age is just a number-10

Age is Just a Number...

Chapter-10

Ziaktu: Cck Lalchhuanawmi 

Ka pa thlan ka tlawh hnuin, sawtah, Lunglawn lamah Rinhlua thlanah ka kal leh a, zan lamah pawh ni se, thlanmuala kal ka hlau lo ka tih tawh kha.

Amawii ka kalpui lo thei lo, ka damdawi mum lian a nih ve hi, huhh.... Tihian awm tlaivar leh mai ang.

*** school i lo kal dawn em? Ka lo sawm ang che*** Johny-a hnen aṭang chuan message a lo thleng a, ka kal dawn loh thuin ka lo chhang, message dang a lo thawn nghal*** Rinhlua tan chhel taka kan awm a ngai a nia aw, keipawh, nimin aṭangin school ka kal ve chauh, vawiin aṭangin lo kal ṭan ve mai rawh*** tiin.

Sawma, Rintlaka leh Ropuia hnen aṭang pawhin fuihna thu angreng velte ka dawng ve nual a, ka inthlahrungin ka zak ngawih ngawih!

" Bawiha, chaw ei ka siam fel tawh a nia, lo kal tawh rawh le", tiin ka nu chuan min lo ko, room aṭanga chhuakin dawhkan chu ka kil nghal a, " School i la kal dawn lo em ni? ", tiin min lo zawt nghal vat bawk a, ka lu ka lo thing ringawt.

Ka la kal lo mai ang, a theih phei chuan chawlh daih ka duh, mahse, ka nu bulah chuan ka sawi chuang lo.

Chaw ei kham hnu chuan office turin ka nu chuan min chhuahsan a, tihian, keimah chauha awm leh a ni mai, achang chuan thlan lamah te ka han kal leh lawp lawp a.

" Ka fapa leh nangmahah duhthlang turin min ti lul suh, ka fapa hi ka hmangaih a, nangpawh ka hmangaih tho che, mahse, mahse... In pahnih inkarah duhthlang turin min ti suh khawngaihtakin", ṭap hawm hawm chung leh insum tak chunga ka nuin a tih thawm chu ka hre ru a.

" Ka fapa nen in pahnihin ka thlah theilo ve ve che u ", a tih zawm leh a, ka ding khawng reng, kalsawn ka tum a, ka thei derlo, " Aih, aih, chutiang thu chu sawi lo hram rawh", a inhnit hlawp hlawp nghal a, engtin tak chuan lo ti ni maw, ka nu ka khawngaihna chuan min hneh nghal a.

Ka biang lo lum thla pap papah chuan ka ṭap a ni tih ka hre ve chiah, ka zawi hnawk. 

Tunah chuan ka kalsawn thei ta, thawm dim tak chung siin ka room lam ka pan ding nghal zat a, zingkar mah nise, ka Amawii ka dût nghal tlawk tlawk a, ka âwm a tawt em em Mai bawk.

Ring taka au vak vak ka chak ber tunah chuan, ka rui thei miah lo chuan min tithinrim ngawih ngawih bawk, Amawii dût tur pawh awm tawh lo, chuti chung chuan ka la rui miah lo; corex bur khat tlât, ka hma study table chunga lo inhung vâng chuan ka mit a la ngang mai!

Lu na bûr chunga ṭhangharhin muangchangin ka khum aṭangin ka han tho a, din ka tum chu ka lu a lo hai thut a, khumah chuan ka han tlu zal leh rih.

Tlai lam dar ruk a ri der mai, khua a thim ṭan tawh bawk, ka damdawi in vang vek, vawiin nilengin ka nu thawm ka hre miah lo, ni dawn tak e, mut nilen chuan hriat loh awm tak, bakah office a kal ang!

Ka pum a lo ri rawk rawk nghal a, nilengin engmah ka ei lo tak bawk e, in chu a reh ṭhiap a, ka nu chan tur ka han ngaihtuah ve a, a rilru a hrehawm ngawt ang.

