age is just a number-2

Age is Just a Number...

Chapter-2

Ziaktu: Cck Lalchhuanawmi

" Zirlai fel chuan Principal an hmu reng tur a ni tih thuchhuah an siam ami? ", kan inrul tawk leh chiah.

" Eddie, Rinhlua tenawm reuh zia chu", nui huah huah chung hian Johny-a chuan a lo ti lut a, Rinhlua pawh a khi vur vur.

Rinhlua leh Johny-a te hian Arts( history) subject an zir a, Lalrinawma nen hian Science subject kan zir thung. School danga kal kan ṭhian Sawma, Ropuia leh Rintlaka te khan commerce an zir ve bawk. Kan ṭhianho hian kan zirnaah pawh insemzai tiin kan inchhaih laih laih ve ṭhin.

Kan bul an lo thlen chuan tukin lama ka dawn ho chu an inchuh laih laih leh a, Rinawma erawh chuan a chuh ve ngailo, hmeichhe lama tla na tak ka ni tih hi ka sawi tawh em? Inchhuan thil ni loin ka hmel piah lamah ka engkim hi a fuh vel vek ni chek ang chu, chhân sen loh lehkhathawn leh thilpek ka dawng nasa!

" Eddie, Rinhlua thiltih i hre duh em? ", Johny-a bawk chuan a ti leh . " Khatia ti ne ne lo khan sawi ṭha mai la", Rinawma pawh chuan a lo ti ve a, hepa nui hmel hi ka hmuh awm ka la hre miah lo. " Kha i love letter tur", Rinhlua chuan lehkha lek va va chung hian a ti a. Johny-a lo inrawlh leh vatin, " Khami vang khan Rinhlua'n eng emaw thil special tak a dawn phah a nia aw", dawhkan beng dat dat chung chuan a ti a, a nui vur vur lehnghal. " Min tibo tawlh tawlh", Rinawma chuan a lo ti bul hmuk.

Rinawma chuan min lo en nghal vutin, " Zaninah intlansiakna neih a ni dawn a, i tel ve dawn em? ", tiin min zawt a, ka lo kâ ho. " Eng intlansiak maw? ", ka ti ha a. Rinawma chuan, " Zanin aṭanga ṭanin dar sawm hnu lam atang bike racing neih thin a ni dawn, mahse dan phal loh ang khan a nia thuruk a nih chu, Sawma khan a sawi alawm", a ti a.

" Dan phal loh maw, chutiang chu ṭha dawn em ni? ", Johny-a chuan a lo ti a. Rinhlua pawhin, " Sawma zawhfiah a ngai nih chu, bakah kan ṭhianhoin racing kan neih dan hi ṭha ka ti ber", a lo ti ve vat a, Rinawma pawh a lo bu ve nghauh nghauh. Keipawhin tha chu ka ti ve tho mai, mahse tel ka chak rilru viau thung, eng ang chiah nge ni ang tih chu ka ngaihtuah nghal rauh rauh a.

Bell a rik tawh avangin Rinhlua leh Johny-a te chu an classroom lam panin an kal ta a, " Lalrinhlua chuan engthil special tak nge maw a dawn chu ni", Rinawma chuan a ti lang lang a, keiin, " Ngaihtuah duh suh", ka lo tihsak a.

Bazarah peih lo tawkin chawhmeh lamin ka kal a, ka nu hian min tir ve ziah, inrinni a thlen tawh hi chuan. 

Ka chawhmeh lei ho lah min sawisel sak ziah lehnghal a, mahseṭ sawisel chung pawhin a siam ve mai zel tho.

Sobji bazarah ka lut zel a, step-a miss Kimi lo chhuk thla ka hmu hlawl! 

Min hmuh theih ngeina turin ka kal pel a, min chiau au miah lo, min hmu ngei bawk si a. Àw thian kharh chung hian, " Morning miss", ka han ti a. Lo lehhawi vatin, " Aw morning, i va fel ve", nui sang chung hian a ti leh lawi si a, ka ngei lek lek.

