black sheep-1 cont

               Ba_Ba_Black_Sheep

       Dark Romance Loan Sharking

     Mafia King________Mafia Princess

   A love between long lost best friends              

          #Friends #Jealousy #Lovers

                         ~~Cck Lalchhuanawmi

Chapter-1 Cont... 

Zeph leh kei chu inkawp thei kan ni lo, a bula dinga ṭanpui turin thiam ka nei ve si lo. Mommy leh Daddy-te hian min kal chhuahtir phal tawh sela ka ti ngawt mai.

Octavia nen Pool-ah chêngin, New York chhuahsan tur kan rel. New York leh Sicily hi kan kartawn zak mai a ni. Colombia-a awm ka duh, New York hi ka hne.

Zeph nen lah, New York hmawr tawp ve veah awmin, kan inbe ngai bawk si lo.

Octavia'n, "Ash, i rilru dik tak min hrilh turin ka duh che. Damon hi min duhpui em?", a ti a. "Damon Switchblade hi maw?",

"Ni chiah e. Kan mikhual chhung khan kan inbe tlangnel hman viau, tun hma zawnga inbe ngai hlei lo kha. Mak i ti em? Keipawhin mak ka ti, kan mikhual chhung khan thil tam tak a thleng hman asin", a ti leh.

Zeph ngaihtuahna lamah hriat mumal ka nei hauh lo. "Ash, min duhpui vak nange?", ka dar a rawn tawk.

Pool aṭangin kan chhuak a, Bar-ah Martini dawmin kan ṭhu ren rawn. Ka ngawi reng si a, Octavia chuan ka duhpui lo a nih a ring tawh.

"Ash, min duhpui loh chuan Mommy ka hrilh lo mai ang",

"Ka duhpui che. Mommy pawh hrilh rawh, Daddy pawhin a duhpui che ka ring. Damon chu a fel alawm", ka ti a. Octavia a nui ta e. Naupang ber ka ni a, Mommy ai pawhin min duatin min ngaihsak.

Chumi avang chuan, a duhzâwng leh a lawm zâwng tih a tumna reng rengah thlawp ka tum tlat ṭhin.

Octavia chuan, "A ṭha e. Augustine bia ila, a bula min hruai theih nan kawng dap teh ang. New York-a awm reng hi ka hne", a ti lang lang. "Damon hnenah hruaibo tur chein hrilh la, Damon i nei tawh alawm", ka ti zeuh.

A nui har har, "Sweety, i va sawi dik em. A ṭha e, zaninah min hruaibo turin ka'n hrilh ang e. Min zui duh ang em?",

"Duh tehreng e, min hruai ngei a ngai. New York hne ber ka ni ang", ka ti sak. New York hmel hmuh hi ka ning.

Zanriah ei khamah Huanah ka tei harh, thlifim a thaw heuh heuh, ka dai sawng sawng mai bawk. Zeph lakah beiseina ka nei ṭhin a, amah lahin eng nga tan mah min ti bawk si lo.

Huana teiharh ka ning chuan, Daddy leh Mommy-te Golf khelhna pindanah ka kal. "Ash, khawiah nge Octavia?", Daddy-an min hmuh veleh a ti nghal. Damon nen an inbe ta a ni ang.

"Kan awmna a hre lo a ni ang, Anna hian han hrilh sela", ka ti a. Mommy-in, "A ṭha khawp ang. Golf khel ho ang u", a ti ve bawk.

Hnung lam hawiin Anna bulah, "Ann, ka unaunu han ko rawh", ka ti a. "Yes, Miss", chibai min bukin a kal chhuak nghal.

Kan Mansion-ah hian engkim a awm. Indoor Golf khelhna pindanah hian kan awm tam ber thung. Rei loah Octavia lo kalin, kan paliin Golf kan khel. Kan ri mam mam a, chu chu remchangah lain Damon nena an indate thu Octavia chuan a sawi ta. 

Rin loh lutukin Mommy chu a lawm berah a ṭang. Octavia pawh a thaw huaiin ka hria. Daddy aiin Mommy a tawh khirh tlat.

"Switchblade chhungkua nena ṭhian kan nihna bakah hian, inlaichinna dang leh nghet zâwk neih theih ka duh ṭhin a. Damon nen chuan indate mai ni lovin nupaah insiam ngei ula ka ti hle mai", Mommy chuan a ti a.

