Au Mami... Chapter-9

Au Mami... 

Chapter-9

Ziaktu: Cck Lalchhuanawmi 

" Hmuni?",

" Umm",

" Zanin chu, naktukah kan bazar tawh dawn sia", a buaithlak ṭhin, " Naktukah chuan kan bazar dawn a, eng nge ni zanin chu?", hriatthiam loh hmel tak hian ka ti a, innemkhalhin min en chhuk leh run, " Zanin chu", ner nung hian a ti leh a, ka la hrethiam duh lo lui tlat, hahthlak tih hmel tak hian a thaw kâwk kâwk a, ahnuah chuan, " Mu ang", a ti ta tawp, a kut pakhat min kham tirin a kut pakhat erawhin ka kawrchhung a zen rak rak loh leh ka hmui a khawih niap niap ṭhin a. 

Zing ka tho chu Rintluanga a lo mu tawh miah lo, khum siam felin choka lamah chuan zi mar ar ar pahin ka phei a, " Eng nge i tih?", Rintluanga'n buhfai a lo sil mial mial chu niin, min chhang chuang lo chuan a tihzawm mawlh mawlh a, ka en reng ringawt, a che chu a hmuhnawm phian. Ka lo thlir doh doh a, " Tihian chawbel ka chhuang tawh a, a bak chu ti ve tawh mai rawh, chuan thingpui min lo siam nghal teh", dining chair-ah chuan a ṭhu tum luau nghal a, a inkuangkuah than bawk. Thingpui chu ka siam sak a, ka nu leh pa te pawh lo tho ve tawhin Rintluanga chu, " Kan tlangvala chu a va tum nasa ve, utumsa a ei em ni?", tiin an lo chhaih a.

" Hmuni hi in duat bik lutuk, a sual ropui si", tiin titau nghawng nghawng chung chuan a kalsawn ta daih a, nui deuh ṭhaw hlawm hian kan in en hrek hrek a, ka pa chuan, " Pangpar chin lehna hmun tur i va zawng teh ang", tiin  ka nu nen chuan thingpui no ken chung chuan huan lamah an kal a. 

Pindanah ka va lut a, Rintluanga chu tum luau chung hian a lo mu âwn duai, thingpui pawh a in loh thu leh tum reng lo turin ka hrilh a, min en duh lo chuan hnuai lam a en ngar ngar, bawh deuh titihin a bengbulah zawi sap hian, " Mam, thingpui lo in rawh", a biangah chuan fawp zeuhin ka ti a, ka zak lutuk chu ka tlanchhuak nghal daih. " Engmaw, engmaw?", tiin min umkual dat dat a, ka sawi nawn duh tawh lo reng reng. 

Min puin min virpui lawp lawp a, ko nawn leh turin min tichhen bawk, ka zak tlat tawh bawk si a, ka ko nawn duh tawh bawk si lo, chhuatah min dahthlain ka kawngah nghet takin a chelh a, ka nâk a piai sawk sawk, " A nâ, i ninawm reuh lutuk", ka ti bah nawk a, a nui hmel ṭha zetin min thlêk tawn sek, ka lâi chhe lutuk chu eng ber nge ka sawi pawh hre lo chuan ka riat nawk nawk a. Rintluanga erawh a nui huah huah leh ṭhin a, thin phu dut dut leh chil lem khawlh khawlh chung hian ka en ve ran. Chawbel lo khuang lauh lauhah chuan kan inthlah nghal vat a, " A va hun lo tak e aw", tiin a phun bul bul. 

Chawhma chhung zawng Rintluanga nen kan bazar ang a, chumi chhung chuan ka pain office a lo enkawl ve thung ang a, chuti chuan bazar zawhah ka pa nen haw rual theih turin rem kan ruat a, ka nu lo kal ve tura ka tihin ina awm a thlang zawk tlat. 

Loh theih loin kekawrte chu lei a ngai ngei ngei, sawi pawh a zahthlak tawh zawk e a, panga kan lei, t-shirt pahnih leh boxer pakhat kan lei thei hram bawk, track pants a neih thu a sawi ṭalh a, mipui zinga inhnial buai em chu ka tih avangin a thu ka awih ta ngawt, bazar pawh kan ang lo nghet tak hian min chelh a, kan kal kual vel mai mai ni berin ka hria. Thlan a tla dup a, nipui a inṭan tawh bawk nen, kan hma lawka ice-cream chuan ka mit a la ngang mai, ice-cream ei pah chuan bazar chhungah kan lut zel a, bakilh mawi hoin ka mit an la thei khawp mai. Nu upa lampang ṭhutna chuan ka hnûk a tiulh a, ka mittui a tlak loh nan ka khap fap fap, a chhwn chu a ṭhutna ah sawn chawhmeh ka ṭhutpui ve tawh tlat a ni. 

