age is just a number-11

Age is Just a Number...

Chapter-11

Ziaktu: Cck Lalchhuanawmi

****Past day****

" Miss, thil pakhat ka zawt ang che aw"

" Aw, min zawt la, mahse, awl deuh aw"

" Ngati nge Hruaia nen chuan an inhualtir che u? "

" Hruaia a? ", ka lo bu nghut, " Kan pian ve hma thil daih mawle, ka pain uHruaia pa hi pawisa a lo puk ni awm a, a rul ṭha hlei thei tawh si lo a, ka lo pian hnuah uHruaia hi pasal atana min neihtir chuan kan ba min ngaihdamsak tur thu min tiam a, chuvang a nia " , a lo nih mai mai chu a.

" A nih, a sawisak ṭhin thu che hi i chhungte i hrilh reng reng em? ", tiin ka zawt nghal a, a lu a thing nasa.

" Hrilh ta che, bakah sawisak theihna che dan a neilo hrim hrim", a neilo tak tak.

Miss Kimi chu ka melh rawm rawm ve a, ho min tih thu leh, thinrimna leh lungawih lohna a neih lai chauha a sawisak ṭhin thute chu a sawi siam siam a, " I â em mai", a kar lakah ka lo tihsak ve zel bawk.

Chawlh kan hmang ṭan dawn chauh maw tih laiin school kal a hun der!

A peihawmlo ṭhin tak tak a ni, first term exam result a chhuak nghal a, ka pass ngei e.

Rinawma chu topper a ni leh tawh, ani te chu a ni reng reng ṭhin lawm.

Miss Kimi status *** pass ngei ang che*** a tih kha ka hrechhuak zawk, ka la zawt ngei ngei ang mawle...

Ka ṭhiante pawh an pass a, kan dinhmun kha ka ngaihtuahin a hahthlak ve hlawm dawn nen, kan pass ṭha hlawm phian a, Ex-man Rinhlua ka va ngai tak!

" Eddie Zomuanpuia, engkhaw sawi set set loin lo chhuak rawh le", sir David-an chutianga min kohna pawh chu ka ngai hman alawm le.

Ka lu a dik vek, uniform a dik thlap bawk, ka kuttin a seilo bawk a, sawisel tur a hmu miah lo, mahse min hrem kha nuam a ti hrim hrim a.

" Inhmuh lohna a rei tawh hle mai", a la nui ṭhaw ang zui a, Line-up hi ka tan bik liau liau aniang.

Sir David-a chuan min dinchilh chawt a, eng a hria ni maw, sir Zaia nen an titi char char tho, ngawi rengin ka dingkhawng ve luah ringawt.

Miss Kimi'n Rinawma necktie a siamṭhatsak lai ka va hmu thuak, ka en ṭha leh ngat a, miss Kimi'n a darah a beng thak thak a, eng nge maw an sawi ni an nui hlawm a, sir David-a'n min kochhuak khanglang chu ka ngei ṭum ber a ni.

Class tin top three-te an ko chhuak a, kut bengin kan lo lawm, kut beng thawm a ropui ngang mai.

Chumi hnuah classroom lam kan pan hna hna hlawm a, khua a la lum bawk si a, thlan lah a lo chhuak ve sek bawk nen, ka necktie chu ka han phelh thawl deuh a.

" Zomuanpui", ka phu nasa lutuk, " I necktie kha", a tiang ken chuan min kawk zuk zuk a, miss Kimi tak hi chu, min siamṭhatsak ve ka phut em avangin phelh thawl sauh sauh chung hian a bulah ka va kal hnai a.

" A lum lutuk alawm, ni sâah ka din reng bik kha, min en mah la, hei, ka thlan nasat zia hi", pangchang âw tak chung hian ka ti nuah nuah a, a rawmawl min pek pah chuan, " Kha hei hian inhru la, chuan i necktie kha siam ṭha nghal bawk ang che", a kal nghal nal nal, ka va ngei mai mai tak.

Zanah chuan kan ṭhian ho group-ah Johny-a'n *** miss Kimi naute thar kan awm tlatin ka hria*** hmela chu aw... *** tunge? Tunge? Kan Goody Eddie Boy-a chu a puitling tawh tihna em ni??? *** Sawma te ho chuan an lo ti nghal tuar tuar a, an awm loh thuin ka lo chhang ve ngawt, Lalrinawma dinhmuna awm ka chak ber ṭum a ni ang mawle!

