age is just a number-12

Age is Just a Number...

Chapter-12

Ziaktu: Cck Lalchhuanawmi

Teacher's Day lo thleng tur atan nasa takin kan inpuahchah ṭan a, a nuam leh dawn e, kan lam leh mup mup dawn a nih hi.

Abik takin Rose sen, sen nalh leh rimtui em em ka siamtir a, miss Kimi tan bik liau liau.

Zirtirtu chhelo deuhte chuan an dawng hnem leh ngawt ang chu, miss Kimi hian a dawng hnem ve ang em aw?

Office-ah chuan lutin miss Kimi dawhkanah Rose sen chu ka dah a, tuman min hmu lo bawk a, a hawihai ve ngawt ang.

Zirtirtute pawh an lo thleng ve pheuh pheuh a, miss Kimi ber a lo la theng lo.

Kan zirtirtute pawh hmuh an nuam e, vawiin chu an nî a ni bawk a, kan duh dan danin kan ti thei, kan zai tir a, kan lam tir a, châng(recitation) te kan sawi tir bawk.

Mahse, Children's Day-ah hian kan tuar let nâ thin khawp mai. 

Nui lui tih hriat taka miss Kimi khi ve sak sak chu ka en leh zeuh a, tumahin khawlum laia scarf a awrh chhan saw an hre miah lo ang, kei tih loh chuan.

Chuvang chuan a ṭhing leh over thei ang ber chuan programme ka kalpui a, kei ngei pawh hian kum dang zawng aiin nuam ka ti berin ka hria.

" Vawiin kha chu mittui tla phunga ka nuih chule, ka nuihna lamah ka pum a nâ vek thei, ka biangte hi a kham vek", nui hawk hawk chung hian a lo ti a.

" Kha kha alawm kan tum, in zirlaite kan fel zia hi chu aw, min hremin min hau peih viau ṭhin mah ula, in hlimna hi kan duh ber a ni ve fo a nia", ka ti a, " Keini pawhin kan hrema kan zilh ṭhinna chhan che u chu, in ṭhatna kan duh vang a ni ve tho alawm", ka lo nuih hak ringawt a, a sawi dik ve tho.

" Kha in inremsiamna kha phelhtir tumin hma i la ve tawh reng reng em? ", a ngawi vang vang a.

Ka zawt lo thei lo, ka hrechiang tawlh tawlh a, ka rilru a hneh tawlh tawlh tlat si a, keipawh chu ka ngawi reng a, a thaw sât sât ri pawh ka hre thei.

A ṭawng tawh dawn lo emaw ka tih hnuah, " Kummm, hmalam tawhah khan", ka thaw huai thei, " Ka ṭhianpa nen tlanbo kan tum a, ṭum khat chu", a tih chuan, " I bialpa maw? ", ka lo ti vat.

" Ummm, mahse, uhruaia ten an pawisa ru angah sawiin police an man tir a, tunah chuan an chanchin engmah ka hre tawh lo, an chhungkua pawh khaw dangah an insawn daih a, jail aṭang pawhin a chhuah tawh ka ring", a ngawi leh vang vang a, a ngaihtuah zui a ni ngei ang.

Keipawh chu ka ngawi leh vang vang a, lo tlanbo ta se, tunah hian engtin nge an awm zel ang le?

Tunah ai hian a nuamsa zawk maithei a ni, duat leh hmangaih kha a hlawh dawn tlat a, mahse, tunah chuan heti hi a ni rih tlat.

" A nih, kei hi min ring turin ti ta che ila, min ring thei ang em? Min lo nghak rawh ti ta che ila, min nghak duh ang em? ", muang cher chawrh hian ka ti a.

Kum sawmpasarih chhung leh kumin belhkhawma ka thutak ber ṭum niin ka hria, " Call hi titawp tawh ang, lehkha zir ṭan tawh rawh, vawiin i che bawn si, naktuk aṭang chuan lehkha zir hlir a ni leh tawh dawn a nia, a nih aw", tih leh call cut a rual nghal a, ka mangṭha hman hleinem mawle. 

Ka hmaa zirlaibu chhah em em ho intiang urh chu ka melh rawm rawm a, 'lehkha zir hmuchhuaktu hi chu ka hnek thlu chawrh châk mang e' ti nuah nuah chungin zirlaibu chu ka ban a.

Rinhlua thlanah kan ṭhian hoin kan ṭhu bial laih a, a ngaihawm thu bak sawi tur kan hrelo reng reng, a ngaihawm ve em lah tak a.

" Rinhlua hi mahni intihlum anih ka ring theilo, engtiang pawhin a rilru chu lo nâ pawh nise hetiang kawng hi a thlanglo tawp ang, a thihnaah hian eng emaw tak inthup a awm tlatin ka hria", Rinawma chuan a lo tichhuak hlawl a, mak ti takin kan en ṭhap ringawt.

