age is just a number-4

Age is Just a Number

Chapter-4

Ziaktu: Cck Lalchhuanawmi

Nilaini a ni a, hemi ni hian biology class hi a tam em em mai a, mahse, bunk emaw mutthluksan tih kha chu ka phal teuh lo, nangni pawhin biology ber kher zir hi chu nuam in tih pawl a nih ve tho ka ring.

Period dawt leha kan zir tur ka han zawh chuan Rinawma chuan physics a nih thuin min chhang a, ka peih loh em avangin bunk turin ka chhuak daih a. Johny-a leh Rinhlua te kan bunk-na hmunah an lo awm vang tawh bawk.

" Ka ngaihtuah a, zial te hi han zu ve chhin teh ang u", Rinhlua chuan a ti chhuak hlawl a, ngaihtuah zui ni awm takin kan ngawi vang vang. A hnuah Johny-a lo ṭawngchhuakin, " Ṭha phian ang, zaninah Sawma lo keng tel turin kan ti ang a", a ti a, keiin, " A lei ngam dawn em ni?", ka lo ti thuai.

" Zû mah a lei ngam chuan a ngam lohna tur hi ka hrelo e", Rinhlua chuan thaw hrawkin a ti a, Kan Sawma hi chu zu leitu ber atana kan tih kha ni hrim hrim a.

Kan Sawm chhur chheh chhawha kan sawisa zui nghal a, period khat dang chu kan bunk leh der mai; lunch ei a hun der tawh bawk.

Basement aṭang chuan kan classroom lam panin ka chho hna hna a, miss Kimi nen kan intawk thut, rum tawkin min melh a, " Goody Eddie boy-a teh hlawl chu", nui saihin a ti a, a lungawi lohna a hmelah a lang tho. 

Chutih lai tak chuan thli a lo thaw vuk vuk mai a, miss Kimi chal sam a lo chhem leng dawr dawr nghal a, a chal veilam panga duk churh chuan ka mit a la nghal zat!

" Miss, tinge i chal kha? ", tia zawh leh a chal va khawih chu ka rual nghal a. Ka kut lo thing thla nghal vatin, " Engmah a nilo, i mi vuak perna a nih hi, classroom-ah va kal tawh rawh", a ti bak hlarh a, a chal sam a siam tha nghal zung zung bawk.

Ka awih chiah lo, a chalah tak khan alawm ball khan a fuh, a sirah a nilo reng reng, chuti ni lo se engtin nge thal tawp khan a tluk theih ang? 

" Khawi maw", tih leh a dara a sam phiar uaithlak tir hnuang chu ka han la sawn a, a nghawngah samin a khuh theih chinah a lo duk chur leh; sawisakna ni awm zawk tak a ni.

Ka kut a lo thing thla thuai a, " Classroom-ah kal rawh ka tih chu", zawi sep hian a ti a, a kun deuh lap bawk. " Miss, tuin nge sawisa che a? ", tiin ka zawt a, a lo hawichhuak nghal vat.

" Hman zan ami kha ni em, ' ka thlah ang che ' titu pa kha a ni em? ", tiin a dara ka kut pahniha va chelh chuan ka zawt leh nghal zat. 

Ka ring deuh tlat, a unaupa emaw Tu emaw tak chu a ni ngei ang. Lunch break dar a lo ri ral ral zawm nghal a, " Zomuanpui, classroom-ah kal rawh ka tih chu", tih leh amah pawh kal a rual nghal.

" Eddie, ka sawi i hria em? ", Rinawma'n min lo sawi dat a, ka harh zawk. Miss Kimi ringawt ka lo ngaihtuah chu niin, a taksaa duk awm ringawt tur chuan ka ring lo, khawiah emaw tluin a intauhna ti dawn ila, a chal kha chu a awihawm mai a; mahse a nghawnga duk awm kha chu tluk avang chuan ka ring hauhlo.

Ka ṭhiante chuan min lo sawi leh dat dat a, " Eng nge, eng nge? ", ka ti hawi à hu, ka lo ngaihtuah múk leh mah mah ni.

Ka ṭhiante chu ka han hrilh a, " Love bite pawh a ni mai thei asin", an lo ti sam et, khatiang khan love bite a awm ngai pawhin ka hre lo; sawisakna hnuhma ni ngeia ka rin thu ka hrilh leh a, " Nangpa tê reuh hi, i ngaihtuah dan em emah hian arukin i duh chiang ", chik zeta min en chung hian Sawma chuan a ti kharh kharh a, " Chhura, ka ngaihtuahna em em pawh ka hre lo; ka ngaihdan ka sawi mai chauh lawm", nam sawn pah chuan ka ti a.

