age is just a number-14 last

Age is Just a Number...

Chapter-14 Last

Ziaktu: Cck Lalchhuanawmi  

***Present day**

" I chau em? ", tiin Sanga chu ka zawt a, " Chau lo e, a nuam ka ti zawk; ka pu, Mizoramah chuan thlawhnain em ni kan kal tawh ang? ", tiin min zawt let a, " Kal dawn lo e, i peih chuannn", ka ti chiah chu, " Yes Sir, kan ride leh ang nga ni mai alawm", a lo ti var nghal a, ka lo nuih ringawt. " Ngati nge IAS hian motor bik in neih kher le? ", Sanga tak hi chu aw.

Thawk ka la hak a, DC Office lamah chuan kan inkhalh chhuak ta a, a post ka thlakna tur ber Shri. Sunil Singh Kumar leh midang ho chuan DC Office kawtah min lo nghak ṭhup a, tlemin ka zam chhe ve deuh.

Kan inchibai liam liam a, pindan pakhatah min luhpui a, Shri. Eddie Zomuanpuia, IAS, DC of Churachandpur District, tih name plate chu ka hmu nghal chat, patling pui tawh pawh hi mittui a hnâm sawk thei.

Ka rilru chuan, " Aw Lalpa, i hnenah lawmthu awm mawlh mawlh rawh se", ka ti pah bawk.

Vawiin chu hlim takin Pu Sunil-a te ho nen kan inthlah liam a, tun aṭang chuan Churachandpur DC ka ni ve ta reng mai!

Zanah, " Didi, TV-ah kan lo en che a nia aw, chuan maw; kan in kawtah hian nula nalh leh hmelṭha tak tak an intlar pût tawh hlawm a nia", Nautêi chuan a ti lang lang a, kan lo nui dar dar hlawm. 

Lawmpuina thu ka ṭhiante hnen aṭang pawhin ka dawng nasa a, Sawma pawh IPS-ah a inziak tling tawh a, Lungleiah a awm vâng tawh mai bawk.

Lungleia a awm theih nana min tihbuai nasat dan ngaihtuahin, ka thu thua awm tur a ni tawp mai. 

Duata pawh a lo inrawlh ve sek a, Nautei nen an inhau leh rih. Hawn tur min chah ṭeuh a, ka hre seng lo zawk, Duata tan chuan pheikhawk kha a ni mai a, thil dang ka hawn sak tho ang.

Mizoram lam panin Sanga nen chuan kan inkhalh chhuak ṭan leh ta a, " Ka pu, Mizoram kan thlen hunah eng nge i tih hmasak ber ang? ", tiin Sanga chuan min zawt a, " E le, Mizoram kan thleng tawh a nih hi ka ti ang", ka tih chuan za em emin a nui nghal uar uar a, " Tak takah, Ranngo kan zawng ang chu le, abikin i tan kan zawng hmasa ber dawn a nia", ka tihzawm leh a, a lâi chhe nasa khawp mai.

" Aa, nangman zawng hmasa ber rawh", min ti ve nghal mai bawk a, kan nui bâwk bâwk a, khawi hmunah pawh awm ila, " Eng a? ", tihpui tur hi han awm zel phawt mai sela, a ṭha ber mai.

Mizoram kan thleng ta, mahni ram leilung ngei han rah leh takah chuan ka thaw huai mai. Ka chhungte ka call a, " Hei, Mizoram kan lo lut tawh a, kan lo tlang nghal mai dawn", tiin ka hrilh a, an lo remti khawp.

Sanga chu ka khalh chhawk a, a hnung lamah a mu awn duai a, nuam hi a ti thei em, driver a nihna anga a chunga han intihthu vak ka tum lem lo a, hetia a duh dana ka awmtir pawh hian min zah loh phah chuang lo.

Zing khawvar tirhah au mami hnen aṭangin call ka dawng a, min lo call zîng ka ti khawp mai a, ka hamhaih lek lek,

" Kan IAS pa chu, kan la be phak meuh amaw? ",

" Be phak ele, i ho em mai", nui sak chungin ka lo ti a, Lunglei thlen hunah chuan tlawh ngei ngei chi a ni.

" Ka lo call chhan che chu, ka rilru a insual nasa lutuk, kâr liamta khan bazarah Hruaia nen kan inhmu hlawl a",

" Chuan engtin, eng nge thleng a? ", ka lo ti hmanhmawh, " Kimi nen naktuk mai khian an inneih tur thu min hrilh", a ti chiah chu ka ding chawt a, Sanga a let thla nghal ṭhuai bawk!

" A ni thei lo ang", zawi sup hian ka ti a, au mami chuan, " Ka hrilh duh lawk lo che a nih kha, ka hrilh dawn che nge hrilh dawn lo che tihah ka rilru a insual nasa lutuk a, atawpah zawng ka lo hrilh tawp che ", a ti ta mai a.

Ka awmdan chu ka sawi thiam lo, ka nâ ngawih ngawih ka ti dawn nge, ka thinrim lutuk ka ti dawn, nge ni a miss Kimi chu mahni thuthiam bawhchhiaah puhin a thlâ ka hau vak vak dawn?

Motor aṭanga chhukin, a ke chu ka han chhuih leh hrep hrep ṭhin a, awmzia awm lo teh e. 

Sanga pawh chu lo chhuak vein thil awmzia min zawt a, tihtur ka hrechhuak zawk, " Lut la, hmalamah khan ṭhu lut rawh", tih leh keipawh chu ka ṭhu lut ve nghal a, ka phone chu pein.

" Call tura ka tih apiang che i call anga, chuan, loud speaker-ah i dah dawn nia", ka ti a, ka thâw kâwk kâwk phawt a, chutah, " I inring em? ", ti supin ka tlan chhuak nghal a, " Sawm chhura tih kha call rawh",

" Sawma, tunah hian Aizawl kan lo pan mek a, motor tlan zawng zawng lo ding vek rawh se, Serkawrah kan tlang nghal dawn, kan kawngah eng motor mah a tlan ve tur a ni lo, kawng sirah lo ding vek sela, eng motor mah lo tlanchhuak suh se.

Traffic jam tih vel a awm tur a ni reng reng lo bawk, zin chhuak tur te pawh chhuak lo mai rawh se, kawng chu a reh em em tur a ni ringawt, i hria em? ", tiin ka hrilh nghal mawlh mawlh a, " Hre lo, Police Station pakhat ṭhutchilh ve mai hian engtin nge Mizoram te chu ka control theih ang ni aw? ", tep chuap chuap chung hian a lo ti a, mahni lo maha hmanhmawh ve tawh nak laiin, " Chhura, ka sawi ang chuan ti nghal mai rawh, a nih loh chuan i hna aṭangin ka bantir ang che", ka thin a tawt lutuk ringawt.

" Hmela", ti thum dutin call a cut nghal a, khatia tih loh chuan hmanhmawhna chang a hre leh dawn lo. Speed sang ber chuan ka tlan zel a, steering pawh chu ka herhkawi nawk nawk ni ber hian ka hria.

Aizawl kan tlan lut ṭan ta, motor veivak a la awm tlat, Siren ka tiri ta ngawt a, ka speed chu ramhuai speed a la ni reng, Sanga lam reng ka lo ngaihtuah tawh lo, ka va hawi phei zawk chu a lo ṭang nasa mai a, a hlau tih pawh hai rual a ni lo, mahse; ka hmanhmawh tawh em avangin tlan muan ka tum phah chuang lo, min ngaidam mai teh se.

" Ka lo nghak reng ang che ", tia min thlahtu khan khiang min awi san dawn maw....

Chu pawh, amah bum phar dawr dawrtu kha a la ni zui, engtin nge a theih zawk.

A theih loh, keiin ka phal lo; a bulah khan ka awm tir dawn lo reng reng.

Inla ril hman pawh ka nih loh hi maw!

Kawng pawh reh tual tualin kawngsir lamah motor chi hrang hrang a inhung thluah hlawm tawh bawk, Traffic Police hmuh tur an awm pheuh pheuh bawk.

" Eddie, eng nge thil awmzia? Serkawrah chuan eng nge tih i tum reng reng? Ngati nge kawng zawng zawng",

" Nakinah ka hrilh vek dawn che nia, Tunah tak hi chuan sawi ka la duh rih lo; thlen hman loh ka hlau a ni".

Ni e, ka hlau lutuk ringawt. " Awle, Petrol Pump leh motor accessories dawr ho ka hawn tir bawk a nia, mahse; fim tak leh fimkhur takin aw, min lo be zel dawn nia. Lunglei DC leh Mizoram Bawrhsapte lakah min chhan ngei a ngai bawk ang", Sawma tak hi chu, chhan dawn chiang e a. 

Ṭhiante zingah chhur deuh an lo awm hian a nuam.

