age is just a number-7

Age is Just a Number...

Chapter-7

Ziaktu: Cck Lalchhuanawmi 

Miss Kimi'n min nawr kal dat dat a, ka luhlul ka chhuah ve tlat a ka kal ṭha duh lo lui tlat, " Zomuanpui, kal ṭha mai mai teh", a ti hlak hlak a, hah hmel tak hian a thaw halh halh mai bawk.

A rukin ka nuih ka nuih mai, ka khawngaih tho naa hetia min buaipui hi nuam ka ti tlat ṭhin.

School thlen hma teah ka lo nghak leh a, school ka kal peih loh thu leh ka haw tur thu ka hrilh a; tihian min nawr kal a tum ta a ni.

" Morning, miss", ka hawi nghal vat a, Rinawma lo ni; nelawm deuh hian a lo nui sang a, kei erawh ka nui lai ka tawp chat.

Miss Kimi pawh chuan a lo chhawn ve vat a, kei min biak ang lo takin nelawm tak hian a be siam siam a; ka thik lutuk chu Lalrinawma ka hnek thlu lo chauh a ni.

" I ṭhianpa hi school kal loh ngawt a tum a, han hrilh ve teh; nangman classroom thleng han hruai law law teh", miss Kimi'n a tih chuan, " Keimah pawhin ka kal ve thei", ka ti nghut a ka kal nghal nal nal.

Lalrinawma chu ka thlit sek mai a, inkhalh haw theilo rak tur hian han rui hnap sela ka ti khawp mai, mahse, min lo hnar ve zel a; a fing leh lutuk hi a inti à chawp ni maiin ka hria.

A rukin ka melh hriam ngaih ngaih ringawt, miss Kimi lo ngaina ve ringawt tur leh miss Kimi'n kei aia a lo ngaina ve tur pawh ka duh lo; keipawh hi min ngaina ve em tih pawh ka hriat loh chu.

" Ka D nen kan inhmuhthiam loh vang a nia", inthlahrun hmel tak hian Sawma chuan a ti chharh chharh a.

Rintlaka chuan a hnunga chulsak heuh heuh pah hian, " A chhur chhur hian aw", a ti tham tawi salh a, Sawma'n a melh no lo teh e.

An inhmuhthiam loh vangin kan ride phah loh ve ngei a, ka lo nuih hak ringawt.

Classroom tukverha ka dak chu miss Kimi leh sir Zaia lo inbe mawlh mawlh lai hi ka hmu a, sir Zaia hian miss Kimi hi a duh ve hian ka hre deuh, mahse, miss Kimi chuan pasal hual a nei tawh a; chu chu a la hre lo pawh a ni mai thei a ni.

A, keipawh hi ka lo inrawlh vena tur awmlo, mahse, sir Zaia hian a duh tak tak a nih chuan tuna a pasal hual lak aṭang hian chhanchhuaktu pawh a ni thei a; a ṭha phian zawk ang, khapa hmen hmun kha a.

In warm-up nan no thum vel ka in a, hmeichhe pakhat rui chhe tawh tak hi ka bula lo ṭhu pah chuan min kuah hlun hlun a, " Hmelṭhapa, zanin chu i riang dawn a ang hle mai a; ka bulah lo kal daih ta che", a ti ne ne a.

Hmeichhe rui hmang hi a lo mawi lo ve khawp mai; kei ka duhzawng a ni ta hauh lo.

Ka inpuite zawk chuan lo chhangin, " A riang hleinem, saw, saw laia saw a awm reng saw", tiin Lawmsiami chu an va kawk a.

Ner nawng hian, " A hmelchhiat chhiat nen", a Ti lang lang a, ka nuih a za reuh lutuk; ka bula awmte pawh chu an nui tat tat a.

Henu hi engti kawng emaw tak chuan a lawmawm phian.

" Hmelṭhapa, zanin chu kan pahnihin... ", a mit ko a San euh euh a, ka hre thiam ve khawp mai; ka inpuite chuan, " Kan lo va inthiar fihlim mai ang e", nui tat tat chung hian an ti a, an kal ve mai bawk a.

Chutah, A kutchang no leh nalh zet mai chuan ka hmai te chu a thai kual riak riak a, ka beng leh nghawngte chu a nul thuak thuak bawk, a kut tihnghal dan tawk lah a hria.