" Hmela", tih leh min hnek a lo rual nghal, ka tlu nghal rawk a, " Nangmah vang a nih hi i hria em? Tenawm lutuk, mahni ṭhiante rilru na ngawih ngawihin tuin nge siam ngai", ka kawr nghawnga ṭham nghet salh salh chung leh thinrim insehruh ṭeuh chung hian Rinawma chuan a ti kharh kharh a.

Nui lui sak chung hian, " Keimahin ka siam ṭhin", ka tih chuan min thing thla hrawk nghal a, Rinhlua thlanah zanah te eng nge a lo tih ve dawn ni!

" Nangpawhin i ṭhiante rilru na ngawih ngawihin i siam ve ṭhin kha", tiin a kal tur chu ka au a, " Tu rilru nge ka tihnat a? ", a kut hum ruh ṭeuh chunga a lo tih chuan, " Keimah, hmela, keimah hi mawle", tho ṭual ṭual chung hian ka ti a.

YMA ho lah hi a, ka duty eke bale e hi an ti ve a, an ngam zawngte bak an manin an hrek ngam chuang lo.

Keipawh hi an man ngamte zinga mi ka ni, min sawisa hrepin min pet bawk a, aṭhenin min hnek bawk, khawlai a nih tlat avangin mipui an lo pungkhawm luih luih nghal a.

" Hepa luhlul reuh dan chu(h), vawikhat tê pawh a la ṭe lo ka ti", ti pah hian a tiang kenin ka hnungah min lo hlap nghal ṭhawt a, ka va han ṭe awm lo tak!

Tuna ruih chunga bike ka khal chhante hi min hriatpui sela chuan, min counselling duh zawk hial ang chule, a thuhrimah, an ngam zawngteah inluling an tum leh ṭhin lutuk hi chu a dik lo.

" Awi, Eddie, ngati nge a? Duhtawk tawh teh u, khawngaihin, hei, a thi nasa lutuk ", min lo kuah thuak thuak pah hian miss Kimi chuan khawngaih a dil nghal mawlh mawlh a.

Khawiah chuan nge maw a kal reng reng, engtin nge keimah ka ni tih a hriat theih zawk? " Rui chungin bike a khalh a, a la pawr em em leh ta nghal a, kan zilh hlak a nih kha", an lo ti nghal dual dual a, ka va han awih lo tak.

" Chutiang pawh lo ni tehreng se, hetianga sawisak reng reng, naupang mai a la nih hi, ṭha taka zilh zawk tur in ni asin, puitling zawk in nih kha", âw khur dar dar chung hian miss Kimi chuan a ti a.

Naupang, naupang ka ni tawh lo, naupang ka la nih mai vang leh, a zirlai ka nihna ang chauha min ngainatu a nih hi, naupang nih ka duh lo, keipawh hian alakah beiseina ka tisang mah mah ni!

Min kuah chialna ata chu ka talchhuak a, heng ho mitmengah hian ngaihdam ka dil an phutna ka hmu thei, ka va han dil dawnlo rua tak em!

Miss Kimi in luahna building thlang lawkah nia min sawisak, min lo hmu a ni mahna miss Kimi hian.

A in luahnaah chuan min hruai nghal a, ka taksa a na chhuak vek, building kawt kan thlen chuan, " Mangṭha", ti supin ka bike awmna, min sawisakna hmun lam pan tur chuan ka inher a.

" Khawiah mah i kal dawn lo, i thi hneng hnuang kha, i duk cher churh mai bawk, lo intifai phawt rawh", min lo ti nghal vat a, " Ka ṭha", tih leh kal ka rual nghal a, " Zomuanpui", tiin a lo au leh nghek.

" Tun ang zanah khawia kal nge i tum? ", a lo ti zawm nghal a, hahthlak ti deuh chung hian ka thaw hawk, a bânah chelhin building chhungah ka luhpui a, " Eddie", min ti pah reng bawk, a mittui a hru zeuh zeuh pawh chu ka mit sirin ka hmu reng.

A inchhungah chuan ka luhtir a, " Khawiah nge i kal dawn? ", min lo umzui nghal, inher vutin bangah ka nawrbet nghal a, dim baksak lo leng hian ka fawp tawn tawn a.