" Inthup awm maw? Eng chiah nge sawi i tum? ", tiin ka zawt a, ṭhiante pawhin nia an lo ti ve sup sup nghal.

" Rinhlua khan Lawmsiami a duh zia chu ka hre tho a, zanah in inzuichhuak ṭhin tih ka hriat ve chhan pawh Lawmsiami nen an inhauh lai ka hriat ruk aṭangin a nia", min lo en zeuh a, ka lo bu zeuh ringawt.

" Zui ruk che ka tum ṭhin, in inkawtah ka ding reng zel, mahse, i chhuak lai hi ka nang fuh ngai lo, chuvang chuan ka zui ru theilo ṭhin che a, mahse, zankhat kha chu Lawmsiami i phur lai Kikawn phei velah kha chuan ka hmu che. Rinhlua ka hrilh miah lo. Chu zawng ai chuan a chhungte awmdan khan ka ngaih a tiṭha theilo, tun thleng hian", a ti charh charh a, ka harh ve deuh ruai ruaiin ka hria.

Sawma'n a lo tuihnih ve nghal a, " Ni tak e, an inah Rinhlua awm leh awm loh zawt tura ka kal ve chang pawh khan a awm loh thu bakin min lo chhang ngai lo, inchhungah pawh khan min luh tir ngailo reng reng, Rinawm, nang khan a thih thu min lo hrilh a, engtin nge i hriat theih? ", tiin a zawt let nghal a, " An ina ka kal khan ka number ka pe a, Rinhlua inah a awm ve leh min lo hrilh nghal turin",

" A nih, tuin nge lo hrilh che? ", Rintlaka chuan a lo zawt nghal a, " A pain min lo hrilh", Rinawma chuan a ti nghal a.

Sawma lo inrawlh leh nghal vatin, " Lawkin, Rinhlua pa hi SP tiraw kha? Lawngtlaiah a awm khan ka hre si a, engvangin nge khami zan khan a lo biak theih che, a lo haw tihna em ni? A fapa thih thu a hria a nih chuan zing lam emaw, chhun lamah emaw a lo haw tihna a ni ang a. A thih zan la lain a lo hrilh che tihna a ni a, a thih zanah inah a awm reng tihna. Engvangin nge inah a awm? Postmortem a ni lo bawk khan ka hria, a dik, Rinhlua room-ah khan fan a awm lo, ceiling fan-a inkhai turin engvangin nge a nu leh pa room emaw siiting room a hman ang. An ina ka kal khan a nu pawh ka hmu ngai lo, min lo chhawn thintu kha nu valai, upa lutuk chu a ni chiah lo a, mahse, a biang dinglamah ser a awm",

" A ni ve tho maw? Sam kir chhep chhawp a ni ve em? ", tiin Johny-a leh Ropuia Chuan an lo zawt nghal a, a lo bu nghauh nghauh, " Chuan in inzui tih a hriat ringawt avang khan mahni a intihlum miah lo ang, Rinhlua chu kan hriat kha, sawi fel kha a thupui a ni leh ngei ang", ka rilru chuan Rinhlua a au vawng vawng nghal.

Sawma zeldin thu hi thudik han ni hlauh sela, mahni nunna han chhat tur em chuan ka phal theilo, a nih chuan, a pa hian inrawlhna a nei ve em ni le? Tu chu nge ni ang kan ṭhianpa tiboraltu hi, ka buai ta map mai le.

Miss Kimi class a ni dawn bawk a, Rinawma nen kan bunk leh mai, min hau leh mai rawh se.

Johny-a chuan Rinhlua chungchang a thlân kan tlawh hnu khan a lo ngaihtuah zui thu a sawi roh a, " Khami nî, Rinhlua'n min manchhuah nî, kan biak pawh theih loh hnu aṭang khan Lawmsiami pawh kha ka hmu ngai tawh lo reng reng, a chanchin pawh ka hre zui tawh lo",

" Engvangin nge aruk chuan inlo inzui reng reng a? ",

" Rinhlua leh hmeichhe pakhat saruak thlalak tih leak-out a tum a, chhuhsak pawh ka tum nasa, a ngen pawh ka ngen nasa lutuk. Chuan inngaizawng pawh kan ni lo, inremsiamna ang hi ni mai, Rinhluate thlalak a ti leak-out lo ang a, kei bike racing naah ka tel thung ang, pawisa ho pawh kha aman a nei vek zel, pakhatmah ka chang ngai lo", chhuikir rauh rauh pah hian ka ti a.

" A va mak ve, Rinhlua leh hmeichhe saruak thlalak maw? Chutiangin kan ṭhianpa hi a awmlo tawp ang, engvangin nge bike racing naah chuan a tel tir che a? Pawisa pawh chu engvangin nge amahin a neih vek a? ", Rinawma chuan min lo zawt var a, rin ngaihna ka hriat loh thuin ka chhang ringawt.