Kan tlan zel kan tlan zel a, a reh ṭhuap bawk nen Thlalera tlan ang maiin ka inhria, siren ri chauh loh chu eng thawm mah hriat tur a awm lo. " Ka pu, ngaithla ve mah teh",

" Tunah hian Churachandpur DC, Eddie Zomuanpuia chu Serkawr lam panin a tlan mek a, Bolero dum, siren ri-in Bawngkawn Aizawl a pel fel chiah. khawtin leh veng tina Police-te leh Traffic Police-ten motor veivak apiang lo ti ding a; mipui pâwn chhuak tur te pawh lo dang rih tura hriattir an ni a, Petrol Pump leh Motor Accessories dawr te erawh inhawnga lo inring reng tura hriattir an ni a, mipui pawh chhuak rih lo tura hriattir kan ni bawk e", chu thu ka hre zet chu...

Call a rawn kal nghal a, " Tikha chuan a ṭha tawh ang, in thlen chin leh in mamawh tur te min lo hrilh zel la, ka lo buaipui vek dawn nia", ba ka va ngah tak em.

Chawl lovin kan tlan zel a, keimah ngawr ngawrin ka khalh. Ka ngaihtuahna ka kawm ngut ngut a, engdang ka ngaihtuahnaah a lut thei lo; ka mit vai ruai chu ka han hru leh rih thin, mipa ni ve ta fam a, han ṭah em chu ka ti deuh si, ka inseh ru tlawk tlawk mai.

Aizawl khawpui chhun pachanga reh duakah chuan kan tlan zel a, Petrol Pump kan hmuh hmasak berah chuan petrol kan thun nghal, eitur an lo vawm lut nghal mawlh mawlh mai bawk.

Traffic Police ṭhenkhatin motor lo tidingin, leh mi ṭhenkhat kawnga lo awm te an lo tiding hlawm bawk, chutih lai pawhin siren ka off chuang lo a, a la ri chuah chuah.

Kan zo fel ta maw tihah kan phit chhuak lehnghal.

Kulikawn kan tlan lut chiah tihah khawi aṭangin nge mawni bike a rawn inbarh lut, hrep tak a!

Thinrim eng phiar phiara ânkhumna hun a awm tawh lo. 

Aizawl kan chhuahsan ta a. 

Eng nga ti nge mawni kan tlan muang riau hian ka hria, au ṭhawtin steering ka chum vak vak a, kawng kawiah chuan kan kawi zawk zawk ve zel mai a, Thenzawl pawh kan thleng har ta riau mai. Thla han nei thut mai ila tha tur.

" Ka pu, Thenzawl kan pel e", tiin Sanga chuan min lo au a, ka phu deuh zuk; khai a! A va muan theih ngai ve mawle.

Sawma leh Sanga te an inbe reng a, kei erawh ngawi rengin an inbiakna ka lo ngaithla thung. 

Sawma'n Venglai aṭangin min rawn zui a tum ve thu a sawi chuan hnial nghal vatin Police Station-a a lo awmin a ṭangkai zawk thu ka hrilh a, min hnial nasa mai, ka kal chhan tur lah Au Mami hnen aṭangin a lo hre tawh bawk.

A tawpa tawpah ka hmin thei hram.

Pukpui kan lut ṭan a, Sanga bawkin min lo hrilh leh. Ka nu call turin ka ti a, ka pa zawkin min lo chhang, " Ka pa, Pukpui kan lo thleng tawh a, Serkawrah ka tlang nghal dawn, tun ṭum chu min dang thei tawh lo ang; ka nu pawh lo hrilh rawh.

In duh dan a ni lo ang tih chu ka hria, mahse; hrehawm reng renga a nun hmang turin ka duh lo, nuamsa taka awm a phu ve a ni; ka pa, khawngaihtakin tun ṭum chu min dang lo hram ang che u", ka biang a lum thla pup pup nghal.

Ka pa pawh chuan, " Thlamuang takin awm rawh, Hlawhtling ngei bawk ang che ", tiin min thlah a, ka thaw huai mai.

Zotlang kan lut a, Lunglei khawpui kan lut ve leh ṭan ta e, a lo reh leh ṭhuap! Tiang hun hi ka tawn ka inring ngai lo asin le, a lungchhiatthlak zawk mang e.

Serkawn Damdawi in kan thlen chuan Sanga hnenah Melte-ah kal a, ka nu te hnena lo va kal turin ka ti a, address leh ka pa hming ka hrilh zung zung bawk.

Sanga erawh chuan a kal duh loh thu leh a pu ka nihna anga ka hnung chu rinawm taka zui a duh zawk thu a sawi a, mak ka ti lutuk chu ka en hâw ringawt, harhchhuak zawkin kan tlan leh ta a, a rinawmna man hi a la hmu ngei ngei ang.

Venglai Police Station kawtah Sawma'n min lo hmuakin motor ke min hlui ṭeuh a, petrol nen, Bridge thlir vang vangin rei rial loin kan tlan lehnghal, zinkawng hmanhmawhthlak leh khawhar zawh tur kan la nei tlat atin a ni.

" Sanga, kan tlan muangin i hre ve em? ", tiin ka zawt a, kan muang ka ti lutuk hi ka thinur ṭeuh tawh. " Ka pu, kan muang lo reng reng, khua a thim hnai ṭan chauh a, a tuk zingah kan thleng thei ang. Bakah eng emaw tal eiin in ve teh, ka lo khal ve tawh zawk dawn em ni? ", rang zet hian a ti a, min ngaihtuah ve hle tih a lang; " A ngai lo e, keiman ka khalh char char zawk ang e",

" I chau chhia ang tih ka hlau a ni, tunah pawh i âw aṭangin i chau tih a hriat theih tawh", a dik, ka chau thawkhat ve ta e. Mahse, keimah ngeiin ka tum ram hi inkhalh thlen ka duh.

Sawma leh Sanga an inbe leh reng a, zana ramhuai speed-a han tlan tak vû vû mai chu! Sawma'n fimkhur tur leh Sanga khalh tir ve turin min lo ti sek a, Miss Kimi lo va biakpawh a tum thu a sawi chuan min tiharh thar sawt.

A hnu deuhah a biak tlang theih loh thu min lo hrilh nghal, Hruaia biak veleh a tum a, a ni erawh a ri ral ṭhak thung.

Lawngtlai kan chhuahsan fel chiah a, Saiha kan hmabak ta, mahse; ka chau a ni. Ka taksa leh ngaihtuahna, thinlung a chau!

Reilote motor tidingin tui ka in khawlh khawlh a, Sanga'n remchangah lain zunram a thiar nghal a, keipawh ka thiar ve nghal.

Tichuan kan tlan leh ta, ka thleng hman ang em? Tih chu ka inzawt reng a, min hmuh hunah engtin nge a awm ang? A lo hmelṭha sawt ang e, a lo dawldangin a lo chhe zawk ang?

Tunah chuan ka humhimin ka enkawl thei tawh anga, thlamuangtakin a awm thei tawh bawk ang; ka hmangaihna pawh naupangchhe rilru min tihsak thei tawh bawk hek lo ang, ka puitling ve tawh alawm.

" Ka pu ka pu ka pu, saw en rawh! ",

" Hrep tak a", ka sawi zo hman, hma lamah ka bû lawp a, ka invawrh chhuak teuh lutuk. 

*****Past day******

Sir David-a chuan khap eih lo hian min en a, a tiang ken chuan min kawk tawn sek bawk, engmah a sawi lo nain, rindan chu a nei thei ngei ang. Miss Kimi lah chu a khur nasa mai si a, a kun tlawk tlawk, thaw hrawkin min kalsan ta a, miss Kimi a ṭhu thla hnawk nghal.

A thaw halh a, a mittui a luang ngiai ngiai bawk.

Zanah ka call a, exam-na tur question a buaipui mek niin, " Exam a hnai leh tawh elaw? ", mak tih hmel deuh hian ka ti a, " Goody hi chu i ni ve chiang alawm", nui tet tet hian a lo ti a, a nui hmel ka hmu chak takzet. Lalrinawma pun leh ila ni mai alawm.

School bulah a lo vei tawn leh sek a, a kut a sik niap niap a, nâ a ti lo nge mawni.

" Kimi", min melh no lo nghalin, " Ka vaw dawn che mile, mi rilru hah nak laiin",

" Engvangin maw i rilru hah a, Lalruatkim",

" Zomuanpui, Ka vaw tak tak dawn che", tih pahin a bag a lek kang nghal vû a, " Sir David-a hmuh ka hreh alawm", mittui tling pam hian a ti ta a, chumi vang lek niin, " Engtin nge i thawven theih em em? ", ka hawi kual a, tumah ka hmu lo bawk a tiin ka kuah a.

Thawveng em em tur leh rilru hah ve lo turah min ngai ringawt a, amah ai pawh hian ka pik daih zawk ang mawle.

Sir David-an engmah a sawi chhuak lo a ni ang, thawm engmah a awm lo, kan kal ngaiin kan kal mawp mawp a, a hma ai chuan Sir David-a ka zahin amah hel dan kawng ka zawng hram ṭhin bawk. A class-ah te hian ka thaw mang ṭhin lo.

Rinawman zirlaiah min pui char char a, miss Kimi'n min pui ve zeuh zeuh bawk, sipisialin!

