age is just a number-8

Age is Just a Number...

Chapter-8

Ziaktu: Cck Lalchhuanawmi

A zirlaibu kenin a intauh dawt dawt a, nuih ka insumna lamah ka pum a na vek tawh; midang ho hian an hrethiam ve hlawm der si lo, ngaihna hriat loh tak hian an hawi hu hu ringawt.

Pangngai taka lecture pek a han tum ve ṭhin tak naa, a pangngai hleitheilo, " Miss? ", tia ka ding chiah chu, " Nang kha ṭhu rawh", min kawk chung hian a au nghek mai a.

A rawl a ring ka tih tawh kha; bakah a thinchhe tel zui, nui ṭhaw chung hian ka ṭhu thla riai riai a, min melh rawm rawm ringawt.

" Miss, i rualin ka lo haw dawn", ka hmui liak huh zeuh hian ka han ti a, " Awiii, Zomuanpui", a bag ah(ak) chuan min vaw nghal bawrh bawrh, zirlai dangten min en hrek hrek tih pawh ka hria, a ti zahthlak thei tak tak a ni.

" Miss, a tawk", a bag chu ka man chawt a, mi melh meng bial nasa ngang mai; ka nui chhuak hawk hawk a, " Miss", ka hmui liah huh leh zeuh hian ka han ti leh a, a teu nasa lutuk, a ṭap ṭep; a naupangchhia reuh lutuk.

" Zomuanpui", ṭah âw ṭuau chunga ti chung hian min vuak leh a tum a, ka lo eu hman.

Rickshaw stand thleng min um a, rickshaw pakhat a lo ding a, miss Kimi chu nam lut nghalin, " Miss, bye aw", ka ban ka vai lauh lauh a, ngaihna hriat loh hmel takin min en zui ringawt.

Rinawma chuan sehchilh tak chung hian, " I ṭhian, kan thianpa hi a rilru tihnat sak hauh suh ang che ", a ti a, sawi tur ka nei lo.

Tihnat sak ka tum hauh lo bawk, venhim ka tum mai chauh zawk a ni; tuna kawng ka zawh lai hi ka venhim theih dan tur a ni bawk.

Johny-a leh Rinhlua an lo lang ve nghal a, Rinawma chuan, " Hmela, i va ṭawp tak", tiin Johny-a chu a hau nghal a, " Ka zun a chhuak tawh lutuk alawm", Johny-a chuan inthiamlo tak hian a lo ti a, Rinawma pheikhawk a lo zunkhum deuh chu niin, Rinhlua a nui vak vak a, " Zozial a ruih vang nih kha", a ti a.

" In inrem tawh em? ", tia Rinawma'n Rinhlua a zawh chuan, " Engthil nge a? ", tiin Johny-a nen chuan kan lo zawt ve vat a.

Rinhlua chuan, " D nena inhmuhthiam lohna chhete mawle, kan inrem tawh e", nui sang chung hian a ti a, mahse, a hmelah chuan hlim lohna ka la hmu tlat, engthil chiah nge thleng ang aw.

Rinawma chuan ka dara a kut lo nghah pah hian, " Miss Kimi nautê hian a ṭanpui thei ang che, in la inrem thei lo a nih chuan", khi suk chung hian a ti a, hepa hian eng emaw tak hriat a nei a ni ngei ang.

Khami ni aṭang khan mahni inthiam lohnain min hneh ta em em a, ka ṭhianpa ka venhimna tura ka thiltih chuan inkiltawihna min siam zawk a.

A khat tawkin Rinawma'n min hrilh dawt chuang lo hian, " Kan ṭhianpa rilru hi tihnat sak suh aw", min ti reng a, a sawi awmzia ka hrethiam tawlh tawlh bawk, hriat ruk chu a nei chiang alawm.

Ka ngaihbel vang nge pawh chu ka hrelo, Rinawma hian Rinhlua hi a ngaihven thar sawt hian ka hre bawk.

Bike racing pawh hi ka luhchilh tawlh tawlh a, keimahah rah ṭha lo a rah chho telh telh tawh bawk.

Ka nu hian ka chhiat ber bur zia min hrilh chamchi tawh a, " Bawiha, pa telloa seilian i ni tih kha hre reng la, patling tak leh fing takin awm tum rawh aw", min ti ṭhin a, min fuihna ve a ni.

