Au Mami Chapter-14

Au Mami... 

Chapter-14 

Ziaktu: Cck Lalchhuanawmi

Muanawma nena kan inngaihzawn ve lai kha high school kan kal lai a ni a, ngaihzawng ka vawikhat neihna a ni a, nu leh pa hriatpui lohin. Awmdan tur pawh ka hre lo a, ngaihsakna leh induhna lantir dan pawh ka hre hek lo, ka awm awm khan ka awm ve tawp a, a zei lo chi ka ni ve bawk nen. Chumi vangte pawh niang Muanawma khan min kawp a, ka hrechhuak leh bawk si nen, kan inṭhen kha ni ve mai a. 

Tun hnuah Mama bulah engtin chiahin nge a lo sawi ka hre lo nain, Mama'n inṭhen hial a rawt danah aruka la induh angin min sawi a ni ngei ang. Ka thiam ang tawkin ka hrilhfiah ve naa, a lung erawh a dam zan lo. 

" Mama nen hian inhre ṭha viau kan ni lo, bazara intawng mai kan ni a, Office-ah a nupui hual lem anga chang tura min tih aṭang khan vawikhat pawh kan la inhmu leh lo. Mahse, Police hoin min um khan Mama nen kan inhmu leh hlawl a, ka hlauthawngin bag kha a car-ah ka dah ta mai a ni. Damdawi a awm tih pawh a hre lo ang, chhuanlam siamin ka kalsan leh daih a, Police ho khan an man ta a ni. Ka thiam loh tak meuh meuh a ni, min ngaidam rawh u", Puii chuan âw khur leh hlau tih hriat tak hian a ti a, Muanawma vang liau liaua Puii pawh man thei an ni Police ho hian, Mama pawh a chhuah theih phah a. 

Mama khan Puii a ni tih hre reng chungin engmah a sawi duh lo a, chumi vang chuan an tan tir a ni. Ka kan apiangin inṭhen a rawt ziah a, kan in lama haw tur leh kal tawh lo turin min ti ṭhin bawk, " Mam, Ka hmangaih che lawm, engmah tihsual i nei lo tih ka hria, ka ring tlat che. Kan pahnihin kan ṭang ang a, kan chak ngei ngei ang", a kut hum nghet sauh sauh hian ka ti a, " Min hmangaih suh, haw mai rawh", he thu ngawt hi a sawi. 

Muanawma puihnain thla thum hnuah chauh kan fihlim thei hram. Kei erawh kan ina ka hawna thla khat chuang a ni hialin ka hria. 

Mama chu ka exam vel a, a cher kâk mai, a dul pawh kiar tawh miah lo. Chaw a ei ṭha lo tih hriat tak hian a dawldang hle bawk. A lu pawh buk deuh chhap. A bulah ka mu leh thei a, mumang a ang zawk mah, tih harh hlau takin ka tho ṭhem ṭhem a, tui taka a mut lohna rei tawh awm sia, a duh hun hunah lo tho mai rawh se. 

Pangngai takin hun kan hmang chho leh zel a, mama erawh a nungchang a inthlak hlawk. Doctor chuan kum sawmparuk a nih hun laia a chen zeuh zeuh thu a sawi a, keini pawhin kan ring ber, a chhan chu umami la dam angah a ngai tlat ṭhin a ni. A zawng aza chuan a awm chuang lo a, khawvel pahnihah hian a cheng ni ber. Pakhat chu ka pasal a nihna leh kum sawmparuk mi a nihna khawvelah, jail-a a tanna khan a rilru a tibuai zualah Doctor chuan a ngai a, damdawi ṭha ber chu hmangaihna nena enkawl a nih thu min fah mawlh mawlh ṭhin. 

" Mama, khua a thim hnai a nia, lo lut tawh rawh", favang lam kan hnaih tawh na chungin ruah a la tla cher cher a, chu chuan khua a tivawt ruih bawk. A bulah chuan ka ṭhu thla ve a, " Au mami ka nghak lawk a, a lo haw har tawh tak tak a ni", mittui tling pam chunga a tih chuan ka nghahpui tur thu ka hrilh a, tlem chuan a hlim ve deuh. Rei vak lohah a lo pangngai ve leh mai a, " E he, mam, tirawh lut ang, a vawt si". 