" Aw le, first term exam kan pass ṭha bawk a, fail kan awm miah lo, a lawmawm lutuk ringawt, kut beng ang u" , kan beng dar dar hlawm a, sweet pahnih ṭheuh min sem nia!

Va naupanchhiatthlak reuh tak.

" Second term exam pawh pass leh vek tum ang u aw, chuannnn, second term exam hma zawnga kan class aṭanga man leh hrem ngai in awm loh chuan, sir Rosangate Resort-ah advance christmas kan hmang ve ang, school-in kan hman hmain ", min lo en nghal ṭhup, hma lam ami te pawhin hnung lam an lo hawi vek a, ka tê chem chemin ka hria, zahthlak thei e...

" Eng nge maw in hriat hlawm le, keite chu ka fel alawm, ngaihtuahawm ka ni lo", kut zaizir meuh hian ka sawi, court hmaa insawifiah ka ang ber.

" I chiang maw? ", nui sen sen chung hian min lo ti a, ka lo bu nghauh nghauh, an zavai chuan an nui ta vek mai, nuihzatthlak ka sawi pawhin ka hre si lo, ka lu thaklo pui ka hiat ringawt.

Haw kawngah chuan ka inngaihtuah rauh rauh a, chutih lai chuan Tu emaw hian min lo kuah thut a, " Vawiin i hmel awmdan kha  inhmu ve thei ni la chu i nuihza ve ngawt ang", la nui huah huah chung hian a ti a.

Rinawma lek chu niin a chet dan chuan min tihrilhhai mah mah zawk, tun hmain tiang hian min kuah paha min nel tak hian min be ngailo kha a ni a, ka lo nui hak ringawt, " Engtin vak nge maw ka awm le aw", ka ti nuah nuah a, a la nui tut tut tho.

Ka tukkhuma min lo beng chawrh pah hian, " Hmela, min lo nghak ta che", Johny-a leh bawk a ni.

" Eng nge in lo tih dawn? School bus-in a tlansan mai ang che u", ka lu tuai vat vat chung hian ka ti a, " In veng penna ah khan kan nghak mai dawn lawm, bakah, haw rualpui tur i nei si lo a, miss Kimi lahin naute thar a nei tawh bawk si a, kan ngaihtuah deuh hlek che a", Johny-a bawk chuan a ti a.

Rinawma chuan, " Miss Kimi naute", ti ve lehin an pahnih chuan an nui bâwk bâwk a, achangin an inhnek fiam thul, " Rinhlua ka ngai ṭhin khawp mai! ", Johny-a chuan a tichhuak hlawl a, atawpah chuan, kan ṭhianpa hming chu lam rikin a awm ta.

Ni e, tun hmain hetiangin min hawpui ngai si lo a, Rinhlua awm ve phei se chu a phurthak ber kha a ni leh ngei ang.

" Tinge maw, tunlai hi zawhna i ngah em em? In zirlaiah te hian zawhna te hi a maka maka tam te hi nei ziah la ṭha tur", hahthlak tih hmel deuh hian a thaw hrawk a.

" Sawi ve mai la", ka lo ti sam et.

" Uhruaia te chu, ka duh sa hrim hrim alawm, a hmelṭha a, bakah, ka pasal a la ni dawn tho a, tunah lo lerh deuhin sual deuh pawh ni se, kan inneih hnu chuan a pangngai ve tawh mai ang" ,

" I mawl em ni? ", fork nghat chawrh pah hian ring takin ka vin nghek a, restaurant chhunga awmten min melh hrek hrek nghal tih pawh ka hria, ahma khan he restaurant chhungah hian miss Kimi'n min vin ve nghek nghek tawh kha, tunah keiin ka vin let hun a thleng veleh.

" Khatia, au vak kher kha a ngai em ni? Ṭha deuhin sawi ve mai ta che", zawi sep hian a Ti a, " A teuh lo, tunah pawh hetia a awm a nih chuan in inneih hunah chuan a nasa ngawt ang", ka ti leh vak a, 'ka beng chak lutuk che' tih melhin min melh, Ka sawi dik reng alawm mawle aw.

A hahthlak em mai, hrilhfin theih a ni dawn lo. 

Buai lohna turah min hnuklut reng mai. 

School kan kal chho leh bek bek a, kan ṭhian hoin zana chhuah kan ching tawh lo a, inhmuh erawh a khât duh khawp.

Mahse, Sunday hi chuan atu emaw ber inah hian kan lengkhawm ziah thung, kan rui ngai tawh lo bawk.