Ka nu lakah pawh hian ka inthlahrung tawh khawp, kum ruk ka nih laiin ka pa hian min boralsan a, ka nuin tihian min ṭulpui ta a ni.

Min enkawlna zozai ngaihtuah hi chuan tianga awmlo tur hi chu ka ni mawle, min rin thu hi min hrilh ṭhin bawk a.

Min rin ang ngeia awm pawh ka tum a, mahse, tunah chuan chu min rinna anga awm ka tumna aṭang chuan ka hla tawh lutuk a ni.

" Ka pa, min la dampui ve ni la chu aw", tih vawng vawng chang ka ngah tawh khawp mai.

Ka ṭhiante lak aṭang pawh chuan ka hla telh telh a, a chhan chu bike racing naah hian zantin deuhthaw kan tel tawh vang a ni, ka ṭhiante hian a chhan min zawt ve sek bawk a, eng nge ka sawi chuan ang, ngawih bak tih theih ka nei chuang si lo.

Rinhlua hmel hlim lo ka hmuh chang hian Lawmsiami ka han vo ve leh rih, awmzia a awm chuang lo, keimah zawk hi ka duh emaw duh lo emaw a thang kamah ka inbarhlut tawh tlat a ni.

Hei hi Rinawma lah hian a hre ve si lo, ṭhiante ngaihzawng chhuhsak duh tur khawp chuan ka tlahniam lo asin!

" Tunlai hi lehkha i zir nasa hle a niang, i hmelah a hriat; ṭang nasa rawh aw, first term exam pawh a hnai leh hle tawh nia", a kut tipir vah chung hian miss Kimi chuan a ti a, engmah lah hi a hre ve bawk si lo.

A chawhmeh zawrh kan leisak ve ziahna nu lah chuan inngaizawng emaw min lo ti, " In inhmeh hi ka lo ti thei lutuk a, in hmelṭha dun si", nui ver ver chung hian a ti a.

Miss Kimi'n, " Kan inngaizawng lo e a", a lo ti hlak a, ka phawk ka chhuah a, miss Kimi va kuah pah chuan, " Ka pi, kumin kum tawpah hian inneih lam kan titlu deuh tawh a", ka ti a, miss Kimi'n rum tawkin min lo melh chho nasa.

Ka pi ka ti ve tak naa, nula senior lam hi a ni mah zawk, ani pawh hi hmelchhe zawk zawk chu a ni bik lo, a hming miss Kimi chuan a han zawt a, " Lalhmunsiami ka nia, mami ti hian min koh ṭhin a, mahse, naupang aṭanga upa lam thleng hian 'au mami' min ti vek mai", nui ver ver chung hian a ti a, hmun danga kal tawh chuang lo chuan miss Kimi nen chuan an titi zui ta chu ni ber.

Keini pawn, " Au mami", ti chuan tun aṭangin kan ko ve ta chu a nih hi.

Kan bazar apiang hian kan dawr ziah a, miss Kimi nen ṭhianṭha tak an ni der tawh bawk. Zirlai mai ka nih thu leh kan inngaihzawn loh thu miss Kimi'n a hrilh pawh hian au mami chuan, " In inhmeh e, in hmelṭha dun bawk si; kum te chu number mai alawm a nih le", a ti ziah a, kei lahin phur fahran hian ka lo tuihnih ziah lehnghal ṭhin a, " Ka hrilh ka hrilh pawhin a awih duh lo lawm", ka lo ti ve ziah ṭhin a, miss Kimi'n a lu a hiah phah ringawt zel.

" Duhtawk tawh ang, ka chau zo tawh, he thil hi engvanga ti nge kan nih? ", ka âw pawh a chhuak chang chang, ka chau em a ni.

Amawii hi tumahin lo ngaizawng ve suh u aw, a hmangaihnaa tluk luh phei chu duh hun hunah a talchhuah theih miah lo a nia.

Ka luak nghek nghek mai a, a hrehawm lutuk; ka ṭhiante nen no khat leka kan lungawi lai kha ka ngai thei asin aw, tunah chuan no khat leka lungawi chu har tawh tak a ni; a cousin nen a ngai tawh.

He inremsiamna ka pawm hma khan vawikhat chauh tal lo inngaihtuah ṭha leh ila!

" Eddie, Eddie", min sawi dat dat a, ka meng ṭha hlei theilo, ka lu a na bur a, ka mit a thip hlur bawk.