Johny-a chuan, " Bike racing naah chuan i ṭha tih a hre ngei ang a, i chak ziah dawn tih pawh a hre ngei ang, Rinhlua tawktarhah a hmang a, a fing khawp mai a", a ti a, a kut a hum ruh nasa.

Rinawma pawh chuan, " Pawi ka ti ngawt mai, kan ṭhianpa thihna khan min tihamhaihin ka rilru a nâ em a, engmah lo chîk nachang ka hre lo a ni", muang fan raih hian a ti a, kei tak kha alawm, hetia an sawi azarah ka ngaihtuah ṭha leh chauh a ni.

Kan ṭhianpa thihnaah fello a awm tih chu kan pawm ta vek a, amaherawhchu, engtianga hmâ han lak tur nge tihah chuan kan buai ta phawt.

F. I. R thehlut ngawt ila, a pa hi SP a ni a, Lawngtlaiah awm daih pawh ni se, Lunglei lam a lo control thei tho ang, a awmzia chu a pa hi kan ringlo bur, kan rinhlelh ber pakhatna tihna a nih chu.

" Building kawtah ka awm tawh a nia, lo chhuk vat la a ni mai, bazar turin kan kal rual dawn nia, ka lo nghak che, rei lo la", phone ka dah nghal a, a reilo turah ngai ang, T-shirt a ha anga, puan a bih anga, crocs a bun leh ang a, a lo chhuk har lo tawp ang.

Bang chu nghêngin sana ka en sek a, a rei reuh phian, nghaktu zawk ka nih vangte pawh a ni ang, " Awi, hmelṭhapa chu", ka phu zawk, ka en chu hmelṭhanui lo niin, " Awi, hmelṭhapa", a nui sen sen a, a hming pawh a pu zo, a hmelṭha ve chiang alawm, " Round dang ti leh turin lo kal leh tawh la", ti pah chuan ka nautetea a ṭham leh salh, ka va ngei tak, a kut ka la sawn a, ka nuih ringawt, ka kal dawn tawh si lo a.

Ka veilam ka hawi chu miss Kimi'n mittui parawl kuang chung hian min lo en reng chu niin, puan a bih miah lo kekawr a ha, jeans dum hi a ni a, a T-shirt hak ber kher vang chuan a kâwng a fek a ni tih ka hre chiah bawk!

" Ka thusawi hi ngaithla ve phawt rawh", a kut phar buai lutuk chu man beh(bet) ka tum ve mek bawk a.

" Lo ringlo tawp che ila tha tur a nia, eng nge maw ka hriat ni, a thusawi kha ka hriatthiam loh i ring em ni? Round dang ti leh tur chuan va kal leh la, mawh, va kal mawlh rawh", a ti ta phiar phiar mai a, inbengdai phawta ka thusawi ngaithla tur chuan ka hrilh ve nasa, awmzia a awm chuang lo.

Ka tihngaihna hrelo lutuk tawh chuan ka kuah ringawt a, " Min thlah rawh", a tal fat fat, " Min ngaihthlak dawn chauhin ka thlah ang che".

" Min ring rawh, engtikah mah min rinna ka tichhe ngailo ang, tihchhiat pawh ka duh hek lo. Ka pawm e, khanu nen khan kan mu dun tih chu, kha zan khan ka rilru nâ lutuk leh thinrim bawk si khan ami sawmna kha ka hnar zo ngang lo a ni. Mahse, khami hnu aṭang khan a thleng nawn tawh miah lo, chu chu ring rawh, thleng nawn leh tur pawhin ka duh lo, min ring hram rawh aw", a kut pahnih chu nghet deuh hian ka vuan a, min ring tura ka duhzia ka mitmengah pawh a hriat theih hial ang, min ring rawh se, min rinna ka tichhe ngai bawk lo ang.

A mittui a luang ngiai ngiai a, ka bulah hian a ṭap reng bik zel a, mahse, pawi miah lo hnêmtu ka ni tal a.

A mittui hruksak pah chuan, " Ki, Kim", zawi sup hian ka ti a, chutah min lo kuah thut a, min ṭahkhum leh bawrh bawrh, " Um, ka ring ang che, chuvang chuan rintlak turin awm ngei bawk ang che, a nih loh chuan a nghawng a nâ ngawt ang", ka nui hak a, " Nuihzatthlak awm lo", a lo ti bak hlarh a, ka kuah nghet sauh.

Lehkha zir tlauh tlauh, achang chuan ka ning thei lutuk, zirlaibute hi hal vek a nia ka duh chu.

Class-ah hian Rinawma chu tluk miah lo mah ila, zawhna min zawh ho hi ka chhâng thei zel a, chhân theih loh te pawh ka nei tho.

Ka zir peih chuan ka lo thiam thei a nih dawn hi a!

Miss Kimi chu ka en kar a, ka lo nui leh vur vur a ni ang, ka bula ṭhute hian min lo nghâwk zauh zauh a, ka ât hmel ngawt ang, lawm loha nuih chu mi â nihna an ti si a.

