Au Mami... Chapter-8

Au Mami... 

Chapter-7 

Ziaktu: Cck Lalchhuanawmi

" Au mami", tiin office bang a lo haw chu a au leh ta. Choka- a ka awm lai a ni bawk a ka va pan vat. A lo ngawi leh vung vung a, " Eih, i lo haw tawh a ni maw?", nui sen sen hian ka ti a, mak tih hmel zet hian min thlêk tawn sek mai, " I lo haw tawh a ni maw" , ti pah chuan ka va kheuh zeuh a, phu zawkin, " Aw, haw tawh, khawiah nge ka nu te hi", dam dup hian a ti ta a, ka thaw huaiin ka hria. An awm reng thu ka sawi chuan bu nghutin pindan lam a pan nghal a. 

Chaw ei pah chuan ka pa leh Rintluanga te chuan hna chungchang an sawi a, ka nu nen chuan kan lo ngawi reng thung. Ka nu chuan ngawih reng aiah a ti nge ni kan pangpar buaipui ṭhin leh kan thlai chin ṭhin te chu min sawipui ve ta a, pangpar chah belh tur te sawiin an mawi thu leh nun an tihlim zia te chu min sawipui ta chiam a, kei lah ka lo phur ve bawk, ka pa te ai ai chuan kan ri hlut ta mai a, 

ka pa chuan, " Nangni pahnih chu", ngaihna hriat loh hmel tak hian a ti a, " A mipa te pahnihin kâ(mouth) in intih neih man a nih kha", tiin ka nu chuan a lo chhang a, ka pa chuan, " In thusawi a ho a nih mai chu a", ṭhen deuh sak chung hian a ti a, ka nuin, " Nangni pawh", a ti leh chuan kan nui ta vak vak hlawm a, kei phei chu a nui nasa ber ka ni, Rintluanga nen kan inhnial lai vel ka ngaihtuah pah a. 

" Naupai thuai thuai rawh u, ṭhiante bula tû te kaih pawh a chakawm ve tawh a nia" , tia ka pain ngen ngawl tih hriat taka a tih chuan ka nui lai ka tawp chat a, kan nui lai a ni zawk mah ang chu. Rintluanga chuan, " Ka pa, i hmanhmawh em mai, kâr khat awrh chauh alawm kan la inneih" , a lo ti vat a, " Inneih tukah te lawm nau an pai mai" , ka pa chuan a lo ti ve leh, angaite bawkin an nui leh vak vak a, kei erawh chu a hming mawiin ka nui ve chauh tawh, Rintluanga chu ka va en a, a nui hmel ṭha tak nena min lo en ve leh chuan ka hawisawn nghal daih, arukin ka ngei thar thut bawk. 

Rintluanga nen khum sir ve vea mu kan nih avangin a lai ruak huaiah chuan teddy bear lian deuh hi ka muttir ve ṭhin a, chubakah Têbera leh Henry-a kuah chiala mu zantin ka nih ṭhin avangin pangti lum hi nautê ang mai hian ka hre em em mai lehnghal, hrehawm ka ti ru em em ṭhin bawk. Mutchhuak tawh tho, muhil hleithei si lo chuan ka let ka let a, Rintluanga erawh chu a hnâr bawrh bawrh tawh mai. 

Zanriah ei laia ka pa thusawi chu ka ngaihtuah ta vel mai mai a, nau chu ka âwt thar ta thut, ka inngaihtuah a, kum sawmthumparuk lai ni tawh mah ila, dozen khat zet chu ka la hringchhuak theiin ka ring.  Mahse, Rintluanga ṭet ṭut hi, ngaihna awm lo, tunah tak hian tlawh thlak ka chakzia chu. Engpawh ni sela, naktuk aṭang chuan a ṭulnain min urthlu tiin, zah theih loh chhuah ṭan tawp tawh mai ang, ka nu pawh khan hmangaih tum turin min tih kha maw, hun a duh rei mai mai ang chu aw... 