Zan khat ka lehkha zir, ka nuin ei tur leh in tur min lo pek a, a chhuah dawn chuan min kuah ngawih ngawih a, ka kalsan hlau ni awm takin, " Ka fapa, i nu hian ka enkawl danah che tlin lohna ka nei a nih chuan min ngaidam rawh aw", ngati nge?

Ngati nge ka nu hian tiang chu a sawi tak? Tlin lohna a nei lo, min enkawl danah eng nge tlin lohna a neih? A tling em em zawk si a, min tihlau dawn alawm.

Inrinni a ni a, bazar a hun leh ta, mahse; ka nuin inah awm turin min ti teh tlat, amah zawk a bazar. School pawh Sawma te kalna ah min kal tir a tum, a awmdan hi ka hrethiam ta hauh lo, kum tawp exam hmachhawn tur kan nih tawh thu leh ka duh loh thuin ka chhang a.

Ka âw pawh a chang deuh hlek, ka inthiamlo hnuhnawh chuan ka nu hnenah ngaihdam dilin, nêm zawkin ka hrilh ta zawk a, min hnial bik ta chuang lo.

Mahse, ka nu chuan school ka kal tih lohah chuan pawnah min chhuah tir ta ngai lo, ka phone pawh a kawl daih, min thutchilh hi ni ber, ka ṭhiante pawh chuan min rawn lenchilh ta bawk.

School-ah chauh kan inhmu leh thei tawh, inhmuh theih loh kar ni hnih chauh ni ṭhin mah se; kum hnih ang vel a ni.

" Bawiha, Sawma te school kalna-ah chuan kal ve mai la, in Principal ka be dawn anga", a ti leh a, ngati nge mawni?

" Ka nu, board exam a tikhaihlak vek dawn asin, bakah term exam pawh a hnai leh tawh lutuk", ka ti a, " Ka nu, harsatna a awm em ni? A awm a nih chuan min hrilh hreh suh", a kut chelh chung chuan ka ti leh a, a awm loh thuin min chhang bawk si, Sir David-an a hrilh a nih ka ring ta ngawt, a ni ngei ngei ang!

Ka nu bazar chhunga rim hman ngei tur leh, a haw hmaa ina ka lo awm fel ngei theih nan chak takin ka inkhalh chhuak a, Rim hman te han tih, zahthlak te tein.

Mahse, building kawtah chuan Hruaia car ka hmu tlat, hmanhmawh takin ka tlan chho nghal a, inhau thawm nge mawni ka hre ruai ruai zui.

Kawngka lo inhawng huau-ah thaw hlawp hlawpin Kimi lo hau mawlh mawlh Tu chu ka en tlawk tlawk.

Kimi chu lo ṭhu hnawk niahiin a lo insut feih feih a, " Zirtirtu i nih kha, mahni zirlaite chungah rilru dang an pu ngai lo, nau rual pawh ni lo, i fapa rual angah en la, a rilru lo tipeng tawh suh, kal bo zawk mai rawh. Hmeichhe zak thei lo lutuk, pasal pawh nei mai turin hetianga awm chu i zak lo em ni? I nu leh pa i timualpho tih hre rawh, ka fapa-ah hian eng nge i duh? Pa tel loa ka enkawl seilen a ni asin, chu chu hriain a chan tur a rosum hi em ni i duh? ",

" Ka nu", tiin ka au tuar a, ka nu kâ atanga chhuak ngai lo tur, thu huatthlala a chhuak ta hial, keimah vang chu a ni ngei sia le.

Min hmu chu min rawn pan nghalin haw turin min ti a, Hruaia pawh a lo inrawlh ve sek, " Hepa nen hian eng nge in tih? ", Hruaia kawk chung chuan ka ti a, " Hepa a? Ani hi chu awm lo sela chuan he zak thei lo nu hian a thlêm che tih pawh ka hre tawp nang ", ka nu chuan a ti nghal thuai a, " Ka nu, hepa hi ring suh, amah zawk hi alawm zak thei lo leh nunrawng; âwmnem zawkte laka che rawra ṭhin mi a nih hi, Kimi", ka lu ka thing a, "Miss Kimi hian thiam lohna a nei lo, min thlêm lo, keimah zawk hian alawm pan", ka nu darah chuan vuanin min hrethiam turin ka duh takzet a ni tih a hriat theih nan ka melh ralh bawk a, Kimi, miss Kimi ka kai tho nghal bawk.

A sam pawr chhip chhep te chu ka hui ṭha mawlh mawlh a, a bek veilam a lo duk chur!

Ka nuin hetiang hi chu a ti thei lo ang, a rukin ka ṭang ṭung a, che thei lek loa sawisak ve mai ni ka nâp, " I hmu maw? An awmdan hi, ka nupui khawih leh buaipui chu kei, a pasal hi ka ni dawn lo em ni? I fapa hian min tithangtlawm hle mai", nupui maw? Hrep tak a!

" Nupui maw? A sawi pawh kha i zak lo em ni? ", tih leh hnek tuma ka che chu Kimi'n ka kâwngah min lo kuahin, " A tawk", khur hlawk hlawk chung hian a ti a, ka nu pawh chuan min bengin, " Zomuanpui", ka khawng awt ni ber, ka nuin hetianga min tih ka hriat vawi khatna, ka tet lai te chuan min vua pawh a ni mahna, mahse; hei chu a dan a dang tlat.

Ka nu chu en pawh ka en ngam lo, miss Kimin nghet taka min kuahna chu nghet takin ka hum ve a, a tap khûr zawih zawih mai bawk.

Muangchangin ka nu chu ka en a, a mita natna thûk tak lo langchhuak erawh hmuh ka duh loh ber te zinga mi a ni, " Ka nu, ka hmangaih a ni",

" Zomuanpui", ka hmai a ri leh nghal chawrh! " Aw... ka fapa", ka nu chuan min benna tuai nuah nuah chung chuan a ti a, Hruaia'n a ti thei lo nge ni, bang chhir zawtin a chhuak ta daih a.

" Bawiha, hetiang tur a ni ngai lo", ka âwm chum taih taihin ka nuin a ti leh a, ka hnung lamah ka hmangaih hliam tuam dam a ngai a, ka hma lamah a fapa a hmangaihna avanga hliam tuam dam tur a awm leh a, ka buai a ni. Boruak dang hip tur awm se ka va ti tak, min chhan chhuaktu tur ka mamawh!

A hnu deuhah ka nu chuan Kimi, miss Kimi hnenah chuan min hmangaih ve nge hmangaih ve lo tih a zawt ta a, dam thlupin ka nu chu ka lo khap ve vat bawk. Miss Kimi chu a ngawi reng a, a insut feih feih, ka nu ai mah chuan keimah hian ka nghakhlel zawkin ka hria.

A âw a thian deuh kharh a, " Aw, ka hmangaih alawm", ka kuah nghal thlawp, engmah sawi tur ka hre lo, " Ka zirlai a nihna angin, a thatna hi ka duh ber a ni", a tih zawm leh chuan muangchanga ka kuahna ata inla sawnin, " Engmaw i sawi? Zi, zirlai ang chauhin maw? ", bah deuh nuaiin ka ti a, a lo bu nghut.

" Zirlai ang chauhin maw? Ka mitah tak enin sawi leh rawh ", a dara vuana thing deuh sak sakin ka ti a, ka vin deuh nghe nghe.

Ka nu chuan min lo pawmin, " Kha i hria maw, tirawh Bawiha, i haw ang, lo kal tawh rawh", tiin min chhuahpui a, ka mit a en miah lo, dawt a sawi a ni hrim hrim.

" Bawiha, mahni aia upa an ngaizawng ngai lo, i naupanchhe rilru vang mai mai leh, a fel i lo tih vang pawh a ni ang, chumi vang a ni ang, hmangaih anga i inngaih. Bawiha, i nu thu hi awih rawh aw", ka hre lo, ka hre lo, ka nu thu hi ka awih thei ang em?

Ngati nge, naupangchhia min tih bik ziah? Ka hmangaih ve pawh ngainatnaah min chhuahsak, buaina hi tinge ka tawh reng bik zel le?

" Khua a vawt ṭanin boruak a inthlak ṭan a, hritlang lo turin in fimkhur nasa dawn nia, miss Kimi pawh school a rawn kal theih loh phah", sir David-an a tih chuan ka lehkhabu ken ka thlauh ri dawt nghal a, hriatthiam hmel takin sir David-an min rawn en vat.

Nilengin ka rilru a luah a, zirlai pawh ka ngaihtuah thei lo, school aṭanga haw ka tum chuan sir David-an min rawn nangching hman, huiha.

Ban dar a rik chuan engkhaw sawi set set loin ka tlanchhuak nghal a, Lalruatkimi ka ngaihtuah takzet. Rickshaw dinna hmun ka thlen chuan ka nu nen kan inhmu hlawl, min lo hruai dawn niin, kal lawkna tur ka neih thu ka sawi chuan min zui tur thu a sawi ta mai a, kan ṭhianpa ka tih pawhin min zui a tum tlat.