Octavia nena a thu min rawn a ni. "Nupaa insiamna kawngah erawh, in duhzâwng ngei fing takin thlang ang che u. Tin, tu nge indate tihah pawh kan inrawlh lo ang. Fing taka in thlan a ngai thung", Mommy bawkin a ti leh.

Hlim takin Golf kan khel ho leh.

Exercise laa Treadmill-a tlan laiin, "Miss, Mister Zephyr Switchblade hnen aṭangin urgent Email i dawng", Treadmill bulah Anna lo dingin a ti a.

"Chhiar rawh", ka ti a. Anna chuan a chhiar.

Zeph-a urgent message chu hetiang hi a ni.

*Dear Ashley,

Nak zanah Queens lama Party chhim ka ngai a, ka ṭhian anga min ṭawiawm turin ka duh che. Zaninah ka rawn hruai ang che. Naktukah Queens-ah bazarin, a tuk zanah Party-ah kan kal ang.

             From,

              Zephyr Renato Switchblade*

"Miss, engtin nge ka chhân dawn?", Treadmill off-in ka chhuk. Maid pakhatin Towel a ken banin ka inhru a, Maid pakhatin Tray-a Serthlum Tui thlit khah sa a chawi chu ka tlak pawp.

Shower herh hawin, ka han ding vang vang. Ṭhian ang chauha ṭawiawm tur ka ni a, thildang teh vak a awm lo.

Bathroom aṭanga chhuakin, "Ka hman dawn lo a ni tiiin chhâng rawh", Anna bulah ka ti a. Ka room-ah lutin, Closet ka pan ding. Ṭhian-ah hian ka lungawi thei thlawt lo.

Queens-ah Party a awm dawn a nih chuan, kha Barlowe chhungkaw fanu duat lai Roxanne(Rawkzen) nen an indinchilh leh chawt ang. Ka sawi sual lo bawk ang, midang nena hmuh dun aiin, mahnia awm ka thlang.

Unaupa Augustine hi upa ber a ni a, Huana titi ho pahin, Skype hmangin min rawn zawm ve. A hmangaih chhar a la thukru rih.

Zanlai ri hnaiin, thawm danglam tak kan hre ta. Adam-an, "Boss, Mister Switchblade a rawn kal", a ti ta mai. Ka thinlung hian Zeph a ni tih a ring nghal hmiah bawk.

Mommy-in, "Damon en ni?", Octavia melh zeuh chungin a ti a. Octavia lâi chu a nui deuh tet tet. Adam chuan, "Ni lo, Mister Zephyr", a ti a. Mak ti ber ka ni ang. "Lo kaltir rawh", Daddy chuan a ti a. Ka hawi â hru mai.

Zeph chu rawn lang tain, Daddy leh Mommy an ding, Octavia nen kan ding hnuhnawh. "Welcome, Zeph. Eng Thli chhiain nge maw lo chhêm lut ta che le?", ka pain a ti hlut.

"Thli ṭha a ni maithei asin", Zeph chuan a ti a. Ka bulah kher a ṭhu bawk.

Kan dawhkan min kilpui der chu a ni a. Eng duha rawn kal nge maw a nih le? Mommy chuan, "I nu leh pa an dam lai a ni em? Inthlah liam chauh ni mah ila, min rawn ṭhawng teh thut chu a ni", a ti ve bawk.

Zeph chuan, "Inthlah liam chauh mah ila, kan dam lai a ni e. Ka rawn ṭhawn(ṭhawng) chhan che u chu, Ashley hi a nia", a ti a. Octavia nen kan inmelh hû.

Daddy-an, "Ashley a? Chiang takin min hrilh thei em?", a ti a. A lungawi chiah loin ka hria. Zeph leh Daddy an inmelh ngur, Zeph ngawhngawl leh tumruhzia zaninah ka hre thar.

Zeph chuan, "Queens Party-na hmuna ka kawppui atan ka duh", hawi sâng vah hian a ti a. Ka hawisawn hmak. A kawppui atan maw ni a?

Mommy-in, "Ngaihtuah chiang la kan va duh em. Kawppui atan i duh tih i sawi a, zan khat atan chauha kawppui ni tura kan fanu i duh chhan hi ka hrethiam lo. Zan khat atana i kawppui ni duh zawng zâwk mai rawh", a ti chhuak.

Zan khat atan ka inphal bik lo. 

Ka hnenah ṭhian angin a ti a, tunah; kawppui atan. Zephyr nge nge a ni e. "Lawkin, sawi duh ka nei", ka ti a. Zeph chu ka lamah rawn thle bakin, "I sawmna ka hnar tawh, heta lo kal a ngai kher hleinem. Mommy sawi angin mi dang zawng rawh", ka ti sak.