A âwmte chu ka tha tawpin ka ṭham sak sak a, ka khûpin Hruaia'n duhtawka khawih a tumna chu na thei ang ber tura ka rin chuan ka han do chho sawk sawk bawk.

Na a ti chu a rum nghut nghut a, talchhuah tumin a bei fat fat ve bawk, a tal nasat poh leh a na ting a ni mai, chutah ka thiltih lai tawp thutin, " Khatiang ti tur khan ka kal dawn", thaw hlawp hlawp chung hian ka ti a.

*******

" Engthil nge ka tih tak? ", mahni leh mahni chu inzawtin ka phun hluk, " Nizanah engthil chiah nge ka tih? ", khumah chuan ka let ka let a, siamṭhat theih tawh loh tur pawi ka khawih leh ta.

Mahni dik lohna hmuh hi chu a har a, hrilhhriat kan nih meuh erawh chuan inpawm thiam a lo har leh hle si, " I ṭhiante tan hian hmun i kian ngai em? Engkimah chungnung zawk nih i duh larh zel a, i ni reng ṭhin bawk, keini pawh hian chutiang nih chu kan duh ve ṭhin tho asin, i ṭhiante hian nangmah avang chauha luck nih hi kan duh bik ngailo.

I ṭhiante hi min lo hrechiang lo hlawm hle mai, nge ni a, i hre duh lo zawk? Rinhlua'n Lallawmsiami kha High School a lo kal aṭangin a duh tawh tih i hria em? I ṭhiante chezia leh ṭawngkamte hi i chik ngailo em ni?

Rinhlua khan zan lama in inzui ṭhin thute kha a hriat loh i ring em ni? Mahse, khanu kha a duh em avangin a ngawi mai mai a, a nui hmel phena lungngaihna te kha i hmuhsak ṭhin lo a tiraw, hei vang hian lawm nang aia chungnung zawk nih tuma ka bei ve fat fat thin.

Mahse, a tawpa chungnung zawk chu nang hi i ni leh nge nge zel e, tunah chuan keipawhin chungnun zawk nih tumna ka bansan tawh, chungnung ber chu lo ni zel ang che", bang chu ka hnek vak vak a, chungnung ber nih zel maw, ni lo e, ni lo e, loser dik tak zawk ka nih hi!

Ka room chhunga bungrua ka hmuh phaka awmte chu au vak vak pah hian ka paih darhin ka pet leng vak vak a, bang ka hnek thul, ka âwm ka chum dat dat a, a tawt lutuk hi puak keh sela ka thawl hawk ka ring mah zawk.

" Bawiha, eng thil-", a lo lut chu a ding khawng reng , " Ka nu, thih ka duh", bang nghêng hian ka ṭhu a, ka beidawng takzet tawh, ka pa ka chân tawh a, ka ṭhiante ka chân leh a.

Miss Kimi rinna keimah ngei hian ka tichhe leh a, ka nu meuh pawhin min kalsanna tur chhan tha tak a nei bawk, abikin, ka nu hian min kalsan anih phei chuan Dam reng hi chu a hrehawm zawk ang.

" Chutiang sawi suh, ka nunna i nih hi, i tel loin engtin nge ka awm ang? ", nghet tak hian min kuah a, ka hnung a beng dat dat bawk, " Khawiah mah ka kalsan dawn lo che, i hria em mi âpa", ka nu chuan min sawi nawk nawk chung hian a ti leh a.

Ka kuah nghal vawng vawng, ka hriat theih tir ata âwrawl chhuah meuha ka ṭah nasat ber a nih ka ring, inkuah chialin kan ṭap dun a, nu te nge nge chu, nu te an lo ni e!

" Ka pi, helaia ṭhu ṭhin au mami kha khawiah nge a awm tak? A la ṭhu ṭhin em?",

" Ṭhu tawh ngai lo reng reng, keini pawh hian kan ngai tawh lutuk", nui sen sen chung hian an lo ti siam siam hlawm a, a nih ka ring, amah kha a ṭawng duh ve bawk si a.