Hrisel ṭha ve tawk leh, lo lem ve zeuh takah chuan thisen pawh a lum ṭha ham ham duh tawh khawp mai, Lawmsiami engtik laiin nge a lo thlen hman ka hrelo, chunu chu a lo pawt leng dawr mai a, a hmaiah a beng chawrh nghal, hriam tak hian min melh a min ei zawh duh vek hmel a pu.

Chak tur chiang sa balin, kan tlan ṭan ta a. 

"Eddie, inrinni chu kan pahnih chauhin bazar ve ila; couple shirt hual ruk ka nei a, a zuartu hnenah pawh min dah ṭhatsak turin ka hrilh", nui sen sen chung hian Siamthari chuan a ti a, a lai kual vel chu a hmuhnawm reuh lutuk.

Min tawk zawnga miss Kimi lehkhabu pawm ṭun chunga lo kal kan hmuh chuan kan ding chawt a, Siamthari chuan lo wish-in keipawh chuan ka lo wish ve bawk a.

A tarmit kar atang chuan min lo en piau a, a zirlaite ai pawha a tawi hi ka lungawilopui thei nia mawle, " A, aw morning; class-ah kal tawh r'u, bell a ri tawh nia", nui sang chunga tiin a kalsawn lehnghal a, eng lehkhabute nge ni a pawm ṭun ni.

Siamthari bulah chuan, " Inrinni chu kan bazar dawn nia, ka lo lam ang che", ti supin classroom lam panin a kal ta a, kei erawh miss Kimi ka va um a, ka umphak ve mai bawk a.

" Miss", ring leng lawngin a beng bulah ka va ti hlak a, a phu nasa ngang mai a beng hupin a " Awi", tuar a, a lehkhabu pawh a tla darh nuai.

" I va hlau awm ve", nui hawk hawkin ka ti a, a la hlau a ni chek ang chu che chang eih lo hian min en kar a, ka ngaih a tiṭha lo lek lek, " Miss, i ṭha maw?", a darah chuan ka va khawih zeuh a, a la che chuang lo, thawk erawh a la thaw.

Hlauthawng titih deuh hian, " Miss, i ṭha em? ", ka ti leh a, chutah lehkhabu pakhat la kangin min vaw ta nghek nghek mai a.

" Zomuanpui, i chhia leh ṭha hriatna i hlauh em ni? Khatianga i lo au vak kha a ṭulna i hria em? Eng nge a ṭangkaina? Lungphu chawla min thih tir i tum em ni? Ka hlau tih te i hre lo em ni? ", a ti kharh kharh a, min vaw pah reng bawk a, mahse a rawl a ring miah lo thinrim ve si!

A ṭhu thla dawt a, lehkhabu tla darh ho chu a chharkhawm mial mial nghal a; keipawh chuan inthiamlo tak chungin lehkhabu chu ka han chharpui ve nghal bawk a.

Ka han en zeuh chu a mittui hi a lo hru zeuh a, " Miss, ka tihpalh lutuk; khatiangin i hlau ang tih kha ka hre lo alawm, ka tihpalh lutuk a nia aw", lehkhabu pe pah chuan ka ti a, hetiangin a hlau ang tih ka ring phalo hrim hrim.

" A pawilo, mahse, tun hnuah chuan ching tawh suh ang che", a ti hmuk a, a la thinrim deuh a nih ka ring, " Yes sir, aw yes miss", ka ti zâng vah a ka nuih tlawn titih deuh bawk, " A ṭha ", a lo ti leh hmuk thung a, ner deuh nangin ka lu ka hiat ringawt.

Siamthari chu a phun nuah nuah a, couple shirt a lo hual ruk kha a zuartunuin, " Min dah ṭhattir ve si a", ti lo chuan a lo hralh daih mai a, kan inthlem nileng dawn a nih hmel.

Ngaihzawngte la thlem ngailo chuan tihngaihna ka hre ṭhak lo lehnghal, a mittui a tling pam reng a; ṭawngkaa thlem dan tur takngial pawh ka hre lo, " I duh duh ka lei dawn che nia", ka tih lahin, " Kha mi kher kha ka duh alawm", ṭah àw ṭuau chung hian a ti ṭhin bawk nen, kan chhangchhiat hmel hi ka ti lutuk a.

Bazarah chuan miss Kimi ka melh pah deuh reng bawk a, mahse, tun thlengin ka la hmu lo; chawhmeh zawrhna lamah pawh nise amah awm ang tur takngial pawh ka hmu lo.

