age is just a number-3

Age is Just a Number

Chapter-3

Ziaktu: Cck Lalchhuanawmi 

Rinhlua leh Johny-a te class lam panin Rinawma nen kan kal hna hna a, " Eddie', hmeichhe pakhat hian kan hnung lam aṭang chuan min ko a, ka han en chuan chocolate, ribbon sena ṭawn keng chung hian a lo ding a. " Nangmah hian em ni min ko? ", tiin ka han zawt a.

Break lai a ni bawk a, zirlai kan inpel suau suau; hetiang boruak a nih takah chuan an mit fukna ber kan ni ta. " Ih, Eddie ka duh lutuk che", a kun deuh lap a, a sen ṭawn ṭawn. Ka lo nui deuh hawk a, " Hei hi khawngaihin min laksak rawh", chocolate chu a lo kengsang vah a.

Rinhlua leh Johny-a pawh an lo lang nghal, ka ngawi reng a, sawi tur ka hre hauh lo, huaisen ka ti khawp mai.

Lehkhathawn mai pawh duhtawk loin hetiang hian a che ta a nia, Tu fakau nge maw ka nih le? Henu hi lawm Rinhlua'n a lehkhathawn min pek theih nan Rinhlua fawh pawh pawi tilo kha!

Rinhlua'n thil special tak a dawn kha, a fawh phawt loh chuan a lehkhathawn min pek loh tur thu a hrilh a, a fawp ta nih kha; eng rilru nge maw a put le?

" Rinawma hian chocolate te chu a duh lutuk alawm", ti sapin chocolate chu ka la a, Rinawma kutah ka hmehbel nghal zat.

Rinhlua leh Johny-a kuahin an classroom-ah ka luhpui a, Lalsiamthari te ṭhianzaho an lo au chel chul, " Eddie, khanu kha hre'm, school dangah bialpa a nei reng a nia aw", inla nô fahran hian a ti a, Rinhlua'n, " Lalsiamthari hi chu, kan Eddie-a tan hi chuan i ṭha ber mawle", a kut tipir vah chung hian a ti a, Siamthari a lai chhe khawp. " I hrechiang tak tak maw? ", Rinhlua chuan a zawt leh nghal vat a.

Lalsiamthari chuan a hma aia inla nô fahranin, " Hrechiang lutuk tlat", a lo ti leh.

Rinhlua bawk chuan, " Eddie, i duh dawn loh chuan ka lo nihpui daih teh ang", a ti a. " Tunge ni reng reng a? ", tiin Rinawma chuan a lo zawt thuai a. Johny-a chuan lo chhang vatin, " Lallawmsiami, Class 11 ami nia, Commerce subject a lain ka hria, a hmel pawh ṭhat kha; a hleitling ve hle bawk ka ti", a ti siam siam a.

Rinhlua lo inrawlh leh vatin, " Kan Eddie-a tan chuan kan Siamthari bak ṭha an awm lo", Siamthari en zeuh pah chuan a va ti a, Siamthari lawmah a tla em em mai ni.

" Lalrinhlu, Eddie-a hi lawm a duh; i rilru a na zawk mai mai ang", Rinawma chuan a ti tawi nghut a.

Ka sawi tawh kha, Rinawma hi kan inkawmna a rei ve hle tawh a, a nui hmel ka la hmu miah lo! " A pawina awmlo, ahma pawhin lehkhathawn ka dawnte zingah an duhzawng a awm chuan an nihpui tho lawm", ka ti a, a ni reng lah tak a; kei hian tumah ka chhang ngai lo a, thilpek ho pawh, Rinhlua leh Johny bakah Sawma, Rintlaka leh Ropuia te ho hian an insem ṭhin bawk, Rinawma erawh chutiang a ni ngai hauh lo, min el tih chu ka hria; mahse ka ṭhian a nia, chubakah han el let ve vak dan tur ka hre lo.

Johny-a chuan, " Eddie, hetia i awm reng hi a ṭha lo; pakhat tal te chu han nihpui ṭhin ve la, tihian i buai reng mai ang", a ti a.

