age is just a number-9

Age is Just a Number...

Chapter-9

Ziaktu: Cck Lalchhuanawmi

" Tiang pawisa zozai hi khawi aṭangin nge i neih? I nu leh pain an pek che a nih ka ringlo", miss Kimi chuan a tarmit kar aṭang chuan min melh chho kuang a, keiin ka en duh lo lui tlat thung.

"Miss, chutiang ngaihtuah a ngailo, i chhungte chu va thawn vat vat la ni mai", ti pah chuan sumo counter lamah ka nawrphei dat dat a.

A lo let leh hnu chuan zawhna eng eng emaw hi min zawt ṭeuh a, chhang lem loin ka ngaithla liam ve ringawt, " Zirlai hmel pawh i pu tawh lo", a tih leh chuan, " Zirlai hmel chu engtin nge a awm a? ", tiin ka lo zawt let a.

" I ṭhianpa Rinawma hmel ang kha, nang chu i ṭawk hler hlur mai", hmui tisawi deuh chung hian a ti niah niah a.

Rinawma hming a lam hrim hrim pawh chu ka thik, " Rinawma te chu a fel alawm", ti supin ka kal nal nal a, " A va mak tak, Zomuanpuia tak hi chu", a tih hlak zui ri pawh ka hria, Zomuanpuia min ti leh tawh!

Ngaihsak duh lem chuang loin ka kalsan ta daih a, amah pawhin a haw ve thei tho.

" Eddie", tia ka hnung lam aṭanga min kotu en tum chuan ka han inher a, Siamthari a lo ni, aw Lalpa! Ka bialnu ka lo theihnghilh daih lawm le!

Inthiamlo tak chung hian, " Aw Siam, eng nge ni ta? ", ka han ti ve luam a, Sawma ai pawhin ka chhur daih zawk a nih hi mawle aw.

Ka banah min lo chelh a, a hlauhthawn hmelin ka hria, inṭhen a duh thu a sawi a, Rinhlua nena kan inkar a hriat ve vang maiin; huhh, mahni bialpa te pawh ring zo lo, thudik hriatchian tum mauh lo, eng nge ka beisei reng reng le?

Classroom lam pana mahni hriat tawk leka phun bul bul chunga ka kal laiin office kawtah miss Kimi leh Rinawma te lo inbe bawrh bawrh lai ka hmu a, an nui sâng a, ka kut ka hum ruh ngawt ngawt, ka thinrim chhan ber pawh ka hre lo.

Rinawma chu ka thik ngawih ngawih, tuna miss Kimi a nuih lai ang chiah sawn ka bulah pawh nui ṭhin sela ka ti.

Classroom chhungah pawh lut tawh chuang lo chuan bunk turin ka kal leh daih a, classroom piah lamah school pawh hi nuam ka ti tawh lo.

Rinawma chu lo dahṭha ta ila, Johny-a takngial pawh ka be hleithei tawh lo, inah lah nise ka nu ka zahna lamah ka ṭi dák a, sawipui tur takngial pawhin ka huaisenna hi dawihzepna hian a la hneh tlat rih a ni.

Zan dang ang thoin ka inkhalhchhuak leh a, ka nu khan ka hrechhuak tawh tih a hria a, hre tur pawh a ni reng a ni, message seen pawha chhânna pek loh te chu a lehlam zawk tan khan a hrilhhaithlak duh dawn lutuk.

Min sawipui a duh thu a sawi a, mahse, ka ngam hlawllo, khapa bulah khan kal a duh thu a sawi ka hlau em a ni, ka mal dawn em asin; ka ṭhiante ka chân mek a, ka nu lehzel ka chân chuan ka awm theilo ang.

Miss Kimi in lam panin ka tlan zel a, kalna tur ber pawh ka hre lo, bike racing naa kal chuan ruih bak tih tur awm lo, ruih reng mai pawh hi ka ning, mahse, chu chu rilru thawpik lutuk tihthawvenna ṭha ber a ni bawk si!

A kawngka ka kik dat dat a, min lo hawn ruala ka mi hmuh vang chuan ka thin a sa phat, " Ka tibuai che u a, ka tihpalh ni e", nui lui saka ti chung chuan ka kal nghal a.

Miss Kimi'n, " Zomuanpui, lo ding teh", tiin min au zui lang lang a, Rinawma hriatah Zomuanpui tia min koh ka duh lo, min lo umzui a ni ngei ang, " Khawia kal nge i tum? ", tih leh ka ban lo chelh a lo rual a, keiin min chelhna lo thing thla rawkin, " Zomuanpui tiin min ko tawh suh", ka ti ṭhak a, ka aukhum a ni mah zawk.

Lalrinawma chu a hlim tawh ngawt ang le, miss Kimi nen pawh hian an inhreṭha tawh lawm le, amah tibuaitu Hruaia lak atang pawh khan chhan ve tawh rawh se.

Tuna ka nundan hi chu ka ning ngawih ngawih, Tu ber nge ka thik a, ka huat pawh ka hrelo.

