age is just a number-5

Age is Just a Number...

Chapter-5

Ziaktu: Cck Lalchhuanawmi

Tum lo deuhin Siami ka va biak phah ringawt bawk.

****

Present day*******

Sanga chu ka han khalh chhawk a, seat hnung lamah a mu àwn duai mai; a puar ngang bawk a nia nge, hotel-ah chaw kan ei a, kan chhuak leh dawn chiah a ni.

Tihian kan tlan char char mai, Sanga hian riah khawtawi vel a ṭul loh thu a sawi tlat pek a, kan thlen hma a duh zawk a ni.

Ka chhungte kan thlen chin ka hrilh ve zel bawk a, nautêi a lo duhthawh thei lutuk a, duh ai kan inbe rei phian zel; sawi tur apui hi a ngah thei lutuk a.

Tukin pawh hi a tho tlai leh ngei ang, nizanah eng eng emaw a sawi leh ṭeuh mai a.

Ka phone chu a lo ri ral ral a, ka nu lo niin nautêi ni leh ngei ang, school a kal dawn hian min lo call leh ziah ṭhin, ka han 'hello ' thuai a, " Aw, ka ní in dam maw? ", ka nui chhuak hawk hawk nghal, hei chu Duata a ni, kan milai, nautêi u chiah leh ka chhang chiah, kum 16 a ni thung; kan chhang hi a khat ve em em mai ni. " Duata, eng nge ni ta? ", heti hian a ti ziah bawk, " Ka u", tia min koh vaih chuan nautêi'n phone a lo chhuh nghal a ni mai.

" U, Didi ka be duh a nia; zingkar kara ka ní te biak chu a", nautei'n a tih hlak ri chu ka hria a; Duata'n lo chhang ve thuaiin, " I thu lo, ka nu leh pain ka pheikhawk duh deuh min lei duh si lo a, ka inlei tir dawn", a ti let ve hlak a, kei erawh an thawm lo ngaithlain ka lo nui kar kar thung; ka nau te hi an ngaihawm tawh takzet a ni.

Chuan Duata hian pheikhawk duh deuh a nei a, ka nu leh pain an lei duh lo nge, nakinah an ti zawk, a thil duh ka nu leh pain an leisak lawk lo hian min hrilh ziah ṭhin.

Ka ní niloin keimah min hrilh zawk a ni a, ka leisak leh ngei chu a ngai dawn a nih hi; ka nau te tan chuan ka inhuam ve em. " Duata, pheikhawk chu a thlalak min lo thawn la, ka lo hawnsak dawn che nia aw", ka ti a.

" Aw ka ní, a ngai leh lo mai ang, ka u ka chah mai ang", Duata chuan a lo ti a, ti hian kan inbe fel ta e, tunah chuan nautêi hun a ni ve leh ta e.

Mahse, ka pain chaw a ei phawt loh chuan min biak a remtih loh thu a sawi a, Duata chuan intithei fahranin, " Hello, ka u, chaw te i ei tawh em? Kan inbiak lohna a rei tawh tiraw, hrilh tur che ka ngah tawh lutuk Tu emaw ang deuhin", a ti kharh kharh a, hetia a sawi lai hian nautêi a va melh zawk zawk pah ang a, nautêi a lo teu hlar ngei ang.

" Ka u, room-ah ka awm a, eng emaw zawh duh che ka nei a", a ti a, " Aw sawi la", ka lo ti thuai a, engtak min zawt ang chu ni maw.

" Ka u, ih, englo, ih englo a nia", sehchilh tak hian a ti nawk nawk a, " Duata, eng nge ni ta, sawi rawh", dam diai hian ka ti a, " Ka u, ngaihzawng lam a nia", a tih leh chuan ka ding dawt.

Ṭhuthmun rem fel te tein, " Aw Duata, han sawi ta che", ka ti a, " Ka u, ka thianpa hian bialnu a nei amaw; mahse chu a bialnu chuan kei hi min duh zawk a", ṭhianpa Rinhlua ka hre chhuak zawk, sawi zel turin ka ti a.