Zan khat atana kawppui nih zawng, ka thinlung hian duh hle mah se; ka chhia leh ṭha hriatna hian a tlin hlawllo.

Zeph a beidawng dawn lo tih ka hria, hlawhchhamin a haw dawn lo bawk. A lu a thing hmak reng bawk a, Daddy lam hawiin a ding a, "Kan chhungkaw inṭhianna hming chhalin Ashley hi min hruaitir tur a ni, him pialin ka rawn thlah leh ang tih ka tiam che. Chu chu thu hnuhnung a ni e", a ti a.

A kalkiang a, min nghakin a Mercedes-ah a ṭhu vung dawn tih ka hria.

"Dad, ka kal duh lo. Min kaltir dawn lo ti raw?", Mommy nen ka en a, min kaltir an tum. Octavia ka melh a, min ṭan bawk a, "Kaltir lo ila a ṭha", a ti bawk.

Mommy chuan, "Eng thu mah sawi tawh suh u. Ash, kal rawh. Anni chhungkaw ṭhian nih hi uanpui tham a ni, tin; Switchblade chhungkaw hmelma nih hi dam chhunga mahni mawng hlim ang kan ni bawk. Chuvang chuan, va kal mai rawh", a ti sap.

Beidawng takin ka thaw hap a, Daddy pawhin, "A intiam anga him piala a rawn thlah lo che a nih chuan, kan inṭhianna a tâwp nghal ang", chang fek fawk hian a ti a. 

Kal ka hreh takzet. Him pialin min thlah haw leh dawn tih ka hria, zan khat atan chauha a kawppui nih ka hnial hek lo. Barlowe chhungkaw fanu duat lai nena an indinchilh leh run tur ka hmu ngam lo mai zâwk a ni.

Anna nen ka room-ah chhoin, hâk thlak pahnih thum ka inbuatsaih. Chumi chhungin Beatrix nen Skype hmangin kan inbia. A unaupa thiltih ka hrilh.

Beatrix chuan, "Ka sawi kha, Zeph hian a duh tlat chein ka hria. Tunah chuan a dinhmun hi a nghet tawh bawk a, a duh duh a ti thiang tawh alawm", a ti duah.

"I thusawi chu han sawi zau deuh teh", ka tih chuan, "Black Sheep King a nih tawh hi. Hmânah kha chuan Prince mai chauh a ni a, Boss pawh a ni pha lo. Tunah chuan King a ni tawh a, a duh duh a ti thei tawh tihna a nih chu. Zanin aṭang hian a duh leh duh loh che i fiah ngei a ngai, han fiah teh. Ash, ka unaupa hian duh ta chein, i duh ve ang em? ", zawhna min zâwt pah. 

Chhâng loin ka ngawi daih. Switchblade chhungkua hi Black Sheep ti-a hriat lâr an ni. A chhan pawh, hemi te chhungkua hi an hlauhawm. An hming aṭang reng pawh hian an hlauhawm. 

"Hruai a tumruh chhan che chu, a duh vângah che kei chuan ka ngai nghet hmiah. Insiam tawh rawh, kan inhmu dawn nia",

"I rawn kal ve dawn em ni?", ka ti a. "Dawn lo, maithei bawk. A chiang lo", Beatrix chuan a ti a. Kal tur tho tho ka nih avangin khawmuan a rem lo.

Gate bulah Mercedes nghengin min nghak reng tawh.

"Anna hruai ka duh",

"Never(A theih loh)", a ti bur. "Min vêng turin ka duh alawm", ka ti ngat. Zeph chu, "Jessica?", tiin a fiak ṭhat.

Ka hnungah Jessica chu a ding khawng at, "He hmuna ka thlah leh hma zâwng chea Vêngtu tur che a nih kha", a ti charh.

Luhlul chhuahin, "Anna ka duh", ka ti leh. Zeph chu rawn hnaiin, ka hmui tawkin a tuai. Awm sawn ka tum a, a mi khawihna chuan min zêm tlat. Ka hmui tikauin a kutzungpui a rawlh lut, dang tur ka ni asin le.

"Sweety, hun tihek lo zâwnga nun hram duh mi i nih kha. Sawi fel a ni tawh, Jessica hi Vêngtu tur che a ni, a dik em?", ka bu nghat.

A kutzungpui chu ka kâ chhungah a awm a, min thunun a ni!