A dik ve viau chuan ka hria, classroom kan chhuahsan dawn chuan inher letin, " Siami, vawiin aṭang ka bialnu i ni aw", ka ti a, Siami lawm lutuk chu a hawi à hu mai, hawhaw hluah hluahin a zui nghal.

" Lehkha te hi i zir ngai em? ", miss Kimi chuan anhnah en kual dan dan chung hian a ti a, " Tunkar chhunga kan zirte kha hriatthiam loh laite i nei em? Nge ni a, i thiam vek tawh zawk? ", a tihzawm leh a. Sawi tur engmah ka hre lo, tunkar chhung khan hrem ka tawk zing em em a ni mai.

Chawhmeh lei tur min thlansak ho chu ka bag-ah khung pahin miss Kimi chuan min en kar a, keiin a man ka lo pe thung. A mit aṭang laser a kap chhuak mai ang tih ka hlau khawp, " Zomuanpui, zawhna ka zawh che chu", a ti zawi sep a, hrelo ang hmaka awmin ka kal zui nghal nal nal. Min pawt ding dawtin, " Zu i in ṭhin tiraw? ", va hahthlak tak, a rawl a ring phian lehnghal.

" Miss, min tihzah i tum em ni? ", sehchilh deuh takin ka ti a, min en ṭhup lehnghal. Min umzui dat dat a, min pawt dingin zawhna min zawt nghal ṭhin bawk a, " Ngaihzawngte kha i nei tiraw? ", ka inher vut a ka àwmah a intauh chawrh!

A inkhai bawr luah ve reuh lehnghal a, chutia min um dat dat chu nuam ka ti reuh tlat zu nia! 

Min pawt ding leh a, " Edd, ka hah tawh a nia, ṭha deuhin sawi teh ang", a tih chuan, " Eng nge sawi tur awm a, min hrem leh dan tur maw? ", ti nghutin ka kal leh nghal nal nal a. " Edd, Zomuanpui", a ti vin ṭhawt mai a, ka beng ka chhu ngawng tlat!

Min pawt ding leh a, " Ngati nge hrem ngaia i awm ziah a? ". Min pawt ding leh a, " Fel deuhin i awm ve thei lo em ni? ". Min pawt ding leh a, " Ngati nge i chimawm em em? ", bazar chhungah kan inpawt ding reng mai ni.

Line-up hi ka ning, ni a sa ṭha bawk si; check-up neih chhung lah rei ve thei bawk si, vawiin chu Johny-a leh Rinhlua te pawh lu buk zingah an tel a; man an ni ve e.

Kei erawh ka lu hi a buk pawhin ka hre lo, uniform-ah lah a dik vek, chuti chungin sir David-an, " Eddie Zomuanpuia lo chhuak rawh le ", a la ti hram. Min hrem hi nuam an ti ve tawh hrim hrimin ka hria.

Miss Kimi'n rum tawkin min melh, " I chak lo khawp ang", tih a mit mengah ka hmu theiin ka hria! 

Roll a call lauh lauh a, " Rollno. - 37, Zomuanpuia", ding khawng at chungin, " Present miss", ring leng lawngin ka han ti a, mi melh khiau chungin, " Ṭhutthleng chungah khan ding nghal rawh", a thinrim hmel em em mai lehnghal. 

" Ngati nge miss? ", ka ti kâ ho a, " Ding la ni mai", a mit ti bial kuang chung hian a ti a.

Peih lo tawkin ṭhutthleng chungah ka ding, roll a call zawm lehnghal. Kan class-ah hian mi sawmrukpathum lai kan awm a ni. Roll a call zawh chuan, " 1st period hi ka class a ni nghal bawk a, zirlai kan ṭan nghal mai ang", a ti a. 

Ka ding char char dawn tihna mawnile, " Miss kei hi? ", lu thak lo pui hiat nuah nuah chungin ka ti a, " Tikhan i ding reng dawn, tun period chhung zawng; i hnungah i kut suih rawh", a ti hlak hlak a, mak ti deuhin ka en reng ringawt; a tet tet nen a thinchhe tel ve khanglang tihna maw nile?