Miss Kimi chu ka la ngaihtuah em em tho, engzah chiah nge an bat ang aw?

A nih loh pawhin bike racing naa ka hlawhte kha Hmelṭhanui ka kawltir vek a, a duh chuan a hman theih tur thu ka hrilh kha ni a, khami hmang pawh khan a rul zo thei ngei ngei ang.

Hmelṭhanui'n a lo la hmanglo te nih chuan, a lo hmang tawh a nih pawhin ka tlan chhuak leh mai ang, mahse, Hmelṭhanui hmu turin bike racing na hmuna ka kal a ngai!

Inneihna hmanga ba rul kher a ngai lo tihna, miss Kimi khan Hruaia a duhsa hrim hrim thu a sawi a, mahse, duhsa hrim hrim tho si khan khawih a tumin a duh ngai lo a nih kha, chubakah a fawh hmasak ber ka ni bawk.

A nih chuan, miss Kimi khan dawt a sawi, he inremsiamna hi a duh miah lo, an tilui a ni ngei ang, chumi awmzia chuuuu, ahhhh ka hre tawh bik lo, ngati nge mawni ka lo hlim ve em em ringawt ni?

" Khawi atangin nge hetiang zozai hi i neih a? I ru lo tiraw? Engthil nge i hralh? ", min puh chhe thei bawk sia aw, " Zu rimte i nam leh ṭan tawh a nia".

Hmelṭhanui vang vek, min tihbuak a, mahse, ka in miah lo, ka in loh thuin ka chhang vat a, min awih chuanglo reng reng.

" Hawn let vek ang che, ka la dawn miah lo a nia, rul leh vek pawh ni ila tunah chuan awmzia a awm tawh chuang lo", beidawn hmel tak hian a thaw sat sat a, ka thin a thawk leh thut.

" Awmzia awm e, heng hian a rul zo lo a nih chuan ka tlanchhuak leh mai ang, chubakah, nangpawhin an remruatna i duh chuang lo a, i tilui a nih chuan i chhe vek zawk ang", sehchilh tak hian ka ti nak nak a.

" Eng, eng maw tlanchhuak a?"

" Aw, ka tlanchhuak leh mai ang, inchawina hmangin bike racing a awm ṭhin alawm, chuan maw, ka tel chhunah chuan ka chak zia bawk a nia aw, a aia tam ba rul tur in nei a nih pawhin ka tlanchhuak leh zel mai ang"

" I, i, i â ta em ni? I ngaihtuahna fîm hmang rawh, engvangin nge chutiang hmunah te i tel reng reng, min ngaihtuah ka ngai lo, lehkha ṭha takin zir la, hlawhtlin tum zawk ta che", min lo pan hnaiin ka kut a rawn vuan a, ka thinrim sosang a dai vek nghalin ka hria.

" Aww Eddie, lehkha ṭha takin zir la, thil ṭul loah inhnamhnawih tawh lo bawk la, school-ah fel deuha awm tum tawh rawh aw, aww Eddie", a mittui a parawl kuang a, sawi tur pawh ka hrelo, engvangin nge maw lehkha ṭha taka zir tura min tih ziah le?

Lehkha chu ka zir ve tlauh tlauh ṭan a, ka bo nghal map mai bawk!

A va beidawnthlak tak, ṭul lo deuhin Rinawma bulah tuition ka kal hi ni ringawt.

Rinawma hian min hnek lo chauh ṭhin mawle, keia pawh hian engvangin nge maw science hi ka lo zir ve reng reng ni!

Ka sawi leh duh bawk chu, Rinawma nen hian ahma aiin kan inpawhin kan innel sawt, kan rilrua awmte kan inhrilhhriat tawh vangte pawh a ni ang, min elna kha a nei tawh bik lo, thlamuang tak hian kan inkawm ve tawh ni ber.

" I ruih peih lutuk avangin i thluak a chawmawlh tawh a nih kha", min tithla leh rawk ṭhin.

Ka nu hi achang chuan khawhar takin a awmte hian ka hre bawk, ka pa kha a hmangaih ngei a, mahse, engtin nge midang a hmangaih theih?

" Exam hmaa i status-a *** pass ngei ang che*** i tih kha keimah ka ni tiraw, miss Kim? ", nui deuh sawng chung hian ka ti a, min en ṭha duh lo ngei.

" Teuhlo em mai a", a ti bung hmuk a, keimah ka ni chiang lutuk.