Lo hnai leha chik zeta min en leh hian, " Zanin hian miss Kimi chungchang hlir i sawi tih i hria em? ", a ti muang fan raih a, " Ka awih lo", nam sawn pah chuan ka ti leh a.

Johny-a leh Rinhlua lo inrawlh ve vatin, " A ni lawm, chubakah hman inrinnia kan len pawh khan miss Kimi chungchang ringawt i sawi a, ball i hlap khumna kha sawiin i nuih uar uar kha; i hre tawh lo em ni? ", min en kar hlawm chungin an ti a, kei erawh tihngaihna ka hriat loh em avangin ka lu thak lo pui ka hiah phah ringawt.

Zanin chauh hi miss Kimi chungchang kasawi vawikhatna a nia ka hriat thu ka hrilh chuan an lo teu hlar. " Goody Eddie boy", an lo ti rual dial a, " Engtin nge miss Kimi'n min kohna kha in hriat ve zawk? ", tiin ka zawt hu hlawm.

" I chiang lo riauin ka hria, kan sawi chu awih mai teh, miss Kimi ringawt alawm i sawi", Rinhlua chuan a lo ti hlak a, ka bo tawlh tawlhin ka hria. 

Rinawma chuan a àw thian hmasa phawt hian, " Vawiin khan, physics sir Hmaa aiah miss Kimi a lo kal a, class i bunk tih a hria a nia aw", a ti a, chuvang nih dawn chu rum tawka min melh ni.

" Bakah Eddie, Siami khan i ngaihsak ṭha tawklo niin a sawi a nia aw", Johny-a chuan a ti a, Rinhlua pawhin a lo tuihnih ve vat. " Eddie harh teh", Ropuia chuan min thing nawk nawk chung hian a ti a, ka harh reng si a, " Zanina i awmdan chu a diklo reng reng, Sawma i zial lo ken hi ganja te hi ni lo maw? ", Ropuia bawk chuan a ti leh a. Sawma'n a nih loh thuin a lo chhang vat.

" Kan vawikhat zukna a nih vangte pawh niang, bakah miss Kimi ringawt a ngaihtuah vang a nih kha; ngaihṭha takin awm rawh, a ṭha em em ang", Rinawma chuan a ti a.

" A dik, hetiang zozial cheng 10 man lek hian Tu fa mah a tihàt theih ka ring lo", Sawma chuan a ti chharh chharh a, pak khu hluah hluah zui nghalin a khú a hak nghal bawrh bawrh bawk, " Sawma tak hi chu aw", a hnunga ben sak dat dat pahin Rinawma chuan a ti a. 

An sawi hi a dik ang, miss Kimi chu keini aiin a upa a, a inenkawl ṭha thei em em ang, ngaihtuah zui loh ka tum tur a ni.

" School-ah hian in hmuh theih chin lohah pawh cctv kan dah vek tih in hria em? ", ka mawnga min vaw leh chawrh pah hian sir David-a chuan a ti a, ka hma lamah ka eu nghal zawt, ka tuai nghal vawng vawng a; a na lutuk ringawt.

Lalrinhlua vang vek, kan bunk pawh min man phah; lighter a thlauh khanglang a, kan va chhar turin sir David-a vei lauh lauh nen kan intawn phah a, vawi 20 min vuak a tum a, tihian vawi 10 min vuakna a ni tawh.

" Zomuanpuia pawh tih tawh nak laiin, nangni lehzel", Johny-a leh Rinhlua a tiang ken chuan a kawk tawn sek a, " Midang pawh bunk an awm ṭeuhin ka ring, han sawi teh u", ka lama a tiang kena min kawk va chung hian a ti a, kan hriat loh thuin kan lo chhang a; keini pathum tih loh pawh bunk an awm ṭeuh.

A thaw hrawk a, " A ṭha e, in sawi duh loh manah vawi 10 dang ka vuak belh leh dawn che u", tih leh min vuak a rual nghal, ka hma lamah ka eu leh nghal zat a; a na lutuk, kan sir David-a kut hi a dam lo chi ni bawk nen, " Zomuanpuia phei chu nikum lama mi nen ka man zat che ka chhiar ṭha leh ang a, vawi 10 dang ka vuak belh leh dawn che", Rinhlua vaw chawrh pahin a ti a, ka khawngaih lutuk ka ṭhiante pahnih hi.

Lawkin, " Sir, a fair lo em mai", ka mawng tuai nuah nuah chungin ka ti a, awii a na lutuk a, ka ṭhut ṭhat theih pawh ka ring lo.