Siamthari kuah vang vang pahin inrinni bazar leh hun tur ka ngaihtuah rauh rauh a, ngati maw?

Ele, miss Kimi nen pangngai taka kan inbiak ve theih hun a ni tlat alawm, engtin nge ka inum kualtir leh ang tih chu ngaihtuah chhuah ka tum ber a ni; khatia min um kual dat dat kha nuam ka ti riau.

" Eddie, eng nge i ngaihtuah? ", Siamthari chuan min sawi dat dat chung hian a ti a, ka harhchhuak zawk; ka ngaihtuahna ka kal hlattir deuh a ni. 

Lawmsiami an ti khan ka hria, khanu khan, " Siami, veng ṭha rawh aw; nanglo midang a ngaihtuah te hi ni nge", nui sen sen chungin a ti a, Rinhlua khan a nihpui ta kha nia, mahse he nu hi ka ring hauh lo; eng kawng emaw talin buaina a chawhchhuah ka ring tlat.

Siamthari chuan lo chhang vatin, " Ka Eddie-a hian kei lo midang a Ngaihtuah ka ring lo", min lo en chho ha chung hian a ti a, ka lo nuih tawi tak.

Ka inthlahrung ve det, ka bialnu kuah chungin hmeichhe dang, ohh, miss Kimi ka lo ngaihtuah daih a nia; Lawmsiami a lo ner nawk. Rinawma tih dan takah Rinhlua'n Lawmsiami a nihpui hi a nat phah ang tih ka hlau khawp mai.

" Tunkar inrinni chu lenchhuah kan tih kha aw", thli baw niaih nuaih chungin Rintlaka chuan a ti a, rui chhe em em pawh a ni lo; a over ve hrim hrim hepa hi chu. Theiriat tlangah kan awm a, Pukpui aṭang kan lo intlansiak ve thung, champion han ring teh u, keimah leh bawk mawle!

Rinawma chuan, " Kei chu ka lo kal ve lo mai ang, rual awh a nat hmel em mai", a no ken lai chhunga tui fim kàk mai, Amawii an ti em ni kha? Tlak pawp chung chuan a ti a, kan lo teu hlar.

Rui chhe khawpin kan in ngailo, inkhalh haw leh tur kan ni tih kan hre vek a, Sawma lah chuan, " D nei ve lo awhthik", intithei fahran hian a lo tihkhum a, Johny-a leh Rinawma ten an kuk fawk, amah lah chuan a chal tuai nuah nuah chungin a nui huah huah a.

Rinhlua leh keiin ngaihzawng kan nei tih an hriat khan Rintlaka, Ropuia leh Sawma ten single nih bik an lo duh lo nasa mai a, an school ami an duh duh an thing ve hmiah; anni pathum pawh hi an chheloin an hleitling a, an luck ve thei ṭhin khawp.

Johny-a erawhin a duhzawng a la hmu ve lo niang, Rinawma phei chu ka sawi peih lo; hmeichhe chungchang takngial pawh a thawiin a sawi ngai lo a nia. " D phurh tur pawh hmu zo hleilo che u", uang fahran hian Sawma chuan a ti leh a, Ropuia pawh lo inrawlhin, " Chutiangah lungngaihna tur a awmlo, kan Johny-a leh Rinawma tan hian an D tur an lo phurhsak a, an lo thlenpui ṭep tawh ang, hei en ula", nui hawk hawk chungin a phone a phawrh a, kan han en chu di pangngai nu hoin an phurh lai thlalak hi a lo ni pek, Johny-a chuan, " Hmela, tak tak emaw tih laia", sehchilh tak chung hian a ti a, thinrim theih pawh a ni lo; Johny-a phei chu a sawi uar berah a ṭang zawm nghal, " Engtik nge an lo thlen ang aw, ka nghakhlel tawh mang e; inrinni hma hi chuan lo thlenpui hram se", nui tat tat chungin a ti a.