Bawiha chuan ka pa nen min thlah a, lo leng lut ve zawk nghalin thingpui kan in ho a, kan chhungte chanchin ka zawt a an damṭhat thuin min chhang chu ka lawm ngei mai, Chawlhni lo awm turah kan len tur thua inhrilhin kan inthlah liam ta a. 

Rintluanga chu office ban hun awmah pawh a lo la haw loh avangin ka call a, a la thei miah lo, a buai a nih ringin ka call nawn tawh lo. Zanriah ei hunah pawh a lo la haw lo, ka call leh a, a la la thei chuang lo, hlauhthawn rukna ka nei ṭan ta hial, ka nu leh pa te chu chaw ei mai turin ka ti a, an ruala ei ve nghal tur leh Rintluanga pawh a lo haw har tawh loh an rin thu te an sawi a, mahse; lo hnialin Rintluanga chu ka nghak a, nghak chhuak tak ang maw! 

Zun chhuakin min tiharh a, ka han meng chu khumah ka lo mu reng niin, ât hmel tak hian ka hawi ka hawi a, chutah pindan aṭang chuan chhuakin Rintluanga ka zawng nghal ruai, " Mam, mama?", ka thin a tawt ṭun mai bawk. Choka lam aṭang chuan thawm a lo awm a, " Choka ah ka awm", muangchangin ka va pan, " I lo tho tawh maw, nizanah chaw i ei lo tih ka hria a nia, kha hei thingpui hi in vat rawh, chuan call ka lak loh avangin ka tihpalh lutuk aw", thingpui min pek pah chuan inthiamlo tih hriat tak hian a ti a, ngawi rengin ka lo en, " Hna a laklawh deuh hlek a, ka lo haw chuan sofa chungah i lo hnar bawrh bawrh tawh", nuih insum deuh tak hian a ti leh a, ka lo ner nasa mai. 

Eirawngbawl a chuh tlat a, a inthiam lo ve takzet a niang, mahse; eirawngbawl a thiam zek a, a bai siam phei chu ka lei ka lem lo chauh, ka ei ṭeuh mai. Ka nu chuan Rintluanga chu eirawngbawl tu ber a nih thu a sawi a, ka pain, " Kan nula senior a ni ṭhin alawm", a tih chuan ka chaw ṭhial lai ka hak bawrh bawrh mai a, Rintluanga'n tui min lo pe vat. 

Office a kal dawn chuan car awmna thleng ka thlah a, " Zing aṭang min la be miah lo a nia, Hmuni ka tihpalh, eng emaw tal han sawi teh, min hau mah la a pawi miah lo, maww", min kuahin ka hnung a chul heuh heuh a, ka himin ka thla a muang takzet, kuah let vein, " Hna laklawh a awm a i lo haw har dawn chuan min lo call ngei ngei tawh ang che", pangchang taka ka ti chu ka hmuia mi fawp zeuhin, " Yes Boss", nui var chung hian a ti nghal a, ka lo nuih sen sen. 

Ina han awm reng takah chuan tihtur neuh neuh hi a lo tam ṭhin khawp mai, tihzawh pawh sawi theih loh, chetna tur hi a awm ve reng zel tho. Mo nih pawh hi a namai lo hle tak a ni. 

" Ha chhin la, i tan liau liaua ka lei a nih hi", melh pawh ka melh peih lo, night dress an tih ang chi a var, chhing zet leh pan zet, a bahna hrui pawh sin deuh, " Ka ha tawk lo awm em mai", ka ti sup a, a hak pawh ka zak e a, " Zantin ka kuah che a, ka hrechiang che lawm, i ha tawk dawn chiang lutuk", inringtawk tak hian a ti a, ka va ngei mai mai tak, " Kekawr i ha ṭut zel a", a ti leh, " Nangpawhin i ha ve tho lawm", tiin ka lo chhang ve nghal zat. 

" Keite chu mipa ka nia", thum zet hian a ti a, hmeichhia ka nih ve tho thuin ka lo chhang leh, " A tawk, pawi lo ha lo mai rawh, zanin chu ka lâi tawh lo turah ngai ang", a tih zawh rualin ka hmui a rawn chuktuah. 

