age is just a number-13

Age is Just a Number

Chapter-13

Ziaktu: Cck Lalchhuanawmi 

Result chu ka kutah a awm ta vang mai, khur hlawk hlawk chung hian ka keng a, ka mittui kar aṭang chuan vai ruai chung hian ka en ṭha leh ngat, " Negative", Aww Lalpa, ka va lawm tak em!!!

Result ṭha tak ka hre tawh a, pangngai takin hun ka hmang ve tawh dawn emaw ka tih laiin, " Christian Higher Secondary School-ah zirlai leh zirtirtu inngaizawng an awm", tih thu chu a thang ta tlat!

Ka ngaihtuah mai mai a, Kei leh miss Kimi chungchang hi em ni ang, mahse; inngaizawng pawh kan niin ka hre si lo a, engpawh ni sela, Tu tihthan nge ni ang tih chu ka ngaihtuah ber a ni.

School chhungah pawh boruak a rawn nei lian hle a, zirlai ho lah hian ngaihbel tur apui lah hi an ngah, " Kei chu Eddie-a leh miss Puipuii an nih ka ring", tih te, " Miss Nancy leh Rinawma te hi an niang", tih te, Rinawma leh miss Nancy ngaihbel maw, ka nuihza lutuk hi ka thi lo chauh.

Lalrinawma'n ngaihzawng a nei ve tur ka han mitthla chhin a, a awm ang lo lutuk; chu aia ka nuihtizatu pakhat leh chu miss Kimi leh Rinawma an sawina chu ni.

Miss Kimi'n lecture a pek mial mial lai chuan Rinawma nen ka en tawn sek a, a va âtthlak mai mai tak; nuih ka insumna lamah ka pum a nâ zo vek. 

Ka zui tam leh ka biak tam ber miss Kimi nen hian ngaihbel kan la ni miah lo, eng nge an hriat hlawm le? Boruak hian zia lam a la pan thei tak tak lo bawk, Principal-in meeting a ko hial, atu lo tih than chu nge ni ang aw?

Rinhlua thlanah kan ṭhu kual leh laih a, Rinawma kan chhaih pah reng bawk, " Miss Kimi leh miss Nancy ten an inchuh a, hepa luck zia hi aw", Johny-a chuan Rinawma hnunga beng thak thak chung chuan a ti a.

" Kan school-ah pawh in school chanchin hi sawi hlawh ber pawl a ni mek a nia aw, a mak ngawt mai", Sawma chuan a lo ti a, kan nui lai kan tawp chawt hlawm, ngaihtuah zui vawng vawng ni awm hrimin kan ngawi diak a, ka ṭhiante hi ka hrilh ve law law mai dawn em ni ang aw?

" Lalrinawma hi arukin a lo nasa phian a, chumi vang vek chu alawm", Johny-a chuan a lo ti chhuak hlawl a, kan nui zo leh vek.

" Ti daih ila, sawmpahnih hi Pathian zarah lo pass chhuak ta ila, eng nge tih kan tum hlawm? ", Ropuia chuan a ti a, ngaihtuah zui ni awm hrimin kan ngawi leh diak.

Sawma hi chu a chhur hrim hrim bawk a, a ṭawng hmasa berah a ṭang leh a, " Kei chu 3-gate tlangval hnen aṭanga England Rose lak kir", intihthei hmel fahran hian a ti a, " Chhura nge nge i ti ṭha e", a kut tipir vah chung hian Johny-a chuan a lo ti, " Kei chu, India rama Surgeon ṭha ber nih tumin ka inzir ang", Rinawma chuan a ti a.

Johny-a chuan Professor nih a tum, Mizo subject bikah, Rintlaka chuan BusinessMan hlawhtling tak nih a duh thung, Ropuia erawh chuan a la chiang chiah lo.

Sawma pawh chuan a lo tuihnih ve leh a, " Tak takah, kei chu IPS inziah tlin ka tum ang, chuan Lungleiah hian ka thawk bawk ang", khi deuh sak pah hian a ti a, " Chuti a nih chuan MPS-ah hian inziah tlin tum zawk la", ka lo ti a, min lo chhân letna chuan ngaihtuahna a ti kal thui ngang mai, " Central-ah nge nge chuan keini angte pawh kan tling ve thei mahna le", a thaw deuh halh a, kan lo bu dual hlawm.