Ei rawng bawl pah chuan ka nu nen pangpar chah tur ho chu ka phone-ah kan en a, a nalh hlawm em em mai lehnghal, "Pangpar te chu a tam tawh em saw, in duhâm leh lutuk mai", ka pa chuan a lo ti a, "A, ka pa, nakinah ' In pi leh in nu te pangpar kha tichhe suh aw, an vaw mai ang che u' i la ti duh dawn a sin" , nui sen sen chunga ti pah chuan ka nu chu ka va en zeuh a, " Ni e", a lo ti ve mai bawk. Ka pa pawh chu a phur thar a, min lo enpui nghal. Rintluanga hmel reng reng hmuh tur a la awm loh avang chuan pindanah ka va lut a, " Lalrintluang, tho", ka ti chiah chu ka ding chawt nghal, thawmhnaw a lo hai darh chiam chiam chu niin, " Ngati nge?", va pan pah chuan ka ti thuai a, " Khawiah nge ka kekawrte?". 

" Maw?", nuih insum deuh taka ka tih chuan, " Ka kekawrte ka hmu zo lo, nimina ka inbual tur pawh khan ka hmu miah lo, ka zawng nasa lutuk tawh, khawiah chuan nge maw a awm ni? Pu daih turin sazu an awm bawk si lo a, bakah drawer chhungah a awm a, an pu thei lo hrim hrim bawk, engtin nge ka hmuh loh theih le aw" , a ti vawng vawng mai a, a kawng a dawm pah a, chunglam a melh vang vang bawk si, achangin a lu a hiat leh nuah nuah ṭhin a, hmuhnawm ti takin ka lo thlir ringawt. 

" Ka sawi i hria em? Nizan aṭang kekawrte ka ha tawh lo", ner nunga a tih leh chuan ka insum zo lo chu pum dawm meuhin ka nui chhuak ta hawk hawk a, kut ka beng thul, a posi leh a thusawi kha a inhmeh chiang lutuk. " Lalhmunsiam, hei en rawh", ti pah chuan a boxer hak chu a khup thlengin a pawtthla ta mai, " Aw, aw, ka hria ka hmu ha leh tawh rawh", hnunglam hawi daih chung chuan ka ti a. " Nangmah hian i thukru ni hrim hrim", 

" A awihawm loh em mai a, engvangin nge i kekawrte chu ka thuhruk ngawt ang a?", ka tih chuan chîk zet hian min melh khui khui ta mai, " I ni chiang lutuk, khawiah nge i dah?", ti pah chuan min lo pan a, ka tawlh hnung ve hret hret, pindanah chuan kan inum kual zak zak mai a, ka thuhrukna min zawt pah reng a, kei lahin ka hrilh duh der si lo. Ahnuah ka bengah a lo pawt, " A nâ, min thlah rawh" , 

" I dahna sawi phawt rawh",

" Min thlah loh chuan ka sawi dawn lo", vin hlar chuan ka ti a, min thlah chiah tihah, " Ka nu", tia au pah chuan choka lamah ka tlan ta daih a, ka nu hnungah chuan ka biru vat, Rintluanga pawh a lo lang ve nghal a, thil awmdan te chu a sawi nghal zuah zuah, ka nu hnung aṭang chuan ka lo nuih kur kur a, " Tumahin kekawrte pahnih chiah an nei ngai lo, a thuhrimah i thawmhnaw reng reng pahnih vek, mawza i ngah ngah nen", ka lo ti tawn tawn a, min melh no lo leh teh e, "Kha maw, ahmâ aṭangin ka hrilh ka hrilh tawh che kha, tunah chuan i nupui kam khat i tawh tak hi i thawmhnaw chungchangah", ka nuin a lo ti vat. Ka pa chuan, " Kekawrte vang mai maia buaichiam a ngai lo, a zahthlak, mama, min rawn zui rawh, ka kekawrte i ha mai dawn nia", a ti ta a. 

Keiin in tihfai leh thawmhnaw suk vel ka buaipui laiin ka nu chuan pangpar bawk a lo buaipui a, kan khum hnuaia Rintluanga kekawrte ka thuhruk chu lachhuakin keimah chuan ka khi leh vur vur mai ṭhin a, zinga a hrilhhai lutuk hmel te chu ka ngaihtuah a, ka khawngaih rualin ka nuihza tho bawk si a. Ka thuhruk chhan chu pahnih ai tam neih a ṭhatna hria sela ka duh vang chauh a ni. 