Bazar chu ruak huai mai hian ka hre bawk a; nuam ka ti chiah lo bawk, thlem lungawitur ka nei bawk nen.

" Hetiang chuan bazar pawh nuam lo, min thlah haw daih teh", Siamthari chuan a ti chhuak hlawl mai a, ka lawm zawk hial thei nia mawle!

Ka thlah fel hnu chuan miss Kimi in luahna lam panin ka tlan lehnghal vat a, building kawtah chuan ka ding dawt a, ka helmet ka la thla chiah tur chu Hruaia kha a kawnghren, kekawr kawnga lo thun tha nuah nuah pah hian a lo chhuak ta mai.

Ka ngaihtuahna a kal thui hman khawp a, a car dahna bul a thlen chuan mipa pakhat nen hian an inbe zui a, an inbiak danah chuan inhmelhriat ṭha deuh an ang.

Ka bike chu hung ṭha sauh sauhin helmet nen chuan building chhungah hmanhmawh tak hian ka tlan chho a.

Kawngka ka kik dat dat a, ka chum bawk a, " Miss, miss, lo hawng teh", tiin ka au pah bawk.

Mahse, chhangtu ka la nei miah lo; ka hlauthawng ru tlat tawh bawk nen kawngkhar tihchhiat mai ka tum ta a, a chhungah a kalh tlat bawk si a.

Ka dar dinglam chuan ka nek salh salh a, atawpah chuan ka nek hawng thei ta a; ka thil hmuh chuan min ṭhawng kher mai.

Kil khatah hian miss Kimi lo thu tawm vekin a lo ngik feih feih a, a taksaah hliam a awm nual bawk; Hruaia khan a kawnghren hmang khan a vua a ni ngei ang, a chal veilam a lo duk chur leh a.

Mit meng phi buai tak leh hlauthawng tak hian min lo en ve nghal vat a, a kawr ṭet hniang hnuangte chu a tawm ve rak rak a; ka thin lo so thut chuan, " Shitt", ti hlakin ka helmet ken chu bang vawm chawrh nan ka hmang zui a.

Chutah tlan chhuak nghal vutin Hruaia chu ka zawng a, a lo kalbo hman.

Boruak te chu ka han pet thul ka sam chu ka hui chho puat a, ka hmai pawh ka tuai puat ringawt, ka hmuh leh hmasak ber tur chu a tawpna tur a ni tawh ngei ang.

Miss Kimi ka hrechhuak zawk a, building chhungah chuan hmanhmawh takin ka tlan lut leh hlawk hlawk a.

Eng pawh mai, ṭha taka min hrilh duh lo hi ka hua. 

A hliam khuh dan a thiam reuh lutuk, make-up a hmang thiam hle a ni tih ka hre ta; hetiang a nih chuan ahma pawhin make-up hmang hian a khuh ṭhin ngei ang.

Engvanga sawisa ṭhin nge a nih ang tih chu ka ngaihtuahna tibuaitu ber a ni, a thinrim hrikthlakna atan hian a hmang pawh ni thei a; a thinrim apianga inhrikthlakna atana han hman pawh chu!

Miss Kimi ka zawh lahin, " Ngaihtuah ve suh, ṭha deuhin lehkha zir zawk rawh", min ti ṭhin bawk si, ngaihtuah loh theih loin min siam leh ṭhin bawk si.

Ngaihtuah loh ka tum ve lahin an pahniha an buai lai ka nang fuh thei phian lehnghal. Eng chiah hi nge an buaina ni ang aw, engvanga inhual ngawt nge an nih ang?

Lawmawm reuhi khan rawmawl sen a lek kang va va a, a inha chhingin a infeng chhing ziah lehnghal; a hming ka zawh lahin, " Hmelṭhanui", tiin, mit siai zeuh chung hian min chhang ziah a, midang hoin, " Miss ti ve tawp rawh", nui kur kur chung hian an ti ṭhin bawk nen, miss ka ti ve tawp.

Miss Lawmawm reuhi zawk mawle. Lawmsiami a tei theilo ve ṭhak lehnghal, ka nuih a tiza ṭhin khawp mai.

Rawmawlin lei a dek chiah tihah ka tlan nghal vut a, zanin chu inchawina a sang deuh a, nuai sawm lai a tling hem mai.

A manhla thei ṭhin khawp, mahse, pakhat mah ka chang ngailo. Lawmsiami'n a chang vek zel; achang chuan sual chhuaha han chak lo lui ka duh thei a nia aw.

