Au Mami Chapter-15 Last

Au Mami...

Chapter-15 Last

Ziaktu: Cck Lalchhuanawmi 

" Lalrinmawi, ka vaw dawn che, i pi pangpar duh ber a nih kha", a mawngah ka pa chuan a beng tai tai a, a luhlul ngang bawk a, a ṭap lo reng reng, ka fanu tak hi chu a. 

A nau, Lalchhanhima erawh a buhdelhin ka la pawm deuh chawt a, kum thum lai chu ni ve tawh mah se, a u ang em em hi chuan a harhin a inhlei tehchiam lo, ṭawng pawh a la ṭawng ve lo, a la chiar deuh nak nak, zai chhuah a nih vang nge mawni te ka ti. 

An ni boral ni-ah an piang a, an ni pawh kha la dam se chu a duat ve ṭhin ngawtin ka ring. 

Rintei hi chu a pi leh pu kutah a awm deuh chawt a, amah zawk hi chuan a pa hi a duh zawk mah. Chhantea chu a pi ka pawm tir a, thingpui lumin aṭṭa ka kang a, pakhati chu a pu nen huanah an la inkawm char char, a pi pangpar duh ber Lily, a sawisa leh ni chiang mai, an pa pawhin a lo video call leh ṭep tawh ang. 

" Rinte, papa-in a be duh che, a pu nen khan lo lut tawh ru le", ka ti chu, " Pa", atia a ṭap ta vak vak mai, a pu lo tlansanin phone min lo chuh vat a, " Pa, a puin beng", a zualko leh ta. A pu te ho nen kan lo nuih tliar tliar a, " Min nui", tiin a ṭap zual sauh, a pain lo chhanin min hau hlawm a, Rintei pawh a lungawi ve leh mai. 

Pathianin fanu leh fapa min pe a, ka pasal nunna pawh min chhanhim sak. Mama'n a duh ang takin a fanu hming a sa a, Lalrinmawii tiin, a fapa erawh, ka pain sa se a tih avangin ka pain, Lalchhanhima tiin a sa a. Mama pawh tawhsual a tawh a, a dam leh hnu hian a pangngaiin a ṭha tawh lutuk, ka nu phei chuan, " Lalrintluanga dik tak a lo let leh nih hi", a ti hial. A fanu angin a ṭawngtheiin a zuan a zâng em em a, tunah chuan kan chhungkua hian tudang reng kan ngai tawh bik lo. 

Nau ka neih hnu hian ka inenkawl uluk ve viau naa, ka hmaite a duk a, ka sawi thiam danah chuan ka chhe bem bum lutuk, min zaina erawh a him ṭha. 

" Mam, Chhantea hi hnute lo pe lawk mai rawh", ka thleng sil lai chuan mama chuan a lo ti a, thleng min sil chhawkin Chhantea chu hnute ka pe a. 

A fanu nen chuan an inum kawi leh zar zar a, Chhantea pawh a lo nui ve sulh sulh zel. Walker-ah dahin a u te chu a um ve a, a khêk ve nasa mai. A pi leh pu te nen kan lo en a, an pa zawk hi a lawmawm, a ṭawngfiah lo der ṭhin leh a fate ai pawha pangchan leh nawrh a thiam lutuk hi ni. 

" Mam, lo ding lawk teh, necktie", car kawngkhar a hawng tur chu a lo lehhawi a, ka awrhtir nghal mawp mawp mai bawk. 

" Bye bye kiss chu", ti pahin a biang a lo dawh a, fawh ka tum chu a hmui zawk a rawn dawh, kan han nui leh ang hrih. A fanuin a lo hmuh hmaa kal vat turin ka ti a, car chhunga luh a tum chu inchhung lam aṭang, " Pa, papa", tih thawm kan hre ta tlat, mak ti tak hian kan inen a, ka nu chuan, " Chhantea a ṭawng a nia", tiin a au zui. 

Walker rinchhana lo kalin Chhantea chu a kut a lo phar a, a pa hi a ngen ve mawni, mittui tling pam hian, " Pa", a rawn ti leh a, mama chu tlan vatin walker aṭanga hlangin a pawm vawng vawng a, " Aw, ka fapa, khawiah mah ka kal dawn hleinem", a insawi dat dat pah a, " Pa", Chhantea chuan a ti leh, an hmuhnawm takzet a ni, " Pa, pawm", Rintei pawh kut lo pharin a pa chu a lo pan ve a, an pahnih chuan a pawm ta hle hle. 

" Mami, inkhawm in tum lo em ni, in va insiam lo ve", ka pain a tih chuan, " Ka pa, Rintei a inhlei thei si, chubakah Chhantea pawh a harh chho viau bawk si a, Biak inah pawh umkawi reng an ngai a, inah ka lo awm pui zawk mai ang", ka ti a, Rintei lah chuan a nau a lo vel ṭap leh hman. 

" A khai khai, chutiangin an ti ngai lo. Biak inah chuan naupang ṭap ri leh nui ri hriat tur a awm ngei ngei tur a ni, an ni tel loin Biak in a changtlung thei lo, han insiam rawh u, car pawhin a kal theih tho", ka pa chuan a ti leh a. Ka pa thusawi chu dik ve tho mai, inkhawm tur chuan kan han insiam hnuhnawh leh a. 