School pawh ka kal thleng thei ṭawk ṭawk, classroom ka thlen rualin dawhkan bawhin ka mu nghal daih a; ka la harh ṭha theilo, ka nun mai nilo, ka taksa leh thlarau thleng hian a chau ni maiin ka hria.

Tu emaw hian ka pang a lo dek dap dap a, a kut a thap deuh danah miss Kimi kut a ni tih ka hre thei!

A kut hi no nalh ve hle mah se, a hnathawh ṭhinna avangin a thap hrup, " I damlo pawh ni si lo, Edd, i ṭha em? ", tiin min zawt a, a chhan hriat si loh hian ka dam nghal sawng sawngin ka hria; hawichhuak chuang lo chuan ka ṭhat thu leh ka mut a chhuah thuin ka lo chhang a.

Sir David-a hi chuan line-up apianga min la koh chhuah a ching, keipawn ngaiah ka nei tawh a, engah mah ka ngai tawh bik lo.

Au mami leh miss Kimi te hlim taka an inbe bawrh bawrh lai chu nui sang chung hian ka lo thlir ve a, eng han sawi ve lo mah ila an bulah chuan ka hlim ve ṭhin khawp, abikin miss Kimi bulah hian a awmlo ang tih hi ka hlauh ber a ni tawh.

Ka nu bulah leh ka ṭhiante bulah takngial pawh tunah chuan ka inkiltawih duk duk tawh lawm le, miss Kimi bula thawveng taka ka awm theihna hun, inrinni bazar pawh ka ṭhulh ngailo, ahmaa peihlo tawka kal ṭhin kha, tunah chuan phur takin ka kal ṭhin tawh thung.

" Goody Eddie boy-a hian zanin chu a pi chungchang a sawi ve lo teh khiah a", nui ver ver chung hian Sawma chuan min lo ti a, ka lo nuih sak ringawt.

Eng eng emaw hi an sawi a, an nui leh vak vak hlawm ṭhin a, ka lo ṭhen ve ringawt zel.

Rinawma hnen aṭangin warning ka dawng reng pah bawk a, a hrehawm duh ṭhin a nia aw; Lawmsiami bulah pawh tawpsan tawh turin vawi engzah nge ka hrilh tawh pawh ka hrelo, a ngen hian ka ngen mah zawk.

Rinawma hi ka hrilh ve zawk dawn mile, sutkian dan pawh a hre mai thei asin; nge Rinhlua hi ka hrilh law law zawk ang, huiham.

" Miss, lo ding lawk", a lo ding ve mai bawk a, a nui sang a, nun hi a hlimawm ṭhin a nia. 

" Eng nge ni? ", a lo ti dam dup a, " Kan veng peng thleng ka lo chuang ve", ṭhen sak chung hian ka ti leh a, " Tehreng mai".

Eng eng emaw hi rickshaw khalhtu nen chuan an sawi siam siam a, a nui leh hak thin; ngawi rengin ka lo ngaithla ve a, mahse, an sawi ber pawh ka hre lo.

Miss Kimi ka va en zeuh chu a chal dinglam zawka duk tharlam tak chu ka hmu zuai!

Rinhlua chu classroom-ah a lut daih a, kei ka lut ve thei si lo, ngati nge mawni vawiin kher kher pawha ka lo bunk ni, engkim a pawi zo ta vek e.

Lallawmsiami ka hnunga lo kal chu ka kutzungchala kawk chung hian, " Nangmah vang", ka ti vin hlar a, ka âw ki a sang mah mah, pawi ka ti lo, ka thinrim em a ni.

Kan bunk-na hmunah Rinhlua leh Johny-a nghaka ka awm laiin Lallawmsiami lo kalin min rawn fawp ringawt a, Rinhlua'n min lo hmu hman si, " I ngaih ang kha a ni lo a nia", ka tih lawm lawm chung pawhin min ring thei tawh lo, " Ka sawi tawh kha, i duh a nih chuan a ruka inkawp kher a ngai hleinem; min hrilh thei reng alawm", a ti tawh, kha thu a sawi laia a hmela natna tam tak lo lang chhuak kha ka hmuh hmaih hauh lo, atan chuan mi bumhmang ka ni ta der.

Khami ni aṭang khan Rinhlua ka be thei ta mang hauh lo, school a rawn kal mumal lo a, ka call leh message a chhang ngai bawk si lo; an ina ka kal lahin amah a lo awm ngai lo a, ka ngaihtuahna a tibuai takzet.