Ka pa pawh hian Office lam hnaah a ṭanpui thar leh a, keipawhin tlem tlemin ka lo pui ve ṭhin bawk. Mama hriat loh hian kan buaiin kan lo hah thei lutuk, ka pa nen ka nu inentir turin kan la thlem thlu thei bawk si lo. 

" Ka nu, au mami hi khawiah nge?", tiin mama a au leh a, buaithlak ṭhin. Ka nu chuan a bulah ṭhuttirin umami chu a leng angin a hrilh a, eng eng emaw te sawipuiin, an ngawi deuh vang vang hnuah mama pawh a pangngai leh viau tawh. Choka-ah chuan ka lo inhru inhru ve mai. 

" A, ka pa, kan ṭhenawm nau saw ka va inhruai tir mai teh ang, ka awm hle hle thei lo", tih leh chhuah ka rual nghal a, zan dar sawm a ri hnai tawh a, mama a lo la haw si lo, call pawh a chhang lo. 

Kan ṭhenawm nau chu ka inhruai tir a, Bazar veng kan thlen chuan ka rin ang ngeiin mama a lo awm. Kan ṭhenawm nau ka haw tir a, mama bulah ka kal vat. A lo mutui ngang mai, dim tein a lu chu ka malchungah ka nghat a, ka rilruin 'umami, ka pasal hi i ngaidam a ni tiraw? I ngaidam a ni tih lo hrilh hram rawh aw' ka ti mawlh mawlh a, engchen nge hetianga a awm dawn tih ka hre si lo. 

" Mam, mami", min sawi dat dat a, ka lo muhil ve sek nih dawn hi. 

" Mam, i harh tawh maw? Haw tawh ang aw", tia thawh ka tum chu min lo kuah thut a, ka hamhaih lek lek, Min kuah nghet em em mai lehnghal. 

" Mam, mami min ngaidam rawh aw, min kalsan suh aw", 

" Kalsan dawn lo e, haw turin min ti leh mah la, ka haw tawh dawn miah lo, i hria maw?", kuah letin a hnungah ka beng thak thak a, " Min kalsan lo tak tak ang maw? Min kalsan suh aw", ka biang dawm chungin a ti leh a, a mittui a luang ngiai ngiai mai, ka biang a dawmna kut chu vuanin, " Um, fanu kha i duh tiraw? Naktukah Damdawi inah kan kal dawn nia aw", zawi sapa ka tih chuan, " Fanu maw", a ti bah nawk a, a lawm lutuk chu a ṭap hawm hawm. 

" I ruak lo e, chuan i hah thei ngawt ang, hahdam taka awm i tum hram hram dawn nia, chhan chu phir i pai dawn a, i rit nelh nawlh dawn si a", 

" Maw?", mama nen chuan phawk zet hian kan tirual a, inenin kan nui ta ringawt. " Naute pahnih pa ka ni dawn i tihna em ni?", phur fe hian mama chuan a zawt leh ngat a, Doctor a lo bu nghauh nghauh, Doctor pawh chuan min lawmpui takzetin ka hria, chu zawng ai chuan Mama hlim hmel mawlh chu hmuh kan a har. 

Doctor sawi ang chiahin ka rit nelh nawlh khawp mai, keimah tawkah ka puar ve ak tawh a, naute te ho lah hi an chet tawh chuan che nasa tak an ni. " A nu leh pate in inngeih lo ṭhin em a, khami vang nih dawn kha", min tihsak mai zel bawk a, hmeichhia leh mipa a nih an ring deuh ṭhup a, mama chuan hmeichhia ve ve nise a ti thung. Keipawhin zantin ka ṭawngṭai naah hmeichhia leh mipa ni turin ka dil ziah. Hmeichhia ve ve chu, mama ka ṭawmpui thei meuh lo. 

TV enin Apple ka keih melh melh a, Apple manah hian kan inseng hnem tawh lutuk, keih melh melh tihah han zai lep vel hi ka peih thlawt loh vang a nia. Ka nu test result lam turin ka pa nen an kal a result ṭha tak lo hawn hlauh sela. Mama pawh a Office leh hrih, a lo haw hma tur thu a sawi ve luam a, lo haw hma leh tak ang maw. 