Zantin kan tel ngai lo a, kan tel chhunah erawh chuan ka chak ziah zel; sum thawhchhuahna awl tak a ni.

Mahse, nunna thap ve meuh meuh a ni thung, hmanni lawkah pawh pakhat a accident a, a boral an ti tlatin ka hria; heng sum tling khawm pawh hi an nu leh pate thawhchhuah atanga inchawi an nih ka ring, ruih theih pawh a tam.

" Edd, hringnun hi fair lo tih chang i nei ve ṭhin em? ", tiin min en chuanglo chuan miss Kimi chuan min zawt a.

Ka thaw huai theiin ka hria; a rilru hahna te sawichhuak ve ṭhin sela, amah pawh a thawl hawk ka ring.

Ni e, fair lo tih chang ka ngah ve ṭhin khawp, " Ka zawhna tur awm zawk tak che a ni", ka tih chuan min lo en zawk a, a thil ei lai chu a chawk let leh vel mai mai nghal.

Miss Kimi chu a thaw hrawk a, " Fair lo pawh ti hle mah ila, kan chan tur a ni miau si a", a ti muang fan raih a, a lo tuar nasa tawh ngawt ang; hriatchian lehzual ka chak sawt bawk.

Vawiin chu a hlim hmel ka hmuh awm pawh ka la hre lo, " Miss, ka bike-ah ka phur ve hrim hrim ang che vawiin chu", ka ti chiah chu, " A teuhlo lutuk", ring leng lawngin a ti nghal a, a auin a au mah zawk, ka phu chiang teh asin.

Thingpui dawr chhunga awm zawng zawng mit kan lamah a fu ṭhup nghal bawk, zawi sup hian, " I duh loh pawn au kher a ngai em ni, a zahthlak alawm le", ka ti sup a, a zahthlak lutuk; han au vak kher.

" Bike-a inphurh lam kha chu a thawi pawhin sawi tawh suh ang che", a fork ken chuan min kawk dat dat a, " Aw ka hria, i lawn theih loh vang bak va ni suh", nui kur kur chung hian ka ti a.

A fork ken chu dawhkanah dah thla chawrhin, " Zomuanpui", ti vin nghekin mi melh khiau mai a, kan lam an lo hawi leh ṭhup nghal, " I ti zahthlak thei lutuk, i au ring si", zawi sup sup hian ka ti leh a, a lo ner nasa.

Bakah, a lungawi lai chauhin, " Edd", tiin min ko a, a thin ka tihrim emaw a lungawilo deuhin, " Zomuanpui ", min ti vin leh nghek zel a, hei chiah hi nih hi fair lo chu.

Zanin chu Sawma kan hnem a ni deuh ber, " Ka chhur tak tak em ni? ", ṭap pur chung hian a ti deuh reng a, nuih lamah a kal zawk.

Han nuih chiam dawnin ṭhiante broke lai em chu ka ti ve deuh bawk si, ṭhian dangte nen chuan kan inmelh hrek hrek hlawm ringawt.

" Sawi sawi mah sela ka nghei dawn chuang lo", tiin a zaipui hluah hluah a, " A ni lo pawh hmeichhia an tam em mai", a ti pah reng bawk.

Tihian, inṭhen hlim hi chuan han rak leh vel mai mai teh se, a tuk aṭang chuan a chhur ngaiin a chhur leh ṭalh mai ang.

Lalrintluanga Varte ' ka nghei dawn chuang lo ' a luck khawp mai, vawi engzah nge play nawn a nih pawh ka hre lo.

Sawma a phur tawlh tawlh tih mai tur a ni, a lam hut hut a; han lampui ve bak tih theih awm chuang lo le.

Rinawma pawh ani ang lo takin a che ve nasa mai, mahni insawisain kan nui báwk báwk a, Sawma chuan, " Hey, ex-man, i hnung ka lo zui dawn, hmun tinah ex ka hung fer fur dawn", a ti nghut a, Rinawma'n a thil in lai a phuh chhuak ṭhawt, keini ṭhianho hi chu kan bawn ve nia aw.

Virgin ngan ngat Lalrinawma te, Ex-man Lalrinhlua te; Overthang Lalrintlaka te, Bawng tut Lalropuia te, " Ngaihzawng neih pawhin an puan hmawr khawihsak kher tur tihna a ni hleinem", Ropuia hian a ti ve ziah, a sawi dik ve tho.