" Chuti, bunk dang sawi rawh, chuan nikum ami chu ka cancel ang", Johny-a vaw leh chawrh pahin a ti a, naaa, ka rilru buai lutuk.

Pawilo, nikum ami chu chhiar ṭha leh mai rawh se. Vawi 20 min vuak bakah bunk dang kan sawi duh loh avangin vawi 10 min vaw leh a, kei chu special deuhin vawi 10 dang vuak ka tuar leh dawn, ka peih lo lutuk.

Mawng tuai nuah nuah chungin office kan chhuahsan a, teacher ten min nuih dar dar hlawm a, a nawm dan a nuam vaklo.

" Vawiin chu pasalṭha kan ni ringawt alawm le, tir'u ṭhiante u", mittui tling pam chungin Johny-a chuan a ti a, ka khawngaih lutuk, kal pawh kan kal ṭha hleithei lo. 

Rinhlua pawhin, " Hei tak hi lawm ṭhian chhan thih ngamna chu", àw lawi zet hian a lo ti ve bawk a, ka lo bu ve nghauh nghauh ringawt, sawi tur ka hre lo, a na lutuk tih chauh ni mai.

" Lo ding teh u", zawi muangin kan inher ṭham ṭham a, miss Kimi lo ni rengin; a nui tet tet a, " Miss, ka lawm lutuk", ka ti a, ka intipachang ve hram hram.

Miss Kimi vang hian special vuak pawh ka dawn loh phah, sir David-a bulah min lo chhan hlauh a, chuti ni lo se office aṭang pawhin kalchhuak tur ka awm tawh pawh ka ringlo.

Miss Kimi chuan dam diai leh nui sen sen chung hian, " Awle, awle, chawlh kan pe che u; karleh Thawhṭanni aṭang chauhin school in rawn kal dawn nia", a ti a, a chhan kan lo zawt thuai, " Khati per pur khan lo kal theih in inring em ni? ", a hmui hupin a nui khur dar dar a, kan lu thak lo pui kan lo hiat nuah nuah ringawt.

Chawlh min pek dawn chuan mut nilen a ni mai, zan lamah pawh kan chhuah theih hmel loh.

" I lo bazar thei elaw? ", tiin nuih insum zet hian miss Kimi chuan min zawt a, ka theih thuin ka lo chhang thuai.

Sir David-a'n min man dante ka han hrilh a, " Zu pawh i in tih tawh laia meizial lo zuk leh te chu a", a ti bah nuai a, " Miss, engtin nge i hriat? ", tiin ka zawt heu a, " Hmana min su thlu Tu pa kha i ni tih ka hriat loh che i ring em ni", a ti hlak a.

Min lo hre reng a nih chu, " Hlim viauna tur a awm em ni? ", mi melh khiau chung hian a ti leh a, " Min hre tawh lo emaw ka lo ti a", kiai supin ka ti a, a lo ner nak, " Chu chu a hlimawm viau em ni? ", a ti a.

" I hlim lo a nih pawhin, kei ka hlim alawm", ka lo tihsak a, ka kawrah min pawtin, " Edd, ṭha deuhin awm ve la; hrem ngai nih bik ziah hi a nuam em ni? ", a ti dam dup mai a, ka lung a phut ran ber ṭum niin ka hria, a phu dut dut mai. 

A hmelah tihtak zetna ka hmu bawk a, " Ka thei tawh lo a nih hi ", tiin min pawhna kut chu ka chelh a, " Bazar vat vat ang", nui saih chungin ka han ti leh a, a lo bu ve nghal zat.

School pawh ka kal ve leh ta a, bunk rih lo phawt kan rel, sir David-a min vuaknain min la nghawng rih tlat, zan lamah pawh ni se kan chhuak tawh ngai lo, ṭhian dangten," In pathuma in dam hunah a ni mai", an ti ve tlat a.

Kan bunk apianga kan awmna hmunah kha chuan cctv an dah pawh ka ring lo e a, a sawi uar ve mai mai a ni, a hriat pawh ka ring lo.

" Miss, nizana ka lo zawh che kha min la chhang miah lo a ", Rinawma chuan a ti lang lang a, miss Kimi'n a lo bengkhawn vat, " Aw, a ni maw; nizan kha chu ka buai deuh hlek a, i zawhna chu lo sawi la, tihian a chhânna ka lo sawi mai ang e, i ṭhiante zawhna pawh lo ni ve thei a ", a lo ti dam dup a.

