age is just a number-1

Age is Just a Number...

Chapter-1

Ziaktu: Cck Lalchhuanawmi

Churachandpur-ah DC post ka hmu a, Mizoram lama awm ka duh tehreng nen, a pawi chuang love; tihfel ngai tur tifel zung zung ila, Serkawr lama mo hruai tura thawhchhuah nghal a ngai.

Tu mo tur maw? Keimah mawle!

Miss Kimi, Lalruatkimi, ft5 chunglam boruak hip pha ṭawk ṭawk kim ve biai si kha; zirtirtu anih vang pawh ni chuang loa miss Kimi ni tawp.

Tunah hian min ngaiin a lo kúr nasa tawh ngawt ang, kum nga chhung tehmeuh kan inbe pawp tawh lo a nia!

" Hello? "

" Didi ", ka nautei tak hi chu. 

Eddie Zomuanpuia ka ni a, ka nautêi, ka farnu neihchhun leh ka duat em em hian 'Didi' tiiin min ko ṭhin, " Aw nautê ", kum sawmpahnihna a hmang ve tawh a, ka tan erawh nautê chiah a la ni, ka ngai tawh khawp mai.

" Didi, engtik nge i lo haw dawn? ", va hahthlak tak em, nizana kan inbiak pawhin ka haw hun tur ka sawi tawh reng si a, " Ka nautê, ka lo haw tawh dawn lo", ka ti nghut a, a lo teu hlar.

Tunah hian ka bulah chuan awm se kan inumkawi leh nasa ang chu, " I u kha mut hahchawlh tir tawh rawh, naktukah chhuah a ngai ni lawm ni?", ka nu chuan a lo ti a, ka pa pawhin pawm pui tih hriat takin a lo tuihnih ve vat.

" Ka la be duh lawm, zan pawh la rei lo", nautêi chuan a ti lang lang a, " Didi, ka ngai tawh lutuk che, i bulah ka awm daih duh; hetah chuan tumah paw'n min duat lo", ṭap pur chung chuan a lo ti leh a. Chutia a ṭah takah chuan a duh chen chen min biak theihna tur phalna a hmu leh ta nge nge a.

A duhtawka a han ṭawng hi chuan kan tlaivar phah lo chauh mawle, " Nautê, dar 10 a ri tawh a nia, naktukah Delhi aṭang ka hnathawhna hmun tur pan a ngai si a, kan duhtawk mai dawn em ni? ", ka ti ta ngawt a, zing thawh a hre lo ropui ve bawk si.

Khamlo deuhin kan inmangṭha ta a, ka ngai nghal vawng vawng mai. Ka nautêi tih loh mi pakhat ngaih deuh ka la nei, ka mut dawn apianga ka suangtuah ngei ngei ṭhin kha.

*

Past days*****

" Eddie tlak pawp ", ka tlak pawp a, kut an lo beng nasa, " Champion nih rengte hi i hne ve lo em ni? ", hepa hi chu ka ngai theilo ve chiang alawm.

" Keite chu Lalrinawma anga loser nih reng ka duh hleinem", ka duh phawt chuan ka ngeiawm thiam ve em Mai. Lalrinawma hi 2nd a ni ziah a, kei ka champ ziah thung.

Ka kawr nghawngah min lo tham sawk a, seh chilh tak leh thinrim tih hriat tak hian, "Engmaw i sawi kha, han sawi leh teh? ", a ti a, kei ka lo zam lo nasa, " A thunawn ka pai tawh lo", a mit taka en chung chuan ka ti sak a.

Midang an lo inrawlh vat, Lalrinawma hian min tluk ngai lo hrim hrim, tichung chuan min elna hi a bansan thei chuang lo.

" Ka haw tawh mai ang e", tih leh thawh ka rual nghal a, " No khat bak i la tlak hleinem maw", thiante chuan an lo ti nak nak nghal a, a ṭhenin, " A champ zing tawh lutuk a, ngaiah a nei tawh a nih hi", an lo ti leh bawk a.

An sawi dik ve reng, champion nih reng mai pawh ngaiah a neih theih dawn tlat. Bakah zanin chu in hnem thei pawh ka ni lo," Naktukah Principal Office kawngka kik leh a ngaih dawn vang mawle", ka kik zing malh malh ve tawh khawp mai.

" Suspend order a hmu dawn naktuk chu", Lalrinawma bawk chuan a lo ti leh a. " Eng nge maw i tihsual leh tak le?", nui kur kur chung hian thiante chuan an lo ti hlawm a. Ka sawi peih mai mai lo e a.