Eng emaw thil chep ri hi ka hre rei ruai a, ka khap fap fap, ka kut chelhtu an awm, ka bulah Rintluanga a lo awm tawh lo, a duh hunah hi chuan a tho hma thei mawle. 

Ka inbengkang deuh a, ngawi renga  ka tin lo tan mial mial tu chu mak ti zetin ka en ho, " I lo harh ta maw, i tinte hi tan ve ṭhin ta che", a tan zawm leh, ka kut chu laksawn ka tum a, a vuan nghet tawlh tawlh, ahnuhah phih hrawkin ka ṭhu chhuak nghal a, puanin ka âwm ka khuh nghal vat bawk, " Min lo en suh, ruakin ka awm a nia", ka ti chu a nui hmel ṭha zetin min tihlai tum ni awm fahran hian min en chet chet ta mai a. 

" Lalhmunsiam, keimahin ka thlak che a ruak chuan i awm thei lo hrim hrim", 

Ka han inen a, nizana ka kawr hak a ni tawh miah lo, mak ti takin ka va en a, " Eng nge awmzia? A thuhrimah engvangin nge ka tin i tan ve ngawt a? Eng nga tinge?", ka ṭap pur leh tawh, rilru no lutuk hi chu a ṭha lo a ni. Hahthlak tih hmel deuha min en vung vung chung hian, " I va han ṭahbelh tak e aw, Lalhmunsiam ṭahbelh", min chhiahkhum zeuh chung hian a ti a, a la tlan daih zui. 

" Ka ṭahbelh lo aw", ṭah âw ṭuau chung hian ka um a, min chhaih nan tak a hmang zui, ka nu chuan, " Eng nga ti bawrh bawrh nge, zingkarah te in inum tak mai?", a lo ti a, Rintluanga chuan min lo kuah chung hian, " Ṭap kan inthlem a nih hi", nui bâwk bâwk chung hian a ti a, " Ka nu, ka muthilh hlanah ka tin a tan ringawt alawm", 

" Ka tan chhan chu nizanah min ham nasa lutuk alawm, ka hnung hi a pilh pheng phung mai", Rintluanga chuan a ti ta mai, ka zak lutuk chu a âwmah chuan ka hmai ka phum ta ngawt, nghet taka min kuah hian a insawi dat dat a, a nui kur kur mai bawk, ka nu pawh a nui ve ngei ang, ka hawichhuak ngam tawh lo. 

" Mama nu, In insu a nih chuan ka coat hi min lo suk ve teh u", ka pa chuan a lo ti a, Rintluanga chuan, " Lo dah rawh ka pa, keiman ka lo su ang", 

" Eng nga tinge khatia in inkuah ngawih ngawih tak mai?", ka pa pawhin mak a ti ngawt ang, kei lah ka hawichhuak ngam tawh teuh si lo, " Bedsheet var lam hi chu phah tawh lo ila ṭha ang, tual that ang maiin hnuhma tihbo kan tum a, a ṭha lo", a la ti ta deuh deuh, ka sik nawk nawk a, amah lah chu a la nui kur kur ang zui a, " A nâ, Khatin min sik vak vak suh, nizana i nâ tawrh ang min tawrh tir ve i tum em ni?", ka khawng awt hian ka hria. 

" Mo thar chetsual pawh a nei miah lo, bai bel kha keimah tihbuak a nia", nui kur kur chung chuan a ti leh a, ka zak lutuk chu chet pawh ka che ngam tawh lo, min kuah nghet em a, chuti ni lo se chuan chhuatah ka ṭhu thla hnawk tawh ngei ang. 

Ka pain, " In va ho mai mai tak e aw", a tih chuan pindanah ka tlan lut daih a, khu ral thei ila chuan hmuh tur ka awm tawh miah lo ang mawle. Rintluanga a lo luh ve chuan lukhamin ka lo vawm chawrh a, tunah chuan ka thinrim tawh, " Ka nu leh pa bula sawi kher a ṭul em ni?", khumah ka ṭhu thla nghal a, min lo panin, " Kumin a chaldelh chin ṭhah tho lawm kan nih hlawm", lukhama vawm leh tuma ka tin uai chu a lo indang nasa lutuk, lukham chu dahthla riai riai pah hian ka thaw kâwk kâwk a, kan nu leh pate bak baka min hrechiang tur an awm chuang hleinem maw, mahse; ka la zak tho tho.