Au Mami Chapter-13

Au Mami... 

Chapter-13 

Ziaktu: Cck Lalchhuanawmi

Mama'n Office aṭanga hna khawih zawh loh a lo hawn chu ka tihpui ve mial mial a, coffee pawh no engzah nge ka siam hman ka hre lo. Kan zo chu khumah mu phar duaiin ka thaw kâwk kâwk mai, a chauh theih ngai tak tak a ni. 

" Mu ṭha rawh", ti pahin maman ka awmdan a siam ṭha mawlh mawlh a, ka chungah a lo bawk nghal zat bawk, phakar reuh lutuk mai. A chau ve ngang a niang, a hnar nghal bawrh bawrh mai bawk a, amah zawk mut ṭhattir a ngai, hahthlak ṭhin. 

" Khawiah nge necktie ho hi a awm?", inkuangkuah thana melh chhuk kar chung hian ka ti a, min en ṭha duh lo ngei, a hriat loh thuin min chhang a amah bak hian a dah bo leh chuang dawn lo hrim hrim, a che rang ṭhin mai bawk si. " Ka nu, mama hian necktie a dah bo vek a nia", tia ka nu hnena ka zualko chu min rawn um rang teh e, " Ka dah bo lo", tiin thum zet hian min lo hnial nghal a, ka lo ner nung. 

Ka nu bulah dingin necktie awrh a peih loh ṭhin em avanga dah bo ta a nih ka rin thu ka sawi a, ka nu pawhin min pawmpui khawp mai, mahse; amah hian a sawi duh leh tlat lo. 

Ka nu nen kan chhimbudawi kual vel chu ka pain min lo fin ve nghalin mama lamah a ṭang nghal thung. Kan inhnial laih laih a, necktie vangin; kan awmdan chu a naupanchhiatthlak lutuk ringawt, a nuam lehling zawk, mama lam ka hawi chu nui ver ver chung hian min lo en reng chu niin, ka nuih let ve saih nghal, a lai chhe nasa mai. 

Atawpah mama chuan, " Khua a lum ṭan tawh a necktie awrh reng ka peih lo lawm, Hmuni lah hian min awrhtir reng a, chuvang chuan ka thukru nih kha, necktie awrh hi ka hua", hmui tipawr nawng chungin a ti a, " Ṭan man i va awm lo tak", ka pain beidawn hmel zetin a lo ti vat bawk. 

Tikha chuan necktie awrh loin kan inthlah liam ṭan leh ta, a thuhrukna a la sawi chuang lo, teddy bear angin a dahna hriat theih a ni lo. Kei, ina awm reng leh inchhunga che nasa tak hian a dahna zu hmu thei hauh lo a mawle! 

Ka nu nen titi siam siam paha nui leh bâwk bâwk ṭhinin nî kan vui liam ve mai zel a, ka pa erawh Bible hi a bih deuh reng zel, achanga a leng zeuh ṭhin tih loh leh kan bula reilote a lo awm ve ṭhin tih lohah chuan. 

" Mami, ka fanu, kan in i lo luah lum aṭang hian ka fapa nui ri ka hre leh thei a ka lawm tak tak a ni, a lungawilo hmel te, hengte hi ka lo ngai hman tawh lutuk a, a u mami boral hnua a hlim hmel leh nui ri te kan hre leh thei hi Pathian malsawmna vang liau liau a ni. Chubakah, Doctor pawh khan a tidikin ka hria, mahse; i tawrh a ngai ta erawh pawi ka ti", ka kut rawn vuan chunga ka nuin a tih chuan ka chem ken lai dahthlain ka vuan let ve nghal a, " Ka nu, a ho lutuk. Mahse, mama chu ngati nge a? Doctor chuan engtin nge a tih a? Umami boral hnu aṭang engtin nge a awm? Eng nge ka tawrh chu?", tiin â deuh hian ka zawt hû a, a sawi awmzia ka hre miah lo. 

" I pa, mama pain a hrilh lo che em ni, Mama nen in inneih hma hian?", 

" Ka pa chuan engmah a sawi lo, ka pa nen an inbe zawk a", ka tih chuan ka pain a fala min biak duh kha ka hrechhuak zawk a, ka nu chu min hrilh turin ka tur ta sek, ka nu thusawi leh ka pain min hrilh duh chu a inzawm ka ring ta tlat. Ka nu chu a ngawi deuh vang vang a, ka tur sek chu ka inthiamlo leh deuh, " Awle, ka hrilh ang che", dam dup hian a ti ta a. 