" Ka u maw, chu a bialnu chuan ka ṭhianpa hi ṭhen a duh thu leh keimah nena inngaihzawn a duh thu ka bulah a sawi ṭhin a", a ti siam siam a, kei erawh ka kut ka hum ruh nasa, ka chunga thleng ang kha ka nau chungah hian thleng ve lo hram rawh se.

" Chuan maw, ka duh ve loh thu leh ka ṭhianpa rilru tihnatsak ka duh loh thu ka hrilh a, amah chuan ka ṭhianpa ṭhen loin a rukin inkawp ang min ti a", ka nau hi ka hrilhfiah ngei a ngai ang. A chhan dan ka han zawt a, " Ka u, ka duh lo a, ka lo zawt che engtin nge ka tih ang?

Ka ṭhianpa hian a duh ve lutuk a; chuan maw a sawi zel danin keimah vangin ka ṭhianpain a bemna pawh chhang mai chauh a nih thu a sawi bawk a", ka hre thiam ṭan e, mi hlauhawm tak a nih ngei dawn chu; ka nau hi chuan a tuar ve lo ang.

" Duata, i ṭhianpa bulah chuan chu a bialnu chu ṭhen hmasa zawk turin hrilh rawh, chuti lo chu i ṭhianpa kha i chân thei a nia aw; chuan i ṭhianpa bialnu pawh chu hnaih ngai reng reng tawh suh, ngaihzawng neih nan khua a la tlai lo aw, Duata, i ṭhianpa nena in inkar kha tihchhiat tir suh aw", ka ti mawlh mawlh a, ka thiam ang ang Chuan ka hrilhfiah ve mawlh mawlh, a zawm ngei tur thuin min chhang a; zawm mai loin hre thiam ngei bawk se ka duh a ni.

Ka tawn ang tawng lo tur in ka duh, ka tisual tawh a; ka nau hi Chuan tisual ve tawh suh se. Ka lo daisual tawh a, a hrehawmzia pawh ka hria; ka ṭhiante tana ti nia ka inngaihna khan nunna a la zawk si.

Minute khat, nilo, second khat lek pawh ṭhianpa Rinhlua kha lo tho ta se Chuan maw, ngaihdam ka dil mawlh mawlh ngei ang, chubak sawi theih ka nei chuang lo; khatianga ti lo khan ka ṭhianpa kha lo hrilh vat zawk ila tha tur.

****

Past days******

"Hepa hi tunge? ", thip zeta min en kar chung hian a ti a, hmeichhe pakhat hian intitatu takin a banah a chelh bawk; ka nghal ka chhuah a, " A bialpa", ka ti ve sak, a hma ai zawngin a meng thip, puipunna hmun chu ni lo se min sawisak hrep ka ring.

Miss Kimi'n a lo hnial vat a, ṭangkaina a awm tawh lo, ka sawi tur ang chu ka sawi zo vek tawh.

A inluahah Chuan ka zui lut a, " Zomuanpui", tiin min vin nghek a, ka hnung lamah ka kat dawrh, a rawl lah hi a ring ve phian reuh lehnghal a. " Min tihlau alawm", ka àwm chu ka han tuai vel a, a lo ner nak.

Chawhmeh a lei ho chu a dah fel mawlh mawlh a, " Khapa kha i unaupa niloin i pasal hual zawk maw? ", ka tih chuan min lo en zawkin a tihlai a tihzawm lehnghal.

Kan inhmuh hmasak ber ṭuma thlah tum tu pa kha a pasal hual lo ni rengin, a taksaa duk awm ka hmuh pawh a sawisakna ngei a ni, bakah a la ler kualsan zui, chuti chungin miss Kimi hian pasal atan neih a la tum tho.

Chumai bakah a pasal hual atan a inserh thianghlim ve ṭang ṭang, ngaihzawng pawh a nei ngailo! " Miss, i à takzet a ni", ka ti tak tak, a à reuh em mai. A mizia engkim a hre vek chung pawhin tihian a la pawmzam mai mai chu a nia.