Keiin, " An lo thlenpui hman loh leh, Rinawma nen in inphur tawh ang nga ni mai lawm", ka han ti a, Rinawma'n a no ken laiin min lo vawm chawrh, ka euna lamah ka thal der, " Tenawm suh", a lo ti hlak a, amah bawkin min lo kaitho a; nui ngai lem loin inlathutak deuhin awm ṭhin mah se, a ruk tak chuan ngainatawmna a nei; a ṭhiante min care thei em em a, tihian kan zingah a tel ve ziah a; topper a ni ziah thei tho; min el ka tih tawh kha, a chhan hriat ka duh thin khawp mai.

Zirtawpni a ni a, chawhma lamah class lak a ni dawn a, chawhnu lamah sport neih a ni dawn thung, inthlakna tur kan keng mai; mipa hoin volleyball kan beng dawn a ni.

Tihian 1st period chu ka'n bunk leh phawt anga, miss Kimi'n roll a call zawhah sport dan turte a sawi a, kei classroom a chhuahsan rualin ka pit ru ve nghal.

House pali a awm a, green house, purple house, blue house leh red House te an ni. Kei leh Rinhlua green house-ah kan awm a, Johny-a leh Rinawma blue house-ah an awm thung.

Mahse, vawiin chu Science leh Arts ho kan inkhel dawn a, Johny-a leh Rinhlua te nen chuan vawiin chawhnua volleyball inkhel turah khawi class nge chak zawk ang tih kan sawi liam liam a. Class ang zawnga inkhel tur kan ni bawk a, aruk tak chuan ṭan a na ve khawp.

Rinhlua te class nen chuan kan inhmachhawn ta ran a, Rinawma'n a hlap pawp pawp a, Johny-a'n a lo block hmiah hmiah ve thung. 

Boruak a ṭang khawp, kan piah lawkah kan class master leh mistress, miss Kimi leh sir David-a min man thei deuh pa kha; an lo au ve lauh lauh a, Lehlam pawl pawh chuti bawk. 

Rinhlua ball lo tilet chu ka ti out palh a, miss Kimi'n a la na ngang mai, " Zomuanpui, i ngaihtuahna hmang ta che, ṭhutthlenga period khat chhung din i duh leh te nih loh chuan ṭang nasa rawh", a ti kharh kharh a, ka tihluihah a ngai nge mawni, tikhan min nuih leh luai luai tawh.

Miss Kimi'n min hauh vang pawh ni chuang lo chuan ka ṭang nasa mai a, a rem emaw rem lo emaw ka hlap pawp pawp, Lehlam pawl pawhin min dan zawh loh chang an nei zeuh zeuh. 

Rinawma'n ball min lo pass pahin, " Eddie", a ti a, a ball min lo pass hlap tumin ka han zuang a, ka hlap ta chiah tihah ball nge ka hlap dan diklo vang nge ni ball chu a kal sual hlauh mai a; miss Kimi, chair-a lo ṭhu chu a chalah tak a va fuh a, chair chawp chuan a let thal phung mai!!!

"Hmela le"

"I va ngeiawm tak"

"Lal Johny, hmelchhepa", Johny-a kan hnek luai luai, a hmelchhiatzia hi. Sualthiam lutuk, ngeiawm tel bawk.

Amah lah chuan, " Inrinni hmain ka D tur an lo phur thleng hman a, chuvang alawm", a pum dawm ngawih ngawih chungin a ti a, ka va ngei mai mai tak.

Tlawnga kal phawt kan ti a, Serkawnah kan innghak khawm a, Johny-a D phurh tur nei dawn loa kan hriatin ama phu loa chhelo zet a lo phur chu niin, kan hmela mai mai hi e, ka hnek thlu chawrh loa a vannei lil lel lutuk.

Rintlaka leh Ropuia chiah kan nghak ta, Rinawma chu a sawi ang khan a lo kal dawn ta lo. Johny-a chuan Khawi ami nge a lo phurh chhuah tih chu kan zawt sek a, kan D ten eitur leh in tur an lam mek a, kan ṭhian dangte kan nghah chhungin. Rinhlua chuan, " Lal Johny han sawi vat teh, khawi ami nge a? ", Johny-a sawi dat dat chung hian a ti a.

