age is just a number-6

Age is Just a Number...

Chapter-6

Zuaktu: Cck Lalchhuanawmi

" Naupang tê tê si", tih leh Hruaia chuan min hnek a lo rual nghal a, kei ka lo inring hman lo bawk nen, ka let tawp mai a; tho nghal vutin kan insual titih chu a ni nghal mai, kei aia u mah nise a thiltih hi a dik bik lo; hmeichhe àwmnem zawk kut lo thlak te chu a, chuta karah a nupui hual a la rinawmlo San ṭhin a nia.

" Duhtawk teh u, khawngaihin duhtawk tawh teh u", miss Kimi a lo au lauh lauh a, ka va en chuan a lo khur hlawk hlawk; lo ṭhu tungin a bengte chu a lo hup nasa mai a; Hruaia chuan min thing thlu hrawkin miss Kimi lam a va pan a, kei aia upa leh tha ngah zawk na na na chu ka la hneh lo deuh a ni.

Miss Kimi va pawt ṭhu dawt pah chuan, " Lalruatkim, mahni nau rual nena inngaihzawn maw, i zak lo em ni? ", nui lui sak hian a ti a.

" Ka sawi tawh kha, ka zirlai lawm a nih; kan inngaizawng lo", khur hlawk hlawk chung hian miss Kimi chuan a ti a, a hlau te pawh a ang zawk.

A kut zungchalin min lo kawk va mai a, " Kan la zo fel lo ", ti thum dutin a kalsawn ta daih. " Edd, Edd i tha em? ", khur hlawk hlawk chung hian ka lam panin a lo kal a, bawkvak hi a ang mah zawk.

Ka ṭhat leh ṭhat loh thu min zawt pah chuan ka hmaite chu a khawih niah niah a, " A na em? Ngati nge i lo inrawlh a, i à em mai. Naktuk school kal a ngai tih i hre lo em ni? I hmaite lah hi a khem nasa si, bakah tun ang zanah te khawiah nge kal i tum? ", mittui tling pam hian a ti siam siam a, thinrima sawi pawh a ni lo; ngawi rengin ka en a, a lungchhiatnate han inhrithla ve teh se.

Fiam ka chak leh tlat pek a, " Awi, a na lutuk; ka pum hi a na lutuk min hnekna kha a niang", ka ṭhen sak sak mai a, ka pum ka dawm ngawih ngawih mai bawk.

Ka rin ang ngeiin miss Kimi chuan min ngaihtuah takzet tih hriat ngawih ngawih tur hian a hmelah a lang a, chutah min lo kuah thlawpin, " Ka tihpalh lutuk, Edd, keimah vangin i tawrh phah ta si a; pawi ka ti lutuk ", min ṭahkhum ta chiam mai a, awmdan tur pawh ka hre lo; ka inthiamlo letling hial zawk, " A pawi lo, miss, a pawi lo reng reng", ka ti ve ta ringawt a, kuah let vein a hnungah ka beng thek thek ringawt.

" Nangpa chu le, Sawma ten an hmu ve tawh che em; insualpui i nei tihna mi? ", Rinhlua chuan min lo zawt nghal vat a, " Nizan pawh i lo kal loh chhan kha hei vang hi mi? ", min zawh zawm lehnghal, chhan dan tur ber pawh ka hre lo, ka ngawi reng ringawt.

Ka sawi duh teuh lo, tunah hian Sawma awm phei sela chuan a phur ber berah a nia a ṭan leh dawn ni, " Va cho leh ila", a ti chul leh mai ang.

Siamin min ngaihtuah ngang mai, school mah nise a thiam ang angin min duat ve nasa, Johny-an, " Duattu neih vang ngawta na ber awm zia zanga awm kher loh tur aw", tiin min fiam pah reng bawk a, ka lo nuih mai mai.

A rukin Lallawmsiami pawhin min ngaihtuah ve a ni tih lantir nan chocolate min pe leh a, Rinawma ei leh tur a ni mai.

Miss Kimi hi ka la hmu miah lo, school chu a rawn kal ka ring; Venglai P. W. D. Office thlangah building pakhat luah theih turin an sa a, chutah chuan miss Kimi pawhin room pakhat a luah ve a; nizan pawh khan ka thlah, damdawite min hnawih sak a; ka ṭhiante bulah ka kal loh phah bawk.

Zanah chuan miss Kimi ka va text a *** miss, vawiinah school i rawn kal em? *** a la online lo zui, tick pakhat chauh a awm.

A online har thei lutuk an tih kha ka hrechhuak zawk a, 'Rinawma pawhin a call ve tho a lawm le' ti supin ka va call a; " Aw Rinawm, eng nge ni ta? ", a lo ti dam dup, ka sa phat nghal bawk; " Ka ni lo", ka ti hlak a, phone screen en mang hleiloin min lo chhang a ni chiang.