" Ka lo haw, naute leh a nu an lo ṭha em?", rang takin ka hawiphei a, mama ni rengin, " I va lo haw hma ve",

" Ka lo haw hma dawn ka tih kha", tianga hma te chu, tlai ei rawngbawl hun chauh lawm le aw, engpawh nise ṭha vek e. Inbualfai turin a kal a, kei erawh TV enin Apple ka keih leh mial mial, chutih laiin naute an lo che leh, " Mam, naute te an che leh tawh nia", ring mangkheng hian ka ko vak a, ruak veka sahbawn kai nuai chung hian a lo tlan a, ka pum lo dawm vatin, "Ka fate u, Insual tawh lo turin ka hrilh che u kha, in pa thu hi awih rawh u", a ti a. Kan nui vak vak a, kei chuan mama zawk hi ka nuih, towel emaw tal pawh veng hman lo chu. 

An pa thu awih ang hrimin an tawp ve thuai mai bawk a, kei erawh ka nuih a za tulh tulh, mama chuan, " Nui tawh suh, ka va inbual zo phawt ang e", ding uai pah hian a ti a. 

" Awi, Lalrintluang le, engti zia a, a zia lo em mai, khati puia han awm", ka nu chuan inchhung a lo luh rual rualin a ti a, " A mak lo, ka inbual dawn lawm", mama chuan tiin a kal nghal a, ka awm hmunah ka lo nui ver ver. 

Ka bul lawk sofa-ah ka nu te lo ṭhuin result ṭhat thu min hrilh a, Aw Lalpa ka va lawm tak! Bawk satliah mai a lo ni a, a hlauhawm lo e, he thu hi mama hian a hre lo, kan zep tlat, result pawh a ṭha a, zep man a awm e. 

" Ngati nge Puii kha nupui hual lem chan tira Office-a i lo hruai kher, i biangah i infawh tir kher bawk a", lungawi loh hmel tak hian ka ti a, ka ner nung bawk. Hetia fiam hi ka chak hrim hrim, khumah min ṭhut awn tirin ka ke min hmehsak a, tuilum ip pahnih ngawt min pawm tir bawk. 

Chutia ka fiam chu a ngawi reng a, kei lahin ka lo kar ve sek, " A, ngaihzawng i nei emaw ka tih vang lawm, ngaihzawng nei lo awhthik min ti bawk sia", intikhawngaihthlak deuh hian a ti ta a, " Mahse, a fawp kher che a", ka ti leh hram, khami kher kha chu ka ngaithiam lo ve lek lek, keimah zawk chu ka insawi thinrim dawn tlatin ka hria, ka thik thar leh chu ka mittui a hnai nghal. 

" A, mam, khawmaw", ti pah chuan ka mittui luang hruin min kuah a, " Khami pawh kha ka tihpalh, ka tihpalh takzet aw. Keipawh khan nuam lo ka ti lutuk tho nia, i bulah kha chuan ka danglam vek zel a, ka rilru awmdan kha ka hriatthiam loh bakah ka hmuh tawh che chuan ka lung hi thlawk chhuak tur angin a phu nasa thei lutuk a, chuvang chuan ngeiawm deuh deuhin ka ti ṭhin che nih kha, ka huat leh ngeih loh vang che pawh kha ni bik lo", inthiam lo tih hriat tak hian a ti nuah nuah a, ka lo hlim ru veng veng mai. 

" Um, a pawi lo, ka fiam che nih kha". 

Christmas leh kum thar inkar boruak vel chu keini chhung erawh kan buai nak mai. Pasal ka neih hnua ka vawikhat hmanna tur a nih tehreng nen. Mama, achangin an chiu muhil tawp zel, an awmpui naupai angah te min ngaiin hnawhchhuah te min tum thul. Umami a lam reng bawk a, a pindan te pawh amah hian a tifai vek zel, kar khat tal tawp te kan mu dun lo a, ka nu te hian an pindanah min mut tir ve tawp zel mai bawk, tunge ka ni tih a hriat loh chang te hian. 

Haw hrih tura min tihin ka haw duh bik si lo, a chhan chu pangngai hun hi a nei miau ṭhin si a. 

Zanlaiah te lah, " Au mami keimah vangin a thi", tiin a ṭap hawm hawm zel a, bangah te a intauh vak vak zel. Kei, pum puar luah nen chuan ka ṭanpui thei bawk si lo, va hrehawm ṭhin tak, ṭha vat vat tawh se aw. 