Ka kal loh chhungin a lo bo hman daih, biak pawhna tur ka nei si lo, miss Kimi chungchang zawh ka duh, miss Kimi ka be ngam chiah bawk si lo.

Bazarna hmunah arukin ka zawng leh dû dû a, ka la hmu lo reng reng, a bazar dawn lo a ni ang.

Lecture a pek chhung zawngin ka lamah vawikhat chiah a lo hawi, min haw(hua) tawh a ni hrim hrim, ka thiltih kha a diklo ve em bawk a ni, vui tur ka ni lo.

Johny-a hian kan veng peng thlenga lo kal hi a ching thar tlat, mahse, nuam ka ti, kan titi pah a, Rinhlua chanchin lam sawi hun kan la tilo deuh nge ni, atua mah ve vein kan la sawichhuak ngai lo, ka rilru erawh chuan a hre reng ṭhin!

Miss Kimi ka en kar a, ka hmuh lohna a rei tawh vang nge ni ka hmu cher sawt em em mai lehnghal, Hruaia khan a la sawisa ṭhin ang em le? Ka va zak tak!!!

Ahma aiin ka nu nen kan inkar a ṭha lehzualin kan inpawh zual sawt em em a, ka ṭhiante pawh pangngai takin ka be leh hlawm tawh bawk.

Rinawma nen hian kan la inbe miah lo bawk, miss Kimi nen!

Mahse, ka ngai thei lutuk.

Ka phone chu ka tuai ka tuai a, tunge ka biak hmasak ang, miss Kimi nge Rinawma zawk ni ang?

" A pawi lo, a pawi lo, i ṭha leh vat mai ang, tuar fan fan phawt rih rawh aw", ka hnung chul heuh heuh pah hian ka nu chuan a ti a.

Ka thlan tla bawrh bawrhte chu a hru a, " Ka nu, min ngaidam rawh aw", khur dar dar chung hian ka ti a.

Kan nawmna tur leh hlimna tur nia kan ngaih kan chen ham ham hnua min han chen let ve meuh hi chuan a nuam tawh lo khawp mai, a hlimawm tawh lo bawk, a hrehawm ngawih ngawih zawk a ni e.

Ka nu hian min vil tlaivar ṭhak hi a ni ber, achangin a han ṭap khur leh dar dar a, rilru nêm tih takah, chubakah mahni fate nâ tuar hmel hmuh aia hrehawm a awm bik chuangin ka hre lo.

First term exam-in min la hmuak zui, fail phawt a ni mai, a hnai tawh em em ropui si, zir tur ka hre thlawtlo, a boin ka bo!

Hun reilo tê chhunga, thil thlen tam dan hi. Hun pawt dingtu an awm emawni tih tur a ni. 

" School-ah te hian i talbuai em? Sawi hreh lo la, chawlh te kan dil mai dawn nia", ka nu chuan a lo ti a, " Talbuai lem lo e, bakah exam a hnai tawh a, kan chawl ṭep tawh zawk", anthur thui hawp ri hluah hluah chung chuan ka lo ti a.

Ka inthlahrung, naupang tê sia zu vanga han talbuai; naupang nih ka duh tawh loh thu ka sawi sia, hmmm, naupang ni leh phawt mai ang!

" Zomuanpui, lo ding lawk teh", ka lung a phu dut dut, a phu rang em em zui!

Chu âw chu hai rual lo hian miss Kimi ngei a ni tih ka hre nghal, muangchang hian ka inher, lehkhabu hi lo pawm ṭunin a khup a lo tawm deuh chut chut a.

" Khatia ding reng lo khan lo kal vat ta che", a lo ti vin hlar lehnghal a, ummm, min vinna âwka pawh ka lo ngai hman lutuk alawm le!

Lehkhabu chu ka va pawmsak ve ṭun a, puan a bih ṭha nghal sauh sauh, hei vang chiah a nih dawn hi, " Aw, ka lawm lutuk e", thaw hawk chung hian a ti a, lehkhabu chu pawm leh nghal ṭun chungin a kal leh nal nal a, ngawi rengin ka thlir zui vawng vawng ringawt.