Pawl sawmpakhat ho routine ka chhinchhiah a, miss Kimi'n class a neih dawn chuan pawl sawmpakhatah ka va ṭhu thin, a hnung kil berah ka ṭhu ṭhin bawk a, min hrechhuak ngai lo, chuta ṭang chuan ka thlir doh doh a, amah ringawt pawh hi hmuhnawm a tling, a va han duhawm tak!

" Duata, khati khan i nau ti ziah suh", ka hnung lam ka hawi vat a, Rinawma lo ni rengin, chu zawng ai chuan a nau hruaite chu an ni, Duata leh Nautei te kha an ni.

Dawrah an duhzawng an kâwk kual a, " Kei chu good day khi ka duh", Nautei chuan a ti lang lang a, Duata chuan a lo hnial ve zel a, an inngeih loh hmel reuh lutuk, Rinawma chuan, " Keimah zawk hian ka duh duh ka lei ang e", a ti a, a duhzawng ho chu a la mial mial a, ka en reng a, dawr chhungah chuan ka awm ve a ni tih inhhriattir ka duh miah lo.

Dawr aṭang chuan chhuakin car pakhatah an lut hlawm a, Serkawn lam pan chuan an tlan chho ta a, mak ti tak hian ka en reng ringawt, keipawh chu mahni in lam panin ka tlan haw ve ta nge nge a.

Zanah Rinawma ka va text a, dawra a thil lei lai ka hmuh thu leh a nau hruaite chu tu te nge an nih tih ka zawh chuan, " Ka patea fate, Duata leh Nautei an nih kha, an nu ber hian a tlansan daih a, kan duat hlawm teh a nia aw, kan chhungkuain kan duat rawn a, Nautei phei kha chu keh thei dawm tak meuhin kan dawm", a rawn ti ta mai!

A nih chuan ka nu leh a patea chu lo innei ta se, ka unaupa a ni dawn tihna ni maw? Hriatthiam a va har ta ve!

" Phek 220-na aṭang khan ti r'u kan zir ṭanna tur kha, Adolescence And Drug/Alcohol Abuse tih kha, kan hrethiam nghal mai em", ka hriatthiam loh thu sawi ka châk, ka hrethiam nasa mai sia. Min kâp leh ngei ang. 

"Biology-ah chuan nangmahni, keimahni kan inzirchianna a ni deuh ber a, Adolescence tih pawh tleirawl emaw rawlthar emaw hun chhung, tunah hian, Adolescence stage-ah in awm mek", min kâwk kual a. 

" Hmeichhia, an Adolescence stage hun chhung chu kum 10 atanga kum 18 inkar kha a ni a, mipa erawh chu kum 12 aṭanga kum 19 inkar a ni thung. Heng hunlai hian taksaah danglam te a lo awm ṭan a, ṭhan thi period kan tih te, mipa pawh tilpawr âw tihte in nei ṭan a, chubakah, ṭhan duh hun lai a ni a, in thang vak vak a", kan nui hlawm a. 

"Rilru thianghlim lai, tha zat lai, thil chik hun lai a nih angin engkim tih chhin châkna in nei a, chutah tak chuan zial emaw zu te kha tih chhin châkna in nei ta a, khata tihchhin aṭang khan a nia zu ngawlte an lo vei tak ni, damdawite pawh. 

Society, chhungkuaa in rilru sûkthlekte a lo danglam ṭan a, mahni dik nia inhriatna te a lo awm ta a. Adolescence stage-a awm mek in ni bawk a, in inhriatchian chu ka ring, a ni em Eddie? ", miss Mâ-i chuan min lo zawt nghal vat a, ka sawi kha, a ṭul lem lo e, " Aw, miss ni e", tiin ka lo chhâng ve mai a.

" Drugs Abuse, damdawi hmansual, Van lam chanchin zirte hi kan lo awm ve tawh em? ", kan ngawi ṭhap a, tumahin kan la zir lo a ni ang, keipawhin ka la zir lo e a, ka nui deuh sak a, " Eddie, damdawite hi damna tura an siam a nih laiin ruih nan kan lo hmang a tiraw? ", nui deuh ver ver chung hian a lo ti leh a, " Miss, a dik chiah, ruih nan niloin damna atante hian hman zawk tur a nia", ka lo ti ve a, an nui dar dar.

A sawi leh zel a, " Damdawi chuan Hallucinations, mit vaihna, hmuh sualna, thil nilo pui pui hmu anga inngaih tlatna te a thlen ṭhin a, tin; mi a tiphurin hriatna a ti chawmawlh tlat avang khan mahni emaw intihna a neih tir ta ṭhin a ni.