Tunge chân ka hlauh pawh ka hre hek lo; a hrehawm lutuk.

Attendance a pawimawh ve si a, school ka kal hram hram, mahse, roll call hunah chauh classroom-ah ka awm, abak chu bunk a ni mai.

Zan lamah nise, bike racing naah hun ka hmang tam a, achangin ka pa thlanah ka awm zankhua ṭhin bawk.

Inrinni bazar pawh ka kal ngai tawh lo tluk a ni, ka nuin, " Bawiha, hetiang hi chuan awm lo teh ang, ṭha deuhin sawi ang", min ti ṭhin a, mahse, ka duh ngailo, ka hlauhna hian min la hneh em a ni.

Kumin hi ka tan hian kum chhia a nih dawn hi a!

Karkhat chuang tehmeuh rilru bul bal loin hun ka hmang ta, Rinhlua pawh school a chawl ta; a chawl tih chiah ka hria, amah pawh ka la hmu lo.

Ka ṭhian dangte sawi danah anni pawhin Rinhlua ber pawh an la hmu lo; school a kal lohna a rei tawh em a, school chawl a ni tawh mai, tun thlengin ka la be pawp thei chuang si lo.

Ka phone ka en apiang hian ka nu leh miss Kimi aṭang hian missed call a tam em em a, Rintlaka, Sawma, Johny-a leh Ropuia hnen aṭangin a awm zeuh zeuh bawk; message pawh ka dawng ve nasa mai, Biak ka châk hlawm lutuk hi ka â lo chauh tawh a ni e.

Lehkha zir ngailo ta na na na chuan zirtirtu ten zawhna min zawh chang hian ka chhang thei ṭhin lo a, zah lamah pawh ka la duh tawh lo, ka nihna a ni tlat a.

" Hmelṭhapa, tunlai hi i lo lang zing tlat, a chhante a awm em? ", mi melh zuk zuk pah hian miss lawmawm reuhi chuan a ti a, ka lo nuih ringawt. Chhan awm lem lo mah se, nuam ka ti ve tlat tawh.

" Hey, hmelṭhanu, zanin chu ride dun i duh em? ", ti pah chuan ka bike awmna lam ka hawi zeuh a, a lo phur ngang mai, min lo pan nghal vat a, ka bike awmna lam pana kan kal lai chuan ka phone a lo ri a ka han en chu miss Kimi lo niin, ka off daih a, phone pawh chu silent-ah ka dah nghal hmak.

" I chhang dawn lo em ni? ", miss lawmawm reuhi chuan a lo ti a, tun aṭang chuan hmelṭhanu tiin ko ve tawh mai ang, min ko rawh a ti bawk a, " Ka bulah hmelṭhanui a awm dawn a, midang ka biaksan daih ten a ṭha nang", ka ti a, a lo nui ver ver.

Kan inkhalhchhuak dawn chiah tihah midang hoin min lo umzuiin khawiah mah kal lo turin min lo ti a, kan let leh a, mahse, reilote tak tak chauh ka awm tawh thung, inkhalh haw theilo ṭhaka ruih chu a tih chi loh lutuk.

Peihlo tawkin school ka kal ve leh a, chawlh daih ka duh tawh mai; class-ah ka awm ngailo a, eng nge kan zir tih takngial pawh ka hre tawh lo.

Miss Kimi leh Rinawma inbe khi vur vur lai ka hmu fuh thei em em lehnghal a, chuzawng chu ni mai. 

A dik, ka thik ṭhin chiang alawm, a chhan pawh ka hre teh hrep lo e a, hriat pawh ka duh hek lo.

Miss Kimi pawh hian min hmu ve reng ṭhin, min biak hmasak a tum ngai lo reng reng, nizan lama a call ka chhan loh leh vang khan a lungawilo mile?

Min biak hmasak loh chuan biak ka tum tawh bik lo, ka ning!

Mahni in lam panin school aṭangin ka kal ve hna hna a, Val hi a riang theih ṭhin khawp mai.

" Eddie, min lo nghak", tiin Johny-a chuan min lo au lauh lauh a, ka lo nghak a, kan inbiak lohna rei tawh dan hi, ka mittui a titla hial dawn lawm le!

Ka bul a lo thlen chuan, " Zanin chu inkhalhchhuak leh ang u, Sawma te ho nen kan sawi kan sawi a, bakah, kan call leh message te min chhang ngai lo a, group-ah lah i lo active tawh ngai si lo, Eddie kan ṭha chiah em? ", ka lo kiai ringawt, sawi tur ka hre thlawt lo ni e.

Kan veng penna kan thlen chuan kan inthlah liam ta a, Rinhlua chungchang a sawi lo kha ka lawm lutuk ringawt.

Ka phone screen-a hming lang chu ka chhiar ṭha ngat a, Rinhlua ngei a ni, ka ngaihtuahna mai mai a ni lo, mahse, a thu min lo thawn chuan ka ngaihtuahna a tikal thui ngang mai.