Vawiin hi exam kan neih dawn avanga school kan kalna hnuhnung ber a ni a, classmates hote chu an thiam chin leh thiam lohte inzawh nan leh inhrilhfiah tlauh tlauh nan an hmang a, kei erawh chu ka bo em avangin dawhkan bawhin ka mu daih a.

A chang chuan ka lo khur ru dar dar leh ṭhin, ka thlante a tla bawrh bawrh a, mahse, ka tuar ve thei tawh lutuk, ka thiltih rah ka seng mek a ni si a.

" I ṭha maw? Kha i thlan nasa lutuk", min hru thuak thuak pah chuan Rinawma chuan a ti a, ka hma chiahah a ṭhu ka tih tawh kha.

" Hei, tun exam naa suggestions ka siam a nih kha, khang kha i thiam vek chuan pass mark aia sang pawh i hmu maithei a ni", file pali vel hi ka kutah lo dahin a hma lam a hawi nghal a, ka han en a, a sawi ang tak tak kha a ni, kutziak vek a ni zui a, a hah ngawt ang.

Lawmthu sawi ka tum laiin dar a lo ri hman, ti hian, exam ni thlen hma chu kan chawl ta, Rinawma a chhuak nghal daih a, lawmthu pawh ka sawi hman tawh lo.

Rinawma chu topper a ni ziah a, ka ring tawk, zir tura min siamsak liau liau chu ka chul heuh heuh a, ka hriat loh karin file chungah chuan ka mittui a lo tla!

A sawi ang tak takin ka ṭhiante hi ka lo hrechianglo hlawm hle mai.

*** Pass ngei ang che *** miss Kimi status chuan min tibuai ngang mai, Tu a tihna tak ni ang maw, kei min tihna hi a ni thei mai ang em le?

Ahma ang kha chu nise ka va zawt leh hrim hrim, ka chhaih pah bawk ang.

Tunah chuan a status leh last seen pawh ka en ngam ṭawk ṭawk tawh nia.

Rinawma hnenah chuan lawmthu ka va sawi a, group lamah exam na atan duhsakna kan inhlan tliar tliar bawk.

Miss Kimi khan kei duhsakna min hlanah ngai ve mai ang.

Rinawma zarah tha ṭakin ka chhang ve zel a, ka pass ngei pawh ka ring, hehee...

Exam han zawh meuh chuan ka thaw huai mai lawm, ka nu nen kan bazar a, keimaha bazar kha ka duh zawk asin le, hmelhriat apui hi a ngah lutuk a, kan kal hlek a, kan ding nghal zel, kan kal leh hlek a, kan ding lehnghal a.

Chandmari pheiah kan inzui dat dat a, helai bawr vel hi chu christmas bazar hunte a nih loh chuan a reh ṭhin lutuk, khua lah lum si, huii ka rilruin ka phun ka phun mai.

" Ânu", naupang pahnih hian ka nu chu an lo kuah nghal chawt a.

Mipa naupang leh hmeichhe naupang, " Duata, Naute", âw thum deuh chhalh hian kan hnung lam aṭangin a lo ti ve bawk, an pa a ni ngei ang, engvang ngawtin nge ka nu hi, " Ânu", tia an lo koh ve ngawt?

Ka nu chu min hawsan turin ka ti a, miss Kimi kawngka bulah ka indawm kun tlawk tlawk, a awm lo, khawiah emawni a kal a ni ang.

Khang naupangte pahnih khan nu an mamawh takzet a nih kha, Duata leh Nautêi maw kha, an pa pawh kha chutia upa zawk zawk chu a ni hauh lo ang, chutin ka nu pawh la ṭhalai tak a ni a, pasal a sûn hma mai pawh a.

" Ka pa, eng nge ka tih ang? ", ka rilru chuan ka ti mawlh mawlh a, chutih lai tak chuan kawngka ri rawk rawk thawm hi ka hria a, ka hawichhuak chu miss Kimi hian kawngka a lo hawng mek chu niin.

Min be miah lo a, en pawh min en lo, inchhungah chuan a lut daih a, kawngka chhetê hian a hawng, lut turin min duh a ni ang.