Alcohol Abuse, Zû hi depressant a ni, depression a ni lo. Mi a titha tho loa, thinchhiatna zawk a ni. Zu in mi te hi belchiang mah rawh u, an thinchhe tlangpui, kâl(kidney) te, thin(liver) leh pumpui te a khawih chhe hneh bawk a, hei chu kan hriat hnu vek a nih ka ring. Eddie, hetiang lam hi chu zir vak pawh a ngai lo i ti ve tho em? ", miss Mâ-i chu a nui deuh sen sen a, ka nui ringawt, a awm ang lo ṭhin em mai.

Miss Kimi bulah chuan zawi sup hian, " Min ngaina ve tho tiraw? Zirlai ka nihna ang loin", ka ti a, ami chhân dan tur chu ka hriatsa ni tho mah se, chhânna danga min chhân hun a awm mahna tiin ka zawt fo. 

" Ka zirlai i nihna bakin ka ngaina lo che", a ti hmuk a, mahse, a zirlai ka nihna ang lo hian min ngaina tih ka hre tho, chuti ni lo se min rin tur thu kha a sawi miah lo ang.

" Hriatthiam alawi pawh hi i neilo ni berin ka hria, haw tawh mai rawh, zan a rei hma hian, naktuk lamah kan inhrilh leh dawn nia", zirlaibu khup pah chuan a ti a, ka lo bu ve mai.

Helmet ka khum tur chu thil ka hrechhuak zawk a, ka tlan let leh a, thaw hlawp hlawp chung hian kawngka ka kîk dat dat a, mak tih hmel deuh hian kawng a lo hawng, " Ehe, ngati nge a? Theihnghilh i nei em ni", ham bai bai chung hian a ti a.

Kun hniam deuhin a chalah chuan ka fawp vang vang a, " Kha kha ka theihnghilh a, muttui aw", ka kut pahnihin a biang chu ka dawm a, a mitah tak chuan ka en bawk, a mit khap miah lo hian min en ve bawk a, ngati nge mawni a mitmengah chuan lungchhiatna ka hmu tlat!

A hmui chu ka en leh daih a, a hrethiam ve nge mawni a biang ka dawmna kut chu a lo vuan a, kun hniam leha fawh ka tum chu min nam awrh a, pawnah chuan min namchhuak ta mai, " I la puitling tawk lo aw", nui saih chung hian a ti a, ka lo nuih hak ringawt, " Muttui aw", dam zet hian a ti leh a, a ṭum hnihna atan mangṭha lehin kan in lam ka pan ve leh ta a ni.

Ka peih loh ber kar(week) kan thleng leh dawn ta, chu chu Crusades kar(week) hi a ni, Eden huan aṭangin bul min ṭanpui ziah a, a tawpah sawmna an siam leh a. Sawmna hi ngati nge mawni an siam ziah thin ni? 

Kan school tihdan kha a ni tlat a, a ṭhatna mual mual chu a awm ve tho mai.

Kei erawh chuan ka peih lo ṭhin a ni.

Tu te Team tak sawm leh ang maw, Team te chuan inhlan turin min sawm bawk a, kan insawm tawn hi a ni ber.

Mahse, tun hnai chho hi a ruk hian ka khuasik er er a, chaw châkna te hi ka nei mang ṭhin lo, ka chauin ka zawi ngawih ngawih a ni ber, ka thlante hi a chhuak leh bawrh bawrh a, ka hrethiam tawh bik lo, ka zu in nasa lutuk effect te hi a la nih ka ring.

Phone leh TV te hi han en ila HIV fakna hi a tam thei em em mai lehnghal!

" Bawiha, inentir mai ta che", ka nu chuan a ti a, ka ṭhat leh vat ka rin thu leh ka thiltih nghâwng zel ni tura ka rin thuin ka lo chhang ve mai. A ni ngei bawk ang, zu kha ka in ve nasa em bawk a ni.

Hruaia chu a hmeichhe khawi nen khan min tawk zawng hian an lo kal a, ka bulah miss Kimi pawh a ding khawng luah, bazarna hmun chu nilo se, saw hmeichhia saw engtin emaw tak ka ti ang mawle, miss Kimi bulah Hruaia kalsan turin a ti ve chhen a, ka nuih lam lam a za.

" Nuam inti awm hle mai a", meng rum ralh hian Hruaia chuan a ti a, ka va sawisa leh châk tak.

" Mahni nau rual ngaihzawn pawh pawi sa lo mihring", a ti thla rawk a, miss Kimi chuan ka kut a rawn vuan vat, za em em hian a nui uar uar a, miss Kimi'n min vuan tlat lo sela chu a hmai saw a khem nasa tawh ngawt ang, a ha pakhat tal a bal tawh ngei bawk ang mawle.

" Tirawh Bawiha, kalsan mai ang", tiin Hruaia kut chu a vuan a, rum tawka min la melh ṭawk ṭawk chung hian an liam ta a, " Helaiah hian tumah mahni nau rual ngaizawng an awm lo", ka âw chu a chang mah mah, mipui ho pawh chu an phu leh sup sup nghal a, khami te pahnih chu aw, boruak an tichhe vek alawm!