" Lalrinawma kha zanin atan chuan champion a ni e", ti hlakin ka kalsan zui nghal a. 

Keini ṭhianho hi kum sawmpariat rual awmkhawm kan ni a, bike kan nei fer fur bawk, zan reh lama intlansiakna neih kan ching em em a, kan chhungte pawh hian an hre ngailo tluk a ni, a rukin in aṭang kan chhuak miau ṭhin hek.

Zohnuaia awm kan ni a, Theiriat atanga Kawmzawl, Pukpui thleng hian intlansiakna kan nei thin a, tunah pawh hian Theiriat ka chhuahsan mek a ni. Thiante chu an duh dan danin lo awm ve tawh mai rawh se.

Hetiang hi ni hlawm mah ila hmeichhe lamah hian kan fihlim ve hlawm tlat, a awmzia chu virgin awmkhawm vek kan nih ber chu; chutak chu kan inchhuanna ve ber pawh a ni. Zu han tlak pawp chu kan ching ngei, nuam pawh kan ti a, zu bak kan ti ngai lo bawk.

Kan veng Zohnuai panna peng ka thlen dawnin, Serkawn, Zakamlova Memorial School atang chuan hmeichhe pakhat hi a lo chhuak hlawl mai a ka su thawi lehnghal, a tihluih nge pawh chu ka hre lo a tlu tawp mai a. Ka ding nghal a, rawn tho chhuakin min rawn hau nghal bawrh bawrh mai.

" Fimkhur ta che, mit i nei lo em ni? ", a ti vin hlar a, a àwphawi chu le, va ṭhing Mai mai tak, thingtlang lam mi ni chiang. Thinrim sa a ang, a mit a bui lúk a, a sen ram bawk, ṭap zo hlim chiah te pawh a ang.

" Naupang tê tê si, zan reia vah duk duk te chu a", min tihdan mai mai chu," Hmeichhia zan reia vak du du nen kan inang reng", a hnar a hmu lian ve khawp ang le, kei ai a upat hmel bawkin ka hria. Helai school awmna bawr vel hi a fal ve deuh hlek a, in ding awmchhun atang pawhin a hla deuh bawk.

Kei ai a upat hmelin ka hria.

" Helmet pawh i khum lo, zu rim te i nam lehnghalin ka hria", ngawi rengin ka en kar ringawt, a inhnit faih faih reng a, eng emaw tak harsatna a tawk a ni ngei ang. Zanlaia mahni chauha awm ngawt thu va ni suh.

Bike aṭang pawh chuan ka chhuk tawh chuang lo, ka inrah khalh char char a, ani erawh ka hmaah dingin eng emaw hi a sawi siam siam a, min hau ka ti dawn nge a thinrimna a hrithla ka ti zawk dawn.

A hnuah chuan, " Mipa ho hi tinge maw rinawm hi in harsat em em le? ", a rawn ti chho ṭan ta a, ka hrethiam ta chiah; a bialpain a rinawm lohsan ni ngei ang. A thingtlang àwphawi nen a inhmeh lutuk tlat, ka nuihte lam a za.

Chutih lai chuan school atang hian mipa pakhat hi lo chhuak vein, " Ka lo thlah ang che", a ti a, a kuta chelh leh kalpui a rual nghal. A ṭang ve nasa mai," Ka u, ka kalsan mai ang che", ka ti ta ngawt a, ka tihchhan tak pawh ka hre lo.

Bakah ka inrawlhna tur awm vein ka hrelo bawk, engtin tak chuan inti zel ang maw!

Classroom ka luh rual chuan Lalrinawma lo ṭhu tum luau chu ka hmu nghal, a chhan pawh ka hre thei mai; ka rin ang ngeiin ka dawhkan chungah chocolate, rose sen, lehkhathawn tih angreng a awm leh teuh.

Kan ṭhianho zinga pali chu kan school luhna a inang a, Christian Higher Secondary School tih niin Serkawnah a awm a, Lungleiah chuan school lar ve pawl tak a ni. Chumi piah lamah an dan a khauhin a kengkawhtu te pawh an khauh ṭalh ṭalh hle bawk.