A thuhrimah Rinawma nen pawh chuan an lo va inbe zing tawh awm.

" Tunge aw? ", a lo ti leh a; " I bialpa", kiai suk chung hian ka ti a, " Zomuanpui", a lo vin hlar nghal.

" Lehkha zir rawh", a lo tihzawm lehnghal a, keiin, " Mahni bialpa te pawh han hriat loh", ka ti leh sak a, a teu nasa ngang mai. " Zomuanpui, in zirtirtu ka nih hi, tiang thu lawilo sawi lo khan lehkha zir rawh", a lo ti hlak hlak a, ka lo nui hawk hawk thung.

School a rawn kal reng a min hmuh a hreh avangin class-ah pawh lo kal lo a nih thu a sawi a, bakah miss Thani biology-ah a àm ve deuh hlek a, a class pawh a ken(kian) thu a sawi; sir David-a roll lo call lah khan min fiam nge min zilh nge tih pawh hriat theih mang lo khan a phun nuah nuah mai bawk.

School thlen hma teah hian miss Kimi ka nghak a, a lo thleng har em em zui; school ṭan dar pawh a ri tawh, han kal mai ka tum laiin miss Kimi lo kal chhet chhet ka hmu a; ka lung a phu rang ngang mai ka lawm lutuk vangte pawh a nia nge.

A hmaah tak chuan ka va ding a, ka àwmah a intauh leh chawrh, lo dak chho vain, " Awi, Edd i tha tawh em ni? ", a ti ha a, nui suk chungin ka lo en chhuk run thung.

" Ti teh kal ang, school ka tlai dawn a ang hle mai", pen hlawk hlawk chung hian a ti a, ka umzui ve vat.

A ding dawt a, a lo lehhawi nghal a ka hnung lamah ka eu zawt, chutah min melh kar chung hian, " Engvangin nge school-ah i awm loh, tun ang hunah chuan school-a awm tawh tur i ni", a ti kharh kharh a.

" Miss, ka tlai alawm; ih, ih, tiang hmel ka put chhung hi chu ka nuin school kal hrih lo tur in min ti a; mahse ka lo kal lui hram hram ", hmui tipawr deuh chung hian ka ti a, a inthiamlo lutuk chuan a lu a hiat nuah nuah ringawt.

" Ka nuin min hau nasa lutuk", ka tih leh phei chuan inthiamlo tak hi a ni, a ni reng lah taka min hau ve nasa lutuk.

" Ka tihpalh lutuk", ṭhen sak chung hian a ti a, ka inthiamlo ve reng, mahse, fiam hi nuam ka ti tlat tawh.

" Min chhan ngei a ngai ang", ka ti sup a, a lo bu ve mai bawk.

Chutah ka bengah pawtin min hau nghal bawrh bawrh.

Office kan thlen hnu chuan sir Zaia'n min lo hmu a, " Kha Kim, i lo lang tawh maw? ", a lo ti var a.

Miss Kimi'n ka beng a pawhna pawh thlah chuanglo chuan, " Aw, ka tlai deuh hlek a vawiin chu, min hriatthiam mai a ngai ang", nui saih chung hian a ti a.

Sir David-a a lo inrawlh ve vat, " I lo kal loh hlau deuhte kan awm a hei", ti pah chuan sir Zaia darah a beng thek thek a, sir Zaia a lo lai ve nasa.

" Eddie-a bawk chu", hahthlak tih hmel deuh hian sir David-a chuan a ti leh a, sir Zaia a lo nui tet tet, miss Kimi nge sir Zaia nge sir David-a nge ka ngei tih pawh ka hre lo, an pathum hian a ni mai.

Miss Kimi chuan, " A, aw, Zomuanpui, class-ah va kal tawh rawh", min thlah pah chuan a ti a; ka han tawi khawmuang lui vel a, " Zomuanpui, hmanhmawh rawh", dam deuh hian min lo au a, sir Zaia leh sir David-a awm lo se chuan ' Zomuanpui' a ti vin leh hlar tawh ang chu.

Ka ṭhiante hian ka hliam dan hi min zawt reng a, kei lahin ka hrilh ṭha duh bawk si lo; a hnuah phei chuan min zawt duh tawh lo.

" Zaninah i ṭhiante bulah i chhuah theih loh thu hrilh la, kan pahnihin kan chhuak ve thung ang", tim eihna nei lo hian Lawmsiami chuan a ti a, " Ka nuin ka chhuak ru ṭhin tih a hre tawh a, ka chhuak thei tawh lo", tifuh inti tak hian ka ti let ve a.

" A nih chuan, tunah hian i ṭhianpa Rinhlua bulah inṭhen ka duh thu ka va hrilh mai ang e, i hria tiraw, i ṭhianpa hlimna leh hlim lohna ka kutah a awm tih hi", zahna nei hmel pu pawhin a lang lo.