Inthlahrung tak chungin ka lut a, min en chuang lo hian, " Ngaihdam min dil rawh", a lo ti a, ka ding ngawi reng, ka zak lutuk ringawt.

Ka hmaah a lo ding a, " Ngaihdam min dil rawh", a ti leh a, " Min ngaidam rawh", bah nuai hian ka ti ta nge nge a.

" Awle, ka ngaidam che, mahse, tun hnuah chuan khatiang khan i awm tawh tur a ni lo ang", ka lo bu nghauh nghauh, a nui hak hak a, tihian kan ṭha tawhin ka hria, va nuam tak.

" Exam i titha em? ", min zawh ka ring reng a.

*****Present day ******

" Aw, ka pa, nizan lam in mutui hlawm em?"

" Aw, mutui e, thlawhnaa kal mai tur a nia, a chauh thlak dawn em mai, in tluang zel em? ", ka pa chuan min lo zawt nghal a, kan tluan ve zel thuin ka lo chhang.

" Nu, khawiah nge i phone hi, Didi ka be duh", tia Nautei au lauh lauh chu ka hre zui a, ka pa a lo nui hawk hawk, " Chu, i Nautei'n Didi a tih leh tawh chu", a lo ti a, ka lo nui ringawt.

" Ka pa, nakinah Nautei chu ka lo be mai ang, ka lo biak chhan che chu nizan khan Duata a nawmsam vak loh thu Nautei khan a sawi zeuh a, Duata chu biak lawk ka duh mawle", ka ti a.

" Aw Naute, i u Duata hi i nî in a be duh lawk alawm, i nuin a phone a hman zawh hun nghak mai rawh", dam dup hian ka pa chuan a ti a.

" A u Duata chauh hi a nî te pawh hian an duat lutuk mai", vui deuha a tih chuan ka nu a lo inrawlh vat a, " Nang chu Didi duatlai i nih kha", a lo ti ve bawk a.

" Ka ni bawk lo, Tu duatlai mah ka ni lo, Didi pawh hi a ka biak hmasak loh chuan min lo biak a tum ngailo", a inhnit feih feih nghal a, kan va chhangchhe ṭhin tak.

Ka inhmuhchhuah phah zui nghal, lo biak hmasak ve ṭhin tur hi nia, " Aw, aw le, i u Duata hi i nî in han be phawt sela, Didi chu kan be nghal dawn nia", ka pa chuan a ti a.

" Duata, an chhaih leh tawh che em ni? ", tia ka zawh chuan ' Aw' tiin min lo chhang a, an nuin Nautei pian hnu lawkah pasal a umsan daih a, chhaih nawmnah school-ah a tawk ṭhin bawk.

Puitlingte tihsual naupang thleng thlenga burbun hi chu a ṭha lem lo khawp.

" Eng nge ka hrilh che kha, ' Nia' tia kal daih tur ka tih kha aw, lehkha ṭha takin zir la, lehkha zir hmangin phuba lak tur aw", hetiang hian ka hrilh ziah, phuba lak vak ngaihna a awm chuanglo, lehkha zir hmang hian ni mai.

Û ber han nih ve takah chuan ka naute pahnih hi ka thiam ang tawkin ka duat ve ṭhin a, zilh an ngaihnaah chuan ka zilh ve ṭhin bawk.

Keimah taka pawh hi ka in uluk sawt bawkin ka hria, ka nun pawhina a zir ve a ngai tlat si a.

Nautei pawh kha ṭap chungin school aṭanga lo haw chang a nei zeuh zeuh ṭhin bawk, ka nu pawh hian a hmangaih a ni tih ka hre thei.

Ka pa pawh hian min en hrang bik lo a, hauh emaw zilh ka ngaihnaah chuan min hauin min zilh ve bawrh bawrh ṭhin bawk.

Ka naute pahnih hian nu hrawn an hrawn tih hi a hriat ngai miah lo a, keipawh hian pa hrawn ka hrawn tih a hriat loh. 

Mahse, hun lo hman liam tawh kan nei a, chhungkaw dik tak, thisen inzawmna neilo kan ni tih chu mite hian an lo hre khawp.