Kan zirtirtu dam lo kan mai tur ka nih thu ka sawi chuan min rawn chelh ta vat, ka ruala a kal tur thu a sawi leh, hruai ve ka duh chiah si loh avang chuan kan inzui haw ta zawk a.

Zanah pawh chuan Lalruatkimi ringawt ka ngaihtuah a, Au Mami a awm ti chu ka hre tho naa, keimah ngeiin damdawi tal pek ka duh.

A rukin ka chhuak leh ta a, mahse; Kimi in luahna thlen hma, Bazar venga bus stand bulah chuan Tu emaw hian min rawn su thlu a; ka thawh hma hmain amah zawk chuan min rawn pawt thoin min hnek thal ta tawp mai, ner sawka hnek tuma ka thawh ve chuan Rinawma lek lo niin, thil awmzia zawh tuma ka âng chiah tihah min hnek leh ta mai.

Sawma, Rintlaka, Ropuia leh Johny-a te pawh lo thleng nghalin Rinawma an lo chelh bet a, a kein min lo la tlawh hram, " Eng nge maw i hriat le? ", vin deuh tak hian ka ti a, talchhuakin ka kawr nghawngah min rawn ṭham, " Hey, nangni ho kha, hepa hi artui lo pe teh u", thinrim inseh ruh ṭeuh chung hian a ti ta a, " Maw? ", kan ti rual dual. 

" Kan zinga fing ber ka nih hi, i nuin min hrilh aṭang khan ka rinhlelhna che a dik tih a rawn nemnghet. I naupanchhe rilru aṭanga harhchhuah i tum miah lo em ni? Puitling, mipa ve taka i inngai a nih chuan harhchhuak tawh tur i ni", min thing thlu nghal ṭhuai a, ka lo nui hak.

Ṭhen sawk chungin ka ding kun deuh a, thaw halh chunga enin, " Min hnek leh rawh", ka thal nghal, min hnek leh turin ka ti leh a, min hnek ve leh mai bawk. Sawman duhtawk turin min lo ti a, ka la duhtawk lo nasa, ka nuin a hria, hepa pui roh pawh hian a hria, a patea leh ka nu chungchang pawh a hre ngei ngei ang.

Min hnek leh turin ka ti a, Sir David-an ka nu a lo hrilh ngei e, Hruaia a lo pawng pawrh ve bawk a. Min hnek leh lai chuan a patea te chu a lo sawi chhuak ta, eng nga ti nge hepa hi a fin em em mai le? Hmeichhia chu ni ila ka chhuah hauh lo ang, Aaa, a zei lo awm em mai.

Khi deuh sakin Rinawma kawr nghawng chu ka ṭham ve a, mahse; ka chakna a hnek chhuak zo nge mawni, zawi hnuangin leiah ka mu ta tawp a. Rinawma chuan ka kawr nghawng ṭhama a kut lehlam hum ruha min tin uai chung chuan tho turin min ti a.

" A tawk, duhtawk rawh u. Chuan Eddie, in zirtirtu nen in inngaizawng maw? ", Sawma chuan a lo ti a, Chhura tak hi chu aw, a ho zo leh vek dawn e. Ka bulah lo mu ve hlawmin Van lam ngawi rengin kan en hlawm a, engtak chu ngaihtuah hlawm ang i maw?

" Miss Kimi chu a timak hle mai a, engtin nge a zirlai te a ngaihzawn theih le. Bakah Eddie, nangpawhin engtin nge i duh theih? Mahse, a duhawm reuh, han inchei parh ve deuh sela chuan a sexy ngawt ang. Takah, ka ngaihtuah a, nupui te kan nei ve duh ngei awm si a, virgin ngata neih tur chu, ka ngaihtuah hian zan khatnaah engtin nge ni ang le?

Rinawma phei chu virgin ngan ngata leng tar tur, keini hi chu kan la zia ta a, kei chu expi neih mai pawh ka hnial lo. Ni tak e, ka nuin sawmpahnih hi ka fail chuan Bawng chaw i phur ang min ti, ka fail awm tawp dawn si lo a",

" Sawma? ",

" Aw",

" Sawm chhur chheh chhawha tih hi i birth certificate-ah chuan(chuang) tir tawh rawh", Rinawman a ti a, kan lo nui hawk hawk, " In va nui bal hlawm e, Tlawngah zu su rawh u", Sawman a ti hlak a, " Ka ti tak tak, ka nuin Bawng chaw min phurhtir a tum, a fapa ka ni lo a ni ang", amah bawk chuan a ti leh.

Lo len an tum a, kei ka lo chhuak ru Rinawman min hmuin min lo umzui ta a ni. Ka kal tur min dang tlat bawk a, kan in thleng min zuiin min ven zankhua an Tum!

Miss Kimi nen kan inbe lo leh char char a, huiii, lemchang thiam lawmman hi dawng tur chu kan ni ve mawle kan pahnih hian.

Fimkhurin inthup tum viau ṭhin mah se, min ngaiin min thlahlel tih chu ka hai bik lo, mahse; min hlat tual tual tho si.

Second term exam inbuatsaih nan chawlh pawh kan nei ṭep e.

" Term exam tawpna tur kan nei dawn a, sawmpahnih tan chuan final exam chu Board a ni tawh, chuvangin zir nasa ang che u, a bikin sawmpahnih ho kha, pawl sawm ho hi chu ngaihtuahawm an ni lo tih ka hria", sawmpahnih ho a bikin min ti nia, Sir David-a tak hi chu aw, pawl sawm ho pawh an ngaihtuahawm.

Thlasik lai chuan line-up hi a ninawm loh a nuam zawk.

Tuna ka tih tur hian eng harsatna nge a thlen dawn ka hre lo, mahse; ka ti ngei dawn.

Kan class in line-na, ka dinna aṭanga pên chhuakin miss Kimi hmaah tak ka va ding a, School pumpui hmaah ka fawp ta hmiah!!!!!

Thinrim ṭeuh chungin Office aṭangin ka chhuak a, engvangin nge min hmangaih a ni tih a sawi ve mai loh. Min benna chu ka tuai heuh heuh a, hemi ai chuan ka rilru, ka thinlung a nâ zawk daih.

Classroom lam pana ka kal chhung zawng chu, min lo en doh doh hlawm a, min sawichhe tawk leh min fak tawk te pawh an awm, engah vak mah ka ngai chuang lo. An sawi zinga ka duh deuh chu, " Van pa rem rem tak", hei hi ka duh. Mipa ka nih chuan ka pa tur reng a ni.

Classroom ka luh chuan min en hrek hrek hlawm a, intivei larhin ka ṭhutna pan dingin ka ṭhu nghal, Rinawma a lo hui pap pap bawk, chutah le, " Eddie chu le, va han bawn rem rem em ve, wowww", an kut tipir vah hlawm hian kan class mipa hoin an lo ti sup sup a, " In ngaihtuahna hi chu in hmang lo hlawm thlawt alawm, miss Kimi ngaihtuah tel ve ta che u, nang kha; Sawma ai pawhin i chhur zawk, hahthlak lutuk mai, miss Kimi chu engtiang takin ti ang maw, hnawhchhuah a ni dawn nge nangmah zawk hi hnawhchhuah i ni zawk dawn? I chhia leh ṭha hriatna a bo zo tawh em ni? Naupangchhia lutuk, puitlin a hun ve tawh, ka hnek leh dawn che mile? I chhah em mai, ka sawi peih tawh lo", Rinawma chuan a ti kharh kharh a, a thinrim ve khanglang nge mawni!

Mak ti tak hian kan en hraw hlawm a, " Rinawma hian ruih a nei em ni? ", zawi sup hian min lo ti a, ka lo khi deuh salh, a ṭawng tam ngai vak lo a, mak an ti pawh a awm reng e.

Mahse, a thusawi chu ka ngaihtuah ta neuh neuh a, a dik phian dawnin ka hria; ka ât luat hi a tuar thei dawn tlat, eng nge maw ka tih tak?

" A ni thei lo", ti hlakin din chhuah ka rual nghal a, classroom ka chhuahsan nghal bawk. Office lamah chuan a tlanin ka tlan a, Sir David-an min lo dang, min hau hrep a, min hauhna thu phei chu ka hre chuang lo, tunah tak hi chuan min vaw hrep dawn pawh ni se, ka hnial hauh lo ang.

Office chhungah ka luh a phal lo a, pawn aṭangin Office chhungah an phu nasa tih ka hmu thei, miss Kimi phei chu ka hmu tawh hauh lo, engtin nge a awm ang le?

" Sir, min ngaidam rawh, mahse; Principal leh miss Kimi min hmuh tir la", ngen ngawl takin sir David-a bulah ka ti ta ngawt a, a beng kawrawngah a luh hmel lo ropui, " Fimkhur tluk hi chu a awm lo asin, insumtheihna nen", muang cherh chawrh, khap fap fap chung hian a ti a, huiha!