Sehchilh deuh tak hian, " Ka lo hruai dawn che a nia ", ka ti a, ka kut ka hum ruh nasa.

Nui var chung hian, " I lo kalna hmun tur ka lo hrilh dawn che nia, min lo hruai a ngai lo ang", dar chhin hak chung hian a ti a, a kal liam hnu chuan thawk ka la vang vang; kan indinchilh lai khan ka thawlo a ni chek ang chu.

Lallawmsiami thang kamah ka awk der chu a ni mai si ale, Rinhlua hian engtin nge hetiang hmeichhia hi a lo duh theih zawk ni; a hmelṭhat vanga duh nge a nih anga, thildang vang zawk.

A ruka a lo tenawm zia hi a hre map si lo; ka hrilh ang e hrilh lo ang tih chu ka buaina ber a ni.

Ni e, a hmel chu a ṭha ngei alawm; a hleitling phian bawk, mahse, Siami a pawn lam lan dana za hawr ai pawhin a tenawm zawk; kum sawmparuk mi lek thiltih atan chuan a rapthlak letling hial zawk bawk.

" Edd, i va ngaihtuah muk ve", thluk kual raih chungin miss Kimi chuan min lo sik hlawk a, " A na, i va naupangchhia reuh tak", ka ti hlak a, a lo nui ringawt.

A pawi lo, ka ngaihtuahna kal thui tur lak ata min tiharh a ka lawm zawk; bakah a bulah hi chuan ka hahdam, ka ngaina tawh khawp mai.

" Min hrilh duh te i nei em? Buaina te i nei a nih chuan min hrilh la, nge sawichhuahte a rem lo zawk em ni? ", a mit ko ti sang euh euh chung hian a ti a, ka nui hak ringawt.

" Aw, ka hrethiam e; Tu emaw chu a gf nen intihthiamlona an nei a ni chiang", khuh kharh kharh chung hian a ti leh a, a duh naah chuan ngeiawm thiam ve tak chu a ni.

" Miss, risk chi hi hriat tur", ka ti nghut a, a hma aiin a nuihza emaw tih tur a ni, a nui hawk hawk lo naa a nuihza hle a ni tih erawh a hriat theih tho.

*** Eddie, i nu hian min hrem rei tawh i ti ve tawh lo maw? *** huii, a va hahthlak tak em; *** a hrem tel ve lo che u *** ka va ti a, *** i tel lo chuan kan kim bawk silo nih hi maw*** an lo ti niah niah hlawm a, ka ṭhiante ho hi ka tel lo chuan an chhuak ve duh bik ṭhin si lo.

Keimah vang chu ni bik lo, kan ṭhian ho zingah hian pakhat lek emaw pawha kan kim dawnlo a nih chuan kan kal chhuak ngailo.

Ka nuin a hriatchhuah thu ka hrilh phei chuan chhuah loh mai an ti tlu ve ta kha a ni a, mahse, kei erawh arukin ka chhuak zeuh zeuh thung si; ka inthiamlo lutuk tih hi sawi ngaihna pawh ka hrelo.

Lallawmsiami ka tihlawm zual poh leh Rinhlua hlimna a zual ve zel thung bawk si, chutia ka ngaihtuah neuh neuh lai chuan ka inrawlhruk, a sen chi chu ka in tlawk tlawk mai a, úm chanve dawn ka in thlen hnu chuan ka thaw halh halh a; ka lu a hai chhap nghal, hei pawh hi Lallawmsiami vang vek.

Ahma chuan a fim chi ah pawh khan ka lungawi ve mai ṭhin a, tunah chuan a sen ngat lo chu ka ti ta.

A message a lo thleng nghal a, *** zanin chu kal lo ang aw, i duh chuan i ṭhiante nen in chhuak ho thei ang*** ka chhiar zo chiah chu ka phone ka vawm darh lo chauh a ni, engvangin nge he nu thu thua ka awm?

Group-ah pawh chuan mut hma ka duh thu hrilhin data ka off nghal hmak a, lukham hnuaiah ka dah nghal zat.

" Eddie, tunlai hi rilru hahna i nei em ni? ", Rinhlua chuan ka dara a kut nghat chung chuan a ti a, nei pawh ni ila engtin nge ka hrilh ang, Rinhlua ngat phei hi chu.

" Nei lo e, chutiang rilru hahna ka nei lo", nui lui sak chung hian ka ti a.

Hetia dawt sawi reng pawh hi ka ning, kan pathumin kan bunk ṭan leh tawh a, min man tawh lohna turin kan fimkhur nasa tawh mai.