" Kan ṭhianpa thihna hian ka lung a ti awi thei lo, chhui chhuah ngei ka duh", Sawma chuan a ti leh charh charh a, ka va en zawk a, a kut a lo hum ruh nasa mai. Ni e, han chhui chhuak ngei teh se, kei hi eng nge ka tih ve ang aw?

Thu thang a awm aṭang khan miss Kimi nen kan inhlat tial tial ni ber, a inah ka kal a phal tawh lo a, school-ah nise, zirlai leh zirtirtu ang tak takin kan inbia! 

Bazar hun hi ka nghahhlelh ber a ni leh tawh, " Vawiin chu ka lo len phal tawh hram la, call leh message pawh min chhâng ṭha duh si lo", zawi sup hian ka ti a.

" Miss Puipuii inah va leng la ni mai alawm", ti thla rawkin min kalsan nal nal, ka che chang eih lo a, miss Puipuii nena min lo demna kha a thîk tihna em ni le? Ka umzui thuai a, " I thîk tiraw? ", nui var chunga ka tih chuan, " Tu chu maw ka thîk ang a? ", a lo ti hlak a, " I thîk chiang lutuk ", a mita en kar chung chuan ka ti leh a.

" Thu awihawm loh loh sawi suh ", a ti thla leh rawk a, a thîk chiang lutuk; a mitmengah pawh khan thîkna a awm, thîkna a nei ṭan a nih chuannn... Yes, va nuam tak!

Fly over bridge chungah chuan kan chho a, heta ṭang hi chuan a awmna building pawh a hla tawh lo, " Nui hmel min la hmuh miah lo", a sama pawt chung chuan ka ti a, min chhâng peih tawh lo a ni ang, a samah chuan ka pawt ka pawt a, luhlul takin a kal nul nul tho.

Chutia thîk leh thîk loh chungchang ka zawh ka zawh lai chuan bridge lai takah miss Puipuii nen kan intawk hlawl, a va hun lo tak ka ti dawn nge a hun chiah chiah zawk ang aw, " In bazar a ni maw", tiin miss Puipuii zawk chuan min lo be hmasa nghal a, " Um, nang zawk? ", miss Kimi chuan a ti a, bazarah miss Kimi ka hmuh thu ka sawi ve ringawt.

Eng eng emawni hi kan sawi zawm nghal a, miss Kimi erawh chu a ngawi deuh reng a, a kun deuh lap bawk, min thîk chiang alawm! " Puipui, ka lo va haw tawh mai ang e, ka inkhai bawr si a", nui lui tih hriat tak chung chuan a kalsawn nghal a.

Chutia a kal ta chu miss Puipuii chuan, " Vawiin chu a nuamsam meuh lo niang a, nidanga a ṭawng duh tehreng nen, keipawh ka kal mai ang e, lehkha ṭha takin zir ang che aw", tiin min thlah a, keipawh chuan miss Kimi ka um lehnghal vat, building kawtah a lo tlu chu niin, au mami chuan a lo buaipui a, au mami ka hmu chu mak ka ti deuh hlek!

An lama kal ka tum chu au mami chuan min lo hmu a, a lu a lo thing nawk nawk nghal, " Lo kal suh", tih ni awm hrimin, mitmei min hmuh nghal a, ka bo chiang ngei mai, miss Kimi chu a ṭap a ni ngei ang, au mami chuan a hmai a tuai sak a, eng ngati nge ni ang aw?

Zanah chuan ka call a, min chhâng thei lo, ka call tlut tlut a, dar sawm a ri takngial dawn; rilru kaptu awm reng chung chuan lehkha a zir theih loh.

Ka han chawl deuh a, dar sawm leh minute sawmpanga velah chuan, " Ka bei nge sei rûn dung", tiin ka han call leh a, a rî ral ral, ka khûr theiin ka hria, call cut mai ka tum laiin miss Kimi chuan ṭah âw ṭuau chung hian, " Um", a lo ti a, a inhnît hlawih hlawih nghal, eng khaw sawi set set loin ka thin a sa phut nghal bawk.

" Ngati nge i ṭah? ", sehchilh deuh tak hian ka ti a, ka thinrim chhan tak erawh ka hre chuang lo, " Lo kal rawh", a lo tih leh chuan ka tho zawt nghal a, " Aw le", tih leh bike chahbi lak ka rual nghal.