Chhun lai a nih chuan ka pa chu a lo haw der mai a, ka nu pawh ko lutin thingpui te kan in a, Rintluanga kekawrte chu ka thuhruk a nih thu leh ka thuhruk chhan te chu ka sawi ta a, ka nu chuan kan inneih ni-a a suit hak chu a suit neih zinga mi a nih thu te leh thawmhnaw lei ve ṭeuh ṭeuh ṭhin tura a hrilh thu te chu a sawi a, ka pa pawh chuan an hauh ṭhinna tam zawk chu thawmhnaw chungchangah a nih thu a lo sawi ve bawk, Rintluanga sawisa chuan ka nui nileng ni ber. 

Tlai dar nga a rik chuan kawngka bulah ka vei tawn sek a, rei lo-ah Rintluanga chu a lo tlan lut ta a, inchhunga a lo luh dawn chuan, " I lo haw tawh a", ti pah chuan a kutah ka va chelh, min en ren rawn a, a âng zuau zuau mai bawk, "Hmuni, ka lo haw ti rawh le?", nuih sen sen chung hian ka ti leh a, a mittui a parawl kuang mai! " Ka nu, ka lo haw", a ti ta daih mai a, pindan lam pan chuan a kal nal nal mai bawk. 

Pindanah chuan ka lut ve nghal a, a lo inthlak mial mial, a inbual dawn leh dawn loh ka zawh chuan a inbual tur thuin min chhang a, a kekawrte ka hmuh thu pawh ka hrilh nghal, a bu ringawt a, a thinrim pawh ni chiah si lo, a lungawilo pawh ni chiah si lo, hriatthiam a har takzet a ni. 

Zanriah ei kham zawh chuan ka nu leh pa te nen tv enin kan titi pah a, Rintluanga erawh office lama a hnathawh zawh loh thawkin a la buai mek. Ka nu chuan ka pa chu chawhnu lamah amaha a lo haw mai zel chu a ngaihngam loh thu leh motor dang lei a, driver ruai mai turin a rawn a, ka pa erawh chuan ṭul a tih lem loh thu leh rickshaw driver ho a ṭanpui venaah ngai mai turin  a lo ti thung, ka nu chuan, " I thu vek lawm, ka ngaihtuah vang mai che nia", dam diai hian a ti a. 

" E, takah, Mami, nakinah chawlhni velah emaw in in lamah mama nen in la leng dawn nia aw", ka pa chuan a ti a, ka nu pawhin, " Ni tak e, in la leng dawn nia, chubakah i duh hun hunah i kal thei a nia aw, mahse; cham hlen kha chu tum lo la", thutak hmel fe hian a ti a, ka pa nen chuan kan lo nui a. 

Ka pain mut zai rel a rawt takah chuan mu tur chuan pindan lam ka pan ve a, Rintluanga pawh a hna a lo zo der tawh bawk. Mahse, khumah chuan teddy bear a lo awm ta hauh lo, Rintluanga ka han zawt a, a hriat loh thuin min lo chhang, a thuhruk leh thuhruk loh ka han zawt leh a, a thuhruk loh thuin min lo chhang leh. Puanin a inlukhuh zui nghal, puan chu pawt hawngin, " Lalrintluang, i kekawrte ka thuhruk avang ngawt khan teddy bear i thuhruk ve kher a ngai lo, chubakah ka pek let leh tawh che kha, teddy bear chu min lo pe rawh", 

" Nangmah hian i thuhruk kha ka ring reng a ni", phawk fe-a min en chung chuan a ti a, a tho chhuak ṭual ṭual ta mai, ka ni lo tih theih pawh ni tawh lo, ka inpuang ta vek si a. Khumah chuan min pawtthlu a, ka inring hman bawk si lo nen ṭan ngaihna awm lo, min bawh leh ran a, a kut pakhatin ka kut pahnih chu ka lu chungah a nam bet tlat a, a kut pakhatin a innemkhalh thung. A kekawrte ka thuhruk chhan leh teddy bear khuma ka muttir tlat chhan te min zawt a, keiin ṭawngkam bung hmawk hmawkin ka lo chhang thung. 