" Miss, i bazar em ni? ", ka nuih saih ve a. " Aw bazar, i bazar ve elaw? ", dam diai hian a ti a, a tawina chu thuhran, a thingtlang àwphawi hian min tithutak thei ṭhin lo. Nuih insum tak hian, " Aw ka bazar ve a, mahse, bazarah hi chuan ft5 chunglamah bak boruak hip tur a awm meuh lo", ka han ti chiah mai chu rum tawkin mi melh chho ha mai.

Bazarah hi chuan ft6 hawl pha ṭep tan pawh hian àm taka boruak hip tur a van thin tehreng nen, ani tan phei chuan!

" Zirlai fel ho tak hi chu ", sehchilh deuh taka tiin a nui saih a, a thinrim a ni tih a hriat theih tho. " Bazar nuam, zirlai fel Zomuanpui", ti hlakin a kal zui nghal nal nal a. Eng ka hria ni maw va umzuiin chawhmeh ilo vel min leipui turin ka sawm ringawt!

Miss Kimi pawh chuan aw a lo pawh ve mai bawk a, chawhmeh lei tur min thlansak a, a tharlam ṭha hlawm khawp mai; tukin ka bazara ka chawhmeh hawn ho tur chuan ka nu lung a dum tawh ngei ang.

Miss Kimi chuan chawhmeh man dawn hniam miah lo hian an tuk zah ang angin a la ṭhin a, mi ṭhenkhat chuan dawn hniam an chin thei tehreng nen. 

Engvang nge tia ka zawh chuan," B.Sc ka zir lai khan chawhmeh ka zuar ve hrep ṭhin tawh lawm, a hahthlak zia ka hria a; min han dawn hniam te khan a tha nat thlak ṭhin a nia aw, mahse, inhralh kha kan duh ber a ni ṭhin bawk si a", a ti siam siam a.

" Miss, B. Sc chu khawiah nge i zir a? ", tiin ka zawt a, "E le! Mizoram Khawpui ber, Aizawlah ngat mawle", ka khi sak. 

"Kan school hian teacher thar an mamawh thu advertisement an chhuah kha ka lo hmu a, hei ka vannei asiamin ka tling ve hlauh a nih hi, mahse, zirtir in nuam dawn khawpin ka hria", hreh hmel tak chung hian a ti a. Inhmeh lo lutuk. 

A dara beng thak thak chung hian, " I tithei em em ang", ka lo tihsak a. Thaw hrawk chungin, " Ngati nge mawni ṭhangthar ho hi in san vak vak le, ka beidawng em mai", a ti tum hmuk a. Ka pawm nawlh dawn mawni? 

Kan ṭhianho chuan dan phal loha bike racing an tihna hmunah chuan kan ding ve vang hlawm a. " Ka sawi kha, kal chhin pawh hi ṭhalo asin le, mi hausa fa awmngaihna hrelo intihhlimna tura an buatsaih a nia; keini kan la naupang si", Sawma chu zawi sap hian a phun sup sup a.

Kal chhin ve reng reng ka rawt a, Sawma sawi dan takah a lo tih chi loh dawn khawp. Kil khata lo inchiu ngawng ngawng an awm a, lo inchuktuah ngawng ngawng te; chubakah damdawi, ruihtheih chi hrang hrang leh hmeichhia tlawntlai ṭha tak tak, rui meng à chialte an tam phian.

Rinhlua lo ṭawngchhuak leh vatin, " Kei chu kan ṭhianhoin racing kan neih dan kha ṭha ka tih tawh kha, Pukpui aṭanga Theiriat, han tlak pawp ṭhin kha kei chu ka duh zawk", a lo ti a. Ṭhian dangte pawhin an pawmpui thu an sawi liam liam.

Kei erawh ka tel ve chak tlat thung, " Zanin chu ningkhawng hriat ve hrim hrim atan pawhin tel ve reng reng ang u", ka ti a, min hnial hlawm nasa ngang mai.

" Tiang hi chu veng dangah pawh an ching lutuk, a lut tawh te chu an chhuak leh mai mai tawh ngailo; bakah a ṭhalo hrim hrim", Rinhlua chuan a ti leh a. Rinawma pawhin, " Eddie, ngaihtuah chiang rawh aw; tunah pawh hian kan chhungte hriat lohin nih hi kan chhuah", a ti chhurh chhurh a.