Ka nu leh ka ṭhiante ho chuan chik zet hian min en kar hlawm a, ṭhutthlengah, naupang fel tak ni awm fahran hian ka inkuangkuah ṭhu thân, ka kun tlat bawk; a changing ka en leh zeuh zeuh hlawm bawk. Engmah sawi loin an ngawi reng a, keipawh ka ngawi reng, sawi tur a vâng teh e, kan Chhura lam ka en deuh reng mai a, a ngawi ve reng mai ni.

" Eddie", a tawpa tawpah, Chhura nge nge, " Engtia awm nge i tum? ",

" Ka hre lo",

" I hre tur a ni", ka nu chuan thinrim tak hian a lo ti nghal a, " Thu reng awih lo lutuk", inhru zeuh chungin ka nu chuan a ti leh a, ka duh vang pawh ni lo. Dar sawm thleng ka ṭhu ngawt ngawt a, min thawhsan lah an tum bik lo, ka mawng a kham tawh ropui; miss Kimi bula kal ka duh asin le, keimah avangin hnawh chhuah a tawh phah a, harsatnain a hmuah reng tawh laiin keiin ka lo belhchhah sak zui; hrehawm a va ti dawn tak!

" Engpawh ni se, hetia awm ngawt thu va ni suh; haw tawh mai rawh u, zan lah a rei tawh si, in ṭhianpa ve lel lul hi ngaihsak pawh a phu lo", ka nu chuan a ti ta a, a pindan lamah min luhsan nghal daih bawk. Ka indawm kun tlawk tlawk a, keimah lam ringawt ka lo inngaihtuah vang a ni.

Keipawh chuan haw turin ka ti a, an duh tlat lo, ka pindan lamah kan inzui lut hlawm a, " Hmela le, i va han che bawn rem rem awm ve; School khata kan lo kal lo chu aw, ka va han hmu chak tak che; ka muah hlup dawn che mile", Sawma chuan a ti bawrh bawrh nghal a, a nui ṭhaw mai bawk.

" Sawm Chhura tak hi chu, tunah chuan mi chhur pahnih in awm tawh", Rinawma chuan a lo ti vat a, Sawma ner sawkin, " I thu lo, lo inrawlh ve suh", hahthlak ṭhin teh e.

Ka nu pindan ka kîk karh karh a, ka au pah bawk; chhung lamah a inkalh tlat avangin ka lut thei mai lo. Rinawma koin min biak sak turin ka ti a, Rinawma chuan pindan kawngka chu kik vein biak a duh thu a sawi a, mak tak maiin ka nu chuan kawng hawnin an inzui lut, engtak chu sawi ang maw?

Choka lamah ka pheisan ta daih a, " In school cctv ka va en chak tak, an la paih lo ang tiraw? Ka en chak e", Sawma chuan min lo ti nghal a, " Sawma, i tilui ve hrim hrim ṭhin a mile, a hun leh hmun hi hriat a ṭha", tiin Ropuia'n a lo khak vat, " Ni e, khatiang kha chu intih pa-na chi pawh ni lo, a ṭhing em mai", Johny-an a lo ti ve bawk, Rintlaka pawhin, " Miss Kimi chu ka khawngaih, Eddie; tun chu ka thiam lo che, i chet dan a ṭha lo lutuk tlat, i fing hle emawni ka lo ti a, ka rin aiin i lo â", a ti a, min hau ta luai luai, Sawma pawh an hau tel, kan lu thak lo pui kan hiat kan hiat mai ni, ka nu leh Rinawma lah an rei.

Ka ṭhianten min haw san lawkin, min riahpui leh tura an lo kal leh tur thu sawiin an haw ta sang sang hlawm a; min riahpui tih takah min veng a ni deuh ber ang chu, miss Kimi ngaihtuah hlawm hle chung siin ka hmuh an phal lo lawi si.

Ka nu pawh tlemin a lungawi lohna a zia deuh a, mahse; a hmel erawh hmuh a la nuam lutuk lo, exam chawlhin min nang chiah chiah bawk a, a zia phian.

Ka pindanah rem leh rem loin kan inhnawh ṭun hlawm a, Sawma; a chhur ber tih takah, a hun leh hmun thliar thiam vak lo mah se, kan hlimpui ber a ni miau bawk si a, lehkha pawh a zir tak tak theih loh, kan khi ṭhaw reng hlawm mai ni.

Phone ka hmet êng mai mai a, eng phei chu ka ti lo; ka online lo bawk a, games pawh ka khel ni chuang chiah si lo hian ka thai kual vel mai mai a ni.

Message a rawn thleng thut a, " Edd, min chhan rawh", ka ṭhu chhuak chiang teh e, miss Kimi hnen aṭang ngeiin a ni! Ka ṭhiante ka han en a, an lo mu tui tawh lutuk, sana ka en a, dar sawmpakhat a pel awrh chauh; engtin nge ka tih ang?

Thawm dim takin pindan ka chhuahsan a, bike nen ka kal a nih chuan ka thawmah an hre vek dawn bawk si, chubakah bike chahbi dahna ka hre lo, zawn chi ni tawh bawk lo.

Kein ka kal ta ngawt a, a tlanin ka tlan ni ber, " Lo tuar fan fan rawh aw, ka lo thleng ṭep", ti rilru nuah nuah chungin ka tlan zel a, nun hi a hahthlah ve hrim hrim nge, keimahni hian hahthlak turin kan insiam zawk?

Bazar veng ka pelh dawn chiaha miss Kimi in luahna building ka thleng dawn tihah Police motor hi ka hnungah a lo tlan a, min ti dingin Station lamah min hruai ta daih mai!

" Engmah tihsual ka nei lo, ruih pawh ka nei lo", tiin ka au a, min vuak an ṭhulh chuang lo; ka inti luhlul a, " A nâ", ti pawhin ka au chhuak duh lo, ka au chhuah chhunah tihsual ka neih loh thu bakin ka au chhuak lo, mai mai hlawm a.

Pakhat chuan ka ngeng thu sawi pahin min vaw thlu tawp mai a, min vuakna ai mah chuan mi pakhat ka ngaihtuahnain min tinâ zawk, tunah hian engtin tak awm ang maw?

" A tawk rih", tia lo titawp tu chu tunge a ni tih ka hre chiang khawp, khi deuh sakin, " Hmela le", ti paha thoin ka va hnek chawrh a, a inrin loh lai ni bawk a, a pai chawn chawn mai.

Police min vawtu te ho bawkin min rawn man bet a, kei talchhuah tumin ka bei fat fat ve bawk. " Nang naupang mai mai", min rawn hnek ve nghal ṭhuai a, Police ho hian min man bet lo se chu ka va khawih let dawn rua em!

Miss Kimi phone lek kang va vain, " I hmangaih tak zet a nih dawn hi", min tham lo tih hriat zet hian a nui a, thinrimnain a hmel a inthlak nghal.

Min theh thlu tawpin min kalsan a, ka chau lutuk chu chet pawh ka che peih lo, thei leh thei loin ka inbeng kang a, ka intihharh hram hram a ngai.

Lock-up-ah ka lo awm reng chu niin an la kalh daih zui! Min chhuah tir turin ka au hlawm a, tumah an rawn lang lo, a rehin a reh ṭhup mai. " Edd, Aw Lalpa le! I tha maw?", rang lutuk tak hian min lo pan nghal a, thirban karah a kut pahnih rawn rawlhin ka biang tawn tawnah a dawm a, " Naupang luhlul lutuk mai", min piai sawkin a ti a, a ṭap zui nghal, a tahbelh ṭhin a nia aw.

Chutih lai takin a hnung lam aṭangin a chhipah ṭhamin a phih thlu tawp mai a, " Zawnga", tia au nghalin thirban ka sâwi vak vak, a kawnghren phelhin a hlap zui nghal bawrh bawrh a, " Hmela, ka that dawn che", keia thu ngaih pawimawh loh hmel takin a chhir zui leh zat, a vial nghal ngawih ngawih, " Hmela, ka that dawn che, dawihzeppa", chau ruai hian ka ti a, ka ṭhingṭhi hnawk, " Khawngaihtakin ti tawh suh, ka ngen mawlh mawlh che", ka ti leh a, Lalruatkimi nâ tuar hmel leh rûm thawm hriat tluka hrehawm kha tun thleng hian ka la tawng leh lo, ka mit hmuh ngeiah duhtawkin a sawisa a, ka chhan thei si lo.

Hruaia chuan Kimi û, a hmeichhe khawi chunga a lawm lohna te; a nu leh pa leh a nuṭa te chunga a lawm lohna te sawiin bangah te chuan a intauh tir chawrh chawrh a.

A hringtu ngei chunga a lungawih lohna te leh, a thawhna School-a a lungawi lohna lam nen chuan a chungah chuan a hrithla mawlh mawlh, tih theih nei si loin thirban chhungah ka lo inhrosa vak vak ringawt, " Dawihzeppa, i lungawi lohna tihsual nei lo hnena hrikthlak khan awmzia awm lo, mi dawihzep tak i ni, he thirban chhung aṭanga min chhuah tir hian min lo hmachhawn rawh", rum nghut nghutin ka ti a, ka thinrimna sosang lutuk hian min tichau thei takngial dawn, keipawh chuan thirban te chu hawn tumin ka tlawh vak vak a, awmzia awm lo, hrep chuan.