Crusade nî khatna, Thawhṭanni:

" Chairman khan introduction a nei tawh tho a, chuvang chuan a hranpain introduction ka nei tawh lo mai ang e. Pulpit aṭang hian ka lo chhuk ang e", Pulpit aṭang chuan a lo chhuk a, mak tiru tak chung hian ka lo en tlawk tlawk ringawt, Pulpit hmaah chuan a ding ta a, Eden huan aṭangin bul min ṭan pui miah lo!

Pulpit hma zawna ṭhu ka ni bawk a, keimah hi a mimal takin min lo hrilh ni ber hian ka hria, nge ka inngaihbel pawh ka hre lo.

"Ṭhlalai leh zirlai in ni a, in nun kha han en teh u, engtiangin nge in hman. Kum sawmpathum aṭanga kum sawmpariat emaw sawmpakua emaw inkar in ni hlawm a, tunah khan he ka zawhna hi in rilru khan min lo chhang ṭheuh rawh u aw, 'Tunah khan i la Virgin em? ' ", ka meng phar kâwk!

Ka thin a phu dup dup a, a phu rang lutuk ringawt, tihsual nei ang hrimin!

Crusade nî hnihna, Thawhlehni:

" Ngaihtuah ang aw, Mizoram hi AIDS/ HIV hri vei tamna ber State, Cancer vei tamna ber State, nupa ṭang ṭhen tamna ber State, eiruk case tamna ber State. A bikin aw, HIV vei dan kan hre ṭheuh ti r'u, TV leh phone pawh han en ila advertisement a tam thei em hi, signboard hmun hrang hrangah kan tar chel chul a, MSACS hoin condom pai reng turin min chah bawk a, a nih, AIDS/HIV hri vei kan hniam pah em? Kan pung tual tual zawk a ni lawm ni.

Tirhkoh Pawla'n engthu nge min chah, Rom bung 12, châng khatna: Chutichuan, unaute u, Pathian khawngaihna avâng hian, inthâwina nung leh, thianghlim leh, Pathian lawm tlâk ni tûrin, in taksa chu inhlânah ka ngen a che u;

Thuhriltuin eng nge a sawi, kan ṭhat lai chen turin min ti, engtiangin? A nih; zu leh sa, khawvel nawmna tinreng hmangin em ni kan ṭhatlai chu kan chen ang? Kan chungah Pathianin ro a rel dawn tih hre kar turin min hrilh bawk.

Social media kan hman dante hi, tunah hian kum naupangtê  pawh hian Instagram, a ni tawp mai. Kan mualpho pui leh si a, social media hian nupate a inṭhen tir thei nia mawle! 

Kan Bible-in kan nun fimkhurpui hle turin min chah mawlh mawlh a, kan fimkhurpui tak meuh meuh em?".

Vawiin Crusades ka ngaihtuah rauh rauh a, social media a sawi khan ṭhianpa Rinhlua ka hrechhuak zawk.

Lawmsiami khan engtin nge Rinhlua leh hmeichhe thlalak kha a neih theih? Rinhlua khatianga awm tur khan ka ring phal thlawt bawk si lo.

Keipawh hi ṭhianpa, thianpa ka ri reng a, kei hi HIV te hi ka lo vei ve ta em ni ang? Ka awmdan hi hai rual lohin HIV symptoms(simtawms- tia lam tur) nen a inang lutuk.

Lo kai tak tak ta ila, ka nu hi, engtin nge a awm ang, a thinlung a kehsawm hial ka ring. Miss Kimi pawh kha!!!

Crusades nî thumna, Nilaini:

" Bawiha, vawiin chu school chawlh ka dil ang a, inentir ang hmiang? Chaw lah i ei ṭha bawk si lo", ka nu chuan a ti dap dap a, tunah chuan inentir pawh ka hlau zo vek tawh.

Ka ṭhat thuin ka lo chhâng thuai a, chaw ka bar nghêk nghêk ringawt.

Tun ṭum Speaker chu, Pulpit aṭangin a la sermon miah lo, nî khatna aṭang khan Pulpit hma aṭang char charin a la sermon.

Pulpit hma zawna ṭhu ka nih avangin ka thin hi min lo deng sawk sawk ni berin ka hria, a dikin a fiah felfai thlap mai bawk si, kan rilru mil hian a sermon ni ber.

" Hla phuahtuin, ' Kan tawrh zawh loh rilru natna kan Lalpa'n min pek ka ring lo' a ti a, tunah hian eng harsatna pawh lo tawkin, i rilru, thinlung hrehawm ngawih ngawih mah sela, ' Awi, ka rilru a nâ lutuk' ti chung zelin tun hun hi in thleng tho a, a dik em?