Kiai sak chung hian, " Champion ka ni ziah a ni lawm ni, kei aia bike khalh thiam an awm ka ring lo, bakah an ruih phial phuau tawh hlawm saw", ka ti a. Sawma'n min lo chhang vatin, " Eddie, keini tan chuan kalsan a ṭha ber; kan kawm phak an ni lo, keini aia hausa leh upa vek an nih saw", ngen ngawl tak hian a ti a.

Rintlaka leh Ropuia te pawhin, " Ni e, kal zawk ang u", an ti a. An sawi chu a dik, a ṭha hauh lo, mahse tel chakna rilru ka la pu reng, ka rilru a insual, ka va tel ve thawr dawn nge ka ṭhiante thu zawmin ka kalsan zawk ang?

****

Present day*******

Ka phone ri chuan min tiharh a, alarm ka lo set chu niin; dar li a ni a, Delhi boruak thiang hunlai tak a ni. Zi mar ar ar chungin bathroom lam ka han pan a, workout hun pawh awm lo, shower chuan ka inphuh seng seng a; ka harh kàwk mai.

Ka driver Sanga chu a lo lut a, kei ka lo inthlak mial mial, " Ka pu, thlawhna pawhin kal zawk mai ta la i thleng hma dawn asin", a ti a. Nia, ka thleng hma dawn tih chu chiang sa, " Kan inkhalh chhawk mai dawn alawm, kan ride ve pah ni mai rawh se; hotel-ah te zan kan riak zeuh zeuh pah Mai dawn nia", ka ti a. " Mahse ka pu, kan va inseng hnem awm ve", a ti nuah nuah a.

Ka lo nuih sak a, " Pawi ti suh, chutiang a ho lutuk ", ka tih chuan a bu ve nghut a. Ka inthlak zo chu ni ber, IAS Officer niha Churachandpur lama DC post hmuh ve takah chuan chhungten motor min leisak a, driver turin Delhi-a inhlawha khawsa Sanga hi ka hmu fuh hlauh a ka sawm ta a ni.

A hranpain IAS motor leh driver a awm vek dawn tho a, chhungte tihhnual lohah ka pawm mai zawk a ni ber. 

Flat ka luahna aṭang chuan ka chhuak ta a, Sanga chuan garage aṭang bolero dum tliang nalh tak mai chu a lo khalh chhuak a. Bungrua velte chu kan han dah lut a, chhuak turin kan inring chu ni der.

Kan tlan ṭan ta a, zing dar li leh a chanve chu pel thuak, rim taka ka thawhna leh ka hlawhchhamna hmun, leh ka hlawhtlinna hmun ni bawk Delhi chu ka chhuahsan ve dawn ta! 

Lung te a chhe hial theiin ka hria, hemi dinhmun ka thlen theihna tura ka bei tlauh tlauhna ka han ngaihtuah let a, patling pui e tilo chuan ka mittui a hnàm sawk thei!

****

Past days*******

"Attention", khawng taka din tur hi ni ringawt mai ni. " Vawiin hi check-up neih ni a ni a, engkhaw sawi set set loin Eddie Zomuanpuia lo chhuak nghal rawh le ", kan inhrechiang tawh ka tih kha. 

Ka rin ang ngeiin, " I lu kha ", sir David-a chuan a lo tihzawm. Tuesday leh Thursday apiang hian line neih ṭhin a ni a, chutah chuan thu pawimawh an puang a; chumi zawhah check-up neih ṭhin a ni.

Kei hi chu tihian check pawh ngai loa koh chhuah hmasak ber ka ni ṭhin. Nakinah an man te an lo chhuak leh sup sup mai ang, mawza bun diklo; lu meh dan diklo, kekawr tlang zuih lutuk te; hmeichhiaah makeup lo inhnawih te, mithmul lo pawt te; pawnfen chhing lutuk te, khup khuh tur an tih tlat avangin, kuttin sei te mipa leh hmeichhiaah pawh. Dan a khauhin a kengkawhtu te pawh an khauh a, a let hi a na ngaih ngaih ṭhin a nia aw.

Chuti chung chuan man ngai leh hrem ngai kan la awm reng! Kei pawh ka bang chuang lo, man leh hrem tawk reng ka ni; nikum class 11 kan zir kum phei chuan suspend vawithum vel ka tawk hman. 