Kawngka ka kîk dat dat a, au mami'n kawng a lo hawng, " Khatin mak tih hmel deuhin min en kher suh, pawnah ka lo va awm ang", tih leh chhuah a rual nghal a, kei ka lut ve nghal thuai bawk.

Miss Kimi'n min lo hmuh rual chuan, " Edd", ti sepin min lo kuah a, nghet takin ka kuah let ve nghal, " Ṭap muhil leh miah suh ang che", ka ti chu, a lungchhe zual ni ngei tur a ni, a ṭap chhuak hawm hawm nghal a.

A tuk nileng chuan kan inawm a, a mit a bûi lûk, ka va lainat tak! 

Tukverh aṭang chuan inkhawm kal leh an haw lam te chu kan thlir doh doh a, au mami chu an in lamah a haw thung, sunday apiang hi chuan an in lamah a haw ṭhin a ni awm e.

Ṭhutthleng chungah kut khama muin A biang ka chul heuh heuh a, a mit a chhing diar diar, " Khatia mit chhing chung khan nizan lama thil thleng min hrilh rawh le, min timangang lutuk alawm",

" Engmah thil thleng a awm lo, au mami ka bulah a awm chhung chuan ka him alawm", nui deuh seih chung hian a ti a, ka ner deuh nuah nuah, " Ner vak kher suh", min ti hlak a, mittui parawl kuang chunga lo mengin a nui deuh sen sen a, " Ka ngaih vang che a nih kha", lei chhuah zeuhin a hmai a hup nghal daih, ka nuih hak a, va kuahin ka âwmah a bei thlawp a.

" Miss Puipuii i thîk vang mai mai a nih kha", ka ti chu, " I hriat reng chuan nge min zawh kher", kan inchhang tawk thei sia aw, chutih lai chuan ruah a rawn sur cher cher a, va romantic ṭhin tak!

" Kim? ",

" Het, khatin min ko suh, i ngaihtuahna kha thlak nghal bawk rawh",

" Eng nge ka ngaihtuah? ",

" Ka hre chuang nang, ka mit a kham lutuk",

" Umm, muhil leh daih rawh, au mami lo thlen hma chu ka awmpui dawn che nia". A muhil leh siai siai a, ka thlir veng veng ringawt; achangin a biang ka chul leh ṭhin a, naktukah chuan a ṭahna avanga a mit bûi lûk pawh a zia tawh ngei ang.

Kawngka kîk thawmah chuan ka harh a, ka lo muhil ve daih nih dawn hi! Ka va hawng chu au mami a lo ni a, " A muhil em ni? ", lo lut pah chuan a ti a, ka lo bu nghut. " Au mam, ka haw ve nghal mai ang",

" Aw le, aw le, mahse Eddie, naktuk i school kal hmain inhmu lawk ang hmiang, i hman ang tiraw? ", zawi sap hian a ti a, " Ka hman ang, mahse, eng nga tinge? Engkim a ṭha vek em? ", hlauthawng ru tak chung hian ka ti a, " Aw, tha vek, Sâp tuikhur bula waiting shed-ah khan lo awm rawh aw", a ti a, engtak chu min sawipui ang maw?

Au mami chu ka nghak reng a, a lo kal har phian, Venglai daih aṭanga lo kal tur a ni a, a awm ve reng, chutia ka ngaihtuahna ka kawm mawlh mawlh lai chuan, " Eddie, i awmna a rei tawh em? ", tiin au mami chuan min lo zawt nghal a, a lo thleng ve chiah nih dawn hi, ka awmna a la rei vak lo thuin ka chhang a.

" A ṭhat chu, Kimi nena in inkar hi sawipui che ka duh, chuvang chu nia afala hmuh che ka duh ni", a ti nghal tlawng a, ka hamhaih lek lek, " Eng, engtia inkar? ", ka ti hû a, " Sawi ṭan dan tur mai ka hre lo nain, Kimi chunga i rilru put hmang hi i thlak a ngai", teh tawp chuan!