Chuvang chuan kan tawrh zawh loh tur rilru natna hi min lo pe ngai reng reng lo, Tirhkoh Pawla'n bâng loa Ṭawngtai tur leh lawmthu hrilh tel turin min ti a, kan duh thlen turin min hrilh bawk. Manganna, harsatna kan tawh hi chuan Ṭawngtai hi chu a har a ni ti r'u, ni e; a har lutuk ringawt. 'Aw Lalpa, harsatna namen lo paltlang tur min pek avangin ka lawm e, heng hi ka paltlang leh a nih chuan ka chakzia ka hriat leh theih phah sawt dawn a' tih hi chu har tak a ni. Mahse, Ṭawngtai fan fan kha kan tih tur a ni bawk si a, chuvang chuan i Ṭawngtai tawp ṭhin ang u".

" Aw Lalpa, ih, ih, vawiinah Speaker-in Ṭawngtai tawp ang u' a ti a, ka lo Ṭawngtai tawp. Naktukah thisen test turin ka kal dawn", ka hrawkah eng emaw hian a hnawh tlat a, ka âw a chhuak thei tawh lo, a va hrehawm tak.

Lo positive ta ang ila, engtin nge ka awm zel ang? Naktukah school ka kal tho ang a, lunch break awm ang velah Damdawi Inah ka kal ang, ka hmelhriatte hi hmulo hram ila.

Kan school leh Damdawi In hi a inhlat lutuk lo a, chutiang chiahin Serkawn Biak In pawh hi, Biak In phei hi chu kan school chhak lawk a ni mai, chuvang chuan Crusades-na atan pawh hian kan hmang ṭhin reng a ni.

Crusades nî lina, Nilaithawhtanni:

" Kan ram hi Memeland dik takah kan chhuah takngial dawn, thutak hi nunpui hram hram ang u. Ka ti leh ṭhin ang, nangni ho bak hi innghahna tur kan nei tawh lo, tuna kan awmdan anga in lo awm ve leh a nih chuan kan ram hi engtikah mah a dingchhuak tawh ngai lo ang".

Ka tiril a khur zawih zawih a, Sermon vang chuan ni lo e, ka ngaithla mumal lo a, ka rilru thil dangah ka seng nasa em a ni.

Damdawi In pan chuan zâm ru tak chung hian ka kal hna hna a, necktie leh kamis ka phelh a, a hnuaiah T-shirt ka ha tho, uniform ngiala kal chu ka zak ve deuh hlek.

" Thisen test turin ka lo kal", ṭang ṭung hian ka ti a, ka kun deuh lap nghal bawk, ka va zak tak, khu ral daih thei ila ka ti lutuk ringawt.

'Mipa alawm ka nih le, ka tuh rah tur chu engtiang pawh lo nise, ka pawm mai tur a ni' tiin mahni leh mahni infuih chung chuan ka kut veilam chu ka phar chhuak ta a.

" Pathianin sex a siam a ti r'u, hei chu kan hre vek, vawiin chawhnu chu tlang deuhin ka sawi dawn, hrethiam lo rual pawh in ni tawh lo, hrethiam rual vek in ni tawh a, chuvang chuan tlang deuhin ka han sawi ang e. A nih, nupa karah chauh sex hi a awm tur a ni kan ti fo a, Pathian pawhin nupa tan chauha a siam a ni kan ti a.

Nupa ni tur chuan inneih, Pathian leh Kohhran hmaa thutiam a ngai a ni. Inneih loh pawhin sex te chu a hman theih a, Hmangaihna lantirna a ni bawk a, 'min hmangaih tak tak a nih chuan, dei dei dei' kan ti a", an nui ru tut tur hlawm.

"Kha, Hmangaihna lantirna a ni nameuh mai. Mahse, Pathianin nupa karah chauh a phal, engvangin?

A nih, sex chu han hrilhfiah ve dawn teh u, engtin nge sex awmzia hrelo hnenah in sawi, 'Nupa nun' tiin, tumahin 'hmangaihna lantirna' tiin an sawi ngai lo, a nih leh chu nupa nun hmang tur chuan eng nge tih ngai 'inneih'. Inneihna chu Pathian hriatpuina ngei ni bawkin".

Speaker hian inneih hma chu thianghlimna vawng tlat turin min chah tluk tluk mah se, ka tan chuan a tlai tawh lutuk, thisen test zo hlim, rilru chi-ai laia infuihna thu han ngaihthlak chu, result engtiang nge a nih ang tihin ka rilru a kap reng a, chaw châkna mah neih tawh loh laiin tui takngial pawh ka in châk tawh lo. Aaa, a ni em em tawh lo.

Crusades nî ngana, Zirtawpni:

Crusades tawpna kan lo thleng ta, Speaker chuan a âw a thian kharh kharh a, " Tihian khaikhawm ang aw, in la virgin leh virgin loh ka zawh che u kha in la hre reng em? I la virgin a nih chuan ka ngaisang che a, vawng tlat ang che. I lo virgin tawh lo a nih pawhin ka ngaisang tho che, a chhan chu i virgin loh dan kha ka lo hriatpui miah lo che, mahse, virgin lo ta sa sa tiin hun hmang hlek tawh suh ang che.