" Eng nga tinge chutiang te chu i sawi loh?", ti pah chuan ka kut a nam behna chu thlahin ka hmui chu muangchangin a tuai niap niap a, " Hmuni, ka fawp dawn che, tun ṭum chu luhlul chhuah tawh lo la, aw khawngaihtakin", 

Ṭha takin keipawhin ka lo chhang ve zel, luhlul ka chhuah tawh em bik lo. A duhthawh zel a, thisen pawh a lum chho zel, ka harhchhuak zawk a, a kut chu vai sawnin ka ṭhu chhuak a, ka kawng achin chunglam chu thawmhnaw inbel pawh ka nei tawh lo puan chuan ka khuh nghal a, kawng hnuailam erawh ka la inbel thlip thlep, " Eng nga tinge?", 

" Keipawhin luhlul i chhuah lohna tur ka sawi ve duh",

" Aw, sawi rawh",

" Naktukah kan bazar ang a, thawmhnaw kan lei ṭeuh ang, chuan; i office bang i lo haw apiangin ' Ka nupui duhtak, ka lo haw e' i ti ziah ang", nui saih chung hian ka ti a, a ngaihdan a nih hmel loh lutuk. Min bawhthlu lehnghal pah chuan, " Ka duh lo", a ti sup a, min fawp lehnghal bawrh bawrh, mahse; luhlul ka chhuah leh tlat. 

Tho chhuak hluai hian, " Aw Lalpa, he nu luhlul dan hi", ti hlakin pindan a chhuahsan nghal daih a, keipawh ṭhu chhuakin, " Aw Lalpa, he pa beidawn hma dan hi", zawi sap hian ka ti a, ka kawr ha ṭhain ka mu nghal zat. A lo let leh hnu chuan min lo kuah a, a kut vawt tak chuan ka kawr chhung a lo zen rak rak, " Ka kut vawh thu sawi miah suh ang che, i luhlul rah nih hi", ka beng seh ner ner pah chuan a ti a. 

Chuta ṭang chuan zantin min kuah ta a, min tilui ngailo bawk, fawh erawh min fawp ṭhin a luhlul ka chhuah lo nain a kal thui dawna ka hriat chuan ka luhlul tukkhum pawng ka chhuah tlat ṭhin thung. Teddy bear awmna pawh min hrilh chuang lo, ka zawh lahin min chhang ṭha duh bawk si lo, bazar pawh kan bazar chuang lo. 

Chung aia hrehawm ka tihruk em em chu A office bang ka lo hmuak a, mittui parawl kuang chunga a âng zuau zuau ṭhin chu ni, ' au mami' tiin a au tawh lo na chu ' ka nu' a ti daih ṭhin a, ka hming a lam chu ka duh ber a ni bawk si, chutiang chuan kâr tam fe chu hun kan hmang ta a, hma kan la sawn mawh khawp mai. 

Mahse, tlai khat chu thawmhnaw thlep fela ka nu te pindana ka awm lai chuan, " Hmuni, ka lo haw", tia min au thawm ka hre ta tlat, sana ka en a, dar nga a lo pel tawh, " Hmuni, ka lo haw", pindan aṭang chuan tlanchhuakin kawngka lam ka pan nghal a, kawngka bulah chuan nui sâng hian Rintluanga chu lo dingin, " Hmuni, ka lo haw",

Ka lawm lutuk chu ka va kuah thlawp a, min lo kuah ve nghal, a biangah chuan ka fawp zeuh bawk, " Umm, i lo haw tawh a, i lo tluang em?", 

" Ka tluang alawm, i va ṭahbelh tak e aw", ka mittui luang ngiai ngiai chu a hru heuh heuh a, ka lu-ah chuan a fawp vang vang, ka hahdam sawng sawngin ka hria. 

" Naktuka kan tihtur i hria em?", ka lu ka thing nawk nawk, " Naktukah chuan kan pahnihin kan bazar ang a, kekawrte avanga buaina a awm tawh loh nan sangkhat man lawih kan lei ang", a tih chuan in enin kan nui dun hak hak a.