" April ni thum tiraw kha Mami boral ni kha. Khami ni kha mami damsam lo chung mama khan Kawmzawlah lenpui ṭalh a tum a. Dik tak chuan unau inkawmngeih tak an ni a, a hranpain ṭhian hi an kawm ngai em em lo, inchhungah te hian an inum kawi zar zar ṭhin. Mama lah hian, ' Ka fanu hmingah Lalrinmawii tih ka sa ang a, ka vaw hrep hrep ṭhin ang', tiin a fiam ṭhin a, a pa nen pawh hian kan hlimpui ṭhin lutuk. 

Mami chuan peih lo mang tak hian a kalpui ta a, an lo haw lamah lah tikhan tawhsual an tawk leh ta si a. Mami, a vanduaiah ṭangin kâ pawh chhawn loin a hmunah a boral nghal a, mama erawh nikhaw hre loin darkar khat vel a awm hnuah a lo harhchhuak leh mai a. 

A umami kan vuiliam tur kha a phal tlat lo a, lu tuam bur chung khan a kuang a bawh tlat a, kan buai teh a sin. An chelhbet a, a thlan an vur lai tea a au thawm kha tun thlenga ka ngaihtuah let hian hrehawm ka la ti reng. Kha bak baka tawrhna kha chu a awm leh tawh ka ring lo, thlan chhungah te khan zuan luh a tum thul. 

Mama kha kum sawmparuk mi chauh a la ni a, pawl sawm result nghak mek a ni a, mami pawh sawmpahnih result nghak a niin ka hria. 

Khata ṭang khan mama rilru a buai ṭan a, tawhsual an tawhna hmun Bazar vengah sawn a umami a va zawng nitin ṭhin... ' Ka u', tia a au loh leh ' Au mami', tiin a au vak vak ṭhin a, lo haw tawh rawh a ti thul. Doctor sawi danah chuan amaha inthiam lohna a neih hi a lian em a, chuti maia reh chi-ah a ngai bawk si lo. A ni reng bawk a, a umami thihnaa mawhphurtuah a inruat tlat a, mami peih lo chung a sawm chhuak kha a ni miau si a, inah lah te hian mami a zawng vak vak ṭhin bawk, khatih hun laia kan boruak zet kha zawng! 

Chutia kum thum chuang meuh kan inbuaipui hnuah a rawn inthlak thut a, open-in sawmpahnih a exam a, tichuan a pa hna-ah a insawrbing ve ta a ni. Mahse, a nui ngai lo a, a ngawichawiin a lawmna leh thinrimna te pawh a sawi ngai tawh lo. A nau te ho, a cousin te ho awmpui kan tum lahin a umami pindan hi tumahin an luah a duh bur bawk si lo, in ruak takah kan cheng hi ni ringawt. 

Achang chuan zan hnih te hi a zawnin a lo haw ngai lo a, kan hriatchhuah leh tak chu an tawhsual tawhna hmunah a lo va riak ṭhin chu niin. Doctor chuan amah enkawltu turin nupui neihsak mai turin min rawn a, chu chu pawmin kan zawng ve ngat ngat a, mahse, kan hmu thei lo, mama chanchin kan hrilhin an inzuam ngai lo a ni. Mama lah hmeichhe ngaihsak lo a ni bawk si. 

Mahse maw, kan ina a lo hruai takah che kha chuan i pa bulah i chanchin ka zawt ta a, Office-a in inngeihlo dan te leh in inhnial ṭhin thu te, tichuan i pa bulah nang dil tur chein ka ti ta a ni. I pain a hrilh loh chhan che chu i lo hnial ngei a rin vang ni ngei ang. 

Mami ka fanu, i nu leh pa te hi kan beidawng ve tawh em bawk a, min ngaidam mawlh mawlh ang che aw. Ka fapa hi i hmusitin diriamna duhna hial i pu lo tiraw? I hmangaih thei lo a nih pawhin khawngaihna vang tal chauh pawhin aw, aw ka fanu", tia ka nuin kut khur beuh beuh chunga ka kut chul heuh heuh leh mittui tling pam chunga a sawi chu uluk takin ka lo ngaithla a, ka thinlung a nghawr dat dat mai. 