*** Eddie, min ngaidam rawh aw*** engah chuan nge ngaihdam a ngaih, keimah zawk hi lawm ngaihdam ngai chu, a last seen ka en a 7:00 PM chiah chiah a ni, mak deuh chu min block nghal daih!

Dar 7 leh a chanve tih velah chuan Ka phone a lo ri thut a, ka phu nasa lutuk, Rinawma hi a lo ni a, " Rinhlua a intihlum! Tunah hian an inah kan awm mek, i lo kal ve ngei a ngai ang", ka thu hriat chu le!

Zing lam dar thum a ri tawh a, kan ṭhianpa dâng lip lep tak, khum chunga an mut tir chu ka thlek ngawih ngawih a, ngaihdam dil hmanloa min kalsan hi ka ring thei lo, min kalsan turin ka phal lo bawk.

Eng sual nge ka khawih tak mai hi le? Tihian, tualthattu nen eng nge kan danglamna awm chuang vak le, tunah hian!

Engvangin nge ngaihdam kha min lo dil ve rikngawt, hei vang hi em ni?

Rinhlu, eng nga tinge misual ber, ngaihdam theih loh tur pawi min khawihtir tak mai le!

" Bawiha, tirawh, haw tawh ang hmiang, zing aṭangin engmah i la ei lo a, i chau lutuk ang e, hei, khua a thim ṭan tawh bawk si", ka nu chuan min lainat tak hian a ti a, ka hnung a chul heuh heuh pah bawk.

Vawiinah Rinhlua kan thlahliam a, a thlan chungah chuan ka ṭhu ngawi reng, engmah ka ngaihtuah thei lo, keimah avangin ceiling fan aṭangin lakthlak a ngaih phah hial a, mahni intihlumte chan tur chu kan hre vek a ni lawm ni?

Ni lo, ni lo, mahni intihlum a ni lo, keimah hian a nunna ka chhahsak zawk alawm, ka va inchhir tak em!

Ni thum ngawt chu in ka chhuahsan lo, Amawii stock sa ka nei hlauh a, rui zawr hnap hian ka dût thin a, engmah hre loa awm ka duh ber a ni.

Ka nu mangang hian min han ṭahkhum leh chiam ṭhin a, mahse; ka thengthawngah a lut tawh lo, ka chawmawlh hi a ni ber, chaw mumal ei loa rui reng ta na na na chu manganthlak ve deuh tur a ni.

" I ṭha em? ", ka lo nuih ringawt, " Engvangin nge call i lak ngai loh? ", hethu hi a sawi ka ring reng a, " Tunah chauh i la a, ka lungawilo dawn dawn a, mahse, ka lungawi mai ang, Edd, i tha em? ", hetia min koh hi lawm ka lo nghah ṭhin, " Lalruatkimi, ft5 chunglam boruak hip pha ṭawk ṭawk, kim ve biai si, zirtirtu anih vang pawh niloa miss Kimi ni tawp hian a bialpa hi a ngaihtuah ve tak meuh tihna em ni? ", muang fan raih hian ka han ti a, ahma chuan vin hlar hian, " Zomuanpui", min lo ti nghal thin kha nia, mahse, tunah hi chuan a lo ti tawh miah lo, a ngawi vung vung mai!

Ka chau takzet, ka phone chu ka han en a, a la in off bawk si lo, " Ngati nge i ngawih daih a? ", thatchhe tak hian ka ti a, ka mit ka chhing a, ka meng peih thlawtlo.

" I la sualthiam danah hian, i ṭhaah ka ngai ang", inhnit hlawp hlawp chung hian a lo tichhuak hlawl a, ka lo nui hak ringawt, " Aw le, aw le, ka ṭha ni mai rawh se", ka lo ti vat a, ani pawh a la naupangchhia reng e.

" Ka ngai lutuk che", ka ti tak tak, ka ngai ve em asin, " Kei chuan ka ngailo che", a lo ti hlak a, ahnuah chuan nui chung hian, " Ka ti mai mai nih kha, nangpawh i ngaihawm lutuk ringawt ", a lo ti a, " I ngaihawm ka tih loh kha, ka ngai lutuk che ka tih kha", âw lawi zet hian ka ti a, a lo nui vak vak ringawt.

" School-ah sir David-an hrem tur a nei ngai si lo a, ani phei chuan a ngaihzia hlir che a sawi ṭhin", nui chung hian a ti reuh a, keiin, a ngaite bawkin a ṭawng ka lo ngaithla leh.

" Kim", ka thaw hawk a, " Zomuanpuia tak hi chu, zirtirtute khatiangin an ko ngai em ni? ", âwka vin ni chuang si lo hian a lo ti charh charh a, " Ka ngaina che, zirtirtu leh zirlai inkara inngainatna awm ang niloin, mipa leh hmeichhe Inkara inngainatna awm ang hian, ka ngaina lutuk che", muangchang hian ka ti a.