A chhipah ṭhamin ka lamah a rawn phei pui a, " Ka ta min chuhpui te i tum maw? I zak lo em ni, naupang te te si. Hei hi ka ta a nih hi", ti pahin a âwm a ṭham vak, " Tunah chuan khawih ka phal reng reng hleinem, mahse maw; a hun a thlen vek vek chuan a nâ khawp ang", tih leh fawh a rual a, miss Kimi a tal faih faih, lehlam hawiin ka kut ka hum ruh sauh sauh thung.

Chutah, inla hrangin thirbanah chuan a rawn tauhtir leh chawrh, a hmui a thi ser ser a, a mitmenga hlauhna leh thinrimna inpawlh sawp nuai chu hmuh hmaih theih a ni hauh lo.

" Ka that khawp ang che", ka tih theih tawk rum taka melh chung hian ka ti a, " I puitlin ve hunah", deuhsawh taka min nuih hakin miss Kimi chhipa ṭham chung chuan min kalsan a, " Zawnga", tiin thirban sâwi nghek nghekin ka au a, Constable pakhat lo kalin kawng min lo hawn sak nghal, ka tlanchhuak vat.

Pawn ka chhuah chuan a lo tlanliam hman tawh a, mahse; Bridge chunga miss Kimi lo kal kun ngauh ngauh ka hmuh chuan a lam panin ka tlan thuai a, ka lama kuai her lawkin a hmui thi ser ser chu ka hmui bawk chuan ka hrukfai sak a, tlem te talin a nâ a chhawk ngei ka beisei!!!

A ṭap lo a, a lung erawh a phu dup dup thung; duhthawh takin ka fawp zel a, chutiangin Kimi pawhin; eng nge kan chungah thleng tih lam reng a lang tawh lo, ka ngaihtuahnaah pawh a awm tawh lo, a bo daih!

Kan inthlah hnua kan han hawi chhuak chu, current a lo thim vek a, street light êng hmuh tur pawh awm lo, mahse; Thla a êng lutuk, Thla ên zan tih ka hre ve chiah, in melh ralh ralhin, " Kawmzawl", kan ti rual a, kan innuih dun ngawt. " Ka chau", a tih avangin ka pua a, a zâng em em mai lehnghal.

Thla a êng bawk si a , a nuam takzet a ni; hetiang hi ni thei reng se la!

Building kawta ka ṭhiante leh Au Mami lo ding reng te chu ka hmuhin ka ding chawt a, miss Kimi pawh chhukin ka bulah a lo ding a, ka kut a rawn chelh a min rawn nuih chho sen sen, a hahdam hmel em em mai bawk.

Engtin mahin min ti lo a, ṭawngkam khat pawhin min khak lo; keini pahnih lah kan inhliam nel nual avangin min hrethiam ve chek a ni ang chu! Inmangṭha nan kuahin a chalah ka fawp vang vang a, a chal leh ka chal sik tirin, " Muttui mangṭha", zawi sup hian ka ti a, " Muttui mangṭha", zawi sepin a ti ve leh a, kan inmangṭha tawpna ber leh kan inhmuhna hnuhnung ber tur a ni tih tuin nge hre bik ang le?

Rinawman min phurin kan hnungah Sawma te hoin min zui a, Kawmzawla kan len dun lai ka chhui zel a, inhera lenpui leh tura va hruai ka duh rum rum, mahse; ka ṭhiante leh Au Mami ka zahna chuan min dang ta a ni.

A tukah ka nuin min hmuh loh nan pindan ka chhuah san lo a, Rinawman eng dawt nge a sawi lah ka hre lo. Ka ṭhiante an in lama haw tawh tura ka tihin an duh tlat lo a, an chhungte an hmai zahawm tawh tak tak a ni, " Tihian, study camp kan nei angah ngai mai rawh", min tithla leh ringawt zel.

Miss Kimi ka call a, switch off a inti tlat; ka ṭhiante ka hrilh a, a battery a zo nia an ngaih thu min hrilh a, keipawh chuan ka awih ve mai bawk. Tuilum sa ver vawrin ka inbual a, ka dam sawng sawng tawh mai. Miss Kimi biak leh ka tum a, switch off a inti zel, lehkha kan zir a, ka rilruah a lut thei chuang lo.

Ka ṭhiante bulah ka kalna tur hrilhin ka chhuahsan nghal hlawm a, min rawn auh zuina pawh ka hre reng, ka luhlul ka chhuah leh tlat, min rawn zui leh hlawm ang chu maw.

" Khawiah nge Kimi?",

" A kal tawh, a haw tawh ka tihna; ka thlah ka lo haw chiah keipawh", 

" Ngawi teh ngawi teh Eddie, ding lawk teh", tiin ka kal tur chu Au mamin ka kuta rawn manin min tiding a, " A kal tawh, i nang tawh lo ang. Eddie, ka sawi kha i la hria em? Kimi pawhin a duh ber chu i hlawhtlin hi a ni, i venhim theihna tur pawh a ni.

Keipawh, kan in lamah ka haw tawh dawn a, lehkha ṭha takin zir la hlawhtling ngei bawk ang che, thil tipunlun tawh lo turin, fing tak leh fimkhur chung siin", thaw hrawk chungin, " Awle", ka ti a, Au Mami hmelah hlimna a rawn lang nghal, ka tihah ve ṭhin lutuk tih ka hriatin keimahah inthlahrunna a lo awm chawpchilh. 

" I tan Kimin lehkha a hnutchhiah a".

Au mami ka thlah a, Pukpuia awm an ni bawk a, Kawmzawlah ka tlang nghal. Ka ṭhianten min rawn zui miah lo bawk, kan inah khan an la awm char char turah chuan ka ngai ngawt a!

***Edd, min ngaihsakna leh min puihnaah lawmthu ka sawi a, ka la tawn ngai loh hun hlimawm tak tak min hmanpui bawk a, ka theihnghilh tawh ngai lo ang, ka lawm lutuk aw.

Ka sawi awm a nih leh nih loh chu ka hre lo, mahse; i bulah chuan ka hlimin ka him a, ka thla a muang bawk. Chuvang chuan i bula awm reng ka duh a ni, ka lo nghak ang che aw. Ka lo nghak reng ang che*

Lehkhaphek chu hrual hlawm nawk nawka paih ka tum chu, ka kut man behin a awm ta tlat. 

Ka paih leh thei ta lo, lehkha zir lo hian a hlawhtlin nghal theih mai lo em ni le? 

A tuarna tipunlun zawnga ka awm reng avangin ngaihdam pawh ka dil hman lo. Lainatawmi ka ti mai! 

Term exam kan zo a, Christmas leh Kum thar thawveng takin hman tum mah ila; exam dang hmachhawn tur a awm leh khiau avangin duh ang tak pawhin kan hmang lo. Ṭhianpa Rinhlua leh ka miss Kimi te, ka ngai ngawih ngawih, ka pa chu chiang sa!

Board exam hma lawkin ka nuin pasal a nei a, a pasal tur chu kan hriat ve vek tawh kha. Ka nu chuan min hnial deuh naa, kei ve mai hian khawharna ka hrethiam ve tlat tawh si a, ka pa pawhin tiṭha min ti ngawt ang.

An inneihni chuan hlimna mittui a luang a, ka nu hlim hmel mawlh mai chu thlir nin a har a ni. Nautei leh Duata te chuan min la nel vak lo a, Rinawma an bel chawt; a hnu deuhah chuan keimah zawkin intihnel ka tum a, ka be siam siam a, ṭha takin min chhang ve zel a, ka nau thar te hi an felin an hmelṭha phuk phuk a nia.

Tlaiah ka bike-in Nautei leh Duata te phurin ka tlan kual pui a, kan hnungah Rinawman min lo zui ve bawk. A hnu deuhah Duata chu Rinawman a phur ta daih a, " Didi", Nautein nui sen sen chunga a tih chuan ka lo nuih saih a.

Melte-ah ka nuin min awmsan ta daih!

Kei erawh kan inah ka awm a, ka ṭhiante hian min awmpui chawt a ni ber. Ka nuin min ngaihtuah deuh chang hian an bulah ni rei lo te te hi ka va awm ve bawk.

Kan inah study camp kan nei a, hui; kan ri chel chul mai ni, " Apple fakna: Apple pakhat hi leiah a tla a, Arts zirlai hoin an hmuh chuan ei atan an rawt a, Commerce zirlai hoin an hmuh vein a hlawkna tur an chhut ve bawk; Science zirlai ho kir kerin an hmu ve leh a, engtin nge leiah hian a lo tlak theih? Ve kawkalh hlawm tak hian a, leiah khan tlak tir ve mai mai tur a nia; in Pu Newton-a vang khan class-10 thleng Science kan zir a e, ka rilru hi a nâ tawp thei lo. Lalrinawman a zir hi chu a awm hliah hliah, Zomuanpuian ka zir ve e a ti hi chu, hahthlak, a chut lo ropui si, a inhmeh ve lo, a nawi thei ropui si", Sawman a ti nuah nuah a.