Rinawma chuan a zawhna chu sawiin miss Kimi chuan a sawifiah ta a, ka en kar a; ka mit lo thip zawkah chuan khap miah loin miss Kimi ka lo en tih ka hre chiah.

Miss Tluangi anglo deuhin a tawi naa a ria pan raih thung, puan bih hi a uar em em a; kekawr emaw hi a hak awm ka la hmu lo, a puan bih pawh par chei chuai ang chi ni loin, a plan tawp ang chi hi a ni a; a T-shirt hak leh a puan bih hi a inrem thei em em zui. " Eddie, Eddie ", min lo sawi dat dat a, " Aw, aw", ka ti hawi à hu leh tawh.

Ka ṭhutpuite chuan min lo sawi harh chu niin, miss Kimi'n min lo ko reng hi a lo ni a, " I hrethiam em? ", tiin min zawt a, ngawi rengin ka ding, ka hriatthiam leh hriatthiam loh pawh ka hre lo; eng nge a sawifiah chiah pawh ka hre lo a ni a, amah ringawt ka ngaihtuah avangin.

" Zomuanpui? ", inthiamlo takin ka han hawichhuak a, a lo nui khur dar dar chu niin, " Sir David-a vuakna chu i la na hle mai a, i ngaihtuahna a vaw bo te a ang zawk alawm le", nuih insum zet hian a ti a, min tihzah dan hi chu a hre thei mawle.

Keipawhin ball hmangin thal tawp khawpin ka vaw sak ve tawh tho kha maw.

Zanah chuan miss Kimi ka va text a, a la online loh avangin tick pakhat chauh a la awm; ' miss, i number nei tur hian ka ṭhianpa ka vo phah tih i hria em? ' tiin keimah leh keimah chu ka inbe neuh neuh a.

Rinawma nen an lo inbe char char ṭhin a ni a, zawhna va zawt ṭhin ni tho mah se; pangngai taka inbia an ni tho tho, Rinawma khan min hrilh ṭhat duh loh em avangin a kawr nghawngah ṭhamin ka hnek tur thu ka hrilh a, buaina a duh loh vang nge min hrilh ve ta a; ani pawhin kan zirlai a hriatthiam loh te zawh a duh ṭhin avangin a number a dil a, keipawhin zawh duh nei em em lo mah ila a number ka duh vang hrim hrimin ka dil ve a ni mai.

Lehkha pawh zir tawh chuang lo chuan ka ṭhiante chu kan group siam veah chuan ka nawipui chiam mai a, ***Lehkha zir ve tawh ang u, hetia ruih tur pawh awm hleiloa nawi ve em em ringawt mai*** Johny-a chuan a ti a, Rintlaka lo inrawlh vatin *** Serkawn lam kha intidam vat vat ula rui chunga kan nawi theih nan *** a lo ti a.

Ropuia leh Sawma ten nui lai emoji an lo dah tuar, keiin, *** kan D ten min duat zual phah thung alawm*** za vak loa nui lai emoji dah tel chungin ka han ti a; Rintlaka leh Ropuia an lo nui uar uar nghal a, Johny-a chuan *** lo ngawi tak rawh u, kan veng nu kha ka la bem thlu dawn khawp lawm *** a ti a, Sawma a che rang ngang mai, *** ka ngawi dawn lo, ka bem thluk khalh dawn che *** a lo ti a, an inhnial zui chu ni mai, midang ho erawh kan lo nui kur kur ringawt.

Rinawma leh Rinhlua an reh tlat zanin chu, ngati nge mawni, Rinawma chu lehkha a zir turah ka ngai a, Rinhlua ve thung hi. 

Ka han zawt hlawm a, *** Rinhlua chuan a D a be buai a niang *** an ti tliar tliar a. *** reilote ka awm loh chhungin min lo rel hman alaw*** Rinhlua a lo lang vat, ka thaw huai theiin ka hria. Rinhlua chuan min lo mention nghalin *** Siami khan i online reng siin i be lo tih a sawi a nia aw*** a lo ti a.

Ka hria lawm, ka be chak vak lo a ni; ka biak chak ber lah hi a la online thei si lo a, *** Rinawma chu a lo va lang har tawh ve, miss Kimi nen hian thu thlum tak tak an lo va infah a mile *** Johny-a chuan a ti a, ka thin a sa phut ringawt; a awmzia ka han zawt a, miss Kimi a online har theih em avangin Rinawma chuan call-in a thiam loh a va zawt a ni awm a, a chhan hriat si loh hian ka thik veng veng mai.

Tum loh deuhin Siami ka va biak phah ringawt bawk.