A hnungah ka zui dat dat a, au mami ka ngai rum rum, bazar chhûng pawh hi a reh ruih theiin ka hria, khawiah chuan nge hna chu a thawh le?

Hmeichhe pakhat hian miss Kimi chu a lo nêk sawk a, kan bul lawka chawhmeh lo inhung thli thluah chu a bawh rawk a, " Hey, nang kha", tiin ka au vak a, miss Kimi chu kaihthawh ka tum mek bawk, a lo hawi chu Hruaia hmeichhia kha a ni, hrep tak chuan!

Miss Kimi chu a inbengfai mawlh mawlh a, chawhmeh ho chu a remfel mawlh mawlh mai bawk.

" Ka tihpalh lutuk, ka tihpalh lutuk", a khât tawkin a ti reng a, chawhmeh pawh a chhe nasa lo hlauh, " A pawi lo, a pawi lo, kha nu kha eng a hria ni maw, khatia a lo nêk vak kher che", ka pi chuan a lo ti ve nghal a, dik chiah, khanu thiam loh vek kha.

Ka tihfelpui ve mial mial a, ka rilru erawh chuan a rel char char thung, zam lo reuh lutuk mai.

Tui a in khawlh khawlh a, a khur dar dar mai bawk, a mittui chuan a biang a tival kulh a, a hnung lam aṭang chuan ka va kuah a.

" Engah mah ngai duh suh", ti pah chuan a no ken chu ka dahthlaktir a, a kut chu ka vawnsak bawk.

A taksa si ka ni bawk a, a khur dar dar danah a ṭap a ni tih ka hre thei, " Helai hmunah hian lo kal lo tawp ila ṭha tur", a ṭap chhuak hawm hawm nghal a, kuai herin nghet takin ka kuah nghal a, ka âwmah a hmai phumin a ṭap khur dar dar bawk.

" I luhlul lutuk, pawisa kha pawm hle hle rawh, ka tlanchhuak thei bawk ka tih kha, hetia hrehawm taka i tawrh tlawk tlawk hi ka duh lo"

" Awmzia awm tawh lo ka tih kha, nasa taka hnathawka, tlem tlema rulh ka tum pawhin an duh tawh lo alawm, ka u hian uhruaia hi a dum em em a, mahse, an chhungte lamin kei hi min thlang tlat a, chuvang chuan min tihrehawm thei lutuk. Ka unaupa te pahnih lah jail aṭanga bail chhuah ngai rengin an awm a, helamah lah kut ka tuar ve sek a, Eddie, ka tawrhchhuah theih ka ringlo, ka nunna hi chhah mai ka duh", a tawp lam phei chu a zawi lutuk, mahse, ka hrechiang hle thung.

Kuah nghet sauh sauh Chung hian, " Chutiang chuan ti miah suh ang che, ka awm hi min ring rawh, ti miah suh ang che", nunna chhah maw, ka phal teuh lo mai, engtikah mah a nunna a chhat ngai lo ang.

Tunah chuan ka tih tur ka hre ta, nasa taka lehkha zir, a peihawmlo e, mahse, ka hmangaih chhanchhuah nan chuan ka tih a ngai bawk si. Lawkin, hmangaih maw! Hmangaih ka ti chiang alawm, ka hmangaih maw?

" Bawiha, hei aw coffee, biscuit ka lo lak dawn che em ni ang? Good day vawiin khan ka lei teuh a, i duh ang em? ", ka nu chuan coffee no ka bula lo dah pah chuan a ti a.

" Ngailo mai, coffee chauh hi ni rawh se", ka lo ti a, ka nu hi a lawm thei a nia aw, zan dar sawmpakhat thleng thlenga lehkha zira coffee te min lo pek hi a nei ngai lo a, kei hian ka zir ngai tlat hek lo.

Tunah chuan, " A tlai tawh em mai, mu tawh rawh", min tisek tawh zawk, ahma kha chuan, " Lehkha te hi zir ve ṭhin rawh", tiin min hau sek kha a ni a, tunah chuannn.

Ka thiam loh lai min hrilh turin Rinawma ka call sek mai bawk a, achang chuan a lo pawr thei lutuk, mahse, ka inthlahrung duh chuang lo, ka tibuai zel tho.

Sir David-a chuan min en kar a, rinhlelhna mit ngatin mawle, " Eddie, nangpui roh chule", a thlûk kual duah a, a mak ve ngawt tak alawm, white board-a problem min chawhtir hi a ching tlat a, ka thiam ngai si lo, tunah erawh, ka chawk chhuak vek a, a dik vek bawk.