" Ka thusawi hi ngun deuhin lo ngaithla ang che, Kimi pawh ka hrilh tawh a, in inthlah ve ve a ngai, chu chu in pahnih tan pawha ṭha ber a ni. Kimi chuan a pawm thlap tawh a, nangmah hi hrilh tur chein min ti bawk a ni",

" Au mam, miss Kimi chuan lo pawm pawh ni se, kei chuan ka pawm thei lo, ka thlah thei lo ang",

" Ka hria alawm, in inhmangaihna-a tuar tur ber chu Kimi hi a ni, chu chu i hriatpui a ngai",

" Maw, maw, miss Kimi chuan min hmangaih ve thu i sawi tihna em ni? ", phâwk deuh hû hian ka ti a, " Aw, chuvang tak chuan nangpawhin i hmangaih takzet a nih chuan i thlah a ngai. Kimi chan tur ngaihtuah la, tin; in kum a inthlau bawk nen, Kimi hi i aia nau daih chu nise a pawi chuang lo a, mahse; in inthlau bawk si a.

Chubakah, pasal nei mai tur a ni bawk", a tih chuan, " Ka pawi sa lo, khapa khan a nawm amâka hman a tum alawm, chuvang tak chuan a nia ka thlah thei lo ang ka tih; tunah pawh hetiang hi a nih chuan an inneih hunah phei chuan engtia nasain nge a tawrh ang", tiin ka lo inrawlh vat a.

" Ka hria, ka hria, ka hre vek, mahse Eddie; hetiang zawng hian han ngaihtuah leh teh",

" Au mam, engtia ngaihtuahin maw? Hruaia khan hmeichhe khawi a nei a, chu chu a duhtawk lo em ni? ",

" Ka thusawi lai chuan lo ngawi la, lo pawtchat tawh suh. A hmeichhe khawi i tih kha Kimi unaunu a nih kha, tikhan i hrethiam tawh em? Engtiang takin nge Kimi hi a rilru a hah ang, a nuṭa te lah an sualin jail aṭanga bail an ngai reng a. Chu chu duhtawk ila, in pahnih lam ve thung, ngaihtuah ang che.

Kum sawmpakua i nih hunah Kimi chu kum sawmhnih leh panga a ni ang, chutiang zelin a kum a tam hmasa ziah anga, tin; hmeichhia a nihna angin thisen chhuak tam chi a ni a, nang aiin a lang upa zel dawn.

Chubakah, in dinhmun hi a laklawh lutuk, pawl sawmpahnih zir mek i ni a, ani zirtirtu; tin, i nu leh pa leh khawtlang rilru tur i ngaihtuah tel a ngai, lo inngaizawng ta ula, Tu zawk nge chan chhe chang tur? Kimi hi a ni, a chhan chu hmeichhia a ni a, mipa nen chuan in inang thei lo. Kimi a la upa zawk zui, dêmna leh hmingchhiatna zawng zawng Kimi hian a chang vek dawn.

Chung zawng zawng chu ngaihtuah la, nakin hun zel tur ngaihtuah tel i ngai, i naupangin i hmel pawh a ṭha a, Kimi hi i nakin hun hmanpui tur pawh a ni lo thei tho bawk. I hmangaih a nih chuan i kalsan hmasak a ngai", a ti dap dap a, ka buai vek, ka thâw a ipik a, ka tâwt lutuk hi puak keh ila a zia ka ring, A sawi dik vek bawk si a.

" Au mam, a har dawn em mai, mahse; ka lo tum ang", ka ṭah loh nan ka intipachang hram hram, a va har tak, " Mahse, nangpawhin kumte chu number mai a nih thu i sawi kha",

" Eddie, ka hria alawm. Keichuan ka pawmpui che u, mahse; Kimi hian a hlauhthawnpui che a ni, Hruaia hi i la hrechiang tawk lo a ni, a ṭhianpa nena tlanbo an tum khan thi lek lek khawpin Hruaia pain a sawisa a, chumai nilo, a ṭhianpa chu rukruah puhin jail tân(tâng) tir a ni a, a ṭhianpa farnu tleirawl tê chu Hruaia'n a pawngsual bawk, an khua aṭanga hnawhchhuah an ni bawk asin.

Kimi hian i tawrh ve a hlau em zawk a ni, ani hi chu hetiang dinhmunah a ding ta sa sa, ding tlang law law sela, nang chu hmalam hun êng tak i nei angin chulam chu pan ngei turin kan duhsak che".