Rinawma'n ka kawr nghawnga ṭham chung hian, " A rilru tina suh ka tih che kha", min ti hrawk a, thinrim ai mah chuan ka zak tawh zawk, engtia chinfel tur nge ni ang, kan inṭhianna inkar hi hetianga tawp tur hi chuan ka duh lo; ka duh lo ngawih ngawih.

" Awi Bawiha, eng nga tinge hetianga i awm? ", ṭap hawm hawm chung hian ka nuin min lo kuah vat a, ka room chhuat laiah ka lo mu thal reng chu niin, inbengkangin ka han hawi deuh chu zu úm, úm thum lai mai hi ruak huai hian an lo let phung a, nizanah engtin nge ka awm? " Bawiha, a pawi em mai; hetiang tur chuan ka ring phallo che asin le", ka nu chu a ṭap bawrh bawrh a, min kuah nghet sauh sauh bawk, " Ka nu, min ngaidam rawh", ka kuah let ve a, keipawhin hetianga awm hi ka duh bik lo.

Ka nu chuan, " Bawiha pa, min kalsan hma em mai", ṭap hawm hawm chung hian a ti leh a, sawi tur reng ka hre lo; ka mittui parawl kuang avangin khua ka hmu vai ruai a.

Ka pain min boralsan hma lutuk vanga hetia awm hi ka ni lo asin le, ka nu bula ngaihdam dil bak tih theih ka nei si lo; ka duhthlanna ngei a ni.

" Rinhlu, khawiah nge i awm? ", ka lawm dan hi ka sawithiam lo, hetiang hian ka ṭhianten min lo call-in ka hlimin ka la lawm ngailo.

Zanin chu Rinhlua'n min lo call a, mahse, a âw aṭang chuan a rui a nih ka ring; a awmna ka zawhin a hriat loh thuin min chhang bawk si.

Ka nu bulah chuan rang takin ka tlan phei nghal a, " Ka nu, Rinhlua bulah ka kal lawk dawn nia aw; a hmanhmawhthlak lutuk ", ka ti chul a, ka nuin min chhânna pawh nghâk tawh chuang lo chuan in aṭang ka inkhalhchhuak nghal a.

Rinhlua'n a awmna min hrilh bawk si lo, ka han call lahin engmah sawilo hian, " Eddie, Eddie", a rawn ti ringawt zel a, a rui ni turah ka ngai ngawt a, a rilru a hah dawn lutuk tih chu ka hriatsa a ni; a ṭhianpa hian ka bum angah a ngai miau tawh si a.

Zankhat thilthuah Lunglei khawchhung ka fangkual hi a ni ringawt, Pukpui leh Theiriat, TNT; Zobawk thlengin; Mausen, Thenzawl ka thleng lo chauh tawh a ni, hmun fal deuh leh biru laiah pawh ka zawng vek a, ka hmu ta hauh lo!

Vawiin nileng pawhin school chawl ṭhakin Ka zawng a, ka la hmu chuang lo; zan lamah pawh ka zawng ṭha leh a, a ngaihna ka hre tawh bik lo, an ina ka kal lahin a awm loh thuin min lo hrilh ziah ṭhin bawk nen.

Ka zawng beidawng chuan miss Kimi in lamah pênkawi ka rilruk a, kawngka kik ka tum chu thawm eng emaw hi ka hre ta tlat a, ka han ngaithla chiang deuh a, " Aih, ka duh lo", ṭah âw ṭuau chunga miss Kimi'n a tih ri ka hriat chuan ka sa chhuak nghal phat a, kawngka chu ka theihtawpa nâ hian tlawh hawn ka tum a, " Miss", tiin ka au pah bawk, chhung lam atang, " Edd, Eddie", tiin a lo au ve ṭawk ṭawk a.

A tawpah chuan ka tlawh hawng thei hram a, vawihnih a kawngka kalhna ka tihchhiatna a ni ta. 

" Nang naupang leh bawk chu", ti hrawkin Hruaia chuan ka lam a lo pan nghal a, ahma anga inhnektir hrep kha ka tum tawh bik hauh lo, keipawh chuan, " Tenawm lutuk ", tih leh a lam pan ve nghala hnek ka rual nghal a, ka hmuh leh hmasak ber hun chu a tawpna a nih tawh tur thu ka sawi kha.