Vawiin chu keimah chauhin ka bunk, thlifim lo thaw heuh heuh chu ka hip veng veng a. Miss Kimi khan, " Ka dinhmun angah hi Chuan Tu hmeichhia pawh ding se an tih ve tho ka ring", tiin min hrilh a, eng dinhmunah tak Chuan ding ang maw!

A duhthlanna ngeia pasal hual nei chu a nilo tawp mai a.

" Eddie", muangchangin ka hawiphei a, Lallawmsiami lo niin, " Eng nge i lo tih dawn? Rinhlua a awm loh hi ", ka lo ti hlak a, a la nui sen sen zui; min lo pan hnai a kei erawh khawng takin ka lo ding, kekawr ipteah ka kut ka zen lut than a; ka en kar bawk. " Min duh ve tho tih ka hria a nia aw", a va zamlo tak, " I ṭhianpa hian min duh lutuk tih hi i hria em? ".

Tunah Chuan Rinhlua ngui bam ṭhin pawh a hlim leh tawh khawp mai, Siami ka bialnu a nihna anga ngaihsak tura min lo hrilh chamchi ṭhin kha ka Hrethiam uar uar tawh bawk, kei erawh aruka ka thiltih hian min la vuak let hun chu a awm ngei ngei ang, Lallawmsiami hi fing phakar tak a ni.

" Zan kan chhuah lehna hmasa ber a ni bawk a, Johnny; in veng nu chu min lo tihpui ", ngen ngawl tak hian Sawma Chuan a ti a, Johny-a Chuan, " I chang tawh lo e a, Mary kha chu 3Gate tlangval ta a ni tawh", rilru nat hmel deuh hian a ti a. Sawma'n nui hawk hawk chungin, " Ka ring a ni, hmel zozial lutuk tan Chuan ka lo ui ve em asin", a nui let tawp tawp Mai a, a za ngang a nia nge.

Rinhlua chu ka en ngawih ngawih a, engdang ka ngaihtuah theilo; tun ang hian hlim takin awm reng sela ka duh. Ka ṭhiante hlimna atan Chuan tawrh pawh ka inhuam ve tur alawm.

Lallawmsiami'n chocolate min pek hum ruh ṭeuh chungin classroom lam ka pan a, ka ṭhutnaa ṭhut pah Chuan Rinawma hmaah ka theh thla a, " Ei rawh, i ta tur a nih kha", ka ti a, lo banin a ei ve mai bawk.

Miss Kimi chu ka en char char a, a lecture pek hi ninawm kan tih loh nan a fiamthu pah deuh reng bawk nen; muthlu pawh kan awm mang lo. A ṭawng hriat ringawt pawh hian ka hahdam sawng sawng theiin ka hria.

A rukin in aṭang bike Chuan ka inkhalh chhuak leh a. Zanin chu Theiriat atang Pukpui. 

Zakamlova Memorial School ka tlan thleng chu ka ding chawt a, miss Kimi ka sutna hmunah bawk khan kha a pasal hual Hruaia khan miss Kimi chhipah chuan a lo kek bawrh bawrh a.

Bike aṭang chhuk vatin Hruaia chu ka va hnek a, a pai tawn tawn; miss Kimi chu kaithoin a sam thur bam chu ka hui ṭha mawlh mawlh a, a ṭahna avangin a biangte chu a val kulh hlawm, ka khawngaih reuh lutuk.

" Naupang tê tê si", tih leh Hruaia Chuan min hnek a lo rual nghal a, kei ka lo inring hmanlo bawk nen, ka let tawp mai a; tho nghal vutin kan insual titih chu a ni nghal mai, kei aia u mah ni se a thiltih hi a dik biklo; hmeichhe àwmnem zawk kut lo thlak te chu a, chuta karah a nupui hual a la rinawmlo San ṭhin a nia.