" Au mam, chutiang a nih phei chuan, engtin nge ka kalsan theih ang? ",

" Min nghak rawh tiin i hrilh tiraw? A nghah tur thu che a hrilh bawk che tiraw? Chu i thutiam chu tihhlawhtlin ngei tumin ṭan la zawk rawh. Kimi hi e, a kum phu lo hian a naupangchhia a nia aw, miss Puipuii inti nge mawni, a thîk ringawt a nia, chutiang vel chu a ni",

" Ka hria alawm", kan nui deuh hak a, naupangchhia tak a ni.

" Nangmah zawk hi puitling taka i awm a ngai", ka lo bu deuh nghut a.

" Aw Lalpa, hlim taka ka awm hi i phal lo em ni? ", ka rilru chuan ka ti nuah nuah a, inchung ka en kar.

Dan pangngai anga school kal chu har tawh tak a ni, abikin classroom hi hrehawm ka ti bik, miss Kimi class dawnah hi chuan ka bunk daih zel a, a hmel ka hmuh ringawt pawhin ka nâ ngawih ngawih.

Au mami min râwn ang khan ka innghahna chu pawl sawmpahnih pass chhuah ngei ngei hi a ni.

School sports kan nei a, ka chau thei khawp mai, Siamthari hian min ngaihtuah ṭha leh ṭan a, kan house a inang bawk nen, house Captain ka ni ve khanglang a, Siamthari Assistant a ni thung, mahse; ka rilru erawh a let tawh lo chiang ngawt ang.

Ṭhuamluaia mualah football kan khel a, ruah a sur cher cher bawk, tiang hi a nuam, ruahpuite hi sur sela a ṭha ang, " Siamthari hian a bân hmasa zawk che tih chu kan hre tho a, mahse; ngaihtuah ṭha leh la", Johny-a chuan a ti a, " Khanglaia kan awmdan vel kha chu a fuh lo vel vek", a tih zawm leh a, ka lo nuih ringawt.

" Saw, i mei a lo kal", tih leh Rinawma chuan thawh a rual nghal a, field chhungah kan pathumin kan ṭhu a, nihliap keng chunga Siamthari lo kal lauh lauh chu ṭul ka ti lo mai mai khawp a.

" Johny? ",

" Yes? ",

" Seat kan chang lo",

" Hmel ho", tih leh tui bottle-a vawm ka rual a, nui huah huah chungin min kalsan tho, Siamthari chuan nihliap min zawn a, thei tui a lo keng bawk, Pavillion aṭangin an lo, " Eee", rual dual a, microphone kengtu ber leh, " Eee", ring ber saw sir David-a a nih ngei ka ring bawk.

Siamthari chuan, " A zahthlak reuh e", nui tet tet chung hian a ti a, " Engahmah ngai duh suh", ka lo ti deuh hmak, " Renew a hnai leh em ni? ", sir David-a bawk a ni, ka va ngei tak, renew leh maw? A sawi lai chu a hnaih lai ber.

Haw kawngah ruah a la sur avangin Siamthari nen nihliap kan inzawn leh a, ṭul ka ti lo viau nain amah zawk hian min zawn miau si a, dawr kawtah hian miss Kimi a lo inkuangkuah hlun a, nihliap kenna changte hi hriat ve tur a nia aw.

Dawr hmaah kawng khuar lai a awm a ni chek ang chu, ruah tui a tling piau mai a, kan kawng te lah hi, kumtin an siamṭha a, Fûr a lo nih hian a ṭhat tawk lohzia a lang chhuak leh ṭhin bawk si a, awmzia a awm lo teh e.

Chutia ka ngaihtuah lai chuan Scorpio hi a lo tlan mek a, kawnga tui tling chu a tlan pel ngei a ngai dawn a, " Lalrinawm, khawi maw", ti hlakin a nihliap ken ka laksak nghal a, miss Kimi hmaah tak chuan ka va ding a, ka rin ang ngeiin Scorpio lo tlan chuan kawnga tui tling chu a tlan per chuai mai!

Ka hnung chu, a huh zawr vel vek mai, miss Kimi a meng buai nasa, sawi tur a haihchham nge ni, a khâ a inkhawng dat dat a, " Nihliap ken tur che alawm, hei; hei hi la rawh", tiin nihliap chu a kutah ka hmehbelh a.