Ka thinrim leh lungngaihna inmung rei tawh chu Hruaia chungah ka hrithla a ni ber, ani pawhin a thinrimna hmeichhe âwmnem chungah a titla ve ṭhin tho alawm le; min khawih ve pawhin ka hre lo, keimah zawk chuan ka hnek bawrh bawrh a, tun chu miss Kimi a lo inrawlh miah lo bawk!

" Rinhlua awmna i hria em? ", tiin Johny-a chu ka zawt tawp a, a hriat loh thuin min lo chhang; Ropuia, Rintlaka leh Sawma te pawh ka zawt a, tumahin a awmna an hre lo, kan ngaihtuah tlang vek chu ni si a; engtin nge a awm ang aw.

Mi pakhat Rinhlua chungchang zawh loh ka la nei, Rinawma hian a hre ngei ngei ang; engpawh nise, hreh hle mah ila ka zawt tawp mai a niang chu.

Classroom lam pana ka kal chu, ka thu hriat avang chuan ka hmanhmawh lehzual a, vawiinah miss Kimi school a rawn kal lo maw; a nawmsam loh vangin, nizan lama thil thleng vang kha a ni ngei ang.

Ka bag-ah chuan lehkhabu ka khung mawlh mawlh a, Rinawma chuan ka kut lo man chawtin, " Rinhlua awmna i hre tawh em ni? ", tiin min lo zawt a, " A awmna i hre zawk lo em ni? Zawh che ka lo tum asin", ka tih chuan, " A nih chuan khawiah nge i kal dawn? I hmanhmawh danah a awmna i hre tawhah ka lo ngai a", a ti leh a, ka la hriat loh thu leh thil dangah zawk hmanhmawh ka nih thu ka hrilh a.

Miss Kimi chu nizan ang thoin nghet tak hian ka kuah a, kan mi tenawma khan lo sual a tum chu niin!

A sawisak pawh tih tawh nak laiin lo sual te han tum, petek lo se chu damdawi inah dah luh a ngai thei hial ang; ka la sawisa kham lo asin le.

Ka âwmah lungchhe tak hian a inhnit feih feih a, " Ka lawm lutuk aw", zawi sep hian a ti a, a la khur dar dar mai bawk; a hrilhhaithlak dawn lutuk.

'Ṭap tawh suh' tia thlem pawh ka tum lo, a duhtawkin ṭap sela, a inṭap muhil leh mai ang; achanga a phu zeuh zeuh tih loh chu han buaipui ngai khawp chuan a awm chuanglo.

Kan ṭhianpa awmna chin reng kan la hre lo, school a rawn kal ngai lo a; biak pawh theih pawh a ni tawh lo, engthil nge maw ka tih tak le; hetiang em hian a tawrh ka ring phalo hrim hrim.

Miss Kimi pawh a ina ka kal theih loh hi chuan ka call ṭhin a, " Aw ka ṭha e", dam dupa a lo tih hi chuan ka thaw huai zel, a ṭawng ka hriat hrim hrim pawh hian ka hahdam.

Ka ngaihtuahnaa thil lo lut chuan min tihlim kher mai, Rinhlua hian ka nu phone number a nei lo a, tichuan, ka nu phone hmang hian ka call tawh mai dawn a ni.

Ka nu phone ka han zawng a ka hmu leh mai lo, a dahna zawh dawn lahin amah lah dawrah a kal daih bawk si; a room lamah ka va lut a, khumah a lo awm e.

***I fapa pawhin a hrethiam em em ang, kan inhmangaihna hi", ka nu phone chu ka hmer ngawt ngawt a, chiang zawka hriat ka duh avangin an inbiakna chu ka chhiar dan dan nghal a; kei hi buaina bul ber ka ni leh ta.

" Bawiha", tia ka nuin min koh lauh lauhna chuan ka ngaihtuahna ata min tiharh a, phone chu off-in room chu ka chhuahsan nghal bawk a, mahse, engmah hre lo anga ka nu bula awm chu harsa ka ti takzet.

Ṭhianpa Rinhlua biak pawh ka tumna lamah ka nu buaina ka hriat belh phah zui a, engtianga awm tur nge ka hre tawh lo.

School-ah lah nise ka ṭhiante hmel hmuh pawh ka zah zo tawh, Rinhlua hetianga a awmna chhan hi keimah vang a ni tih an hre ve vek a; ṭha taka min la be theite hi an fakawm thlawt.