" A va mak tak, ka sawi dawn lawm le", Johny-a chuan Rinhlua kut dah thla nghat pahin a ti hlak a, kan beng kan lo chhi nasa. 

" Kan veng ami a nih kha, vawiin atan bik liau liaua ka sawm a nih kha", a ti nghut a, " I va ho mai mai tak", kan lo ti liam liam. Chutah, kan zinga chhur chheh chhawh ber Sawma lah pek chuan, " A nih chuan ka lo nihpui daih aw", a ti heu a, kan kuk luai luai; a eng hi a thawl em em mai ni hepa hi chu.

Johny-a lo inrawlh vatin, " Mawla le, tihian ka lenchhuahpui ang a; ka nihpui daih mai dawn lawm, i thluak hman hunte hi hre ve ṭhin teh", a ti chharh chharh a. 

" A dik, Sawm chhur chheh chhawhpa", kan kuk leh luai luai a, Sawma'n a lu tuai nuah nuah chungin, " Naaa, in ninawm; ka lu hi kuk ral in tum em ni? A na em em mai lehnghal", ner nawng chungin a ti a, " Hetia min kuk luai luai ṭhin vang hi lawm, ka thluak pawh a function ṭhat tawh loh", a tihzawm leh a, kan lo nuih dar dar ringawt.

" I thluakah brain a awm lo zawk a nih kha", ka lo tihsak a, a huat tawk a tling em em mai ni. Ropuia leh Rintlaka te pawh an lo thleng chawpchilh ve nghal a, kan tum lam panin kan inphur chhuak hlawm leh ta a ni.

" Vawiin chu a nuam bawk amaw? ", Rinawma chuan a ti kharh kharh a, a nuam kan tih thuin kan lo chhang thliah thliah. " Vawiin chu dam lai thlan thim hawn ka tum tehreng nen, kan hmela D la ni mai tur vang khan ka ṭhulh leh ta lawm le", pawi tih hmel deuhin Sawma chuan a ti vawng vawng a, kan chhura tak hi chu .

Johny-a'n a lo ti thei ṭhak lo, " Sawma, chhur chheh chhawhpa; i chawh", a ti muang ban raih a, Sawma a lo tlawm duh lo nasa, " Hmel zozial pu lutukin khatiang England Rose kha chu i phu lo, Johny hmel zoziala", sehchilh takin a ti kha kha a, kei erawh ka nuihna lamah ka pum a na vek tawh. 

Rintlaka'n ṭawng bah nuaih chungin, " In kawppui teah lungawi ve mai mai teh u", a ti hlak a, " Overthang Lalrintlak, no khat pawh in zo hleilo khan rui chhe der angten i awm alaw, i zak lo em ni? ", Ropuia'n a lo ti let ve thuai a.

Rintlaka'n a duhlo nangiang mai, " Bawng tut Lalropui, mahni D te puan hmawr pawh dek ngam hleilo khan khatin mi ti ve khanglang suh", a ti vin hlar a, ka thil in lai ka phuh chhuak ṭhawt.

" A tawk, haw lam i hnaih tawh ang u", Rinawma chuan a ti a. Rinhlua'n lo chhang ve thuaiin, " Virgin ngan ngat Rinawma thu chu i awih tlang ang u", nui hawk hawkin a ti a. 

Rinawma pawhin, " Ex- man Lalrinhlua thu chu ngai tawh u", a ti ve bawk a, a khi sak; kan inhrechiang hlawm a nia. Mahni insawisain kan nui dar dar a, ṭhiante bul tluka hahdamna hi a awm thei dawn chuang em ni!

" Miss Kimi bulah ngaihdam i dil leh ngei a ngai ang", sir David-a chuan a tarmit kar atanga mi melh khiau chung hian a ti a. Ka nuihchhuah loh nan ka insum hram hram, inrinni pawh bazar lohna turin ka nu bulah chhuanlam ka siam kha nia, hmuh ka hreh em avangin; ngaihdam kha chu ka dil ve ngei tawh kha, dil nawn leh tura min tih pawh pawi ka ti chuang lo; miss Kimi kha a thal chiang ve em alawm.