Harsa ṭhin hle mah se, ni leh thla kan chhiar zo ve leh mai zel a, Pathian khawngaihna leh awmpuina vang liau liauin. Umami thihcham pawh kan hnaih leh hle tawh a, tunkum chu a thihcham puala chawhlui kil ho pawh ka pain ṭhulh mai a ti a, kan remti tlang vek bawk. Kei min ngaihtuah em em vek mai a, chaw ṭha tinreng an hriat ang ang min chhawpsak hi ni ber. 

" Ka nu, vawiin hi umami thihcham kha tiraw, thlanah pangpar vel emaw tal kan va dah dawn em ni niang?", ka pum dawm vawng vawng chung hian ka ti a, a nâ lutuk!

" Ni e, a ṭha ang. Mahse, i va nawm loh hmel ve", ka nuin a tih chuan ka pum nat thu ka sawi a, ka nau neih thla chu ni mah se, Doctor chuan ni sarih a ti a. Ka pain min lo hmuh chuan Damdawi ina kal a rawt a, kal nan hma ka tih deuh vangin ka lo hnial thung, a dam leh vat turah ka ngai. Tui te ka in khawlh khawlh hnuin ka ṭha ve leh mai bawk a, tukin chu mama pawh pangngai takin a awm a, chaw ka ei ṭeuh mai. 

Ka pum nat thu a hriat ve avangin min ṭhuttir hle hle a, chaw eina a sengfel bakah thleng a sil vek a, in pawh a tifai vek. Ka pa Office-ah a kal a, chawhnu lamah mama a kal ve thung ang. Ka pum a rawn nâ zawk zawk zel a, thawk ka la leh vak vak zel. 

" Mami, ka pa hruai turin ka va kal lawk ang e, ka nu nen lo awm lawk mai rawh u. Chawhnu lam hi chu Office khar mai ila ṭha ang, kan lo haw hnu pawha a la nat chuan Damdawi inah kan kal nghal dawn nia aw", ka chala min fawp vang vangin a chhuak ta a, ka ngai nghal vawng vawng thei. 

Ka nuin mama te lo haw huna kan ei ho tur momo a siam a, keiin ka theih ang angin ka lo pui ve bawk. Vawiin umami thihcham tih pawh hriat loh, ka nu chu ka melh leh zeuh zeuh ṭhin a, ka lainat lutuk chu ka kuah ringawt. 

Ka pum a rawn nâ leh thut a, ka phone a lo ri ve bawk, mama a nih vang chuan ka pum nâ hre chang loin nui ver ver chung hian ka chhang vat a, Bazar venga tawhsual a tawh thu min lo hrilh lek chu niin! 

" Mami, sang rawh, a chhuak ṭep a nia", nurse pakhat chuan ka thlan tla te chu a hru mawlh mawlh a, ka mit a vai ruai a, ka pum nge nâ a, ka rilru tih pawh ka hre lo, a nâ chawhpawlh vek mai. " Ka thei lo", ka pasal, a boral nge a la dam tih pawh hre loin nunna hrinchhuah ka tum mek chu ni si a, " Le, intichak la, han sang rawh le, i pasal pawh tunah an zai mek a, a damchhuak em em ang, nangmah tal han intipachang hram hram rawh le", ka hmai beng thak thak chung hian nurse nge Doctor, nurse a niang, chuan a ti a. 

Ka tha neih zawng zawng sawmkhawm a, " Mama", tia auin ka sang vak a, ka chau hnawp nghal. Naute ṭe ri ka hria chu ka lungchhe zual sauh, mahse; ka chau lutuk men pawh ka meng peih lo, " Hmeichhia a nih hi",

" Mami, naute pakhat a la awm a nia, han ṭang leh teh", chakna ka nei tawh lo, ka chakna zawng zawng a zo vek tawh. 

" A chau tawh lutuk a nih hi, kan zai mai dawm em ni?",

" Ni rawh se", Aw Lalpa, ka pasal leh ka fa nunna hi min chhanhim sak rawh aw, ka fate ka hmangaihzia min hrilhsak turin ka pasal dam tir ngei ngei ang che aw!!!