui a hru leh zeuh ṭhin chu ka va kuah a, kei atak pawh chu ṭah tum lo viau mah ila, dan rual loin mittui a sur zung zung. " Au mam, thlawi tur chuan lo haw miah suh aw" , Awmi chuan mittui parawl kuang chung hian a lo ti a, nuih loh theih loh, " Mo hruaitua ṭan ka duh sia, pu mama ka dil a, a lo phal nasa khawp mai" , Muanawma chuan a ti a, pu mama te han tih, " Ka lawm lutuk e" ,  ka ti sup a. " Aw, ṭap tawh lo ang u, kei Lalhmunsiami hi in tan hmun siamin ka kal dawn alawm" , ban phar chunga ka ti chu an nui tlawr tlawr a, ṭap tawk lah an awm,  a sawitu zawk pawh hi a ṭahbelh ber ka la ni zui a. 

Rintluanga nen, " Tiam tlat e" , kan han ti ve ta chu nia, engtin tak chuan awm zel ang i maw? Kan thawhpui, ṭhen leh rual leh chhungkhat te aṭangin min lawmpui tu te an lo kal ṭeuh a, ban tlang tura an rin te pahnih kan innei ta mai si a, mak an tih thu an sawi luai luai pah a, chutih laiin min lawmpui thu lah an sawi bang lo. 

" Hmuni, ka lâi tlat, chuvang chuan ka mutsan mai ang che" , tih leh puan chuan a inlukhuh nghal daih a, ngaihna hre lo zetin ka en ringawt, khum sir ratah hian saisirin a mu a, keipawh chu khum sirah saisirin ka mu ve nghal. " Hmuni?", ka maimitchhing daih, min lo ko leh, ka hre lo lui ngat. A che ṭual ṭual a, min kuaiherin min bawh thut ta mai, " Ka koh mawlh mawlh che kha" , thinrim hmel tak hian a ti a, ka chil ka lem khawlh khawlh, " Ka muhil hman alawm" , ka ti ta ngawt a, " Inneih zanah te chuan an inmuthilhsan ngai hleinem" , a ti leh a, " Ka chau alawm" ,

" Ni dawn tak e, mu leh rawh" , a thinrim hmel chu hlimnain a inthlak daih a, a nui hmel hi chu a ṭha ve chiang. Mahse, saisirin a mu leh daih a, ka va en a, a lo thaw ri sât sât mai, hepa hi a beidawng hma thei e, ka hnial dawn loh tehlul nen, Aa, ka ngaihtuahna ṭhin hi chu, zahthlak thei lutuk mai. 

" Rintluang, harh teh" , 

" Dar engzah nge a?" , meng mang hlei lo hian a ti a, " Dar nga, tho teh, eirawngbawl dan min lo zirtir rawh" , zawi sap hian ka ti a, " Ninawm" , ti hlakin a muhil zawm lehnghal. A bengah chuan pawt vakin, " I tho dawn em?",  ka ti a, " Min thlah loh chuan ka tho lo ang", ṭhen sak sak chung hian a ti a, ka thlah ve mai bawk. A beng a tuai nuah nuah. 

Choka lamah kan inzui phei a, buhfai dahna, bungbel dahna leh bawlhlo dahna, thlêng leh fian dahna thlengte chuan min hrilh a, chaw chhum tur zat nen, zingkarah thingpui an in ngei ngei ṭhin thu te, " Thingpui lum nghal rawh" , intihthu hmel deuh hian a ti a, " Wow" , a ti leh sup, eng nge maw a hriat ni? 

" Aw, mami chu i va tho hma awm ve" , ka pu chuan a lo ti a, " Tho hma lo e, ka, ka, ka pa" , ka zak lutuk chu ka hmai ka hup nghal daih, thingpui ka siam zo chu pek ka tumna lamah thingpui no ka la thlauh zui! "  A pawi lo, a pawi lo" , ka nu chuan a lo ti a, no chu chharin thingpui dang ka siam leh a. Chaw ei ka han siam ve leh a, ka bai siam suah chhuah ka tumna lamah a bel chawpin chhuatah ka ti tla ri bur mai nih kha! Ka tifai nghal sawk sawk a, " Ngati nge?", ka en chu Rintluanga a lo ni, min lo pui ve vat nghal a, ka nu leh pa te chu an lo kal ve bawk, " Min puih a ngai lo ka tih mawlh mawlh kha, i tibaw lehnghal" , ti pah chuan Rintluanga chu inthiamlo deuh hian ka va en a, a lo hrethiam ve a ni ang chu engmah a sawi lo hlauh. 

Coat suit a dum pahnih, kamis var pahnih bawk, smart shoe pahnih, converse pahnih, mawza erawh a dum hlang bun nga awm vel zet, boxer pahnih, track pant pahnih, t-shirt plane tawp pahnih, " Lalrintluang, engtin nge hetiang hian i awm theih a?", ka ti ta ngawt, amah lah chuan awlsam zet hian, " Ka awm ve tawp", a la ti zui, drawer chu ka thawmhnaw hlirin a khat, a pindan ni ṭhin, kan pindan ni ta chu ka bungrua hian a khat vek ni ber, tianga thawmhnaw nei tlem te chu a, remchang hmasa berah la leisak ṭeuh tur a ni. 

Inneih tuk tih loh chu ka che chhe em em tawh bik lo, Rintluanga pawh Office a kal ṭan leh tawh a, ka pa erawh chawhnu lamah a lo haw daih ṭhin thung. Ka nu nen chuan pangpar hi kan buaipui ber a, keipawh chuan nuam ka ti, pangpar chi hrang hrang pâr vul chuk hmuh hi a lo nuam ber mai a nih hi. Pangpar kan chin lohnaah chuan thlai kan ching a, mahni eikhawp tur hi chu kan thar ve zel bawk. 

Hetia ka chenchilh takah chuan Rintluanga chu mak tihna ka nei chho tulh tulh, Office banga a lo haw hian, " Au mami" , a ti hmasa ziah a, a din ngawi vang vang hnuah, " Ka nu, ka lo haw" , a ti leh chauh ṭhin. Û hmeichhia, Lalrinmawii, Mami tia an koh ve ṭhin a nei a, chu erawh a boral tawh thu ka nu chuan min hrilh a, chu ai pawha mak ka tih leh chu zanah hian a ni, khum sir râtah saisir hian a mu ṭhin a, a inkuangkuah thân zel bawk.  Kan inneih zan bak kha chu min khawih tumna pawh a nei chuang lo, a duh hunah fel deuh hian a mu thlap zel, kan inneih zan pawh khan ka chauh thu ka sawi khan a mu fel leh ât ni kha maw. 

Zingah hian achangin a tho hma a, achangin a tho tlai thei em em a, a nu, ka nu bulah hian naupang ang maia awm chang pawh a nei ṭhin, ka nu hi zawh ka tum ṭhin a, mahse; ka zahna hian min la zawh tir thei lo. 

" Au mami", tiin office bang a lo haw chu a au leh ta.