Ka nu bulah chuan ka hmuhsitna leh diriamna chhan tur a awm loh thu te, ka pasal a nih tawhna anga hmangaih chu ka mawhphurhna a nih thu mittui luang ngiai ngiai chungin ka ti a, ka nu leh pa te pawh ngaihdam ngai khawpin engmah tihsual an neih loh thu ka hrilh ve bawk. Fa chu la nei lo mah ila, nu leh pa tena fate an hmangaihna aia thûk leh ril hi a awm bikin ka hre ta hauh lo, min hringtu ka pa pawh khan ka ko-a he mawhphurhna min nghah chhan hi min rin vang a ni ngei ang. 

Ka nu nen chuan kut invawn mai duhtawk loin kan inkuah a, kan inzawmna a nghet sauhin ka hre bawk. Chutih lai chuan, " I nu kha inentir turin hrilh law law rawh", ka pa chuan a lo ti a, mak ti takin ka nu ka en vat, " A mak ṭhin, kha thil kha sawi ve ziah suh, thu tak hla taka lak chi pawh ni lo", tiin ka nu chuan a lo khak ve vat bawk. 

Ka pa bulah chuan min hrilh turin ka ti a, ka nu rilpuiah bawk awmin chu chu cancer a nih an ring a, ka nu chuan cancer nge bawk satliah tih tifiah turin test a duh tlat lo, A lo nih hlauh chuan a mo leh tu te hmuh hman loha boral a duh loh vangin. Kan dinhmun chu a lai chhe tlat, ka nu chu ka thlem ṭha leh a, min hnial fithla ṭhak, ka pa chuan ka nu chu luhlul a tih thu a lo sawi ve bawk a, " Tikha chuan i nu pawh i kutah a awm tawh e, an nufa hian luhlul dun lutuk mai", tham chhalh hian a ti a, a kalsawn nghal bawk, a lungchhia tih ka hre thei mai. 

Chau tih hriat ngawih ngawih tak hian, " Hmuni, ka lo haw", mama chuan a ti a, a zawi hnuang mai a, a khawngaihthlak zawk, hetiang anga chau hian ka la hmu ngai lo, inthlak loin khumah chuan a bawk thlawp a, a rum nghut nghut mai bawk. Office lamah buaina a thleng deuh nge mawni, pheikhawk phelh sakin ka chhuahsan ta daih a. 

Chaw ei ka siam zawh chuan ko turin ka kal a, ka nu leh pa te chuan dawhkan an kil tawh a, mama chauh kan nghak tawh. Pindan ka luh chuan khumah thawmhnaw a lo darh nuai mai a, a inbual ni turah ka ngai. Thawmhnaw ho chu lakhawmin bal bawmah ka dah a, bual in aṭang towel veng chungin a lo chhuak ve bawk. Tihi chuan a hmel hmuh pawh nuam sawt, chaw ei tura kan nghah thu ka hrilh chuan a inthlak sawk sawk a, nghak tura min tih tlat avangin ka nghak a, a inthlak zawh chuan min lo kuahin min piai zeuh a, a la nui ver ver zui! 

Thleng min sil chhawk leh a, dawhkan tifaia hmun ka phiah zawh chuan a bulah ka va ding a, Office-ah buaina a awm leh awm loh ka zawt nghal zat. A awm loh thuin min chhang naa, a hmel aṭang chuan thil dik lo chu a awm chiang a ni. Ka nu leh pa te thingpui sen hang ka pe chu an bulah ka ṭhu nghal, a hnu deuhah mama pawh lo phei vein ka mal chungah lo muin ka kut a khal niap niap nghal a, ka nu leh pa te an la awm ve avangin ka zak chu ka sa awp awp, Mama lah chu a kiai suk suk duh chauh. Ka pain ka nu bula mut mai a rawt a, nui deuh sen sen chunga an kalsawn phei chu, ka khu ral lo chauh. 