Kan class kha kan chak ta lo kha nia, nuihna lamah tha a kal vek. 

" Vawiin pawh school a lo kal lo ", sir David-a chuan a ti leh a, inthiamlo nain ka khat nghal, chuvang a ni ngei ang, sir David-a hian tukin zing chu roll a call ni.

Khami nia a zak lutuk hmel kha, puak keh mai tur ang khan a sen chhuak vek; thinrim vak ngaihna awm heklo, a nui liam ve mai mai kha nia, ka khawngaih thar thut.

Rinawma nen zung turin zun in lam panin kan kal a, canteen kawta ka mi hmuh avang chuan ka ding chawt. Miss Kimi leh sir Zaia an lo inbe mial mial a, miss Kimi hlim tih hriat takin a nui a, chalsam a nei thar lehnghal!

T-shirt hring a plan hi a ha a, puan a dum a bih bawk, pheikhawk a flat ang chi a dum a bun bawk a, a sam chu phiarin a dar vei lamah a uaithla hniang bawk. Chung chu second reilote chhungin ka lo chhinchhiah vek hman, a êng set setin ka hria.

Ka dinna ngaiah ka ding reng a, amah ka en reng thung, nui sang chungin eng eng emaw hi a sawi siam siam a, " Eddie ka kalsan dawn che, ka zun a chhuak tawh lutuk", Rinawma chuan a ti a, min kalsan nghal. Sir David-a khan school rawn kal lo ang khan a sawi si a, ka bo map mai.

Rinawma lo let leh chu ka chelh ding a, " Rina, sir David-a khan miss Kimi school rawn kal loh thu a sawi tiraw? ", tiin ka zawt a, " Aw sawi e, tinge a? ", a tih chuan canteen kawta sir Zaia nen ka hmuh dun thu ka hrilh a, tunah pawh hian ka en reng, Rinawma chuan min lo sawi datin, " Canteen kawtah te chuan miss Tluangi leh sir Zaia te ni saw inbia", a ti a, mak ti deuhin Rinawma ka en, " Awihawm loh", ti hlakin ka en nawn leh a, sir Zaia leh miss Tluangi te an lo ni tak tak!

" Ti teh, kal teh ang", Rinawma chuan a ti a, ka zun ve phawt tur thuin ka lo chhang a, classroom lam min pansan leh ta a ni.

Classroom lam pan chuan thaw hrawk hian ka kal a, ka necktie ka pawt thawl a, khaw lum lutuk hi chuan, uniform hak reng pawh hi ninawm duh thei khawp. 

Class 10 room ka pel chiah tihah miss Kimi lo kal chhet chhet ka hmu a, canteen kawta ka hmuh dan ang chiah chiah khan. Ka lawm dan chu pui tak a ni, " Miss", nui saihin a bulah ka va tlan phei a, " Zomuanpui", a lo ti hlak a, ka hnung lamah ka kat dawrh nghal.

A thinchhe ve sia aw, a tiang ken chuan mi kawk kual dan dan a, " I uniform kha ha ṭha rawh, i necktie te kha", a ti a, phur ser sawrin ka insiamṭha sawk sawk nghal. " Miss, ka tihpalh lutuk", ka beng pahnihah pawtin ka ti a, " Sir David-an school i rawn kal lo a ti a", ka tih chuan, " Engvangin nge ka rawn kal loh ngawt ang? ", tiin min zawt let leh mauh.

" Miss, ka tihpalh tak tak a nia aw, ka tihluih a ni miah lo", kut vai nuah nuah chungin ka ti leh a, ka inthiamlo takzet a ni; ka tihluih pawh a ni lo, ball kha a kalsual palh mai a ni. 

Chutah a rawn nui chhuak chiam, " A ho lutuk, engah mah ngai duh suh, mahse, ka zak ve khawp mai", kun deuh lap chung hian a ti a, a hnuah nui sang chungin a lo hawichhuak leh.

Ka hmu hmelṭha sawt bawkin ka hria!!!