" Science zirlai an chut tur a ni tih khawi lehkhabuah mah a in ziak lo, chhur chheh chhawh lutuk mai", ka lo ti a, " Nangpawh, commerce zir siin IPS nih i tum tho alawm le", Johny-an a lo ti ve, " Kan nih tum te leh kan zir te hi a inang lo bawk si a", Rintlakan a lo ti ve leh bawk, kan indaihzai thei a nia.

Board exam kan hmachhawn ṭan a, nikhat ni aṭangin ka zam chhe der! 

Pathian hruaina zarah tluang takin exam chu kan zo ve hram a, khumah mu thla rawkin inchung ka en vang vang a, " Ka pa, Rinhlua nen in dam ṭhat lai a ni em? Ka ngai lutuk che u, Rinhlu; Hlua", ka ti zawi rilru a, ka hrawkah min hnawh nghal, ka va ngai ṭhin tak em!

" Eddie, i ṭha maw?",

" Ka ṭha alawm", khumah muang changin ka ṭhu tho a, Rinawma a rawn ṭhu thla ve nghal, " Ka ngaihtuah a, bike-te hi engvanga nei ringawt nge maw kan nih le, mobile phone te pawh. Hengte hi nei lo ila, intlansiak te kan ti, a van lo ṭul lo tak. Miss Kimi pawh ka tawn phah lo tur, Zirtirtu leh zirlai satliah ang khan kan inhre mai mai awm si a, tun thlengin Rinhlua pawh kan zingah a la awm ve reng tur hi a nia", indawm kun chungin ka ti a.

" Ni lo e, heng kan duh dan leh kan remruat ang a nih lohna te hian alawm mi puitling ni tura min chher hriam tu chu. Ti teh, Lunglei hi fang kual ang hmiang, rilru tihthawven nan, ṭhiante ho sawm pah ila", min kuaha ka dar beng thek thek chungin Rinawma chuan a ti a, ani hi zawng a puitling teh e.

Han tlan chiah ila tih leh tlanchhuah kan rual a, chhun pachanga tlan kan ni bawk a, thlan a tla bawrh bawrh thei, khua a lum ṭan leh tawh bawk nen.

Ropuian ice-cream min treat hlawm a, ṭha thei a nia, " Kan Bawng tuta fel zia hi chu aw", Sawman a tih chuan no lo zetin Ropuian a melh vawng vawng.

Police Station kan thlen chuan ka ding deuh dat a, ka han en a, eng nga tinge fuihpawrh theiha an awm le? Tiin ka ngaihtuah reuh reuh a, bridge chu ka han thlir leh a, Kimi nena kan inhmuh hnuhnun berna hmun, ka tan chuan hmun duhawm leh hlu tak a ni.

" Eddie, Kawmzawl lamah va leng ang u", Rintlakan min lo nghawk zeuh a, ka harh chhuak zawk. Ka bu nghat a, kan tlan leh nghal vat.

" Eddie, en rawh", helmet khum lo ila chu, ka lu a keh thei ang. Leia Bike ka tlukpui hnuin thui vak lo kan tawlh leh a ni a. 

Ṭhianten min buaipui a, mitthlaah Miss Kimi a lang uar uar. 

****Present day*******

" Ka pu, ka pu", tiin min sawi dat dat a, engtin nge ka awm? Ka lu a nâ bur mai bawk, thei leh thei loa ka meng chu thisen ka lo kai nuai mai, leiah hian ka lo mu a, a thiam ang angin Sangan min lo bawisawm chu niin. Kan motor ka va thlek a, a hma lam a lo sâwi kawi nasa mai, brake fail-in kopang kan su kha a ni reng a, a awm reng e.

Sanga erawh a sawi danin a inveng hman a, hliam a ngah lutuk lo, rin aiin a hil phian. Kei erawh ka lu ka lo sawh a, ka biang ki veilam a nâ ṭhum mai bawk. Dar zat ka en a, zing lam dar ruk, nikhua ka van hre lo rei awm em em ve, hrep tak a.

Zero khaw daiah kan accident a, Serkawr kan thleng hman tur hi a ni hrim hrim. Sangan khalh min chuh a, keiin ka phal tlat lo thung, a dan ngai tea kawng chin min hrilhtu leh phone call ngaichangtu ni leh turin ka ti a, lungawilo vak chungin 'aw' a pawh hram. Ka lu tuam ṭha sauh sauhin, vung takin kan tlan lehnghal.

Sawma kan thlen chin leh kan reh vung vung tak chhan te ka hrilh zung zung a, kan kawng a lo thian fai leh vek, " Sanga kha khalh tir mai teh, a hun takah in thleng em em ang, i nâ lo hlauh a, a lehpek a awm ang e aw", a lo ti a, min ngaihtuah lo turin ka ti. 

Dâr ri ral ral thawm ka hriat avangin ka hmanhmawh zual a, khawiah nge Biak In a awm tih pawh ka hre lo, map-ah en thuai turin ka ti a, signal a la ṭha lo zui.

Tichuan, dâr ri lam chu ka pan ta ngawt a, a ni lo lamah kan tlan thlawn lehnghal, kan kawi kan kawi a, dâr ri lah a tawp dawn tawh.

" Ka pu, ding lawk teh", tiin Sanga a au tuar a, ka ding nghal chawt, " Ka pu, i chi-ai avangin i ngaihtuahna i hmang thei lo a nih kha, fim takin, i ngaihtuahna hmang rawh", hlauthawng tak hian a ti a, thawk la halh halhin ka inngaihtuah ṭha ve leh ta a.

Dâr ri ka hriatna chu ka han chhui ṭha leh tê tê, muangchangin ka tlan tawh bawk. Tichuan, engtin tin emaw Biak in tual kan pawh ta!

An lo zi hut hut a, chhung lamah pawh an khat vek a nih hmel.

Rang takin motor aṭangin ka chhuk a, Biak in chhungah, " Lalruatkim", ti chunga ka lut chu min lo en nghal ṭhup. Ka kal hnai zel a, ka mi hmuh chuan min tithinrim zual sawt, " Khawiah nge Lalruatkimi?", chang fek fawk hian ka ti a, a lo khi suk; a bula ding, mo thuama inthuam saw Lalruatkimi a ni hauh lo, a hmeichhe khawi kha a ni.

Lalruatkimi awmna ka zawt leh, " A awm tawh lo", Kimi u chuan min lo ti a, " Khawiah nge a awm ka ti reng alawm",

" A awm lo tih mawlh mawlh pawh a, i IAS nihna i rawn chhuang deuh em mawni le? Rawn chhuang pawh ni la, naupang tho i la ni", Hruaia chuan thip zeta min en chung hian a lo ti a, " Biak in chhung hi chu i zah hram teh ang u", an lo ti sup sup a, thil awmdan min zawt nghal sup sup bawk, " Ka pu, pawn lamah chhuak ang", Sangan ka kut rawn vuan hian a ti a, kei erawh chuan ka hmaa ding hi khawih ka chak takzet.

" Eng nge thil awmzia hi?", Pastor nge mawni chuan a lo ti a, ka hawi ka hawi a Kimi reng hmuh tur a awm lo, " Khawiah nge Lalruatkimi",

" Ka pu, ti teh i chhuak ang",

" Min thlah teh", a awmna an sawi bawk si lo, min en ang he haw hlawm a, " Khawiah nge a awm ka tih chu? Lalruatkim", thinrim ṭeuh chung hian ka ti a, Kimi chu ka au vak vak bawk, tumahin min chhang lo a, thawm pawh an siam hek lo, Sangan min pawh kal a tum ve reng bawk.

Chhanna ka hmuh tak si loah chuan Biak in pawn lama zawn ka rilruk ta a, chutia ka inher chiah tihah, " Kimi chu a thi tawh", eng thu nge maw ka hriat tak!

Chu thu min rawn hrilhtu pa lam chu pan nghal vutin a hrawkah chuan ka theihtawp aia nasain ka rek ta vak a, a sawisak laia Kimi nâ tuar hmel a rawn lang nghal zut zut bawk, ka chhan thei lo tih hriain a duhtawkin a sawisa a, hengte hi chu a tan chuan a nep lutuk.

" Duhtawk rawh, thlah rawh. Kimi chu accident-ah a boral a nih kha, Saiha-a an chhoh ṭumin, Saiha thlen hmain an accident hlauh a, chutah chuan a boral zingah a tel ve a nih kha", Kimi u chuan mangang taka ka kut rawn vuanin a ti a, melh hriam hraih nghalin, " A nih chuan eng vangin nge an accident thu chu ka lo hriat ve loh, engvangin Chanchin Thar aṭangin ka hriat ve loh", Hruaia chu a ai nasain ka rek a, a sen tawl tawl tawh mai, " Tuna i thiltih tum hi a ṭha bik lo", min rawn ti leh nghal vat.