Intithei fahran hian ka ding khawng ve ngat, Rinawma lam ka va hawi chuan a lo khi suk a, 'keimah vang' tih nuih hian ni berin ka hria, a hahthlak teh e.

" Eddie leee, a ropui lutuk, kut i ben sak ang u", classroom chu kut beng thawmin a zui nghal a, a zahthlak ve det.

" A ṭha lutuk, heti tur hi alawm, hmâ sawn zel ang che", ka darah a lo beng thak thak a.

Sir David-a'n min fak vena ṭawngkam ka hriat hmasak ber, ka muah hlup ṭep a ni, heheee.

Ka ṭhutnaa ka ṭhu chiah tihah Rinawma chuan, " Luck leh sawt dawn e", a lo ti, ka va ngei tak, " I chhe mai e a", nam awr chung hian ka ti a, a nuam lutuk hi hrehawm zawk.

Class pawh ka bunk ngai mang tawh lo, Goody Eddie Boy-a ka ni ṭan ve tlat tawh.

Mahse, sir David-a hi alawm, line-up naah hian min kochhuak ziah a, a la sim theilo.

" Khawiah nge i kal dawn? ", Rinawma ding uai chu ka pawt ṭhu a, " Miss Kimi class a ni dawn tho a, ka bunk teh ang ka ti deuh, vawiin chu eng class pawh hi boring ka ti tlat", a ti a, boring a ti ve teh khiah chu mak ka ti deuh hlek.

A sawi zawh rualin a kal nghal nal nal a, ka umzui ve vat, miss Kimi'n kan awm lo tih a hre dawn ropui mai sia e, min hau leh nghek dawn nih hi.

" Bunk-na hmun tur pawh i hriat loh kha, an man nghal che ni mai, min rawn zui rawh", ti pah chuan ka kuah a, kan bunk-na hmunah ka hruai a, Johny-a lo inpak khu hluah hluah chu kâ hoin kan en.

" E khai! Nangni chu, Rinawma chu", a phu nasa lutuk, mak tih hmel deuhin min en tawn sek a, " Nang pawh chu", ti pah chuan kan ṭhu a, kan pak khu hluah hluah ve nghal.

Eng eng emawni kan sawi a, a hnu deuhah Johny-a chuan, " Rinhlua a awm tawh si lo a, class-ah ka awm vak ngailo, zirlai pawimawh deuh chu Siamthari'n min hrilh ve zel tho a, school pawh hi nuam ka ti vak tawh lo ", a tih chuan ngaihtuah zui vawng vawng ni awm tak hian kan ngawi reng hlawm a, kei chu Rinawma nen class khatah kan la awm a, Rinhlua a awm tawh si lo, a khua chu har ngawt ang.

Ka ṭhianpa lo khawhar dan tur chu, ka lo ngaihtuah lo reng reng, bunk ve zauh zauh ila ni mai, amah chauh chuan a khawharna a zual ang, Rinhlua te nen bunk ṭhin kan ni si a.

" Siamthari leh a ṭhianten min ngaihtuah ṭhin em a, classroom pawh nuam ka ti mai mai", thaw kâwk kâwk chung hian a lo ti leh a, ni tak e, Siamthari reuh kha!

" Johny-a in lo ngaihtuah ṭhin avangin ka lawm lutuk a nia"

" A ho lutuk, kan ṭhian ve tho a nia, Rinhlua pawh, nangmah zawk kha i ṭha tawh em? I â hman dawn emawni ka lo ti hman a", Siamthari chuan nui seih chung hian a ti a, ka lo nuihlet ve nghal a, " Â hman lo e a, Siami, pawi ka ti lutuk, hrehawm i ti ngawtin ka ring"

" Keimah zawk alawm pawi ti tur chu, harsatna i tawh laiin ka kalsan si che a, mahse, i ṭha zel a, ka lawm lutuk ringawt, tlemin ka inthiamlohna a nep deuh sawt", a kut tuai nuah nuah chung hian a ti a.

" Inthiamlohna tur a awm lo, keima dik loh vang vek zawk alawm, thlamuang deuhin i awm tawh dawn nia" .

Nia, keima dik loh vang zawk kha alawm, Siamthari pawhin midang mi ṭha tak a hmuhna Tur lo ni mawlh rawh se.

*** THIAN CHUAN ENG LAI PAWHIN A HMANGAIH RENG A, MANGAN NÎ ATÂN UNAUVA PIANG A NI — THUFINGTE 17: 17 ***