Kan ṭhian pathumte chu Chandmari-a C. Sawma Higher Secondary School tihah an lut a, hei pawh hi lar ve tak chu a ni. Tin, ka ngai theih loh leh min el ve thintu Lalrinawma hi kan ṭhianho zingah hian a tel ve bawk, tun thlenga kan awmho thei hi keipawhin mak tih chang ka nei fo mai.

" Zirtirtu thar kan nei dawn tih chu in hre vek tawh ang a, vawiin aṭang a lo ṭan thei dawn a, kan lawm hle a ni", sir David-a chuan a ti lauh lauh a, a àw hi a fiak tha ve em bawk a, a hnung lama ding tan pawh hian a hriat fiah theih khawp.

" A hming chu Lalruatkimi a ni a, miss Kimi tiin in lo hre dawn nia, sawtah Siaha District Serkawr aṭangin a ni e, tin; tunah hian Principal Office-ah Eddie Zomuanpuia han kal rawh le", a ti kharh kharh a, " Hepa hming lam rik ngai reng mai pawh hi a", a tihzawm leh, keipawhin ka ning tawh khawp mai.

Office lamah chuan ka chho hna hna a, ka nu ka hrilh miah lo a, min suspend te a nih erawh chuan ka hrilh ve mai ang. Principal office chu ka kik kar kar a, " May i come in Sir?", polite ve reng reng pawh hi a ṭha.

" Come in Zomuanpui", min en mang hlei lo leh a hmaa lehkha awm en mual mual chung hian a ti a, kan inhre chiang tawh a nia. A hmaah chuan ka va ding a, " Office lama koh reng nih te hi i hne ve lo em ni? Nikum lamah pawh vawi engzah nge suspend i nih? ", min la en chuang lo.

Class ka bunk naah cctv pakhat ka tichhia a, cctv dangin an lo record khiau bawk sia, han phat ngaihna pawh awm lo. 

" Nikum lam ang khan han suspend dawn ta che ila, board hmachhawn kum a ni tawh bawk si, attendance-ah i tlak a hlauhawm bawk si; class kal ṭan tirhah Principal office-a koh ngaiin i awm leh bawk si, school ṭan awrh chauh han in suspend ringawt thu awm bawk si lo", hahthlak tih hmel deuh hian a thaw hrawk a.

Kan zirtirtu te leh Principal lam lam hian an lu hi chu ka tihai ve ṭhin chiang alawm.

Cctv pakhat man chawi turin min ti a, suspend chu ka hlawh em lo e. Classroom-a ka han lut tur chu nizana ka hmuh hmeichhia khan, a thingtlang àwphawi ngei mai khan roll a lo call mial mial a.

Nizan khan ka enchiang lo a ni ngei ang, ka rin aiin a lo tawi phian a, ft5 a pha chang chang ang tih tur vel a ni. Lectern a bawh phak ve ang reuh bawk si," May i come in miss? ", ka han ti a, a lo hawi phei vat nghal.

" E aw lo lut rawh", a kuta min hui zeuh pah hian a ti a, min hre tawh lo a ni ang, nge nizana mi ka ni tih a hre lo zawk. Lutin ka ṭhutna lam ka pan nghal a, ka hming leh rollno. min lo zawt vat bawk; ka en reng a, ka nuih a za em em ringawt.

Ka hmaa ṭhu Lalrinawma chuan, " Miss Kimi nih saw, Lalruatkimi", zawi sap hian a lo ti a. Tlar hnung berah mi pathum kan ṭhu a, kei a kil berah ka ṭhu thung. Ka ṭhutpui te pawh hian a tawi thu ringawt an sawi.

" Chemistry teacher tur kha nia, sir David-a nen kan class master leh mistress an ni dawn bawk a", an ti siam siam a. Kan chemistry teacher pakhat miss Tluangi pawh a tawi tawh tehreng nen amah aia sang deuh hlek chemistry teacher kan han nei leh chu nia.

A thingtlang àwphawiin eng eng emaw hi a sawi ve liam liam a, keia pawh chuan engvanga thingtlang àwphawi uar em em nge maw ka nih le?

Ka ban ka phar sang vah a, " Yes? ", a lo ti vat, ka han ding a, " Miss, chemistry teacher tur te chuan ft5 an pel tur a nilo tih thuchhuah an siam em ni? ", ka va ngeiawm tak, classmates ho an nui kur kur a; keipawh ka nuihza reng, mahse ka inla thutak ve tlat.

" Zirlai fel chuan Principal an hmu reng tur a ni tih thuchhuah an siam em ni? ", kan inrul tawk leh chiah.