Miss Kimi pawh school a kal ṭan leh tawh a, kei erawh school bunk piah lamah school kal loh ka ching ta zeuh zeuh, in leh school-ah pawh ngaihngam taka awm ka thei hlei tawh lo, Rinhlua ka call apiangin switch off a inti ziah tawh bawk, message ka thawn tlut tlut mai, a sang chuang chu a tling tawh ang.

Rinhlua'n ka rilru a tihbuai tawh nak laiin ka nu a lo ni ve zel, ngati nge ka lo pianchhuah ve kher kher ni; ka nu sawi ang deuhin, " Ka pa, min kalsan hma em mai! ", ka pa thlan chu ka nghêng dar dar a, zan pawh ni mah se, thlanmuala kal hi ka hlau ve lo; bakah, a ṭulnain min ur tawh chinah chuan hlauh hi a lo sawi loh theih khawp.

Amawii ka dût leh tlawk tlawk a, tunah tak hi chuan ka ṭhiante bula awm ka chak lutuk, pangngai taka kan inbiak lohna hi a va rei tawh tak em! 

Ka rilru hahna sawichhuak kher dawn lo mah ila; an hmel hmuh hrim hrim pawh ka chak, abik takin, Lalrinhlu, khawiah phiangsen chuan nge i awm le?

Miss Kimi, vawiin hian ka la be miah lo tih ka hrechhuak thut, kei school ka kal bawk si lo; rui chunga biak ka hreh deuh hlek, mahse, ka rui miah lo ka rui theilo a ni mah zawk, ka harhfîm lutuk.

Ka phone chu ka han phawrh a, ka on chiah chu miss Kimi hnen aṭangin missed call a lo awm ṭeuh; mak ka ti lutuk chu ka kâ ho ringawt, ka phone ka lo silent vangin ka lo hre lo a; rang takin ka call let nghal a, a lo la rang ngang mai, hello pawh ka ti hmanlo, " Engvangin nge school i rawn kal loh? Tunah khan khawiah pawh awm mah la, inah haw nghal ang che", min rawn hau nghal bawrh bawrh, mahse, ka sawisel dawn miah lo a nia; a ṭawng lai lo pawhchah pawh ka phal teuh lo, naktukah school kal turin min ti a, ka kal poh a ni ang chu.

Ka nu bulah chuan, " Ka kal aw", tih leh chhuah ka rual nghal a, ka nuin, " Chaw i ei dawn lo em ni? ", tia min lo auh zui lawng lawng pawh ka bengkhawn duh lo, kei hi ka lo sual tak hle mai ka ti ta!

School thlen hma teah hian miss Kimi lo vei lauh lauh hi ka hmu a, a kal hma hle mai, keipawh ka kal hma ve reng si a. " Miss? ", ka va ti a, a lo phu nasa mai, " I va phu nasa tak, eng nge i ngaihtuah a? ", ka tih chuan engmah sawi lo hian min thlêk vûng vûng ringawt, min tihrilhhai dawn lawm le, " Ka hmaiah eng nge awm a? ", tiin ka zawt leh a, ka hmaite chu ka han khawih a, min thlêk min thlêk ringawt.

A ṭawng tawh dawnlo emaw ka tih hnuah, " Awi, Zomuanpui, i chhiat ber bur zia kha, zirlai hmel pawh i pu tawh lo", a ti hlak hlak ta mai, min hau mah nise ka thaw huai zawk.

Ka pum a lo ri a, ka dawm nghal, a va ṭul lo tak, chaw ei duh loh chu tih hi ni mai. 

Miss Kimi chuan, " Chaw i ei lo ni maw? Lo kal rawh", ka banah min chelh nghalin kan school piah lawka restaurant pakhatah chuan min chawlhpui a, ka ei ṭeuh mai, ka puar tawh lutuk.

" Miss, ka sawi kha aw; i hlawh advance pawha lak a ngailo, au mami pawh puk a ngailo a nia; keiman ka pe ang che ka tih kha aw", ti supin classroom lam ka pansan nghal a, ka tawi khawmuan leh chuan min hnial leh nasa dawn lutuk.

Zanin chu bike racing naah ka han kal nge, nuaikhat mai mai, a ai tam pawh ka tlanchhuak thei lawm le.