Film-a kan hmuh Police rorum tak tak angah te khan lo chhuak ula, Politician dik leh rinawm, one day CM angte khan lo chhuak ula, kan ram hi kawng dikah nangni zirlaite hian lo hruai ula, Zikpuii Pa khan eng nge a zawh che u, " Mizoram chu mi huaisen ram, mi dik ram, Kristian ramah miten min ngai ṭhin a. Zoram hi eng rama siam nge in tum le, Zirlaite u? ", tiin a zawh che u kha. Tin, Thuhriltuin kan chungah Pathianin ro a rel dawn tih hre kar turin min duh bawk kha.

Kan ram titi hi in ning ve tawh em? Zu, eirukna, HIV, tualthahna, rukrukna, Kristian ram kan ni a ni lawm ni? Kristian zaa za kan inti a, kan inchhuanna ber pawh a ni, tunah hian Zoram chu Kristian zaa za awmna ram a ni in la ti ngam em? Ka hlauh ber chu maw, Sap ram aṭangin kan ramah hian Chanchin Ṭha an rawn hril a, tunah hian chu Sap ramah ngei chuan Chanchin Ṭha hril a ngai ta, kan ramah hian Chanchin Ṭha rawn hril ṭhat leh a ngai ang tih hi ka hlau ngawih ngawih.

Sawmna ka siam ve dawn lo, camp luh te hian sawmna te hi an siam ziah a ti r'u, kei chuan ka siam ve dawn lo. Kan ram leh Chanchin Ṭha innghahna chu tuna Ṭhalai leh Zirlaite hi in ni ta e".

Tihian Crusades chu kan zo ta, Sawi tur reng ka hre lo, ka hamhaih vek, he Speaker hian kan beng a tivar chiang hlawm ngawtin ka ring.

Kei hi kan ram leh Chanchin Ṭha innghahna tur chuan ka tling tawk lo, ni e; ka tling mawlh lo.

Tukin  khan school ka kal hmain Damdawi In lam atangin min lo call a, naktukah test result a lam theih!

Sana ka en a, dar kua a ri chiah chiah, van ka en a, Thla a êng, thla bial zan a ni nghe nghein ka hria, naktukah eng nge thleng dawn ka hre si lo tiin miss Kimi ka call a, " Ride dun ila, first date turin chhuak ang ka tihna", ka tih chuan a lo teu hlar nghal a, nakinah, he a âwka vin pawh hi ka ngaih ngawih ngawih tur a la ni mai thei a ni.

" I lawn thei ang tiraw? ", nuih insum zeta ka tih chuan a ner nang a, intithei fahran hian a lo chuang nghal zat, a taksa inphut tawk lek kawr a ha a, jeans dum a ha bawk, sneaker var a bun a, a sam a tawn sang vah bawk, a va inhmeh tak!

Heti hi chuan zirtirtu pawh a anglo, kan rualpui thawveng ve zet hi a ang.

Tlak hlau awm tak hian nghet zetin ka dulah a kut a suih a, ka hnungah a bet thlawp hi ni ber, runluih nan ka han tlanchak deuh ṭhin a, ka dul zawna kut suih a ni bawk a, a ṭham na thei ngang mai.

Kawmzawl, Helipad hmun chu kan thleng a, zan dangah te chuan mi an awm luih luih ṭhin kha a ni a, zanin chu tumah hmuh tur an awm lo reng reng, a pawi chuang lo.

Eitur kan ken ei mial mial chungin a naupan lai Chanchin leh zanin nawm a tih thute chu a sawi siam siam a, Darkhuang tlangte chu ka han kawhhmuh a, kal a chak leh tlat pek a, kal lo turin kan inkhap thei hram.

Chutah power supply a tawp nge ni, Sipai camp te pawh chu an thim vek mai a, êng hmuh tur reng a awm lo, Thla a êng sawt, Thla êng hnuaiah chuan miss Kimi nui ar ar chu ka en kar a, a sawi hre lo mah ila ka nui ve ringawt zel.

" Zanin boruak chu a romantic riau ka ti, Sap ṭawng takin Kiss ka châk che a, mahse, puitling tawk lo kha min ti bawk si a", ti pah chuan a chalah chuan ka fawp a, " Haw tawh ang le", tia kalpui ka tum chu min pawt ding dat, " Keipawh", thâwk a la deuh halh halh a, " Romantic ka ti ve tho, tiang hun hi ka la tawng ngai lo, chuvang chuan, ih, ih, zanin chu i puitling tawk tawh ni mai rawh se", a hmai a hup nghal daih, a va lawmawm reuh tak, mahse, ka thei lo, result!!!

" Ka bula i awm reng dawn chuan engtiklai pawhin romantic hun hman reng a ni mai", ka ti kher a, ka kuah a, a chalah chuan ka fawp leh vawng vawng zawk a.