Ka ṭhiante pawh kan bul an lo thleng chawpchilh nghal, miss Kimi'n Siamthari a hmuh chuan a hmel a inthlak nghal thuai a, thîkna ka hmu thei, " Ka kal mai ang, tluang deuhin in haw hlawm dawn u nia", tih leh kal a rual nghal a, a ṭap leh ngei ngei ang; miss Puipuii nen min demna mah a thîk a nih chuan, Siamthari phei chu ka bialnu hlui a la ni zui, thîk pawh a awm hliah hliah ang, keipawh hi a!

" Keini pawh haw tawh ang u", ka hmai tuai pah chuan ka ti a, Siamthari chuan, " I huh vek kha, khatia tih kher a ngai em ni? ", thinrim âwka hian min ti a, " A huh vek sa hrim hrim alawm", Rinawma chuan a lo ti nghal, ka chhân hmaa min lo chhân khalh avangin ka va lawm tak, " A ṭha alawm", titau bur chung chuan Siamthari chu a kal ta daih a, pawi lo, kal daih rawh se.

Rinawma chuan, " Miss Kimi nautê dik tak chu i ni e", min kuai kun chung hian a ti a, nautê pawh kan ni ta mai a niang chu, miss Kimi a hul thei tal a, a ṭha alawm.

Zanah ka nu chuan, " Bawiha, in school-ah in zirtirtu leh zirlai inngaizawng awm angin an sawi a, tute nge i hria em? ", tiin min zawt a, " Ka hre lo reng reng, engtin nge i hriat a? ", tiin ka lo zawt let thuai a.

" An sawi nasa lutuk alawm, zirtirtu zawk chu hmeichhia angin an sawi a, fimkhur rawh aw", ka nuin a tih leh chuan, " Ka nu, a nih chuan, chu Zirtirtu ngaihzawng zirlai chu lo ni ta ila, engtin nge min tih ang? ", tiin fiamthu titak deuh si hian ka zawt let a, a ngaihna a hriat loh hmel kher mai,

" Chu zirlai chu ni lo hram mai la ka duh, mahni aia upa ngaizawng duh khawp chuan i rualpuiteah hmu zo lo pawh i ni lo a", ka nu chuan dam dup, mahse, thutak leh ngen ngawl tak hian a ti a, ka nu rilru chu ka hre thiam ta vek bawk, engtikah mah miss Kimi ka hmangaihna hi min pawmsak ngai dawn lo a nih hi.

Pathian zarah school sports pawh kan zo leh ta a, Second term exam kan hnaih leh hle tawh, tihian hun hi a kal a kal anga, exam kan nei leh der mai ang. Rinawma ka la tibuai zel a, " Hriatthiam hi i tum tak tak lo a niin ka hria", beidawn hmel tak hian Rinawma chuan a ti a, a hmel ka en a, ka nuih a tiza bawk si, ka khawngaih tho bawk si, hui ha; hriatthiam tum chuan ka bei ve tho alawm.

" Ti teh, tlan harh ang", Rinawma chuan min kuk pah hian a ti a, " Ka nu, Rinawma nen kan chhuak lawk dawn a nia", tiin ka nu ka au zui a, a lo phal ve mai bawk, " Riak nghal daih la", bike tinung paha ka tih chuan, " Aw, a pawi lo khawp ang", a lo ti ve nghal a, kan ṭhian dangte kan hrilh a, an lo phurthak nasa ngang mai. Rinhlua kan thlahliam hnu aṭanga kan ride-na hmasa ber tur a ni, ka lungchhe dawn tlat!

Sawma phur fal lah chuan, " Champion kan zawng leh dawn em ni ang? ", a ti a, " Chutiang a ngai lo, tihian tlan kual mai mai ang u", ka lo ti nghal vat.

Kawmzawl Helipad hmunah chuan kan ding ngawi reng a, hun hi koh kir theih a ni tawh si lo, he hmunah hian ka ṭhianpa leh ka hmangaih nena hlim taka kan lenna a ni a, khang hunah khan ka kir châk ngawt mai. 

Chutih lai chuan insût hlawih hlawih thawm hi kan hria a, " Min hre thiam teh u, Rinhlua ka ngai em a ni! ", Sawma chu a ṭhu kun ngawih ngawih nghal a, va kuah nghalin, " Sawma, min ngaidam mawlh mawlh teh, ka thiam loh vek a ni, ka mâwl luatah Rinhlua'n a tuar ta si a", ka ti a.