Mama ka sik nawk nawk a, " A mak mawlh mawlh, nâ ka hre ve tho nia", nui huah huah chunga a tih chuan, " Ka nu leh pa te hmuhah chuan a mawi lo lawm",

" Eng nge maw a mawi lo na le, ka sawi tawh kha kumin a chaldelh chin ṭhah lawm kan nih, zah tur a ni lo", ngaihsam zeta a tih leh chuan ka thaw hrawk a, a sawi chu dik ve tho, " Keimah ka zak alawm, tun hnuah chuan ching tawh suh ang che, ka nu leh pa te hun lo deuhah an mut hma phah", 

" Awle, thinawrh", ka nui chhuak hak a, ka pasal tak hi chu a. 

Chanchinthar ngun taka ka ngaihthlak ka hriat vawikhatna, mama ka en chu a lo muhil siai siai, ka kut a la vuan reng a, laksawn ka tum chu vuan nghet sauhin, " Ka la muhil lo", a ti thum leh dut, ka phu zawk nghe nghe. Keipawh chuan mut mai ka rawt a, thuawih tak chuan pindan lamah min zui phei ve hnak hnak. 

A tuk zinga bai tur bawkbawk ka chan mial mial lai chuan, " Ka nu, khawiah nge au mami hi?", ring leng lawng hian mama chuan a rawn ti ta mai. Ka chemte ken lai chu ka hmer ngawt ngawt a, ka kun tlawk tlawk mai bawk, ka nu leh pa te an chhuak hlauh chu a tihzia tak tak a ni. Chhanna a hmuh loh vang nge ni mama chuan, " Ka nu, ka pa, au mami, khawiah nge in awm vek?", tiin a au leh a, choka lamah a lo pheiin ka hria. 

 

" Au mami", ka bulah lo ṭhu thlain innemkhalhin min en run a, a nui sang mai bawk. Ka tihngaihna hre lo lutuk chu mak ti takin ka en doh doh ringawt, lo dawnsawn dan tur ka hre der lo. " Au mami i ni lo em ni?", ka hmaa kut lo vai lauh lauhin a ti leh a, ka khur ṭanin ka hria, a hriatna a hlauh ta nge mawni! 

Bah nuai hian ka nih thuin ka chhang a, min hnawhtu vang chuan ka puak keh thei takngial dawnin ka hria, hlauhthawnnain min tuam up up mai bawk. 

" Lalhmunsiam, i ṭha maw?", min sawi dat data a tih leh chuan, " Nangmah zawk i ṭha em?", lawm ru tak chunga ka tih chuan, " Ṭha e, au mami ka tih che khan i awmdan a dang vek, ngati nge?", tiin min zawt let heu, hawisawnin mak ka tih thuin ka chhang ve ta ngawt. Ka hlauhthawn hman zia hre phei se chu min khawngaih zawk ang mawle. 

Office kal turin ka thlah leh a, tukin zinga min ṭhawn deuh thut vang chuan pawi a tih thu te a sawi luam a, necktie a dahna pawh min hrilh. Mattress hnuaiah a lo dah niin, zantin kan muthnan tihna nih chu nia, engtin nge ka hriat loh theih zawk ni. Ka chala min pen fawk chung hian, " Ngaihtuah muk lutuk suh", 

" A nâ", ka chal dawm vawng vawng chungin ka ti a, ka tuai nuah nuah bawk, a la khi vur ang zui. Min rawn hnaihin min penna chu a fawp vang vang mai a, ka dam sawng sawng nghalin ka hria, "Tikhan a la nâ em?", zawi sapa a tih chuan nui sen sen chungin ka lu ka lo thing nak nak a, " Lo dam tawh rawh se", ti pah chuan zawi te hian a pen leh kher a, ka melh hriam hraih nghal, " Thinawrh", a tih chuan kan nui ta hak hak a, kan inthlahliam thei ta hram bawk. 

Thingpui kan inna vel ka sengfel hnuin kan pindanah lutin Muanawma ka call a, a la thei lo zui, vawithum ngawt ka call a, a ri ral ṭhak, eng nge maw a tih ni. Ni tak e, class a la laklawh pawh ni mai thei, mahse; tun ang hun hi chu chhun chawlh lai a ni hrim hrim a, a phone te hi a keng lo a nih ka ring rum rum. 