Kimi u chu thinrim insum ṭeuh chung hian ka en vang vang a, Kimi hmel ka hmu tel tlat, chu chuan min tinâ thar leh em em bawk.

Hruaia chu leiah ka theh thlu tawp a, ka chhir zui zat bawk. Tunah chuan eng nge ka tih tak ang le? Ka thinrim leh rilru tawt lutuk chu inhrosak vak vak bak tih theih ka nei tawh si lo.

A tawp nan tiin ka chhir leh a, khang hun chhung zawng khan eng ang taka hrehawmin nge a nun a lo hman ang? Mai mai hlawm chuan.

Motor hma sâwi kawi tak chu ka pet leh vak vak a, Lalruatkimi ka hmuh theihna tur Thlanmual lam pan turin motor chhungah chuan ka lut a, Steering chu ka chum leh vak vak, eng tak phei chu min thlen lo.

Biak in chhungah khan engtin nge ka awm a, eng thu nge ka chhah chhuah ka hre lo nain, kan Pathian khian min ngaidam em em ang, min ngaidam mawlh mawlh teh se.

Thlanmual pawh chu kan han zawng chawp leh rih a, tui takin inneihna pawh an kalpui bik tawp lo ang.

Miss Kim, Lalruatkim, ka lo thleng tawh a nia, Biak in aṭanga hruai chhuah che ka tum tehreng nen, engvangin nge thlanmuala ka lo zawn che a ngaih???

" Lalruatkim", tiin ka au rawng rawng a, chhangtu reng ka nei lo. Ka au leh a, chhanna chu theh hmeh ang mai a ni.

Thing kawkalh kawi sâwi taka chuang 'Lalruatkimi' a va nâ tak em! A thlan ve lah chuan mawitu a nei lo a, Ankasa par chauh a ni mai, " Ka tlai avangin min ngaidam rawh aw, ka tihpalh, ka thiam loh a ni, min ngaidam rawh", ṭah hi pa lohna a nih chuan, ni e; pa lo nihna chu ka lo hlawh mai ang e.

" Ka pu, hei lehkha nawi ka chhar a, i hming te ka hmu, nangmah i ni em?", Sanga lehkha ken chu ka la nghal thuai a.

" Zomuanpui, khatin âw ki mi san khum suh, in zirtirtu ka nih hi", thil a hrethiam lo lutuk leh a hrethiam duh lo lutuk chuan min tithinrim takzet, ka puak keh mai dawnin ka hria.

" Zirtirtu te chuan kan zirlai te chu kan hmangaih vek, a chhan chu maw, an ṭhatna kan duh avangin; chumi piah lamah thildang a awm tawh ngai lo", âw khur hlawk hlawk chung hian ka ti a.

" Min hmangaih", a tih rualin ka beng hawi sawk nghal a, Principal-in a hnawtchhuak mai ang tih chu ka hlauh ber a ni, board exam hmachhawn tawh mai tur a ni a. Kei chu min hnawtchhuak mah se pawi ka ti lo, chuvang chuan hetia ka tih a ngai, hrethiam turin ka duh takzet bawk.

" Ka sawi tawh kha ka zirlai i nihna ang chauhin ka hmangaih che".

He lehkhaa mi hi chu Office chhunga kan awm dan vel a ni. A dang chu ka chhiar leh a

" In chhung ka luh rual rualin ka nuin min lo vaw nghal a, " Khawpuiah chuan i va lerh kual ni maw, mahni aia naupangte kawp kualin, i va nasa ve", tiin, ka nuṭa te pahnih pawh awm hle hle ta lo chuan ṭawngkam chhe tinrengin min hau ve bawk. Naupang anga an chhal leh a thla an hauh luai luaia bulah khan ka himin ka thla a muang tlat si a".

" "Bawihte, kan dinhmun aṭang hian sum bawiha tân hrehawmzia leh ṭhat lohzia hi hre reng ang che aw, i nuṭa te hi en la, ruihhlo bâwiha tân ṭhat lohna te leh, hmangaihna leh nawmsakna pawh thliar lo i unaunu aṭangte hian inzir ang che.

Zomuanpuia bulah chuan i dam chhung hun hmang thei ngei la ka va ti tak em, i pa hi min ngaidam rawh aw", tiin ka pa chuan a hnuk chah dawnin min hrilh a, " Ka pa, ngaihdamna tur i awm hleinem, Zomuanpuia bulah chauh ka dam chhung hun ka lo hmang ang", zawi sep hian ka ti a, lungawi takin ka pa chuan min kalsan ta. A tel loin engtin nge ka awm tak ang?".

" " Lalruatkimi luhlul dan hi chu, Saiha lamah chuan chho ve lo mai rawh, ka mang a ṭha lo ti ti pawh a", tiin ka nu chuan min khak a, mang chu eng ang pawhin lo ṭha lo mah sela; nikhat tal pawh kan in hrehawm tak hi awm bo san ka duh.

Ka nuṭa ten an damdawi leina tur ka pek duh loh avanga min sawisakna lah a la dam thei lo, ka nu hian min chhan ahnekin a lo fuihpawrh zawk ṭhin bawk si".

" Naktukah Saiha lamah kan chho tawh dawn a, thla a êng ruai mai a, zanin chu ka ngai zual khawp mai che, kan hun hman bei tham tak te kha ka ngaihtuah zan ṭhin, theihnghilh ni che ka nei ngai lo.

Khang ang hun kha ka la tawng ngai lo, bike-a chuan te, zan thla eng hnuaia romantic taka awm te, bazara kan inzui kual ṭhin te kha, i bazar loh ni chuan ka zawng ruai ṭhin che a ka nghak reng ṭhin che, ka tan chuan thil thar vek a ni si a, ka nuihpuiin ka ṭahpui ṭhin asin.

Kan inhmuh hmasak ber zanah pawh khan, ka u tia min koh kha i la hria em? Kha tah khan a chhan hriat si loh hian ka thinrim em em tawh, ka u tia min koh kha ka duh lo daih tawh.

Au Mami hnenah engkim ka hrilh a, mahni inthunun tur leh puitling taka awm turin min ti a, mahse; i bula ka awm tawh chuan ka thei ṭhin lo. Kan miss nena sawi in nih pawha ka thinrim dan kha.

I laka ka rilru put hmangte kha Hmangaihna an tih ang chi a nih chuan Ka Hmangaih Che.

Mahse, kan dinhmun leh kan engkim hi a ni deuh tawp mai, a inthlauin awm dun thei kan ni si lo a.

A dik, ni e hmangaihna leh indonaah chuan engpawh a thiang alawm. Mahse maw...Hmangaihnaah chuan thiang lo pakhat leh pawm sak nih ngai reng reng lo tur a awm.

Edd, pian nawn lehna hi a awm ngai a nih ngat chuan, i aia a let ngaa naupangin ka piang tawh ngei ang".

Lehkha nawia thu inziak te ka chhiar zawh chuan nghet takin ka hum a, mittui a dir zung zung. Mipa ka lo intihna ve chuan awmzia reng a nei leh ta lo.

Harsa leh hrehawm ti tak chung pawha hlawhtling tura ka beih tlauh tlauhna leh, ka hlawhtlin chhan ber lah heti hi a ni ta si a.

Tunah chuan engti mah ka tha tho tawh lo e, " Ka pu, i ṭha em?", Sanga chu ka en a, a hmela zawhna tam tak awm chu hmuh hmaih theih a ni hauh lo. Engtin nge ka hrilh anga, khawi aṭangin nge bul ka ṭan ang, ka hrethiam mai lo a ni.

" Lo tho thut mai la ka va ti tak em", che chang eih loin a hming intar kul chu ka en a, Lalruatkimi, zirtirtu a nih vang pawh ni lo a, miss Kimi ni ve tawp kha, ka venhim theih nan che leh thlamuang taka i awm theih nan hrehawm tam tak ka tuar ve asin, lo tho leh mai ta che.

Lalpa, khang ka hrehawm tawrh ve te kha, Kimi tawrhna nen chuan a inthlau tih ka hai lo, min lo nghah tir tur che alawm, min nghah tur thu pawh a sawi vek asin, a inhuam bawk.

I hnenah i hruai daih a, ka pa leh Rinhlua i hruai tawh a, he khawvel lungkham nei loa dam chhung hun ka hman ve lehna tur lah i hnenah i hruai leh daih si a. Eng nge ka tih tak ang?

A fair lo em mai!

Ding turin chakna ka nei tawh lo, ka hmangaih hnen ka thlen theihna tura Mizoram a chawl ṭhuapna te kha a thlawn mai an ni ta.

Bei hi a va dawng em em ve.

Kimi, Lalruatkim, keipawhin Ka Hmangaih Che.

Kim, i duh ang ngeiin pian nawn lehna chu awm sela; ka aia a let sawma naupangin piang zawk ngei ang che.

Lalpa, eng nge ka tih tak ang?

Ka la mangṭha thei lo che, engtikah emaw chuan ka la tawn leh ngei che hi ka ring tlat a ni.......

*** A TAWP TA ***