Keipawh chuan ka mittui ka dang thei lo, kan ṭhian dangte pawh chuan min lo kuah a, ka thiam loh tak meuh meuh a ni.

Police Station bul kan thlen chuan duty ho chuan min lo ti ding a, pawisa chawi turin min ti, " Engmah tihsual kan nei lo", kan tih pawhin, " Zan rehah ring tak takin bike in khalh a, cheng za ṭheuh in chawi a ngai, a nih loh chuan in chhungte in koh a ngai ang", an la ti fan, ring tak taka bike kan khalh awm ka hre lo, min man chhan lah hi a ho si, lock-up ah min khung ta daih.

" Lalrinawm, nangmah vang, Theiriat han kal kher a ngai em ni? ", Rinawma chu kan hau luai luai a, lock-up a han awm ta mai chu!

" A tawk, koh tur ka hria", ti hlakin a tho a, " Ka pu, kan chhungte ka lo call teh ang", a ti a, an chhuahtir a, Tu tak chu call ang maw? Reilote hnuah chuan chhuak turin min ti a, Station kawta kan va chhuak chiah chu miss Kimi, au mami leh Rinawma, hmana min mantu te zinga pakhat nen an lo ding luau mai!

" Miss Kimi ka call a, chuan ka pu hi an lo hruai a, chuti ni lo se lock-up ah kan riak ngei ngei ang", Rinawma chuan a lo ti nghal a, " Ka pu, hemi te hi han vaw law law teh", miss Kimi chuan thinrim hmel tak hian a ti a, ka pu chu kan en ṭhup nghal, " Kei chu ka duh lo, sir David-a'n min vaw hrep tawh a, ka duh tawh lo reng reng", Johny-a chuan a ti zung zung nghal a.

Keipawh chuan, " Engmah tihsual kan nei lo, min man ringawt a nih kha", ka lo ti ve nghal a, ka pu chuan, " Pawisa an duh vang a nih chu, tikhan haw nghal ula, chuti a nih loh chuan in miss hian min vuak tir tak tak mai ang che u", a ti a, kan nui dar dar hlawm a.

Miss Kimi leh au mami pawh an haw fel hnu chuan, " Kha kha maw, in miss Kimi chu, min lo biak teh u", Sawma chuan a ti a, a va ho ṭhin tak. Rinawma pawh chu a haw tlang nghal daih a, a lo riak kual peih tawh lo a ni ang.

Miss Kimi kawngkhar chu nghêngin, " Ka ṭhianpa nen ka ngai lutuk che u, i thingtlang âwphawi pawh kha ka ngai lutuk", ka ti chiah chu kawngkhar a lo ri chawrh nghal, ka lo nuih hak a, " Min hrethei tih ka hriat vang alawm ka ngai lutuk che ka tih", kan inkarah kawngkhar hi awm mah sela, kan thinlung erawh a inhawn reng ka ring, kei chu a inhawng sa reng a, hehe...

Practical room phena miss Kimi ka bihruk puina hmunah khan keimahin ka awm a, awm rei thawkhata ka inhriat tawh avangin classroom lam pan ka tum a, chutih lai chuan miss Kimi nen kan intawk thut, ka âwmah a intauh chawrh a, a mit a chhing sawk, chutih lai tak chuan ka kuah nghal vawng vawng, ka ngai tawh em a ni, " Min thlah rawh, school a nih hi", a tal laih laih a, ka thlah duh chuang lo,

" Zomuanpui, min thlah rawh ka tih chu",

" Ka ngai lutuk che ",

A tal laih laih chu a tawp chawt a, min kuah ve nghal, nghet deuhin min kuah a, sawi kher lo mah se, min ngai ve a ni tih ka hre thei. Chutia kan inkuah vawng vawng lai chuan, " Engthil nge ni ngai? ",

Chu âwka vin lutuk tak mai thawm kan hriat rual chuan kan inthlah a, chu thawm kan hriatna lam kan hawi chu sir David-a, ngaihna hriat loh hmel taka lo ding khawngin min lo en reng chu niin, miss Kimi ka en zeuh a, a dâng nghal sawp sawp. 

A kut ka chelh avangin a khur dar dar a ni tih pawh ka hre thei, a hmelah chuan hlauhna ka hmu a, hahdam turin ka mitmeng hmangin ka hrilh ringawt!!!