Zanah chuan, *** nithum vel chu kan chawl aw*** tih hi Lawmsiami hnen aṭang a lo thleng a, chu chu remchangah lain kan ṭhianho group-ah chuan *** zanin chu kan ride dawn lo em ni? *** ka han ti a.

Rinawma a lo lang nghal vat*** ka lo chhuak nghal*** tih hi a lo thawn nghal a, midang pawh chuan an lo ti sup sup nghal; mahse, Sawma a hman ta tlatlo, *** naktukah a chhan ka hrilh dawn che u nia *** a ti a, kan ṭhulh chu a ni ta der mai.

Tunlai chu keimah hi ka chau ngawih ngawih ni ber, mahni chauha thuruk vawn reng pawh hi a hahthlak; ka sawichhuah vaih chuan ka ṭhianpa hi a nat ka hlau bawk si.

Rinhlua a nat ka hlauh vang ringawta hetia aruka a bialnu duh lai ka lo kawp ringawt hi inthiam chawp thei ka ni lo, tumah lah dem thei ka ni lo; a ṭha lo tih hre reng chunga inbarhlut ka ni miau a.

Vawiin class chu ka mu tluan ṭhak a, bunk tur takngial pawhin ka ṭhutna hi ka thawhsan theilo; " Eddie, tunlai hi i in nasa hle ni maw? ", min thlek vang vang chung hian Rinawma chuan a ti zawi sup a, ka in nasat loh thuin ka lo chhang, " Sawma lo ken bak in tur a awm loh kha maw, tunlai kan chhuah khat theih em hi ", ka lo ti let a.

Sawma lo ken bak lo pawh in tur ka ngah tawh lutuk, a lakna tur nen lam; Sawma'n a lakna thin loah pawh lakna tur a lo tam mai a.

Chutiang ngaihtuah thei pawh ka ni lo, tunlai ka nundan hi ka ning ngawih ngawih.

Zanah chuan lehkha zir tumin zirlaibu Ka han la chhuak ve tak naa, ka rilruah a lut ṭha thei chuanglo; ka lo mutthluksan leh thin.

Ka phone ri chuan min tiharh zawk a, ka han en chu miss Kimi hi a lo ni a, mak ka ti angreng viau. " Edd, i tha maw? ", tiin min lo zawt nghal vat a, ka hahdam nghal sawng sawngin ka hria; inhnialpui tur ka nei leh ta e.

" I bialpa hi i lo ngaihtuah ve tihna em ni? ", ka han ti chiah chu, " Zomuanpui", a lo ti vin hlar lehnghal.

Keipawh hi ka nghal mah mah ṭhin a ni, teacher-te tianga be lo tur hi ka ni tih ka inhria, mahse, miss Kimi hi chu a dang tlat.

Tho vutin ka nu bulah, " Ka nu, miss Kimi bulah ka kal lawk dawn a nia aw; thiam loh ka nei a, phone atang ringawta min hrilh chu ka hrethiam chiah lo", zirlaibu lek kang va chunga ka ti chu a lo phal ve hlauh mai a; fimkhur tur erawh chuan min chah nasa mai.

Kawngkhar bulah chuan dingin ka han call hmasa a, " Aw Rinawm? ", phone screen a en lo a ni lehchiang, " Min hai", ka ti nghut a, ngati nge mawni ka call apiang hian Rinawma emaw min tih ṭhin le; ka va ngei tak. " Nichin lawkah pawh kan inbiak kha", ka ti leh nghut a, " Eng i hria ni maw min vin ve kharh kharh thin le? ", lungawi loh hmel deuh hian min lo ti let a.

" Rinawma chauh i ngaihtuah a nih kha", vui àw tak hian ka ti lang lang a, a lo nui hak, " Nui suh", ka lo ti hlak a; Rinawma chauh a ngaihtuah a nih kha.

" Kawngkhar bula ṭawng ri nuah nuah ka hriat hi nangmah i ni em? ", tih leh kawng lo hawn a rual nghal a, a la nui ṭhaw ang zui.

A dar veilamah a sam phiar a uai hnuang a, t-shirt sen dà lam hi a ha a, a inchawih turin kekawr sen dà lam a la ha leh zui, tarmit a vuah bawk a; ka lungphu a su dup dup mai.

Ka thiam loh lai pawh hre turin engmah la zir hek lo le, ka duh lai lai ka kawk ve ringawt mai a; a ṭhen phei chu kan la zir loh te an ni hlawm, " Lehkha i zir ngailo ni maw? ", a tarmit kar atang chuan no lo zet hian min melh a, ka lu ka hiat ringawt, min man chiang ṭhin teh e.

A bul aṭangin min han zirtir ṭha leh a, ka rilruah ka la lut chuang lo; amah ringawt ka en, zanin ka awmdan chu ka hrethiam bik lo, ka lung hi a thlawh chhuah mai hlauhawm khawpin an phu nasa mai!