Zanin chu mama a chau leh khawp mai a, Office-ah a buai viau chuan ka puih reng theih thu ka hrilh lahin a rem ti si lo. Ṭha takin ka muttir a, chaw ei turin pawhin a tho peih lo, ka nu leh pa te nen chauh kan ei a, mama ka ngaihtuah deuh vangin ka chaw ei lah tui thei der lo. 

Ka nu phei chuan, " Doctor hi panpui leh ila a ṭha lo ang maw?", hlauthawn hmel tak hian a ti a, " A ṭha ang, in pahnihin inentir rawh u", tiin ka pain a lo sawi ve vat. Doctor panpui em turin engmah thleng a la awm rih si lo a, chuvang chuan panpui chu a ngaih ka la rin loh thu ka sawi a, ka nu erawh remchang hmasa bera inentir a ṭhat thu ka hrilh ve bawk. Ka nu pawh hi a hranpa takin ka la sawm lo reng reng. 

Chaw eina ka sengfel hnuin kan pindan ka pan ding nghal a, mama lo indawm kun ngawih ngawih chu ka va kuah nghal, engtizia nge mawni! 

" Min bum tur chuan ka ring phal lo che",

" Eng nge i sawi awmzia? Engvangin nge ka bum ang che?", a hmaa ṭhigṭhiin a biang ka dawm a, a ṭhat leh ṭhat loh thu ka zawt a, a ṭhat loh thuin min lo chhang, " Vawiinah pawh i lo call, in la intheihnghilh lo tih ka hria, inbum kual ai chuan inṭhaṭhen zawk mai ila, kan hlim tlang zawk ang", teh daih chuan! 

Mambawih, lo kal ve tawh lo mai rawh, tihian inah lo chawl hahdam la, i lo kal ve zel chuan i chauh belh mai mai zawk ang", dam dupa ka pain a tih chuan ka lo hnial deuh a, mahse; ka nu nen an ṭang dun tlat si a inah ka lo awm mai aniang chu. 

Awmi inchhung chet pawh ka pui ṭha peih lo, ka rilru chauhna hian ka taksa a nghawng tel tlat si a, a ṭhalai zawk ina awm reng thildik a ni si lo a, bakah rilru tihharh nan tiin ka nu leh pate ram lam hna ka pui ve ṭhin mai chauh zawk a. 

Harhchian ka tum poh leh ka nâ zual zel bawk si, Mama ka ngai ngawih ngawih! 

" Au mami chu, thlawi turin lo haw miah suh kan ti che sia, thu i awih lo e", Awmi'n chhuat a nawh pahin nui ver ver chung hian a ti a, ṭhutthlenga ṭhua kuhva rah thel neuh neuh chung hian, " Nuthlawi nih hi a nawm ka ring a, chubakah ka chhungte hi tihbuai che u ka duh hrim hrim, abikin ka mo ṭawngthei zet hi", nui saih chungin ka lo ti let a, a ni hi zawng huat abar pawh hi a nei lo a, za em emin a nui vak vak ringawt, ka awm loh chhunga Nunui leh a bialpa chanchin te, Têbera leh a fate, ka vahte ho school kalna leh an lehkha zir chungchang te a sawi siam siam a, a bula awm hi zawng, ṭawngthei deuh mah se, a hahdamthlak. 

Duata leh Têbera te nen kan mukhawm leh dial a, ka cher thu ngawt Duata phei chuan a sawi. Têbera erawh a fing var ve tawh bawk a, min hnemin min fuih ve mawlh mawlh ṭhin. 

" Lo len in phal maw?", Muanawma ni rengin, " Phal tuk e, lo leng rawh, umuanawma chu tunlai i reh thei riau", Awmi'n a lo chhawn vat a, ka lo nuih ringawt, ṭawng tur pawhin chakna ka nei zo lo. Muanawma pawh chuan ka cher thu leh ei in tiṭha turin min ti a, ka hmelah pawh ka chau tih a hriat ngawih ngawih thu te a sawi chuan ka tha zawng zawng sawm khawmin, " Ka ṭha leh vat dawn alawm", zawi sap hian ka ti a, ka dang a ro nghal hulhin ka hria. 