Hetia a sawi tawh hi chuan Sawma a lo ner nasa thei lutuk, Sawm chhur chheh chhawha kha a ni miau a.

Hmel zozial Johny-a te, a ngaihna hi awmlo, " Kei chu miss Kimi'n min phuahsak ' Goody Eddie boy ' kha ", ka tih chuan min nuih tliar tliar a, a ngaihna hrelo takin ka en hlawm ringawt.

" Miss Kimi nautê", Rinawma chuan min lo kawk zeuh chung hian a ti a, a nui hawk hawk bawk a, " Englai pawhin miss Kimi", Sawma chuan nui let tawp tawp hian a ti leh a, hahthlak, englai pawhin miss Kimi ka ti ngai reng reng lo.

Keimah hlir chu min sawisaa, za em emin an nui báwk báwk bawk a; keimah pawh chu ka nuih a za tawh.

Ka bunk puite nen kan inhlauh tawh, sir David-a hi chu a vei peih ve ngawt mai, class a neilo te nih chuan office-ah ṭhut ve mai mai tur hi a nia.

Bunk an awm leh awm loh check kual dun dun pawh a ṭul lem lo em mai.

Bihrukna tur ka zawn kual laiin miss Kimi nen kan intawk thut a, ani pawh hi class a nei lo a ni ang; ka hnungah sir David-a'n min um tawh bawk si nen miss Kimi chu kaiin ka tlanpui ta ngawt a.

" Ding teh", tih pah chuan talchhuah a tum nasa mai a, mahse, ka chelh nghet lutuk a, a talchhuak mai mai lo ang.

Sir David-a'n min la um reng bawk nen, school chu miss Kimi ka fanpui a ni ber; ka han tlan kualpui tak tak mai nih kha, hah hmel tak hian a thaw káwk káwk a, min pawh din a tum ve ṭhin tak naa, min pawt ding thei ngai chuang lo.

Basement lamah chuan ka tlanpui leh a, physics practical room phenah ka bihruk pui tawp, hetah chuan min hmuh ka ring lo.

Miss Kimi chu a thaw halh halh a, keipawh chuti tho, a thlan nasa mai, " Nangpa hi", sehchilh tak hian a ti a, ka lo ṭhen sak ringawt.

Chutah, ka beng a pawt vak mai a, " Miss, a na lutuk", ka ti chul a, a thlah duh chuang lo, a pawt pawh a ni lo a sik ni mai hian ka hria.

" Engvangin nge class i tlanbo? ", sehchilh tak hian a ti leh a, a thinrim hle nih ka ring.

" Hetia i awm mai mai hian hlawkna eng nge i hmuh? ", eng hlawkna mah ka hmu chuang lo, mahse, class-ah ka awm peih lo a ni mai.

" Class-ah kal nghal rawh", min ti leh nghek a, a thinchhe tak tak a ni.

Kal ka tum chu sir David-a, kan bihrukna lam pana a lo kal thauh thauh hi ka hmu a, engkhaw sawi set set loa bihruk ṭhat leh tuma ka han kun zeuh chu miss Kimi lo dak chho ha ve bawk nen chuan kan hmui a insi ta chawt mai!

Miss Kimi first kiss ka ni hi ka awih thei lo, ka hlim lutuk zawk hi ka lo khi vur vur leh ṭhin a ni ngei ang, ka ṭhianten min zawt sek a, mahse, ka la hrilh duh lo.

Engvanga hlim em em ringawt nge ka nih pawh ka hre lo, ka hlim ve ni tawp. " Hmelṭhapa, zanin chu lucky kiss ka lo pe ang che", no zet leh mit siai zeuh zeuh chung hian lawmawm reuhi chuan a lo ti a, Lawmsiami'n lo nam dawrin, " I buai lohna turah lo buai suh", a ti hlak a, an inhnial titih chu ni der.

" Lucky kiss ka mamawh lo", kiai suka ti chung hian ka kalsan a, ka dinna hmun turah ka ding vang tawh bawk.

Lawmawm reuhi chuan rawmawl sen a lek kang leh va va a, helmet khum ṭha sauh sauhin bike kan start nghal sup sup bawk.

Ni e, lucky kiss hei leh chen dawng lo chung pawhin ka chak ziah a lawm le, bakah miss Kimi'n lucky kiss min pe daih tawh, ka nui sak a, rawmawlin lei a dek nghal bawk a, kan tlanchhuak leh ta.