Rintei leh Chhantea chu a pi leh puin an kai a, an hnungah mama nen inkaiin kan zui ve hnak hnak bawk. Ka rualpui chhelo tak tak ka hmuh te hian ka insit tlat zel, fa pahnih pathum nei tawh la chhelo tak tak si te nen Biak in lam panin kan kal dual dual a, kei a chhe berah ka ṭang thung si. 

" Ngati nge, i ṭha maw?",

" Nau ka neih hnu hian ka chhe bik lutuk, ka hmai te hi a duk nasa si", amah pawh en lo chuan ka ti a, rilru no lutuk pawh hi a. 

" Ka pi, hei ka nupui, Miss World nen kan lo inkhawm ve dawn nih hi", kan bul lawka kan ṭhenawm pi lo kal ve beuh beuh bulah chuan a ti a, ka pi pawh chuan, " E, a lawmawm lutuk, inkhawm te hi hmelṭhatna a nia, hriselna pawh a ni tel a, lo inkhawm zel rawh u. Nupa inhmeh tak in ni e, in hmelṭha dun bawk si", a ti a, a lawmawm ṭhin tak tak a ni. Mama chu ka en a, " Kha maw, ka nupui hi ka pi pawhin hmelṭha a tih em che hi", a dik e. 

Theiriat tlangah kan chho a, mi an lo phu suau suau tawh mai, ni tla tur êng phut mai te hi a mawi a nia. 

Senior tawh lamah leh duh lo chunga pasal min lo neih tir hi ka nu leh pa bulah lawmthu sawi mawlh mawlh tur ka lo ni. Lalrintluanga, ka ngaih theih miah loh kha ka hmangaih leh ka fate pa a lo ni ta si, kum sawmli ral kai chu khawilamah ka tlai chhe hman ṭep zawk a ni. 

" Ṭhiante u, min lo hrethiam lawk teh u, eng emaw sawi duh ka nei", mama chuan a ti a, engtak chu sawi ang maw. 

" Kha, khalaia nu hmelṭha deuh kha ka nupui a nih kha", min lo kawk a, min en nghal ṭhup bawk, ka zak lutuk chu ka sa up up mai, " Ka u mami boralnain min zem ât em avangin rilru bulbal pu hlei thei loin ka awm a. Ṭum khat chu hmeichhe pakhat hi ka hmu hlauh a, ka lung a phu nghal dup dup mai bawk, a bulah chuan ka zam chhe zo a, chutichuan ka sawi tawh ang emaw mawihnai takin ka be ve tawh ang emaw ka tih pawhin a thintirim zawng bakin ka awm leh ngai chuang lo. 

Ka pain min inneihtir a tum khan a duh lo nasa mai a, kei erawh chu ka hlim veng veng thung, chuan kan innei tho a", a tih chuan a nui deuh salh a, midang ho pawh an lo nui hak hak. 

" Kan inneih hnu pawhin ngaihsakna tihlan dan pawh ka thiam hek lo, a chhan chu ngaihzawng pawh pakhat mah la nei lo leh, hmeichhia reng reng kut hmawr pawha la khawih lo ka nih avangin. Mahse, mahse; min hmangaih. Dawhtheihna leh hmangaihna nen min vuan tlat a, tun hun hi ka thleng ta a ni. 

A pasal laktlak lo takin fanu a duh tih a hriat avangin harsa takin a hring chhuak a. Nupuite zawng zawng duhthusam, pasalte tana fapa hrinsak. Mahse, fapa erawh hring loin zaichhuah sak a ni thung, chhel takin a tuar a, ser lian tak a neih phah. Nupui, Mo, fanu leh nu a nihna anga rawng a bawlna-ah a tisa mawina a chul zo a, chuti chung chuan inchhuang taka awm tur si mahni insit reng rengin a la awm fo. Kei, a pasal laktlaklo tak pawh hian lawmthu ka hrilh ngai lo a, hei phei hi chu ka hrilh ngai lo, mahse; tunah hian ka hrilh ang a, chuan nangni ho hi min lo hruatpui tu te in lo ni ang

Au mami, ka hmangaih che", a kut pahnihin a lu chungah love lem a siam a, mittui parawl kuang chungin a lamah ka tlanphei a, kut beng thawm pawh a ṭha ngang, a zahthlak lam lam zawk, " Mam, keipawhin ka hmangaih che", 

" Mam, ka hmangaih che, chuan ka lawm e aw", ka biang chul heuh heuh hian a ti a, " Keipawh ka lawm e", insut feih feihin ka ti let ve a, zip zep mai a, hnap hi ka hua. 

Kei aiin a upa hmasa zel a, upa zel tur pawh a ni, chutiangin A fate ai pawhin a naupangchhia zawk ziah bawk. Kum sawmli pui tawh hi kan tan chuan rawlthar, kum sawmparuk mi ang chiah a ni. 

Umami thlalak chu hrufai pahin, " Au mami, lo lungngai miah suh aw, thlamuang takin lo awm rawh", ka ti a, tunah chuan Au Mami pawh thlamuang takin a awm ve ngei ka ring tawh. 

*** HMANGAIHNA THIHCHHAN TLAK A NIH ANG BAWKIN DAM KHAWCHHUAHPUI TLAK A NI VE THO *** 

           * A TAWP TA *