Class 9 leh 10 ka zir kum phei chu sawi lo zawk mai ang, kan school-ah hian class 9 atang class 12( arts, commerce leh science) a zir theih a, zirlai pawh kan ṭhahnem hle.

Miss Kimi pawhin a check ve tlauh tlauh a, miss Tluangi nen, hmeichhe naupangte pawh an ang alawm le, puan an bih tut ve reuh lehnghal.

Inrinni bazar ka kal leh a, inrinni bazar hi chu ka hna a ni tawh ber. Eng ka hria ni maw miss Kimi ka nghak ru reng a, chawhmeh ilo vel pawh ka la lei lo, lo bazar leh tak ang maw!

Thawhṭan tuk a ni a, Devotion kan hman zawhin miss Kimi chuan roll a call leh tlauh tlauh a, a thingtlang àwphawi nen. 

Thil ṭul a tih te a sawi ve siam siam a, " Zirna kawngah hian mipa ho hi in ṭan a ngai a nia aw, hmeichhe hoin an khalh zung zung tawh che u hi", a ti a, ka lo khi sak.

" Class dangah pawh an topper ho hi hmeichhia an ni zel a nia, office hrang hrangah te pawh a lal deuh chin chu hmeichhia an ni zel. Hmeichhia ka va sawisel lam leh mipa ka ṭan lutuk vang pawh a ni chuang lo, intluktlang taka awm kha a ṭha. Mahse, mipa ho hi in ṭan ve a ngai ka tihna nih chu ", nui sang chung hian a ti a.

Kei erawh inrinnia ka nghah thlawn avang khan ka lungawilo ve ringawt, miss Kimi chu ka en kar a, " Hmeichhe dinhmun chawisan a ngai tiin nuho an au lauh lauh a, heti zela mipa ho in awm reng chuan nakinah, mipa dinhmun chawisan a ngai tia in auh hun pawh a la thleng ve lo ang tih a sawi theih loh", an nui dar dar hlawm a, a ṭhenin dawhkante an beng, kei erawh ngati nge mawni ka lungawilona hian min hneh tlat.

Miss Kimi chuan, " Ka ti tak tak a nia, mipa ho in ṭan a ngai; a luhlul leh suahsual rawngbawl zawnga awmte hi bansan tawh rawh u, chubakah ruihhlo lamah te hian mipa ho in tlan nasa lutuk, ruihhlo lama tlan lo hian zirna lamah intlansiak zawk rawh u", min lo en zeuh a, min tihchhan tih a chiang khawp.

" Mahse, hei kan class-ah hi chuan topper hi mipa a ni a, Rinawma a niin ka hria, a lawmawm ka ti khawp mai; hmeichhe ho pawhin lehpel han tum ula, tin; mipa ho pawhin chutiangin ṭan han la nasa rawh u", a tihzawm leh a, eng emaw kawng zawng tak chuan a dikna mual mual chu a awm.

Rinawma ka tluk lohna chu zirnaah, kan class ah topper a ni ziah a, mahse, bike racing kan neihnaah erawh kei min tluklo ve tlṭhin thung, chubakah Rinawma ai ka luck zawk bawk. 

Rinawma hi a hmel pawh chhe lem loin lehkha a thiam thei a, kei ai luck leh lar tur tak zawk pawh a ni; ka hre thiam bik lo.

Miss Kimi chu class aṭangin a chhuak chiah tihah ka va umzui nghal a, " Miss", ka tih chuan a lo hawi vat a, " Aw eng nge ni ta? ", nui seih chunga a tih chuan ka thin a tirim.

" Ngati nge i bazar loh? ", kâ ho hian min en chho a, " Eng bazar?", a ti tawi hmuk. Keiin, " Ka lo nghak reng che a i lo kal hun, mahse, i lo kal miah lo", sehchilh deuh tak hian ka ti a, ka kut ka hum ruh nasa, thinrimna tur awm pawhin ka hre hauh lo, mahse, ka thinrim em em ringawt mai ni.

‌Inher vutin classroom lam panin ka kal a, pen hnih thum ka pen hman tihah, " Edd", ka inher chiang teh asin!