Zirtirtu hna tho, thingtlang lama a hmuh thu leh chuta a thawh daih tur thu a sawi a, Mama ngaihkawi theih tura thu a zam kual nasat em avangin ngaihdam min dil ṭha leh. Ngaihdam hi min dil mawlh mawlh reng mai ni, ka lainat tawh zawk. 

" Ngaihdam min dilna tur a awm lo, i chungah hian lawmthu sawi kan ba nasa zawk asin, abik takin ka lawm tak meuh meuh a ni. Awm lo la chu Mama pawh a la tang reng awm si a", thaw halh halh chung hian ka ti a, ka chau hnawk thei. 

" Ni thum lai chu a liam tawh a, a lo la hruai ngei ngei ang che",

" Min lo hruai tawh lo ang, kan inṭhen tawh alawm", khap fap fap chung hian ka ti a, mittui a hnai ṭan leh tlat. 

" In inṭhen hleinem, inṭhenna lehkha pawh in tihfel loh kha, hming pawh in la ziak hnan lo. Bakah, a hmangaih che lawm, a lo hruai leh ngei ang che, ka ring tlat a ni. I hre lo nih kha, vawikhat phei chu min sawisa hrep alawm", 

" Maw?", chu ka thu hriat chuan min tihlimin min tiharh kâwk mai, " Sawisa chiang rapthlak, 'ka nupui chungchang khatin sawi suh' a tia, min hnek hrep alawm, Bawiha pawh a awm ve reng. Mam, a hmangaih che lawm, min ring rawh; nangmah vangin nupui hual lem a nei a nia", a tih chuan ka nui ta vak vak a, nupui hual lem. Kan inneih hma, Muanawma nen kan inngaizawng emaw a tih vanga Office-a a nupui hual lem chantira a lo hruai ve ngawt kha, keiin ka lo awi chiang lutuk kha nia. 

Zanin chu ka nu leh pa tel loin, Têbera nen chauh kan inkhawm a, ka nau hian mahni chauha ka inkhawm a ngaingam lo a, kan ina ka haw hnu hian mal taka ka awm duh loin min bawh buai reng mai ni. 

" Au mam, saw saw umama motor a ni tiraw?", kan inkawta car ding kawk pah chuan a ti a, ka tiril a khur nghal, " Ka u, i ṭha em?", 

" Aw, ka ṭha", Têbera chuan min ngaihtuah zet hian ka thlanfim tla chu a hru pah a, inchhunga luh ka hreh kher mai. Mama car ngei kha chu a ni, mahse; mama jail tan laiin kei kan in lamah ka haw daih ta si a, khata ṭang khan driver ruaiin ka nu leh pa te an lo leng ve fo ṭhin. Mahse, mahse, tun ṭum chu mama jail aṭanga a lo chhuaha an lo len lehna hmasa ber, amah hi a tel ve ang em? 

" Au mam, ka nu leh pa te an lo leng fo tih chu ka hria a, mahse; umama jail aṭang a chhuak tawh si a, a lo tel ve ang em? A lo hruai dawn che niang a", 

" Khatin mak ti deuhin awm kher suh", a insiamchhe vel chu ka nghawk deuh salh a, ka nau hi chu chimawm ve mawle. 

Engpawh chu nise, Mama a tel emaw tel lo emaw, min lo hruai dawn emaw hruai dawn lo emaw, inchhungah chuan ka nau ban hmer ngawt ngawt chungin ka luhpui ta a. 

Ka rin ang ngeiin ka nu leh pa te an lo leng, thingpui sen hang an lo in lai tak a ni a, kawngka bulah chuan la dingin Têbera nena inenin kan nui deuh hak hak a, kan ngaihtuahna âtthlak deuh kha kan hrechhuak a niang. 

" E, hei, mami te inkhawm bang pawh an lo haw tawh e", ka pa, mama pa zawk chuan a lo ti a, kan lo nuih ver ver. Ka cher thu ngawt sawiin, mama ka ngaih vangah puhin min chhaih ṭan leh laih laih, engah teh vak ka ngai tawh lem lo. 

Chutih lai tak chuan kan pindan aṭang suitcase nen Mama hi a lo chhuak hlawl a, suitcase nghatin, nui sang chung hian, " Mam, haw tawh ang le".!!!